Moiz⁠—En zonm ki ti annan lafwa

KI SAVEDIR LAFWA? Parey i ganny servi dan Labib, “lafwa” i enplik annan konviksyon ferm baze lo laprev solid. En dimoun ki annan lafwa dan Bondye i annan konfyans ki I pou akonpli Son bann promes.

DAN KI FASON MOIZ TI DEMONTRE LAFWA? Bann desizyon ki Moiz ti fer ti montre ki i ti krwar dan bann promes Bondye. (Zenez 22:15-18) I ti annan sa loportinite pour viv en lavi konfortab e profit tou deliks ki Lezip ti ofer, me i ti “swazir ganny maltrete ansanm avek pep Bondye, plito ki zouir plezir pese pandan en pti pe letan.” (Ebre 11:25) Eski sa ti en desizyon ki i ti fer san reflesir, en desizyon ki i ti pou regrete pli tar? Non, parski Labib i dir ki Moiz “ti reste ferm konmsi i ti pe war sa enn ki envizib.” (Ebre 11:27, nou ki’n met an italik.) Moiz pa ti zanmen regret bann desizyon ki i ti fer baze lo lafwa dan promes Bondye.

Moiz ti touzour rode konman pour batir lafwa lezot. Annou vwar par egzanp sa ki ti arive kan bann Izraelit ti’n paret pri ant larme Faraon ek Lanmer Rouz. Bann Izraelit ti krwar ki zot ti pe al mor, alor zot ti konmans kriy ver Zeova ek Moiz. Ki mannyer Moiz ti azir?

I posib ki Moiz pa ti konnen si Bondye ti pou al separ Lanmer Rouz pour sov bann Izraelit, me Moiz ti annan konfyans ki Bondye ti pou fer en keksoz pour protez Son pep. Moiz ti anvi ki bann Izraelit osi ti annan sa kalite lafwa dan Bondye. Sa resi Labib i dir: “Moiz ti dir avek lepep: ‘Pa bezwen per. Tenir ferm e vwar delivrans Zeova, ki i pou realize pour zot ozordi.’” (Egzod 14:13) Eski Moiz ti reisi batir lafwa bann Izraelit? Byensir, parski Labib i dir: “Par lafwa, pep Izrael ti travers lanmer Rouz konmsi later sek.” (Ebre 11:29, nou ki’n met an italik.) Lafwa ki Moiz ti demontre ti benefisye lezot.

KI LESON NOU TIRE? Nou kapab imit Moiz par fer desizyon baze lo bann promes Bondye. Par egzanp, Bondye in promet ki i pou donn nou tou keksoz ki nou bezwen si nou fer son ladorasyon vin sa keksoz pli enportan dan nou lavi. (Matye 6:33) I vre, nou kapab vwar li difisil pour reziste sa kantite tantasyon ki i annan ozordi pour rod bann keksoz materyel. Me nou kapab asire ki si nou fer nou mye pour gard nou lavi senp e konsantre lo nou ladorasyon, Zeova pou donn nou tou sa ki nou bezwen. I donn nou sa garanti: “Mon pa pou zanmen negliz ou, mon pa pou zanmen abandonn ou.”​—Ebre 13:5.

Nou osi fer bokou zefor pour ed lezot ranforsi zot lafwa. Par egzanp, bann paran ki annan lasazes i sezi tou loportinite pour ed zot zanfan devlop lafwa. Kan bann zanfan pe grandi, zot bezwen aprann ki Bondye i egziste e ki i annan en standar lo sa ki byen ek sa ki mal. An plis ki sa, zot bezwen konvenki ki swiv bann standar Bondye i sa pli bon fason viv. (Izai 48:17, 18) Sa pli gro kado ki en paran i kapab donn son zanfan se ed li pour annan lafwa ki Bondye “i reel e ki i rekonpans bann ki senserman esey rod li.”​—Ebre 11:6, Holy Bible​—Easy-to-Read Version.

[Portre lo paz 4]

[Portre lo paz 4]