Ou ganny kordyalman envite

PETET ou’n deza pas o bor en batiman kot bann Temwen Zeova i zwenn dan ou kominote, ki apel Lasal Rwayonm e ou’n demann ou lekor: ‘Ki zot fer la anndan?’ Eski ou ti konnen ki nenport ki dimoun ki ti a kontan vin asiste zot renyon i kapab vini? Bann viziter i ganny kordyalman envite.

Me petet ou annan serten kestyon konsernan sa bann renyon, tel parey: Akoz bann Temwen Zeova i zwenn ansanm? Ki zot fer dan sa bann renyon? Ki bann viziter ki pa Temwen Zeova i dir konsernan sa bann renyon?

“Rasanble lepep”

Depi byen lontan dimoun ti abitye rasanble ansanm pour ador e aprann konn Bondye. Bann Izraelit ti ganny dir preski 3,500-z-an pase pour: ‘Rasanble lepep, bann zonm ek bann madanm ek bann zanfan ek zot rezidan etranze ki pe viv parmi zot, pour zot kapab ekoute e ki zot kapab aprann, akoz zot devret annan lakrent pour Zeova zot Bondye e fer atansyon pour aplik tou bann parol sa lalwa.’ (Deterononm 31:12) Alor an Izrael bann zenn ek aze ti ganny ansennyen pour ador e obeir Zeova.

Plizyer syek pli tar kan kongregasyon Kretyen ti’n formen, zot ti kontinyen rasanble ansanm akoz sa ti en laspe enportan dan vre ladorasyon. Zapot Pol ti ekrir: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad.” (Ebre 10:24, 25) Zis parey relasyon ant fanmir i vin pli solid ler bann manm fanmir i pas letan avek kanmarad, relasyon ant bann ki anvi servi Bondye i vin pli solid kan bann Kretyen i rasanble ansanm pour ador Bondye.

Annakor avek sa bann rezon dan Labib ki nou’n vwar, bann Temwen Zeova i rasanble ansanm kot zot Lasal Rwayonm de fwa par semenn. Sa bann renyon i ed bann ki asiste pour apresye, konpran e aplik bann prensip Labib. Kot i posib, progranm i parey partou dan lemonn e sak renyon i annan en lobzektif spesifik. Avan e apre renyon, bann ki asiste i ‘benefisye avek lankourazman’ kanmarad par fer bann konversasyon ki ankourazan. (Romen 1:12) Ki zot fer dan sa bann renyon?

Diskour lo Labib

Premye renyon ki laplipar dimoun i asiste i en diskour baze lo Labib ki ganny prepare pour piblik, e normalman i ganny fer pandan wikenn. Souvan Zezi Kri ti donn diskour piblik e enn parmi i Sermon lo Montanny ki bokou dimoun i konnen. (Matye 5:1; 7:28, 29) Zapot Pol ti koz avek bann dimoun ki ti reste dan lavil Atenn. (Akt 17:22-34) Par swiv sa legzanp, bann renyon Temwen Zeova i enkli en diskour ki’n ganny prepare espesyalman pour piblik an zeneral, e pour serten i kapab ki zot pe asiste renyon pour premye fwa.

Renyon i konmans avek en kantik dan liv Sing Praises to Jehovah. * Tou dimoun ki ti a kontan debout e sant sa kantik i kapab fer li. Apre kantik, en lapriyer bref i ganny fer e i ganny swiv par en diskour 30 minit ki en frer kalifye i donnen. (Vwar bwat: “Diskour pratik pour piblik.”) Son diskour i antyerman baze lo Labib. Sa orater i envit lodyans pour get bann verse Labib enportan ki relye avek sa diskour e pour swiv ansanm avek li anmezir ki sa bann verse i ganny lir. Alors, ou kapab vin avek ou prop Labib, oubyen ou kapab demann en Temwen Zeova pour donn ou en Labib avan renyon i konmanse.

 Letid Latour Veyer

Dan laplipar kongregasyon Temwen Zeova, apre diskour piblik i annan en letid Latour Veyer. Sa i en diskisyon par kestyon ek repons lo en size ki baze lo Labib pandan enn erdtan. Sa renyon i ankouraz bann dan lasistans pour swiv legzanp bann Bereen dan lepok zapot Pol. Bann Bereen “ti resevwar Parol Bondye avek bokou lentere [e] . . . etidye Lekritir” avek bokou latansyon.—Akt 17:11.

