En lemonn san prezidis Kan?

“MON annan en rev.” Senkant an pase, le 28 Out 1963, Martin Luther King, Jr., en lider Ameriken pour drwa sivil ti dir sa parol dan son diskour pli renonmen. Par repet sa fraz plizyer fwa dan son diskour, Martin ti koz lo son rev, ouswa lespwar konmkwa en zour imen ti pou viv dan en lemonn kot i ti pou napa prezidis rasyal. Menm si i ti pe adres en lodyans Leta-z-ini, dimoun dan bokou pei in adopte son lide.

Le 20 Novanm 1963, trwa mwan apre diskour Martin, plis ki 100 pei ti adopte rezolisyon Nasyon-z-ini lo eliminasyon tou kalite diskriminasyon rasyal. Plitar lezot pei dan lemonn ti adopte sa rezolisyon. Tou sa bann zefor ti vo lapenn, me kestyon nou kapab demande se, Ki rezilta sa in anmennen?

Le 21 Mars 2012, Sekreter Zeneral Nasyon-z-ini, Ban Ki-moon ti dir: “I annan bokou lagreman ek lenplimantasyon, ensi ki bann azanda ki’n ganny met an plas pour anpes e elimin diskriminasyon rasyal, lafreyer ouswa laenn pour dimoun lezot nasyon. Kantmenm sa, diskriminasyon rasyal pe kontinyen fer soufer plizyer milyon dimoun dan lemonn.”

Malgre serten progre in ganny fer dan serten pei pour konbat diskriminasyon rasyal ek lezot kalite form prezidis, i touzour annan sa kestyon: Eski sa bann amelyorasyon in elimin sa santiman ki profon dan dimoun oubyen eski zot in zis fer dimoun aret demontre bann aksyon ki reflekte prezidis? Serten i krwar sa bann amelyorasyon i zis anpes diskriminasyon me i pa ase for pour elimin prezidis. Akoz? Parski diskriminasyon i en aksyon ki evidan e i ganny pini par lalwa, tandis ki prezidis, i relye avek santiman ek panse, e lalwa pa kapab kontrol li.

Alor, prezidis pa pou ganny eliminen zis par kontrol bann aksyon ki reflekte diskriminasyon, me plito par sanz fason panse ek santiman en dimoun anver lezot. Eski sa i vreman kapab ganny fer? Si wi, ki mannyer? Annou vwar detrwa leksperyans ki pou ed nou pour pa zis vwar ki sa i posib, me osi kwa ki kapab ed en dimoun pour fer li.

LABIB IN ED ZOT SIRMONT PREZIDIS

Linda: Mon ti ne Sidafrik. Mon ti konsider tou Sidafriken ki pa blan konman bann dimoun ki enferyer, pa edike, pa diny konfyans e zis konman bann servant pour bann dimoun blan. Mon pa ti pe realize ki prezidis ti’n anzandre dan mwan. Avek letan, mon latitid ti sanze kan mon ti konmans etidye Labib. Mon ti aprann ki Bondye “pa fer preferans” e ki nou leker i pli enportan ki kouler nou lapo ouswa nou langaz. (Akt 10:34, 35; Proverb 17:3) Sa verse Labib dan Filipyen 2:3 ti ed mwan pour vwar ki si mon konsider lezot pli siperyer ki mwan, mon ti pou kapab sirmont prezidis. Viv annakor avek sa bann prensip Labib in ed mwan pour annan lentere dan lezot, nenport ki kouler lapo zot annan. La aprezan mon santi ki mon’n ganny libere dan sa prizon prezidis.

Michael: Mon ti grandi dan en landrwa kot i ti annan bokou Ostralyen blan e mon ti devlop en leta lespri prezidis anver bann dimoun sorti Lazi, espesyalman bann Sinwan. Kan mon ti pe  dray, si mon ti vwar en dimoun ki resanble en dimoun sorti Lazi, mon ti fer desann mon vit e kriye an dizan, “Retourn Lazi kot ou sorti!” Plitar, kan mon ti konmans etidye Labib, mon ti konmans vwar ki mannyer Bondye i vwar dimoun. I kontan zot, nenport ki pei zot sorti ouswa zot laparans. Sa lanmour ti tous mon leker e laenn ki mon ti annan ti ganny ranplase par lanmour. I vreman merveye pour eksperyans en tel sanzman. La aprezan, i en plezir pour mwan asosye avek bann dimoun sorti dan nenport ki pei ouswa kiltir. Sa in fer mwan sanz lafason ki mon vwar lavi e donn mwan bokou lazwa.

