Larises ki sorti kot Bondye

SI OU fidel avek Bondye, eski i pou beni ou par donn ou larises? Petet, me probableman pa avek sa kalite larises ki ou pe ekspekte. Pran legzanp Mari, manman Zezi. Lanz Gabriyel ti aparet avek Mari e dir li ki i ti’n ganny “faver Bondye” e ki i ti pou donn nesans Garson Bondye. (Lik 1:28, 30-32) Me, Mari pa ti ris. Ler i ti ofer en sakrifis apre nesans Zezi, i ti prezant “en per tourtrel, oubyen de zenn pizon,” ki ti en lofrann ki zis bann dimoun pov ki ti annan drwa ofer.—Lik 2:24; Levitik 12:8.

Eski lefet ki Mari ti pov, sa i vedir ki i pa ti ganny benediksyon Bondye? Sa pa ti leka, parski ler i ti al vizit Elizabet, enn son fanmir, “Elizabet ti ranpli avek Lespri Sen, e ti kriye avek en lavwa for: ‘Bondye in beni ou [Mari] parmi tou bann madanm, e ki sa zanfan ki ou pou gannyen i osi ganny beni.’” (Lik 1:41, 42) Mari ti ganny sa privilez pour vin manman Garson byenneme Bondye.

Zezi li menm pa ti en zonm ris. I pa ti zis en dimoun ki ti grandi dan en fanmir ek en landrwa pov me i ti pov tou dilon son lavi lo later. En fwa i ti dir en zonm ki ti anvi vin en disip: “Renar i annan zot trou, zwazo lesyel i annan zot nik, me Fis-de-Lonm napa en landrwa kot i kapab repoz son latet.” (Lik 9:57, 58) Par kont, par vin lo later, Zezi Kri ti fer li posib pour ki son bann disip i posed gran larises. Zapot Pol ti ekrir: “Pour zot in fer li pov, pour ki par son povrete zot vin ris.” (2 Korentyen 8:9) Ki kalite larises Zezi ti donn son bann disip? Ki larises nou annan ozordi?

Ki kalite larises?

Larises materyel i souvandfwa en lobstak pour lafwa, vi ki en dimoun ris i tant pour met plis konfyans dan son larzan ki dan Bondye. Zezi ti dir: “Konman i vreman difisil pour en dimoun ris antre dan Rwayonm Bondye!” (Mark 10:23) I evidan alor ki larises ki Zezi ti ofer son bann disip ti napa nanryen pour fer avek larzan.

Anfet, lamazorite Kretyen dan premye syek ti pov. Kan en zonm, ki ti envalid depi nesans, ti demann Pyer larzan, Pyer ti reponn: “Mon napa ni larzan ni lor, me sa ki mon annan, mon a donn ou: o non Zezi-Kri sa Nazareen, mon ordonn ou, marse.”—Akt 3:6.

Parol disip Zak osi i montre ki bann dimoun ki ti dan kongregasyon Kretyen ti pov. I ti ekrir: “Ekoute, mon bann frer byenneme: Bondye pa in swazir bann dimoun pov dan lemonn pour vin ris dan lafwa e zeritye rwayonm ki i’n promet bann ki kontan li?” (Zak 2:5) An plis ki sa, zapot Pol ti osi dir ki pa bokou “bann saz” oubyen “bann ki annan pouvwar” ouswa “ki sorti dan fanmir nob” ki’n ganny apele pour form parti kongregasyon Kretyen.—1 Korentyen 1:26.

 Si larises ki Zezi ti donn son bann disip pa ti bann keksoz materyel, ki kalite larises i ti donn zot? Dan en let ki Zezi ti fer Zan ekrir e anvoy kongregasyon Smirn, Zezi ti dir: “Mon konn ou bann soufrans, ek ou povrete, me pourtan ou ris.” (Revelasyon 2:8, 9) Kantmenm bann Kretyen Smirn ti pov, zot ti posed en larises ki ti annan plis valer ki larzan ek lor. Zot ti ris akoz zot ti annan lentegrite ek lafwa dan Bondye. Lafwa i presye akoz “pa tou dimoun ki annan lafwa.” (2 Tesalonisyen 3:2) An realite, bann ki napa lafwa, zot pov devan Bondye.—Revelasyon 3:17, 18.

Larises nou gannyen akoz lafwa

Me dan ki sans lafwa i annan valer? Bann ki annan lafwa dan Bondye i benefisye avek “sa gran labonte, pasyans ek zenerozite Bondye.” (Romen 2:4) Zot osi benefisye avek “pardon pour [zot] pese” akoz zot lafwa dan sakrifis Zezi. (Efezyen 1:7) An plis ki sa, zot posed sa kalite lasazes ki “parol Kris” i donn tou bann ki annan lafwa. (Kolosyen 3:16) Ler zot priy Bondye avek lafwa, “lape Bondye ki depas tou konpreansyon” i protez zot leker ek lespri, e sa i fer zot ganny lazwa ek lakontantman.—Filipyen 4:7.

An plis ki tou sa bann benediksyon, bann ki met lafwa dan Bondye atraver son Garson, Zezi Kri, zot annan sa lesperans merveye pour viv pour touzour. Nou familye avek sa parol Zezi: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16, nou ki’n  met an italik.) Sa lesperans presye i vin pli for ler en dimoun i ganny en konnesans egzakt lo Papa ek Garson, akoz Zezi ti osi dir: “Lavi eternel . . . savedir ki zot konn ou konman sel vre Bondye ek Zezi Kri ki ou’n anvoye.”—Zan 17:2, 3.