Letid Latour Veyer i konmans avek en kantik. Sa lenformasyon ki ganny diskite ek sa bann kestyon ki ganny demande par kondikter i dan sa magazin. Ou kapab ganny en kopi avek bann Temwen Zeova. Bann size ki nou’n egzaminen resaman i enkli: “Paran—elve ou zanfan avek lanmour,” “Pa rann mal pour mal” e “Akoz tou soufrans pou fini byento.” Menm si sa renyon i ganny kondwir dan en fason kot sa kondikter i demann kestyon e lodyans i reponn, normalman sa ki anvi i reponn. Bann ki fer komanter i normalman bann ki’n lir e reflesir lo sa lartik ek verse Labib ki siport nide dan sa lartik davans. Renyon i konklir avek en kantik ek lapriyer.—Matye 26:30; Efezyen 5:19.

Letid Labib Kongregasyon

Enn fwa tou le semenn lo tar apre midi, bann Temwen Zeova i zwenn ankor kot Lasal Rwayonm pour en progranm ki annan trwa parti. Sa progranm an tou i dir pour 1 erdtan 45 minit. Premye sesyon i Letid Labib Kongregasyon, ki dir pour 25 minit. Sa sesyon i ed bann ki asiste renyon pour vin pli familye avek zot Labib, aziste zot panse ek latitid, e pour progrese konman bann disip Kris. (2 Timote 3:16, 17) Parey Letid Latour Veyer, sa renyon i en diskisyon par kestyon ek repons baze lo en size  Labib. Bann ki reponn i fer li volonterman. Sa liv oubyen brosir ki nou servi pour etidye Labib i ganny pibliye par Temwen Zeova.

Akoz nou servi bann piblikasyon baze lo Labib dan Renyon? Dan letan Labib, zis lir Parol Bondye pa ti ase. “I ti ganny eksplike e met en sans ladan; e zot ti kontinyen fer konpran sa lektir.” (Neemya 8:8) Tou dernyenman, bann piblikasyon ki pe diskit lo liv Izai, Danyel ek Revelasyon in ed bann ki asiste sa renyon pour konpran sa bann liv dan Labib.

Lekol Minister Teokratik

Apre Letid Labib Kongregasyon i annan Lekol Minister Teokratik. Sa renyon ki dir pour 30 minit in ganny prepare avek bi pour ed bann Kretyen pour devlop zot “lar pour ansennyen.” (2 Timote 4:2, NW) Par egzanp, eski ou zanfan oubyen en zanmi in deza demann ou en kestyon lo Bondye ouswa lo Labib e ou ti trouv li difisil pour rann li en bon larepons? Lekol Minister Teokratik i kapab ansenny ou konman pour donn bann larepons baze lo Labib ki ankourazan ler ou pe reponn bann kestyon difisil. Koumsa nou pou kapab santi sa ki profet Izai ti eksperyanse ler i ti dir: “Souvren Senyer Zeova li menm in ansenny mwan konman pour reponn bann ki fatige avek en parol.”—Izai 50:4.

Lekol Minister Teokratik i konmans avek en diskour baze lo en porsyon Labib ki bann ki pe asiste in ganny ankouraze pour lir pandan lasemenn. Apre sa diskour, sa orater i envit lodyans pour fer komanter lo bann pwen ki zot in trouv enteresan an rapor avek sa ki zot in lir. Apre sa diskisyon, bann etidyan ki’n swazir pour antre dan lekol i prezant zot size.

Bann etidyan i ganny serten pasaz Labib pour lir lo platform oubyen zot ganny demande pour fer en demonstrasyon pour montre konman pour ansenny en lot dimoun en size baze lo Labib. Apre sak size en dimoun eksperyanse ki donn konsey i felisit sa etidyan depandan lo sa ki i’n fer byen. Son bann komanter i baze lo liv Benefisye atraver  Ledikasyon Lekol Minister Teokratik. Pli tar an prive, i kapab donn serten konsey lo konman i pou kapab amelyore.

