˗Zlan ˗bha ˗Gblüdëdhɛ ˈnën ˈö ˗tɔ mɛnkɔɔnsü ˈö dhaŋ˗ ˈgü. ˗Yö ˗dho yö˗ mɛnkɔɔnsü ˈˈpɛpɛ ˈwo ˈdhö ˗an ʒian˗ ˈgü. ˗Zlan ˗dhö bɔ ˗a ˗ta kö ˗yö ö dhɔɔbhaawɔn kë dhaŋ˗ ˈgü, kö ˗ya kë ˈˈsɛ ˗ta. Nɔɔn˗ ˈö ˗gban ˗Zlan ˗bha ˗Gblüdëdhɛ ˗bha bhë ˗yö ˗së. ˗A yi ˈyaa ꞊gblɛnŋ ˈzü kö mɛnkɔɔnsü ˈö ˗dho mɛnbhɩɩdhe ˗nu ˗zokun, kö ˗Zlan ˗bha ˗Gblüdëdhɛ ˗ya nu ˗an ˗dhɛ. ˗Yö ˗dhö mɛn ˈˈpɛpɛ ˈwo ˈˈkpɔnŋ ꞊taa ˗an ˗lo wo ˈkwëëdhö.​—Makö 13:10; Dhukö 4:43 ˗wo pö.

Zoova ꞊ya ö ˗kɔ ˈˈyɛ ö Gbö Yesu Klito ˗bha kö ˗yö kë ˗a ˗bha ˗Gblüdëdhɛ ˗Gɔdhiʋ̈mɛn ˈka.​—˗Dhɛkpaɔ dhiaˈˈ ˈsëëdhɛ 11:15 ˗wo pö.

˗Bhö video ˗Mën ˈö ˗tɔ ˗Zlan ˗bha ˗Gblüdëdhɛ? ˗ga.

˗Zlan Gbö ˗yö ˗Gblüdë ˗tiaandhö ˈka, ˗a ˗gɛn ˈtɔ˗ ꞊dhɛ ˗a ˈˈgblü ˗yö ˗së, ˈö ˈwɔn kpɛnŋdhö ˗dhɔ ˗ya ˗kë. (Matiö 11:28-30) ꞊Ya ˈgo mü ˈzü ˗kɔmɔnwɔnbhasü ˗ya ˗gɔ ꞊dedewo kö ˗yö mɛn ˗nu ˗takun, ˈyö ˗tɔ ꞊dhɛ ˗yö ˗dho ˗ya dhaŋ˗ ˈgü ˈö ˈˈkpɔnŋtaadhɛ ˗todhʋ̈sü ꞊kɔɔn. ˈDhɛ ˈö go ga ˈgü, ˈyö dho dhaŋ˗ ˈgü ˈyö ˗ya Zoova ˗kɔ ˗së ˈgü kö ˗yö ˗dhɛ ˈˈdhiʋ̈gan. (Eblö 10:12, 13) ˈDhɛ ˈö˗ ˈˈtʋ̈ŋ ˗yö ˗lo ˈyö ˗Zlan ˈˈpiigbɩɩdhɛ nu ˗a ˗dhɛ kö ˗yö mɛndhɛkësü züdɔ.​—Dhukö 1:32, 33 ˗wo pö.

Mɛn kpö ˈnën ˈwo ˗an ˗dhɛ “mɛn ˈˈslʋ̈ʋ̈slʋ̈ ˗nu” bhë, wo ˈnën ˈwo ˗dho ˗gblüdëdhɛ kë Yesu ˈˈpiʋ̈ dhaŋ˗ ˈgü. (Daniel 7:27) Mɛn ˈˈslʋ̈ʋ̈slʋ̈ ˗blɛɛsü ˗nu ˈö Zoova ö ˗kɔ ˗yɛ ˗an ˗bha wo ˈnën ˈwo ˗tɔ Yesu ˗bha bɔmɛn ˗nu ˈwo ˗to wo ˗wo ˗ta. ˈÖ go ˈˈtʋ̈ŋ bhë ˗a ˗bha ˈö yö ˗a ˈka ꞊dɛɛ ˗bha, Zoova ꞊kun ö ˗kɔ ˈˈyɛ ˗ni ˈgü gɔɔn˗ ˗nu waa dhebɔ ˗nu ˈö ˈwo to wo ˗wo ˗ta ˗an ˗bha ꞊dhɛ mɛn ˈˈslʋ̈ʋ̈slʋ̈ ˗nu ˈdhö. ꞊Wa ˈgo ga ˈgü kö ˗an kwi ꞊ya kë ꞊dhɛ ˗Zlan ˗bha ˈˈkiö ˗nu ˗bhaa ˈdhö, ꞊dhɛ ˗kɔ ˈö Yesu ˗bhaa kë˗ ˈka ˗a ˈdhö.​—Zan 14:1-3; 1 Kodhɛngtö 15:42-43 ˗wo pö.

