Kestyon Sorti Kot Nou Lekter . . .

Lekel ki’n fer Bondye?

Mazin en papa pe koz avek son garson set-an. I dir, “Byen byen lontan, Bondye ti fer later avek tou keksoz lo la e i’n fer soley, lalin ek bann zetwal.” Sa garson i reflesir lo la pour en pe letan apre i demann li, “Dadi, lekel ki’n fer Bondye?”

Sa papa i reponn, “Personn pa’n fer Bondye. I’n toultan egziste.” Pour lemoman sa senp leksplikasyon i satisfer sa zanfan. Anmezir i grandir, sa kestyon i kontinyen reste dan son lespri. I vwar li difisil pour konpran ki mannyer en personnaz napa en konmansman. Liniver menm i annan en konmansman. Alor, i demande dan li menm, ‘Kote Bondye i sorti?’

Ki Labib i dir? Annefe, i preski parey sa ki sa papa dan sa legzanp ti dir. Moiz ti ekri: “O Zeova . . . avan ki bann montanny i egziste avan menm ki ou ti kree sa lemonn ek later fertil, depi avan e pour touzour, ou Bondye.” (Psonm 90:1, 2) Pareyman, profet Izai ti deklare: “Eski ou pa konnen? Eski ou pa’n tande? Zeova, Kreater later antye, i en Bondye letan endefini”! (Izai 40:28) Pareyman, let Zid i dir ki Bondye in “touzour” egziste.​—Zid 25.

Sa bann verse i montre nou ki Bondye i “Lerwa eternel,” parey ki zapot Pol i dekrir li. (1 Timote 1:17) Sa i vedir ki Bondye in toultan egziste, i ti toultan la dan lepase e i pou kontinyen egziste dan lavenir. (Revelasyon 1:8) Alor, Son legzistans eternel i en laspe enportan sa Bondye Tou pwisan.

Akoz nou vwar ki sa nide i difisil pour konpran? Akoz lakantite letan ki nou viv i fer nou annan en diferan pwennvi lo letan konpare avek Zeova. Parski Bondye i eternel, pour li mil an i konman en zour. (2 Pyer 3:8) Annou pran en legzanp: Eski en kasbol, ki viv zis pour 50 zour, i konpran ki nou kapab viv pour 70 oubyen 80 an? I pou difisil! Anfet, Labib i dir ki nou parey kasbol konpare avek nou Gran Kreater. Menm nou abilite pour rezonnen i limite konpare avek sa ki pour Li. (Izai 40:22; 55:8, 9) Alor i pa sirprann nou ki i annan serten laspe dan natir Zeova ki imen pa kapab vreman konpran.

Menm si sa konsep lo en Bondye eternel i difisil pour konpran, nou kapab vwar ki i fer sans. Si en lot dimoun ti’n kree Bondye, sa dimoun ki ti pou Kreater. Me parey Labib i eksplike, Zeova i sa enn ki’n “kree tou keksoz.” (Revelasyon 4:11) An plis ki sa, nou konnen ki liniver pa’n toultan egziste. (Zenez 1:1, 2) Kote i sorti? Sa enn ki’n kree li ti’n bezwen egziste avan. I’n osi egziste avan bann personnaz, tel parey son garson byenneme ek bann lanz. (Zob 38:4, 7; Kolosyen 1:15) Alor i kler ki I’n egziste li tousel avan. Napa nanryen ki ti egziste ki ti’n kapab kree li, alors i pa kapab ki i’n ganny kree.

Nou prop legzistans ek legzistans liniver antye i konfirmen ki i annan en Bondye eternel. Sa enn ki’n fer nou gran liniver, ki’n fer bann lalwa pour kontrol sa liniver, in bezwen toultan egziste. Sa i sel fason ki’n fer li posib pour donn lavi tou lezot keksoz.​—Zob 33:4.