Sa parti dan sa progranm ki pas byen vit, in ganny prepare avek bi pour ed sa etidyan osi byen ki tou dimoun ki dan lasistans ki ti a kontan amelyor zot fason lir, koze ek abilite pour ansennyen. Apre ki Lekol Minister Teokratik i fini, nou sant en kantik baze lo en verse Labib pour entrodwir Renyon Servis.

Renyon Servis

Dernyen seksyon sa progranm i Renyon Servis. Atraver bann diskour, demonstrasyon, entervyou, ek partisipasyon lodyans, bann dan lasistans i aprann ansenny laverite dan Labib dan en fason efikas. Avan anvoy son bann disip pour al prese, Zezi ti rasanble zot e donn zot bann lenstriksyon detaye. (Lik 10:1-16) Apre ki zot ti’n ganny byen prepare pour sa travay evanzelizater, zot ti ganny en kantite leksperyans enteresan. Pli tar, bann disip Zezi ti rakont li sa ki ti’n arive. (Lik 10:17) Souvan bann disip ti rakont bann leksperyans avek kanmarad.—Akt 4:23; 15:4.

Progranm Reyon Servis ki dir pour 35 minit i ganny enkli dan en zournal ki sorti tou le mwan, ki apel Nou Minister Rwayonm. Topik ki’n ganny egzaminen resaman i enkli: “Ador Zeova an fanmir,” “Akoz nou retournen plizyer fwa,” e “Imit Kris dan ou travay predikasyon.” Renyon i konklir avek en kantik, e en manm Kongregasyon ki’n ganny swazir i fer lapriyer final.

Ki viziter in dir

Bann kongregasyon i fer en kantite zefor pour fer tou dimoun santi zot alez. Par egzanp, Andrew ti’n tann en kantite move keksoz lo Temwen Zeova. Me premye fwa ki i ti asiste renyon i ti etonnen par kalite lakey ki i ti gannyen. Andrew ti dir: “I ti en landrwa agreab. Mon ti sirprann pour vwar ki kantite amikal dimoun ti ete anver mwan e ki kantite zot ti enterese avek mwan.” Ashel en adolesan ki reste Kanada ti koz an byen lo sa bann renyon. I ti dir: “Renyon ti vreman enteresan! I ti fasil pour swiv.”

José ki reste Brezil ti annan en repitasyon konman en dimoun agresif dan son kominote. Me kantmenm sa, i ti ganny envite pour asiste renyon kot Lasal Rwayonm dan son rezyon. José i dir: “Bann dimoun kot Lasal Rwayonm ti akey mwan, menm si zot ti konn mon fason viv dan lepase.” Atsushi, ki reste Zapon i rapel: “Mon admet ki premye fwa ki mon ti asiste renyon avek Temwen Zeova mon ti santi mwan en pe drol. Me kantmenm sa, mon ti konmans vwar zot konman bann dimoun normal. Zot ti vreman sey fer mwan santi mwan alez.”

Nou swet ou labyenveni

Parey sa bann komanter i montre, asiste bann renyon kot Lasal Rwayonm i kapab en leksperyans ki anmenn bokou byenfe. Ou pou aprann konn Bondye e atraver lenstriksyon baze lo Labib ki ou pou gannyen, Zeova pou ansenny ou “pour ou prop byenfe.”—Izai 48:17.

Bann renyon Temwen Zeova i gratwit e napa okenn laket. Eski ou ti pou kontan asiste en renyon kot Lasal Rwayonm ki pros avek ou? Ou ganny kordyalman envite.

[Not anba lo paz 29]

[Bwat lo paz 30]

Diskour pratik pour piblik

I annan plis ki 170 diferan tenm pour bann diskour piblik ki baze lo Labib e la serten sa bann tenm:

▪ Lorizin imen—Eski sa ki ou krwar i enportan?

▪ Pwennvi Bondye lo seks ek maryaz

▪ Bann ki detrir later pou ganny pini par Bondye

▪ Konman pour fer fas avek traka lavi?

▪ Lekel ki pou ganny sove?

[Portre lo paz 30]

Diskour lo Labib

[Portre lo paz 30]

Letid “Latour Veyer”

[Portre lo paz 31]

Letid Labib Kongregasyon

[Portre lo paz 31]

Lekol Minister Teokratik

[Portre lo paz 32]

Renyon Servis