Sandra: Mon manman ti sorti Umunede, Delta State, Nizerya. Me, fanmir mon papa i sorti Edo State e koz langaz Esan. Akoz sa bann diferans, fanmir mon papa ti viktimiz mon manman en kantite ziska zour ki i ti mor. Alor, mon ti fer en promes pour pa zanmen annan nanryen pour fer avek okenn dimoun ki koz langaz Esan, ni menm marye avek en dimoun sorti Edo State. Me kan mon ti konmans etidye Labib, mon ti konmans vwar keksoz dan en lot fason. Vi ki Labib i dir ki Bondye pa fer lapliferans e ki nenport dimoun ki annan lakrent pour Li i aksepte, ki mwan mon ete pour ay dimoun akoz zot tribi oubyen langaz? Mon ti aziste mon fason panse e fer lape avek fanmir mon papa. Par aplik bann prensip Labib, sa in fer mwan trouv bokou lazwa e ganny lape lespri. I’n osi ed mwan abitye avek lezot, menm si zot kiltir, ras, langaz oubyen nasyonalite i diferan avek sa ki pour mwan. Lekel ou krwar mon ti marye avek? En zonm sorti Edo State e ki koz langaz Esan.

Akoz Labib in kapab ed sa bann dimoun ek lezot ankor pour sirmont laenn ek prezidis? I akoz Labib i Parol Bondye. I annan sa pouvwar pour sanz fason ki en dimoun i panse e santi  anver lezot. Deplis, Labib i montre kwa ankor ki neseser pour elimin tou kalite prezidis.

RWAYONM BONDYE POU ELIMIN TOU KALITE PREZIDIS

Menm si en bon konnesans lo Labib i kapab ede pour kontrol e elimin bann move santiman, i annan de lezot fakter ki nou bezwen pran an konsiderasyon avan ki prezidis i kapab ganny eliminen konpletman. Premyerman, i annan pese ek lenperfeksyon imen. Labib i dir klerman: “Napa zonm ki pa fer pese.” (1 Lerwa 8:46) Alor, nenport zefor ki nou fer, nou tou nou bezwen lite parey zapot Pol ki ti ekrir: “Kan mon oule fer sa ki byen, mon zis kapab fer sa ki mal.” (Romen 7:21) Tanzantan nou leker enparfe pou fer nou fer “bann move keksoz” ki kapab fer nou devlop prezidis.

Dezyenmman i annan lenfliyans Satan. Labib i dekrir li konman en “kriminel” ki “pe tronp lemonn antye.” (Zan 8:44; Revelasyon 12:9) Sanmenm sa i annan en kantite prezidis e limanite pa kapab fer nanryen pour elimin prezidis, diskriminasyon, zenosid, e diskriminasyon rasyal, relizye e sosyal.

Alor, avan ki prezidis i ganny konpletman eliminen, pese, lenperfeksyon ek lenfliyans Satan i bezwen ganny retire. Labib i montre ki sanmenm ki Rwayonm Bondye pou fer.

Zezi Kri ti ansenny son bann disip pour dir sa dan zot lapriyer: “Ki ou Renny i ganny etabli; Ki ou lavolonte i ganny akonpli lo later parey dan lesyel.” (Matye 6:10) Rwayonm Bondye i sa mwayen ki pou elimin tou lenzistis, enkli tou kalite prezidis ek diskriminasyon.

Kan Rwayonm Bondye pou diriz later, Satan pou ganny ‘ansennen’ pour ki “i a nepli kapab tronp bann nasyon.” (Revelasyon 20:2, 3) Apre sa, i pou annan en “nouvo later” oubyen sosyete imen kot “pou annan lazistis.” *​—2 Pyer 3:13.

Sa bann ki pou viv dan sa nouvo sosyete imen kot pou annan lazistis pou gradyelman vin parfe e zot pou ganny libere avek pese. (Romen 8:21) Konman sitwayen Rwayonm Bondye, “zot pa pou fer okenn keksoz mal oubyen koz okenn destriksyon.” Akoz? “Akoz later pou vreman ranpli avek konnesans Zeova.” (Izai 11:9) Sa letan, limanite pou konn fason azir Zeova e zot pou imit son zoli personnalite. Sa pou vedir en lafen avek tou sort kalite prezidis, “parski Bondye pa fer preferans pour personn.”​—Romen 2:11. ▪

[Not anba lo paz]

[Portre lo paz 6]

[Portre lo paz 5]

Martin Luther King, Jr., pe fer son diskour lo drwa sivil

[Sorti kot]

© Bob Adelman/Corbis

[Portre lo paz 6]

[Portre lo paz 6]

“Mon santi ki mon’n ganny libere dan sa prizon prezidis.”​—Linda

[Portre lo paz 6]

“Mon ti konmans vwar ki mannyer Bondye i vwar dimoun.”​—Michael

[Portre lo paz 7]

“Mon ti aziste mon fason panse e fer lape.”​—Sandra

[Portre lo paz 7]