Sɛtanblö ˈˈsu ˈgü, kwa ˗dho ˈwɔn ꞊gban kë kö ˈkwa Biblö draansü züdɔ mɛn ˈˈpɛpɛ ˈkwa dho ˗kpan ˗an ˗bha ˗an ˈˈpiʋ̈ ˈsëëdhɛ ˗be ˈnën Zuʋ̈gblüdhi ꞊slɔɔ ˗toëpö ˈka! ˈgü. ˗Zlanwopömɛn ˗nu ꞊mɔɔn˗ ˗bha ˈwo kë ˗yödhiʋ̈ ˗kɔ ꞊löö ˈka ˈö ˈwo wo ˗kɔ ˗yɛ ˈˈlɛlɛ 30 ˗bha. Kwa ˗dho ˗a kë ꞊dhɛ kö ˈkwa kwa ˗kɔ ˗da ˗zlanwopö ˈˈtʋ̈ŋ ˈkpii˗ ˈö ö ˗de ˗ta bhë, ˗a ˈgü?

• ˗Womɛndhɛsü ˗blɛɛsü ˈˈtʋ̈ŋ ˈka: ˗Kwa ˈsëëdhɛ ˗be ˈnën bhë ˗a kwi ꞊taadhɛ ˈsü kö ˈkwa ˗Zlan ˗wo ˗dhɔ ˗da mɛn ˗nu ˈgü. ˗Kɔ ˈwo˗ ꞊draan ˗a ˈka, ˗kwaa ˗zɔn ˗an ˗dhɛ. Kwa ˗zo ˈya ˈdho bhɔ mɛn ˗nu ˈwo˗ ˗zɔn ˈˈdhiʋ̈ ˗be ꞊dhɛ ˗Zlan ˗wo ˗dhɔ ˗yö ˗an ˗bha waa kwa ˗bha ˗womɛndhɛsü ˗nu ˈka. ˈKö ˗kë ꞊dhɛ ˈwaa kun ˈˈwɩ ˗ni ˈgü ˗a ˗bha kö ˗wo Biblö draanˈˈ, ˗wo ꞊mɔɔn˗ ˗bha ˗wo ˗we kwa ˗bha Biblö draanˈˈ ˗kɔ ˗dɛɛ waa ˈsëëdhɛ ˗be ˈnën bhë, ˗an ˗bha. ˈKwa ˈdho ˈsëëdhɛ ˗be ˈnën bhë ˗a ˈto mɛn ˗nu ˈö ˈwaa ˈkɔɔ ˗an ˗dhɛ ɛɛnˈˈ ˗a ꞊nënŋ ˈsëëdhɛ ˗bha kö ˈkwa˗ bɔ mɛn ˗nu ˈwo ˗kɔ kwa ˗bha nɔɔnwo ˈka, ˗an ˗dhɛ. ˗Zlanwokɔdhi ˗bha yö ˈwɔnyëë˗ ˗nu ꞊mɔɔn˗ ˗bha ˈwo ˗zlanwopö ˗yö ˗bhɔkwëë ˈbhaa ˗nu ˗ya ˈzü ˈˈsu ˈö bhë ˗a ˈgü.

• ˈˈTʋ̈ŋ ˈˈwɛɛ ˗nu ˈka: ꞊Ya kë ꞊dhɛ ˗zlanwokɔdhigümɛn ˗nu yö ˗kë ˗zlanwopö ˗a ˈka ˗gɔnën ˈka, ˗wo ꞊mɔɔn˗ ˗bha ˈwo ˈsëëdhɛ ˗be ˈnën Zuʋ̈gblüdhi ꞊slɔɔ ˗toëpö ˈka! ˗ya ˗a ˈgü. Mɛn ˗nu ˈwo ˗dho ˗a ˗zɔn ꞊dhɛ ˈsëëdhɛ ˗be ˈnën bhë ˗a ˗dhɔ ˗yö ˗an ˗bha, ˗kwaa pö ˗an ˗dhɛ ꞊dhɛ kwa ꞊mɔɔn˗ ˗bha ˈkwa Biblö ꞊draan ˗an ˈˈpiʋ̈ ˈˈwɛɛwɛ. ˗Kɔ ˈwo˗ ꞊draan ˗a ˈka, ˗kwaa ˗zɔn ˗an ˗dhɛ ˗dhɛ do ˈö bhë˗ ˈgü ɛɛnˈˈ ˈzü ꞊taabha. ˗Zlanwopö ˗yö ˗bha ˈwɔnyëë˗ ꞊mɔɔn˗ ˗bha ˈö˗ pö ˗zlanwopömɛn ˗nu ˈwo ˈˈgbɩɩ˗ ˗an ˗dhɛ kö ˗wo ˈdho yökëdhɛ ˗nu ˈgü kö ˗wo Biblö draansü ˗wɔn blɛɛˈˈ mɛn ˗nu ˗dhɛ mü. Kwa ꞊mɔɔn˗ ˗bha ˈkwa˗ pö kwa yökëyoo ˗nu ɛɛnˈˈ mɛn ˈˈpɛpɛ ˈkwa ˗kpan ˗an ˗bha ꞊dhɛ kwa˗ ˈˈpiʋ̈ ˈkwa Biblö draanˈˈ ˗an ˈˈpiʋ̈.

Yesu ˗ya ˗pö ˈkwa mɛn ˗nu «kë [˗a ˗bha] ꞊guëˈ ˗nu ˈka» kö ˈkwa «˗an ꞊daanˈ˗.» (Mt 28:19, 20, NTBL) ˈKö ˗zlanwopö ˈˈtʋ̈ŋ ˈkpii˗ ˈö ö ˗de ˗ta, ˗yö ˈkwa ˗takun ˗a kë ˈˈdhʋ̈ ˗sü ˗bha Zuʋ̈gblüdhi ꞊slɔɔ ˗toëpö ˈka! ˈka bhë, ˈaa ˗yö kë!