Pyer ek Ananyas ti koz manti—Ki leson nou kapab aprann?
ANSENNY OU ZANFAN
Pyer ek Ananyas ti koz manti—Ki leson nou kapab aprann?
Parey ou konnen, en mansonz i en keksoz ki ou dir menm si ou konnen i pa vre. Eski ou’n deza koz manti?— * Menm serten gran dimoun ki kontan Bondye in deza koz manti. Petet ou konn en dimoun dan Labib ki’n koz manti. Son non i Pyer, enn parmi sa douz zapot Zezi. Annou gete akoz i ti koz manti.
Apre ki Zezi in ganny arete, i ganny anmennen kot lakour gran pret. Lontan minwi in sonnen. Pyer i antre dan lakour kot lakaz pret san ki i ganny rekonnet. Dan pti laklerte dife, servant gran pret ki’n les Pyer antre i rekonnet li. I dir: “Ou osi ou ti avek Zezi?” Pyer i per, alor i dir i pa vre.
Labib i dir ki plitar “en lot servant ti war li.” I ti dir: “Sa zonm ti avek Zezi.” Ankor en fwa, Pyer i dir i pa vre. En pti pe plitar, lezot dimoun i al kot Pyer e dir: “Nou asire ki ou osi ou enn parmi zot.”
Pyer i vreman per. Pour en trwazyenm fwa i koz manti an dizan: “Mon pa konn sa zonm!” En kok i sante. Zezi i get Pyer e Pyer i mazin sa ki Zezi ti dir li pli boner: “Avan ki kok i sante, ou pou renye mwan trwa fwa.” Pyer i konmans plere. I vreman regrete!
Eski en keksoz koumsa i kapab ariv avek ou?— Ou kapab kot lekol e ou tann manrmay pe koz lo Temwen Zeova. Enn i dir: “Zot pa salye paviyon.” En lot i dir: “Zot pa lager pour zot pei.” En lot ankor i dir: “Zot pa vreman bann Kretyen akoz zot pa selebre Nwel.” En lot i vire e demann ou, “Pa ou en Temwen Zeova ou osi?” Ki ou pou dir?—
Avan ler en keksoz koumsa i arive, ou bezwen pare pour donn en bon larepons. Pyer pa ti pare li.
Ler i ti anba presyon, i ti koz manti! Me, i ti vreman regret sa ki i ti’n fer e Bondye ti pardonn li.Ananyas, en lot disip Zezi ti osi koz manti. Me Bondye pa ti pardonn ni li ni son madanm Safira. I ti dakor avek son msye pour koz manti. Annou vwar akoz Bondye pa ti pardonn Ananyas ek Safira.
Dis zour apre ki Zezi ti’n kit son bann disip e retourn kot Bondye dan lesyel, apepre 3,000 dimoun ti batize Zerizalenm. En kantite dimoun in vini sorti dan bann pei lwenten pour selebre Lafet Lapannkot e apre ki zot in vin bann disip Zezi, zot anvi reste pli lontan pour aprann plis konsernan zot nouvo lafwa. Alor, serten bann disip Zezi i servi zot prop larzan pour pran swen avek zot.
Ananyas ek son madanm i vann en propriyete pour ganny larzan pour ed bann nouvo Kretyen. Ler Ananyas i anmenn larzan kot bann zapot, i dir ki i’n anmenn tou larzan ki i’n gannyen apre ki zot in vann zot propriyete. Me i pa le ka! I’n gard serten larzan pour li! Bondye i les Pyer konn sa, alor Pyer i dir Ananyas: “Pa avek zonm ki ou’n manti, me avek Bondye.” Apre sa, Ananyas i tonm sek ater e mor! Apepre trwa-z-erdtan plitar, son madanm i antre. I pa konnen ki’n arive avek son msye, li osi i koz manti e i tonm sek ater.
Pa sa i en leson vreman enportan pour nou: I enportan pour dir laverite! Nou tou nou bezwen aprann sa leson! Pourtan, nou tou nou fer fot, sirtou ler nou ankor zenn. Eski pa ou kontan ki Zeova i kontan ou e i pou pardonn ou zis parey i ti pardonn Pyer?— Me mazinen, nou bezwen koz laverite. Si zanmen i arive ki nou fer en gro fot e koz manti, nou bezwen demann Zeova, menm sipliy li pour pardonn nou. Se sa ki Pyer ti’n bezwen fer e i ti ganny pardonnen. Si nou fer bokou zefor pour pa koz manti, Bondye pou pardonn nou osi!
Lir dan ou Labib
[Not anba lo paz]
^ par. 3 Si ou pe lir avek en zanfan, sa tre in ganny mete pour ou mazinen pour fer en poz e permet sa zanfan eksprim son lekor.
[Portre lo paz 14]
[Portre lo paz 14]
[Portre lo paz 15]