Lespri sen—En lafors ki ou bezwen dan ou lavi

“PA TIR mwan devan ou figir; silvouple pa retir ou lespri sen lo mwan.” (Psonm 51:11) Sa ti lapriyer ki Lerwa David ti senserman fer apre ki i ti’n fer en fot grav.

Plizyer fwa David ti’n eksperyans pwisans lespri sen dan son lavi. Kan i ti ankor en adolesan, lespri sen ti’n ed li defet Golyat, en solda ki ti fer per. (1 Samyel 17:45-50) Lespri sen ti’n osi enspir li pour ekrir serten parmi bann pli zoli psonm ki’n deza ganny konpoze. David ti eksplike: “Lespri Zeova ki’n koz atraver mwan e son parol ti lo mon lalang.”—2 Samyel 23:2.

Zezi Kri li menm ti konfirm rol ki lespri sen ti annan dan lavi David. En zour, Zezi ti dir avek bann ki ti pe ekout li: “David li menm, enspire par Sent-Espri, ti dir, ‘Senyer ti dir avek mon Senyer: “Asiz lo mon kote drwat, ziska ki mon a met ou lennmi anba ou lipye.”’” (Mark 12:36; Psonm 110:1) Zezi ti konnen ki ler David ti ekrir son bann Psonm, lespri sen ti gid li. Eski sa menm lespri sen i disponib pour ed nou?

Kontinyen “demande zot a gannyen”

Petet ou pa pou zanmen ekrir en psonm. Me i kapab ki ou pou rankontre bann gro problenm ki fer ou per parey Golyat. Par egzanp, konsider legzanp Isabel. * Son msye ti kit li pour en madanm ki pli zenn. I ti kit li avek en gro det pour peye e i pa ti donn li okenn sipor finansyel pour okip son de pti fiy. I ti dir: “Mon ti santi ki mon ti’n ganny  trai e ganny trete parey en nanryen ditou. Me kantmenm sa, depi ki in kit mwan, mon’n santi ki lespri sen Bondye in soutenir mwan.”

Eski Isabel ti ekspekte ganny led lespri sen san fer okenn zefor? Non, i ti sipliy Bondye tou le zour pour donn li son lespri sen. I ti konnen ki i ti bezwen lafors Bondye pour ed li ganny kouraz pour fer fas avek lavenir, pour pran swen avek son bann zanfan e pour reganny son dinyite. I ti pran aker parol Zezi: “Demande zot a gannyen, rode zot a trouve, frape e laport i a ouver.”—Matye 7:7.

Roberto osi ti santi ki i ti bezwen lespri Bondye, me pour diferan rezon. I ti adikt avek taba ek drog e i ti fim zot tou lazournen. I ti lalit pour aret fim sa bann sibstans pour de-z-an e plizyer fwa i ti rekonmans fimen. Roberto i eksplike: “Ler ou aret servi drog ou plonz dan gran lenkyetid. Zour apre zour, ou lekor i kontinyen azite pour demann drog.”

Roberto i azoute: “Me mon ti determinen pour sanz mon lavi pour mwan kapab servi Bondye parey i ekspekte. Mon ti esey ranpli mon lespri avek bann panse pozitif sorti dan Labib. Mon ti senserman priye tou le zour pour demann Bondye pour donn mwan lafors pour sanz mon fason viv. Mon ti konnen mon pa pou kapab reisi lo mwan menm. Mon ti osi vwar lafason Zeova ti reponn mon lapriyer, espesyalman kan mon ti santi mwan dezespere apre ki mon ti retonm dan sa labitid. Mon vreman krwar ki lespri sen Bondye ti redonn mwan lafors, san son lespri sen mon pa ti pou zanmen kapab sirmont sa move labitid.”—Filipyen 4:6-8.

