APROS AVEK BONDYE

“I rekonpans tou bann ki rod li”

Eski Zeova i apresye zefor ki son bann adorater i fer pour fer li plezir? Serten i kapab dir non, an krwayan ki Bondye pa enterese avek nou. Me sa pa ditou sa kalite Bondye ki Zeova i ete. Son parol Labib i dir laverite lo li. I asir nou ki Zeova i apresye zefor son bann adorater fidel. Annou egzamin sa ki zapot Pol ti dir dan Ebre 11:6.

Ki nou kapab fer pour fer plezir Zeova? Pol ti ekrir: “San lafwa personn pa kapab fer plezir Bondye.” Remarke ki Pol pa dir ki i difisil pour fer plezir Bondye san lafwa. Plito, zapot Pol i dir ki personn pa kapab fer plezir Bondye san lafwa. Andotmo, lafwa i vreman enportan pour fer plezir Bondye.

Ki kalite lafwa ki fer Zeova plezir? Nou lafwa dan Bondye i devret enplik de laspe. Premyerman, nou “devre krwar ki i egziste.” Lezot tradiksyon Labib i dir “krwar ki i reel” e “annan lafwa ki i egziste.” Ki mannyer nou kapab fer plezir Bondye si nou pa tro asire ki i egziste? Anfet, lafwa senser i enplik plis ki sa, akoz menm bann demon i krwar Zeova i egziste. (Zak 2:19) Lefet ki nou annan lafwa ki Zeova i reel, sa i devret pous nou pour azir. Nou montre ki nou annan lafwa par viv dan en fason ki fer Bondye plezir.​—Zak 2:20, 26.

Dezyenmman, “nou devret krwar” ki Bondye i sa Enn ki “rekonpans” nou. En dimoun ki annan vre lafwa i totalman konvenki ki son zefor pour viv dan en fason ki fer Bondye plezir pa anven. (1 Korentyen 15:58) Ki mannyer nou kapab fer Zeova plezir si nou krwar ki i napa sa abilite oubyen dezir pour rekonpans nou? (Zak 1:17; 1 Pyer 5:7) En dimoun ki krwar ki Bondye pa enterese avek nou, pa apresye nou zefor e i pa zenere pa konn sa Bondye ki Labib i koz lo la.

Lekel ki Zeova i rekonpanse? Pol i dir: “Tou bann ki rod li.” En referans ki bann tradikter Labib i servi i dir ki sa mo Grek ki’n ganny tradwir “rod li” pa vedir “rod li partou partou” me i plito enplik fer zefor pour “ador” li. En lot referans i dir ki sa i en verb Grek ki enplik lentansite ek en gran zefor. Wi, Zeova i rekonpans tou bann ki zot lafwa i pous zot pour ador li avek tou zot leker ek devouman.​—Matye 22:37.

Ki mannyer Zeova i rekonpans son bann adorater fidel? Son promes pour lavenir i en rekonpans ekstraordiner ki revel profonder son zenerozite ek lanmour. I’n promet nou lavi eternel dan Paradi lo later. (Revelasyon 21:3, 4) Menm la konmela, sa bann ki senserman rod Zeova pe ganny bokou benediksyon. Avek led lespri sen ek lasazes dan Parol Bondye, zot lavi i gou e satisfezan.​—Psonm 144:15; Matye 5:3.

Vreman, Zeova i en Bondye rekonesan ki apresye servis son bann adorater ki fidel e devoue. Eski lefet ki ou konn sa, sa i motiv ou pour anvi apros pli pros avek li? Si wi, akoz ou pa aprann plis lo konman pour devlop e demontre sa kalite lafwa ki Zeova pou rekonpanse?

MON LEKTIR LABIB

Tit 1–Zak 5

[Ekstre lo paz 11]

Konman nou kapab fer plezir Zeova si nou annan dout lo son abilite ouswa dezir pour rekonpans nou?