Eski Zezi i Bondye Tou Pwisan?

Larepons ki nou souvan tande:

▪ “Wi, Zezi li menm li Bondye Tou Pwisan.”

▪ “Zezi i Bondye, li menm ki ti vin lo later dan lekor imen.”

Ki Zezi ti dir?

▪ “Si zot ti kontan mwan zot ti ava kontan ki mon pe retourn kot mon Papa, parski i pli gran ki mwan.” (Zan 14:28) Zezi ti dir ki li ek son Papa pa egal.

▪ “Mon pe al kot mon Papa ki osi zot Papa, mon Bondye, ki osi zot Bondye.” (Zan 20:17) Zezi pa ti dir ki li menm li Bondye me i ti refer avek Bondye konman en lot Personnaz.

▪ “Mon pa’n koz avek mon prop lotorite, me mon Papa ki’n anvoy mwan in donn mwan lord sa ki mon pou dir e ansennyen.” (Zan 12:49) Sa ki Zezi ti ansennyen pa ti sorti kot li me kot son Papa.

ZEZI ti dir ki i Garson Bondye me i pa ti dir ki i Bondye Tou Pwisan. Si Zezi ti Bondye, avek lekel ki i ti priye kan i ti lo later? (Matye 14:23; 26:26-29) Definitivman Zezi pa ti pe zis fer krwar ki i ti pe koz avek en lot dimoun!

Kan de disip Zezi ti demann li pour ganny en pozisyon spesyal dan son Rwayonm, i ti reponn zot: “Pa mwan ki deside lekel ki pou asiz lo mon kote drwat oubyen mon kote gos. Sa plas i pour bann ki mon Papa in prepare.” (Matye 20:23) Eski Zezi ti pe koz lalang kan i ti dir ki i napa lotorite pour satisfer zot demann? Pa ditou! O kontrer, i ti rekonnet ki zis Bondye ki annan lotorite pour fer sa desizyon. Zezi ti menm eksplike ki i annan serten keksoz ki ni li, ni bann lanz pa konnen me zis son Papa ki konnen.—Mark 13:32.

Eski Bondye ti pli gran ki Zezi zis ler i ti en zonm lo later? Non. Menm apre son lanmor ek rezireksyon, Labib i dir ki Zezi ti soumet avek Bondye. Zapot Pol i fer nou rapel ki “Sef Kris i Bondye.” (1 Korentyen 11:3, Parol vivante) Labib i dir ki dan lavenir “kan tou keksoz in ganny met anba dominasyon Kris, alor Garson li menm, pou met son lekor anba Bondye sa enn ki’n met tou keksoz anba li, e Bondye pou konpletman rennyen lo tou.”—1 Korentyen 15:28, Today’s English Version.

I kler ki Zezi pa Bondye Tou pwisan. Se pour sa ki ti apel son Papa “mon Bondye”.—Revelasyon 3:2, 12; 2 Korentyen 1:3, 4. *

[Not anba lo paz 7]

[Portre lo paz 7]

Zezi ti dir ki i annan serten keksoz ki ni li, ni bann lanz pa konnen me zis son Papa ki konnen