Zot pou leve “avek lezel, parey bann leg”

Zis parey Isabel ek Roberto, plizyer milyon Temwen Zeova in eksperyans pwisans lespri sen dan zot lavi. Lafors aktif Zeova, sa lafors ki i ti servi pour kree liniver i kapab vin disponib pour ou si ou anvi. Bondye i pare e i anvi partaz son lespri sen avek ou si ou senserman demann li. Me pour ganny son lespri sen, ou bezwen aprann laverite lo li e senserman fer zefor pour fer son lavolonte.—Izai 55:6; Ebre 11:6.

Avek led lespri sen ou kapab ganny lafors pour reisi servi Bondye e fer fas avek nenport defi ki ou rankontre dan ou lavi. La sa ki Labib i asir nou: “[Zeova] pe donn lafors sa enn ki fatige e sa ki napa lenerzi, i donn bokou bokou kouraz . . . . Bann ki annan lespwar dan Zeova pou reganny lafors. Zot pou leve avek lezel, parey bann leg. Zot pou taye e zot pa pou fatige; zot pou marse e zot pa pou epwize.”—Izai 40:28-31.

[Not anba lo paz 6]

[Bwat lo paz 8]

‘Mon ti priy senserman tou le zour pour demann Bondye pour donn mwan lafors. Mon ti konnen ki mon pa pou kapab reisi lo mwan menm. Mon ti osi vwar ki mannyer i ti reponn mon lapriyer’

 [Box/​Pictures on page 7]

LESPRI SEN AN AKSYON

Bondye ti servi lespri sen pour kree later ek liniver. Sa psalmis ti dir: “Pa ou bann travay i bokou, O Zeova! Ou’n fer zot tou avek lasazes. Later i ranpli avek tou sa ki ou’n fer. Si ou anvoy ou lespri, zot ganny kree.”—Psonm 104:24, 30; Zenez 1:2; Zob 33:4.

Lespri sen ti enspir bann serviter Bondye pour ekrir Labib. Zapot Pol ti ekrir: “Tou Lekritir i enspire par Bondye e i itil.” (2 Timote 3:16) Sa mo Grek ki ganny tradwir “enspire par Bondye” i literalman vedir “soufle par Bondye.” Souf Zeova oubyen son lespri in gid panse bann ekriven Labib pour transmet “parol Bondye.”—1 Tesalonisyen 2:13.

Lespri sen ti ed bann serviter Bondye pour predir lavenir avek presizyon. Zapot Pyer ti eksplike: “Zot devre byen konpran ki personn pa kapab donn son prop lenterpretasyon lo okenn profesi dan Lekritir. Parski okenn mesaz profesi pa’n ganny prezante par lavolonte imen, me se Sent-Espri ki’n pous zonm pour anons mesaz Bondye.”—2 Pyer 1:20, 21; Yoel 2:28.

Lespri sen ti ed Zezi ek lezot zonm ki ti annan lafwa pour pres bon nouvel lo Rwayonm Bondye e pour fer bann mirak. Zezi ti dir: “Lespri Senyer i lo mwan, akoz in konsakre mwan pour anons Bonn Nouvel pour bann pov. I’n anvoy mwan pour proklanm delivrans pour bann prizonnyen, e fer bann aveg war kler.”—Lik 4:18; Matye 12:28.

 [Bwat lo paz 9]

FASON LESPRI SEN I KAPAB ED NOU

Lespri sen i kapab donn ou lafors pour sirmont bann tantasyon ek move labitid. Zapot Pol ti dir: “Me Bondye i fidel dan son promes, e i pa pou permet ki nou ganny tante plis ki nou kapab siporte, me avek tantasyon i osi donn mwayen pour sorti pour ki ou kapab siporte.”—1 Korentyen 10:13.

Lespri sen i kapab ed ou devlop bann kalite ki fer plezir Bondye. ‘Fri Lespri se: Lanmour, lazwa, lape, pasyans, labonte, lafwa, ladouser, kontrol lo son prop lekor.’—Galat 5:22, 23.

Lespri sen i kapab donn ou lafors pour andir bann leprev. “Mon kapab fer fas avek tou par [sa enn] ki donn mwan lafors.”—Filipyen 4:13.