Menm si bann benediksyon Bondye i prensipalman relye avek bann keksoz spirityel, i osi annan pour fer avek bann byenfe fizik e emosyonnel. Pran par egzanp, Dalídio ki reste Brezil. Avan ki i ti ganny en konnesans egzakt lo plan Bondye, i ti pe abiz lalkol. Sa ti severman afekte son relasyon avek son fanmir. I ti osi annan problenm finans. Apre sa i ti konmans etidye Labib avek Temwen Zeova e i ti fer en sanzman remarkab.

Sa ki Dalídio ti aprann dan Labib ti ed li abandonn son bann move labitid. I ti fer sitan progre spirityel ki i ti kapab dir: “Mon ti abitye sorti dan en bar pour al dan en lot, me aprezan mon sorti kot en lakaz pour al kot en lot.” I ti’n vin en predikater Parol Bondye a plen tan. Sa sanzman pa ti zis amelyor son lasante me osi son sityasyon finansyel. Dalídio ti dir: “Sa larzan ki mon ti abitye depanse lo lalkol, mon aprezan servi pour ed lezot ki dan bezwen ouswa pour aste sa ki mon bezwen.” I’n osi fer bann vre zanmi par son lasosyasyon avek bann dimoun ki, parey li, zot partaz menm pwennvi spirityel. Aprezan Dalídio i annan lape lespri ek lakontantman, plis ki sa ki i ti’n kapab mazin lo la avan konn Bondye.

Renato i en lot legzanp en dimoun ki’n benefisye par devlop lafwa dan Zeova. Ler ou get sa sourir ek sa lazwa lo son figir ozordi, i difisil pour krwar ki i ti annan tou drwa pour santi ki i ti en dimoun ki’n mal ganny trete. Kan i ti’n fek ne son manman ti abandonn li. I ti ganny kite dan en sak anba en ban. I ti annan en bann mark lo son lekor e son lakord lonbri ti ankor atase avek li. De madanm ki ti pe pase ti vwar sa sak ki ti anba sa ban bouze. Premye kou zot ti krwar ki i ti en pti sat ki en dimoun ti’n kit la. Me kan zot ti vwar ki i ti en pti baba ki ti la, deswit zot ti anmenn li kot en lopital pli pros pour ganny swen neseser.

Enn ant sa de madanm ti en Temwen Zeova e i ti rakont sa ki ti’n pase avek en lot Temwen ki ti apel Rita. Rita, ki plizyer fwa ti’n deza donn nesans bann zanfan ki’n mor avan zot ne ti annan zis en pti fiy. Me vi ki i ti vreman anvi en pti garson, i ti adopte Renato.

Kan Renato ti ankor byen zenn, Rita ti fer li konnen ki i pa ti son vre manman. Me avek lanmour i ti pran swen avek Renato, donn li lafeksyon e travay dir pour fer li konn bann prensip Labib. Anmezir ki Renato ti grandi i ti devlop lentere dan Labib. Son lapresyasyon pour sa fason enkrwayab ki son lavi ti’n ganny sove ti osi ogmante. Son lizye i ranpli avek larm sak fwa ki i lir parol psalmis David: “Si mon prop  papa e mon prop manman i kit mwan, Zeova i a pran mwan.”—Psonm 27:10.

Pour demontre son lapresyasyon pour tou sa ki Zeova ti’n fer pour li Renato ti batize an 2002 e vin en serviter a plen tan son lannen apre. I ankor pa konn lidantite son papa ek manman biolozik e probableman i pa pou zanmen konnen. Toudmenm, Renato i santi ki sa kado pli presye ki i’n gannyen se ki i’n konn e met son lafwa dan Zeova konman en Papa ki kontan li e pran swen avek li.

Petet ou osi ou ti a kontan annan en relasyon pros e ranpli avek lanmour avek Bondye, ki kapab vreman anrisi ou lavi. Sa loportinite pour annan en tel relasyon avek Zeova ek son Garson, Zezi Kri, i pour tou dimoun, pour bann ki ris e pour bann ki pov. Petet sa relasyon pa pou donn ou larises materyel, me i pou donn ou en lape lespri ek lakontantman ki ou pa pou kapab aste menm si ou ti ava annan tou larzan ki sa lemonn i posede. Sa parol dan Proverb 10:22 i touzour vre: “Benediksyon Zeova, se sa ki fer ris, e i pa azout okenn douler avek.”

Zeova i vreman enterese avek tou dimoun ki apros li: “Si selman ou byen atantif anver mon bann komannman! Alor ou lape pou vin zis parey en larivyer e ou ladrwatir parey bann laroul dan lanmer.” (Izai 48:18) Zeova i promet tou bann ki vin ver li avek bon motivasyon ek en bon latitid, en rekonpans ki annan en gran valer akoz “limilite ek lakrent pour Zeova i anmenn larises ek laglwar ek lavi.”—Proverb 22:4.

[Ekstre lo paz 6]

Lafwa dan Bondye i donn lape, lakontantman ek boner

[Portre lo paz 5]

Menm si zot ti pov materyelman, fanmir Zezi lo later ti ganny bokou benediksyon avek Bondye