Ki si sa lafwa?

KI MANNYER ou ti pou eksplike ki si sa lafwa? Pour serten lafwa i kan en dimoun i krwar dan en keksoz akoz i’n ganny ansennyen menm si i napa okenn levidans ki i vre. Enn fwa, en Ameriken byen renonmen, H. Mencken, ki en ekriven e zournalis ti dir ki lafwa i “en krwayans dan en keksoz ki pa lozik e tre probab pa pou arive.”

Tou le kontrer, Labib pa dekrir lafwa konman en keksoz ki pa fonde oubyen ki pa lozik. Parol Bondye i dir: “Lafwa i lasirans dan keksoz ki ou pe espere, e sertitid [oubyen “levidans konkret,” NW] keksoz ki ou pa’n war.”—Ebre 11:1.

Vi ki i annan diferan pwennvi lo lafwa, annou egzamin larepons sa bann kestyon:

• Ki mannyer definisyon ki Labib i donnen i diferan avek sa ki bokou dimoun i dir kan zot koz lo lafwa?

• Akoz i enportan ki nou devlop sa kalite lafwa ki Labib i dekrir?

• Ki mannyer ou kapab devlop en lafwa for?

En dokiman an ekrir ek levidans konkret

Dan letan ki liv Ebre dan Labib ti ganny ekrir, sa term Grek ki ganny tradwir konman “lasirans” ti souvan ganny servi. I ti souvan ganny servi dan bann tranzaksyon biznes e sa ti donn sa lide ki en dimoun i garanti pour ganny en keksoz dan lavenir. Alor, en referans i sizere ki Ebre 11:1 i kapab ganny tradwir koumsa: “Lafwa i en dokiman an ekrir an rapor avek en keksoz ki nou pe espere.”

Si ou’n deza aste en keksoz avek en lakonpannyen ki byen repite e apre ou’n espere pour ki zot vin delivre sa keksoz kot ou, an realite ou’n demontre sa kalite lafwa. Sa resi ki ou’n gannyen apre ki ou’n aste sa keksoz ti donn ou rezon pour annan lafwa dan sa lakonpannyen kot ou’n aste sa keksoz. Dan en sans, sa resi ti sa dokiman an ekrir, sa garanti ki ou pou ganny sa ki ou’n aste. Si ou ti’n perdi oubyen zet sa resi, ou ti pou’n perdi sa laprev pour ou kapab dir ki sa keksoz i pour ou. Pareyman, bann ki annan lafwa ki Bondye pou akonplir son bann promes, zot garanti ki zot pou ganny sa ki zot pe espere. De lot kote, bann ki napa oubyen ki’n perdi lafwa, zot napa sa drwa pour ganny sa bann keksoz ki Bondye in promet.—Zak 1:5-8.

Sa dezyenm lekspresyon dan Ebre 11:1, ki ganny tradwir konman “sertitid” oubyen en levidans konkret i donn sa lide ki sa levidans ki ganny prodwir i kontredir sa ki paret vre. Par egzanp, soley i donn sa lenpresyon ki i tourn toultour later, akoz i lev dan les, pas atraver lesyel e kous dan was. Parkont, bann astrononm ek matematisyen i donn levidans ki revele ki later pa dan milye sistenm soler. Enn fwa ki ou konn byen sa levidans e aksepte ki i vre, ou annan lafwa ki later i tourn toultour soley, malgre i pa sa ki ou vwar avek lizye. Dan sa ka ou lafwa i pa enn ki napa fondman. O kontrer, i fer ou kapab vwar keksoz mannyer zot vreman ete me pa sa ki zot paret.

Eski en lafwa for i enportan?

Se sanmenm sa kalite lafwa ki Labib i ankouraz nou pour annan. En lafwa for ki fonde lo levidans solid menm si nou bezwen aziste nou krwayans. Sa kalite lafwa i vreman enportan. Zapot Pol ti ekrir: “San lafwa personn pa kapab fer plezir Bondye. Sa ki vin kot Bondye i ­bezwen krwar ki i egziste e ki i rekonpans bann ki vreman anvi trouv li.”—Ebre 11:6, New Century Version.

Pour devlop en lafwa for i annan plizyer defi. Me si ou swiv sa kat letap ki ganny diskite dan bann lartik swivan, ou kapab reisi.