LO KOUVERTIR: ESKI OU DEVRET PER LAFEN DIMOUN?

Lafen dimoun lafreyer, lentere, ek fristrasyon

Ki ou panse konsernan sa dat le 21 Desanm 2012 lo kalandriye Maya ki bokou dimoun ti dir ki en gran sanzman dan lemonn antye ti pou arive? Depandan lo sa ki ou ti pe ekspekte, petet ou ti santi ou soulaze, dezapwente, oubyen pa ti enterese avek tousala. Eski i ti zis en lot prediksyon lo lafen dimoun ki pa ti korek?

Be ki nou pou dir lo “lafen dimoun” ki Labib i koz lo la? (Matye 24:3) Serten i per akoz zot krwar later pou ganny brile. Lezot i annan bokou lentere dan bann levennman ki ganny asosye avek lafen dimoun. I annan ki fristre akoz zot in fatige tande ki lafen i pros, me i pa zanmen arive. Eski reaksyon sa bann dimoun i baze lo zistwar envante oubyen lo keksoz reel?

Ou kapab sirprann pour dekouver sa ki Labib i vreman dir lo lafen dimoun. Labib pa zis donn nou bann bon rezon pour kontan ki lafen pe vini, me i osi dir ki serten pou fristre akoz zot santi ki lafen pe tro tarde pour arive. Nou envit ou pour egzamin larepons ki Labib i donnen pour serten kestyon konsernan lafen dimoun.

Eski later pou ganny brile?

 LABIB I REPONN: “[Bondye in] met later dan son landrwa fiks, i pou reste stab pour en letan endefini oubyen pour touzour.”​—PSONM 104:5.

Later pa pou ganny detrir ni par dife, ni par okenn lezot fason. O kontrer, Labib i dir ki later i sa landrwa kot zonm pou reste pour touzour. Psonm 37:29 i dir: “Bann dimoun drwat pou posed later e zot pou reste lo la pour touzour.”​—Psonm 115:16; Izai 45:18.

Apre ki Bondye ti’n fini kre later, i ti dir ki i “tre bon” e i ankor santi parey. (Zenez 1:31) Degre ki i kontan later, i’n promet ki i “pou detrir bann ki detrir later,” e i pou fer sir ki later pa pou ganny detrir konpletman.​—Revelasyon 11:18.

Ou kapab pe mazin sa ki 2 Pyer 3:7 i dir. Sa verse i dir: “Lesyel ek later in ganny prezerve par sa menm parol, pour ganny detri par dife.” Eski pa sa pe dir ki later pou ganny brile? Labib i parfwa servi “lesyel,” “later,” ek “dife” dan en sans senbolik. Par egzanp, dan Zenez 11:1 i dir: “Later antye ti kontinyen koz en sel langaz.” Dan sa konteks, “later” i vedir bann imen.

Dan konteks 2 Pyer 3:7, lesyel, later, ek dife i osi ganny servi dan en sans senbolik. Verse 5 ek 6 i konpar lafen dimoun avek Deliz dan letan Noe, kan lemonn ansyen ti ganny detrir. Me sa plannet pa’n disparet, zis bann dimoun mesan. Alor, sa “later” ki Labib i dir ti ganny detrir zour Deliz pe refer avek tou dimoun vyolan. I ti osi detrir en “lesyel” senbolik, savedir bann ki ti pe diriz bann imen sa letan. (Zenez 6:11) Dan sa menm fason, 2 Pyer 3:7 i predir ki bann move dimoun ansanm avek zot gouvernman koronpi pou ganny detrir pour touzour, zis parey dife i detrir keksoz konpletman.

Ki pou arive zour lafen dimoun?

LABIB I REPONN: “Lemonn pou disparet ek tou son bann dezir; me sa ki fer lavolonte Bondye i reste eternelman.”​—1 ZAN 2:17.

