Ki zanfan i devret aprann?

“Tou Lekritir i enspire par Bondye e i itil pour ansennyen, pour koriz lerer, pour remet drwat, e pour formen pour viv byen selon Bondye.” ​—2 TIMOTE 3:16.

BANN zanfan i bezwen ganny ansennyen laverite lo Bondye. Kote zot kapab aprann sa laverite? Dan Labib, sa liv ki bokou dimoun i pli respekte dan lemonn.

Labib i parey en let ki sorti kot Bondye. Dan sa let, Bondye i revel son personnalite e i donn gidans moral tou son bann zanfan, zenn konman aze. Remark serten lansennyman ki dan Labib ek bann leson ki menm bann pti manrmay i kapab aprann.

Ki Bondye i anvi nou konnen lo li?

▪ Sa ki Labib i dir: “Ou, ki ou non i Zeova, ou tousel ki Tre O lo later antye.”​—Psonm 83:18.

Leson: Bondye pa en lafors pwisan ki napa santiman, me i en Personnaz reel ki annan en non.

▪ Sa ki Labib i dir: “Zeova pe egzamin tou leker, e i konn tou panse ek lentansyon. Si ou rod li, i pou les ou vwar li.”​—1 Kronik 28:9.

Leson: Bondye i enterese avek nou tou, enkli bann pti manrmay. (Psonm 10:14; 146:9) I anvi ki nou aprann konn li.

▪ Sa ki Labib i dir: “Zot pa devret fer ditor okenn . . . garson ki napa papa. Si ou fer li ditor dan okenn fason e i arive kriy mwan, mon pou sirman tann son leokri.”​—Egzod 22:22-24.

Leson: Zeova i menm ekout lapriyer bann pti manrmay. Nou kapab koz avek Bondye regilyerman e dir li nou panse ek santiman pli profon.

▪ Sa ki Labib i dir: “Zot ti teste Bondye plizyer fwa, e Sen Izrael ti dan lapenn akoz zot.”​—Psonm 78:41.

Leson: Sa ki nou dir e sa ki nou fer i annan lefe lo santiman Zeova, alor nou devret reflesir avan nou koze e azir.

 Ki mannyer nou devret tret bann ki diferan avek nou?

▪ Sa ki Labib i dir: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.”​—Akt 10:34, 35.

Leson: Si Bondye i aksepte tou sort kalite dimoun, nou pa devret fer diskriminasyon anver lezot akoz kouler zot lapo ouswa zot laparans i diferan avek pour nou.

▪ Sa ki Labib i dir: “Touzour pare pour donn en repons bann ki demann zot leksplikasyon konsernan lesperans ki dan zot. Me fer li avek labonte ek respe.”​—1 Pyer 3:15, 16.

Leson: Kan nou pe koz lo larelizyon, nou devret eksprim nou pwennvi avek konviksyon ek respe. Nou devret osi demontre respe anver sa bann ki zot krwayans relizye i diferan.

Ki mannyer nou devret tret bann manm fanmir?

▪ Sa ki Labib i dir: “Zanfan, obei zot paran dan tou keksoz, parski sa i fer plezir Senyer.”​—Kolosyen 3:20.

Leson: Bann zanfan ki obeisan pa zis montre ki zot kontan zot paran, me zot osi montre ki zot anvi fer plezir Bondye.

▪ Sa ki Labib i dir: “Siport kanmarad, pardonn kanmarad sak fwa ki enn ant zot i ofans en lot. Parey Senyer ti pardonn zot, zot osi pardonn kanmarad.”​—Kolosyen 3:13.

Leson: Lezot dimoun, enkli nou manm fanmir pou dezapwent nou par ler. Me si nou anvi ki Bondye i pardonn nou, nou bezwen aprann pardonn lezot.​—Matye 6:14, 15.

 Akoz nou devret onnet e zantiy?

▪ Sa ki Labib i dir: “Rezet mansonz [e] sakenn devre koz laverite avek son prosen akoz nou tou ansanm nou manm en sel lekor.”​—Efezyen 4:25.

Leson: Kan nou koz laverite, nou pe imit Bondye e fer li kontan. Si nou devlop sa labitid pour koz lalang, nou vin parey Dyab, lennmi Bondye ki “papa tou mansonz.”​—Zan 8:44; Tit 1:2.

▪ Sa ki Labib i dir: “Tret lezot parey ou ti a kontan lezot i tret ou.”​—Matye 7:12, “Contemporary English Version.”

Leson: Nou devret pran an konsiderasyon santiman, pwennvi ek bezwen manm nou fanmir ek lezot dan kominote. Kan nou demontre konpasyon anver lezot, zot pou tret nou dan en bon fason.​—1 Pyer 3:8; Lik 6:38.

Parey nou’n vwar, bann leson ki annan dan Labib i kapab ed bann zanfan pour demontre plis lapresyasyon, respe ek konpasyon ler zot vin bann adilt. Me, lekel ki devret ansenny zanfan sa bann leson?