Resers pour gidans pratik

SI OU pe rod konsey, i annan en kantite ki disponib. Biznes lavant bann liv ki ofer konsey pratik i enn parmi bann lantrepriz ki pe devlope byen vit. Dan diferan pei, parey Langleter, Lanmerik Latin, Zapon ek Leta-z-ini, bann liv ki ofer konsey pratik i bann liv ki fer plis lavant. Bann video, seminar ek progranm televizyon ki ganny fer pour ofer konsey pratik pe osi vin popiler. Zot lapros i annan pour fer avek sa lide ki ou kapab rezourd ou problenm ou menm san bezwen konsilte en psikolog, en konseye lo maryaz oubyen en minis relizye. Ki topik ki sa bann liv i aborde?

Parmi bann size pli popiler ki sa bann liv i aborde i ki mannyer pour ganny satisfaksyon personnel, trouv vre lanmour, e konman pour elve zanfan. Lezot size ki renonmen i konman pour fer fas avek depresyon, latristes ek bann konsekans ki divors i anmennen. I osi annan en gran demann pour bann konsey lo konman pour konbat labitid manz tro bokou, fimen e bwar tro bokou. Eski sa bann konsey i pratik? Parfwa wi, me souvan zot pa pratik. Alor, i saz pour nou pran aker sa lavertisman ki Labib i donnen: “Sa ki napa leksperyans i met lafwa dan tou parol, me sa enn ki malen i egzamin son lepa.”—Proverb 14:15.

Bann liv ki ofer konsey pratik i vreman diferan avek bann liv lenstriksyon ki ed bann dimoun devlop bann skil dan  diferan domenn, par egzanp fotografik, kontabilite oubyen langaz. I kapab ki sa bann liv lenstriksyon i efikas, i en fason pour aprann bann skil e i pa kout ser konpare avek si ou ti pou pran en kour spesyal. Bann liv ki ofer konsey pratik ki swa lo biznes, maryaz, elve zanfan oubyen lasante mantal i diferan avek sa bann liv lenstriksyon. Zot normalman ankouraz dimoun pour annan en kalite fason viv oubyen promot en serten fason panse. Alor i saz pour demann ou lekor: ‘Lekel ki pe ofer sa konsey? Kote i ganny sa lenformasyon?’

I kapab ki bann eksper pa touzour baz zot lopinyon lo bann levidans ki zot in pran letan pour kolekte. Serten i kapab donn konsey ki pou ganny plis lavant, vi ki zot konnen ki zot pou fer en kantite larzan si zot dir dimoun sa ki zot oule tande. Annefe, dan zis en pei tousel, lendistri bann liv ki ofer konsey pratik i fer plis ki wit bilyon dolar sak lannen!

Eski sa bann liv i pratik?

Ler ou rod led dan sa bann liv, ou ekspekte trouv bann konsey pratik. Me, parfwa konsey ki sa bann liv i donnen i siperfisyel oubyen i pa realistik. Normalman, sa bann liv i dir ou: ‘Si ou pans pozitif, ou pou reisi. Nenport kwa ki ou anvi, ki swa larzan, lasante oubyen annan bon relasyon avek lezot, ou pou reisi ganny tousala si ou pans pozitif.’ Eski sa kalite konsey i pratik? Eski i pou ed ou fer fas avek larealite ek dezapwentman dan lavi?

Pran par egzanp, bann liv lo relasyon avek lezot e lo maryaz ki parmi bann liv pli popiler. Eski zot ed dimoun batir en fanmir ere e stab? Pa touzour. Dapre en madanm ki ti pe donn son lopinyon, ekriven en liv ki ofer konsey pratik lo lanmour ki ti fer sikse en sel kou dan Lanmerik Latin, “i montre son bann lekter konman pour devlop bann bon relasyon avek lezot e annan konfidans dan ou lekor.” Sa ekriven i dir ki antretenir en relasyon ki pa pe marse i konmsi ou pe trai ou prop lekor. Mesaz par deryer sa, se lenportans i pour en dimoun fer sa ki pou fer li santi li byen olye idantifye son bann problenm e esey rezourd zot.

I vre ki bann liv ki ofer konsey pratik i kapab donn detrwa bon konsey. Me zot osi kapab donn serten konsey ki danzere. En eksper i kapab donn bann sizesyon pratik lo en size, me an menm tan konsey ki i donnen lo en diferan size i kapab aktyelman fer keksoz vin pli grav. I ti pou enposib pour ou swazir parmi sa kantite lopinyon ki sa bann liv i ofer, ki lamazorite fwa i kontradiktwar. Konsey lekel ki ou kapab met ou konfyans ladan? Demann ou lekor: ‘Eski sa bann konsey in byen ganny etidye, oubyen i zis lopinyon personnel sa ekriven? Ki kantite ki lanvi pour vin ris oubyen pour ganny popilarite in enfliyans sa ekriven?’

En liv ki’n ganny prouve pandan en kantite letan konman enn ki’n anmenn byenfe, i Labib. I ofer konsey pratik lo plizyer size ki bann liv ki ofer konsey i aborde e lezot ankor. I’n pous plizyer milyon dimoun pour pran aker sa konsey: “Fodre ki zot leker ek zot lespri i konpletman sanze; . . .vin en dimoun konpletman nouvo.” (Efezyen 4:23, 24) Labib i donn lasazes ki fer nou konpran lakoz nou bann problenm e i ansenny nou lo ki mannyer nou pour kapab fer fas avek zot. Pli enportan ankor, i donn nou sa determinasyon ki motiv nou pour fer sa ki byen. Sa lot lartik pou eksplike ki mannyer pour fer sa.