Sa “lemonn” ki pou disparet i pa sa later ki nou pe viv lo la me bann imen ki pa pe viv an armoni avek lavolonte Bondye. Zis parey en sirizyen i kapab retir en timer kanser pour sov lavi en pasyan, Bondye pou “detrir” bann move dimoun pour  ki bann bon dimoun i kapab rezwir lavi lo later. (Psonm 37:9) Alor, dan sa sans “lafen dimoun” i en bon keksoz.

I pour sa rezon ki serten tradikter Labib i tradwir “lafen dimoun” konman “konklizyon sa sistenm” oubyen “lafen en lepok.” (Matye 24:3; New World Translation of the Holy Scriptures; New International Version) Vi ki bann bon dimoun ek plannet later pou sirviv, pa i fer sans pour krwar ki i pou annan en nouvo lepok, en nouvo lemonn? Larepons Labib i wi, akoz i koz lo “lemonn fitir.”​—Lik 18:30.

Zezi i dekrir sa nouvo lemonn konman en letan kan “tou keksoz pou ganny refer a-nef.” Dan sa letan i pou fer limanite vin parfe parey Bondye ti oule o konmansman. (Matye 19:28, NIV) Nou pou rezwir avek:

▪ En later ki pou’n vin en paradi kot nou pou prospere e viv an sekirite.​—Izai 35:1; Mika 4:4.

▪ Travay ki annan valer e satisfezan.​—Izai 65:21-23.

▪ Gerizon tou maladi.​—Izai 33:24.

▪ Sa posibilite pour revin zenn.​—Zob 33:25.

▪ Rezireksyon.​—Zan 5:28, 29.

Si nou fer “lavolonte Bondye,” nou pa pou bezwen per lafen dimoun. O kontrer, nou devret enpasyan pour vwar lakonplisman plan Bondye.

Eski lafen dimoun i vreman pros?

LABIB I REPONN: “Kan zot war tou sa bann keksoz pe arive, konnen ki Rwayonm Bondye i pros.” ​—LIK 21:31.

Dan son liv The Last Days Are Here Again, Profeser Richard Kyle i ekrir ki “bann sanzman ki ariv en sel kou ek dezord dan lasosyete i kre en kondisyon ki fer dimoun dir ki lafen dimoun pe al arive.” Sa i le ka sirtou kan zot pa kapab eksplike akoz sa bann sazman ek dezord pe arive.

Par kont, bann profet dan Labib ki ti koz lo lafen pa ti pe eksplik bann levennman misterye ki ti pe arive dan zot letan. O kontrer zot ti’n ganny enspire par Bondye pour dekrir bann kondisyon ki pou endike ki lafen i pros. Annou vwar serten sa bann profesi e deside pour ou menm si zot pe vreman ganny akonplir dan nou letan.

 ▪ Lager, lafamin, tranblemandter, ek lepidemi.​—Matye 24:7; Lik 21:11.

▪ Logmantasyon remarkab dan lakantite krim.​—Matye 24:12, NW.

▪ Imen pou detrir later.​—Revelasyon 11:18.

▪ Dimoun pou egois, kontan larzan, ek plezir me pa pou kontan Bondye.​—2 Timote 3:2, 4.

▪ Problenm dan fanmir.​—2 Timote 3:2, 3.

▪ Dimoun pa pou pran kont ki lafen i pros.​—Matye 24:37-39.

▪ Sa bon nouvel pou ganny anonse dan lemonn antye.​—Matye 24:14.

Parey Zezi ti dir, kan nou “war tou sa bann keksoz” arive, nou devret realize ki lafen i pros. (Matye 24:33) Temwen Zeova i konvenki ki tou sa bann profesi i prouve ki lafen i pros pour arive, e zot partaz zot lafwa par anons sa bon nouvel dan 236 pei.

Vi ki i annan bann prediksyon konsernan lafen ki pa ti korek, eski sa i vedir ki lafen pa pou zanmen vini?

LABIB I REPONN: “Kan dimoun i ava pe dir: ‘Tou i an-pe e an sekirite’ alor en sel kou destriksyon pou tonm lo zot, parey douler lakousman ki sezi en madanm ansent, e personn pa pou sape.”​—1 TESALONISYEN 5:3.

