KWA ꞊dhegblüdhe ˗nu ˗yaaga ˗wo ˗ya ˗sü ˈka ˈˈsɛ ˈˈtɩtɩ ˈwo˗ dhɛ Sangi Besa ˈö ˈˈyi ꞊zinŋgü Ɛndonezi bhë, ˗a ˈgü. ˗Kwɛ ˗nu ˈwo ˗ʒiö ˗de ˗an ˈgü, ˗wo ˗kun yökë ˗ni ˈgü ꞊weeyi ˈˈkpoŋ ˈˈdhiʋ̈. Mɛn ˗nu ˗wo ˗an ˗dɔ ˗së ˈka ˈˈsɛ bhë ˗a ˈgü ˗an ˗bha ˗zlanwopösü ˈwo mɛn ˗nu ˗takun Biblö ˈka, ˗a ˗wɔn ˈgü. ˈˈKɛɛ ˗wö yö ˈˈwɛɛ ˈbha ˗kë ꞊weeyi ˈˈkpoŋ ˈˈdhiʋ̈.

˗A ˗blɛɛsü ˈnën ˗tɔ ˗wo ˗da ꞊weeyi ꞊bhaa, ˈwo ˗gwö kpö ˗nu sü ˈwo nu ˗an ˈka ˈˈyi ˈˈkpoŋ ˈˈdhiʋ̈. ˗A gwö kpö ˈbha ˗nu ˗kun ꞊dhɛ balɔn kpö ˈdhö. ˗Wa wo bo, ˈwo ˗ya ˗gbaanën ˗ta ˈwo ˗gwö kpö ˗nu ˈwü maato ˈka kö ˗wo kë ˈsɛɛn˗ ꞊dhɛ ˗tɔ ˗ɲaan ˗nu ˈdhö. ˗Wa ɲën, ˗wo ˗an ˗lo ˈˈgbʋŋgbʋ ˗nu ˈgü ˈwo ˗da ˗an ˈka goo ˗bha ˈwo ˈdho ˗an ˈka ˈˈkwɛnŋdhö. ꞊Taabha, ˗wo ˗an ˗da bhlɔɔ˗ ˈˈgblʋ̈gblʋ̈ ˗nu ˈgü kö gɔ ˗nu ˗wo ˗an ˈsü ˗wo ˈdho ˗an ˈka ˗kpinŋ yökë ˗dhɛ ˈgü.

Kwa ꞊dhegblüdhe ˗nu ˈwo ˈˈdhʋ̈, ˗wa mɛn do ˗dhɛ Uda. ˈWɔn ˈö˗ ˗ta ˗a ˗wɔn ˈgü, ˗yö ˈˈtʋ̈ŋ ꞊va ˗kë ˗gwö ˈwu ˗sü ˗bha ˈö ˗ʒiö ˗a ˈka mɛn ˗nu ˈwo to ˗an ˗ta. ˈWëëga ˈö˗ ꞊slɔɔ, ˗ya ꞊gban ˗sü ˈö ö ˗zokë ˗a ˈka ö ˗bha ˈkɔdhigümɛn ˗nu ˈˈpiʋ̈. ˈˈKɛɛ ˗yö ˗kun ˗a ˈˈpiʋ̈ kö ˈö ö ˗bha ˈwëëga ˗dadhiʋ̈ kë ˈˈdhʋ̈ kö ˈö pë ˈbha kë ˗a ˈka ˈzü. ˗Yö ˗kun ˗a ˈˈpiʋ̈ kö ˈö tablɛtö do ˈdhɔ kö ˈö JW Library aplikashɔn ˗da ˗a ˗ta. Uda ˗ya ˗yö ꞊dhɛ video ˗nu waa pë ˈˈwɛɛ ˈbha ˗nu ˈwo˗ ˗ta bhë, ˗wo ꞊mɔɔn˗ ˗bha ˈwo ö ˗bha ˗zlanwopösü waa Biblö ˈgümansü ˗kë ˗së.

Dhiapiʋ̈ ˈˈpɛpɛ ˈka, Uda ˗yö ˗gwö ˗wu ˈˈlɛlɛ ꞊plɛ ˈˈpiʋ̈. ˗Ya ˗kë ˈˈdhʋ̈ ˈˈsu do waa ö ˈˈgbu ˈka kö ˗a ˗gwö ˗yö gɔ ˈdɛdɛ do pa. ˗Yö ˗dho ˈö tablɛtö ꞊sɔnŋ ꞊slɔɔ.

Uda ˗ya ˗pö: «˗Gwö ˗wu ˗sü ˗yö n ˈgü ˗ga ˈö n kwigüdhɛ ꞊gban to ˈˈdhiʋ̈˗. ˈˈKɛɛ ˈdhɛ ˈa tablɛtö ꞊slɔɔ ˈö n ˗takun kö ˈa ˗zlanwopö ˗së ˈka, kö ˈa n ˗de baaˈˈ ˗bhɔkwëë ˗nu ˗bha, n ˗zo ˗yö ˗bhɔ pë ˈˈgbɩɩ˗ ˈˈpɛpɛ ˈa˗ ˗kë kö ˈa˗ ˈdhɔ bhë ˗a ˈka.» ˗Ya ˗pö ˈzü ꞊dhɛ ö ˗bha tablɛtö ˗yö ö ˗takun Korona virisö ˈˈtʋ̈ŋ ˈgü, ˈyö sü ꞊dhɛ ˗yö ˗bɔ ˗a ˗ta ˈö ˗bhɔkwëë ˗nu ˗kë, ˈö ˗zlanwopö. ˈWɔn ˈö Uda ˗ya ˗ya ö ˗zo ˈˈpiʋ̈ kö ˈö˗ kë ˗a bhë, ˗a ˗bha ˗to ˗a ˗bha ˗sü ˗ya ˈˈzuʋ̈ˈˈ ˈˈgblü ˗dhi, ˈö kwa zuʋ̈ˈˈ ˈˈgblü dhi ˈpö.