Labib i konpar destriksyon sa lemonn avek lakousman. Douler ki sa manman i gannyen i inevitab e i vin en sel kou. Sa peryod letan avan lafen i parey en lansentman akoz sa manman i konpran bann siny ki pe vin pli evidan ki son pti baba pe al ne. Son dokter i kapab dir li ki posibleman i pou ganny son pti baba tel dat, me menm si son pti baba pa ne lo sa dat, sa manman i asire ki son pti baba pou ne byento. Pareyman, menm si nou ti pe ekspekte lafen arive tel dat, sa pa sanz nanryen akoz sa bann diferan levennman ki pe arive i montre ki san dout nou pe viv dan bann “dernyen zour.”​—2 Timote 3:1.

Ou kapab demande, ‘Si sa bann levennman ki endik lafen pe vini i telman evidan, akoz bokou dimoun pa rekonnet sa?’ Labib i dir ki bann dimoun pou inyor levidans ki lafen i pros. Dan plas aksepte ki sa bann levennman pe endik lafen, zot pou monke: “Oli sa promes, ki i pe vini? Depi ki nou  bann zanset in mor, tou i reste parey depi kreasyon lemonn.” (2 Pyer 3:3, 4) Andotmo, i kler ki nou pe viv pandan bann dernyen zour, me bokou dimoun pa pou pran kont sa bann levidans.​—Matye 24:38, 39.

Dan sa lartik, nou’n egzamin zis serten levidans dan Labib ki montre ki lafen i pros. * Eski ou ti a kontan aprann plis? Si wi, akoz ou pa kontakte en Temwen Zeova e demann en letid Labib ki zot ofer gratwitman? Letid Labib i kapab ganny fer kot ou, en lot landrwa ki pli konvenab pour ou, oubyen menm atraver telefonn. Si ou fer sa, ou pou ganny en kantite byenfe. ▪

[Not anba lo paz]

[Bwat lo paz 8]

Eski Temwen Zeova In Deza Mal Donn Dat Lafen?

Temwen Zeova in deza donn bann dat kan lafen ti pou arive. Parey bann disip Zezi dan premye syek, parfwa nou’n enpasyan pour vwar bann profesi ganny akonplir avan sa dat ki Bondye ti’n plàn. (Lik 19:11; Akt 1:6; 2 Tesalonisyen 2:1, 2) Nou tou nou pou dakor avek santiman Alexander Macmillan, en Temwen Zeova ki’n fidel pour bokou lannen, ki ti dir: “Mon’n aprann ki nou devret admet nou fot e kontinyen rod plis leklersisman dan Parol Bondye.”

Me akoz nou kontinyen met lanfaz ki lafen i pros? Parski nou pran sa parol Zezi o serye: “Fer atansyon, veye.” Si nou pa fer sa, Zezi pou konsider nou konman bann ki “pe dormi,” e sa pa pou fer li plezir. (Mark 13:33, 36) Akoz sa pa pou fer li plezir?

Annou pran en legzanp: En lifeguard i vwar en dimoun ki paret pe noye dan kre. I rod lasistans pour sov sa dimoun, me i realize apre ki sa dimoun pa ti dan problenm. Sa pa dekouraz li pour kontinyen veye, e akoz sa, i pou kapab sov lavi bokou dimoun dan lavenir.

Pareyman, nou’n deza ekspekte ki lafen ti pou ariv lo en serten dat. Me nou pli enterese avek obeir komannman Zezi e sov lavi, ki anpes dimoun kritik nou. Sa konmann ki Zezi ti donn nou pour “prese e anons levanzil” i obliz nou pour averti bann dimoun ki lafen pe vini.​—Akt 10:42.

Dan plas konsantre lo kan lafen pou vini, i pli enportan pour annan konviksyon ki i pou vini, e pran aksyon neseser. Nou pran o serye sa parol dan Abakouk 2:3: “Menm si [lafen] i devret tarde [konpare avek sa ki ou ti pe mazinen], kontinyen esper li, sirman i pou arive. I pa pou an retar.”

[Portre lo paz 4]

[Portre lo paz 6]

[Portre lo paz 8]