 Mɛn ꞊dhɛ ˈwo ˗dho ˈdho dhaŋ˗ ˈgü? Mɛn ˗nu ˈwo ˗dho ˈdho˗ dhaŋ˗ ˈgü Yesu ˗an ˗dhɛ “˗tuʋ̈ kpö” ˈnën. (Dhukö 12:32) Mɛn ˗nu ˈö waa Yesu ˗nu ˈwo ˗dho ˈˈkpɔnŋtaadhɛ ˗todhʋ̈sü ꞊kɔɔn bhë, ˗an ˗lokotasü ˗dho kë mɛn 144.000 ˈka.​—˗Dhɛkpaɔ dhiaˈˈ ˈsëëdhɛ 14:1 ˗wo pö.

˗Zlan ˗bha ˗Gblüdëdhɛ ˗yö ˗ya yö ˗bha ˗kwɛ 1914 ˈgü. * ˈDhɛ ˈö Yesu ˗yö ˗kë ˗Gblüdë ˈka, pë ˗blɛɛsü ˈö˗ ˗kë ˈyö ˗tɔ Sɔtraan waa ö ˗bha ˗zuu yaa ˗nu ˗an ˗zuö ˈˈkpɔnŋ ꞊taa ˗sü. ˈYö bhlɔ ˗yö Sɔtraan pa, ˈyö ˗ya ˈˈkpɔnŋtaadhɛ ˗bhluubhluu ˗sü ˗bha. (˗Dhɛkpaɔ dhiaˈˈ ˈsëëdhɛ 12:7-10, 12) ˈÖ sü ˈˈtʋ̈ŋ ˈö bhë ˗a ˗bha, ˈwɔn yaa ˗nu ˗wo ˗da ˗ni ˈgü ˈˈdhiʋ̈ ˈˈkpɔnŋ ꞊taa ꞊dedewo. ˗Gblü ˗nu, din˗ ˗nu, ˈˈyua ˗nu waa ˈˈsɛ ˗bha ꞊zluu ˗sü ˗nu, ˗an ꞊gban ˈˈpɛpɛ ˈnën ˈwo ˗tɔ ˈsuanbhopë do ˈö˗ ˗zɔn ꞊dhɛ ˗a ˈˈtʋ̈ŋ ˈyaa ꞊gblɛnŋ ˈzü kö ˗Zlan ˗bha ˗Gblüdëdhɛ ˗yö ˈˈkpɔnŋtaawɔn ˗nu ˈˈɲanbhɔ.​—Dhukö 21:7, 10, 11, 31 ˗wo pö.

˗Zlanwopösü ˈö ˈˈkpɔnŋtaadhɛ ˗todhʋ̈sü ˈgü bhë ˗a ˈsaa˗ ˈgü, ˗Zlan ˗bha ˗Gblüdëdhɛ ˗yö mɛn kpö ꞊va ˈwo go ˈˈsɛgɔ ꞊gban ˈˈpɛpɛ ˈgü ˗an ˗lo ˗ni ˈgü ˈkwëëdhö. ˗De ˗kë ˈˈtɩtɩ ˗mɛn ˗nu ˈˈmliɲɔn ꞊va ˗wo kë ˗ni ˈgü mɛn ˈö ˗Zlan ˗bha ˗Gblüdëdhɛ ˈdhö ˗an ꞊kɔɔn Yesu ˗kɔ ꞊löö ˗an ˈka. ˈˈTʋ̈ŋ ˈö ˗dho ˈˈkpɔnŋtaadhɛ yaa ˈö yö ˗a ˈgüshiʋ̈ ˗a ˈka, ˗Zlan ˗bha ˗Gblüdëdhɛ ˗dho ö ˗kɔ kpa ˗an ˗ta. ˈDhɛ ˈö ˈˈdhʋ̈, mɛn ˈˈpɛpɛ ˈwo˗ ˈˈpiʋ̈ ꞊dhɛ ˈwo ˗Zlan ˗bha ˗Gblüdëdhɛ ˈö bhë ˗a ꞊trɔɔn yö, ˗an dua ˗mü kö ˗wo ˈwɔn ˗man Yesu ˗ta ˗sü draanˈˈ.​—˗Dhɛkpaɔ dhiaˈˈ ˈsëëdhɛ 7:9, 14, 16, 17 ˗wo pö.

˗Kwɛ 1000 ˈˈpiʋ̈, ˗Zlan ˗bha ˗Gblüdëdhɛ ˗dhö ˗Zlan ˗zopiʋ̈wɔn ˈö kun ˗be ˈö ˗gban mɛnbhɩɩdhe ˗nu ˗bha ˗a kë. ˈˈSɛ ˗todhʋ̈sü ˗dho kë ꞊bhɔɔ ˈˈsɛ ˈka. ꞊Ya ö bo ˗kë ˈˈdhʋ̈ ˗sü ˈka, Yesu ˗dhö ˗Gblüdëdhɛ ˗lo ˈö Dë ꞊kwɛɛ˗.(1 Kodhɛngtö 15:24-26) Mɛn ˈbhaa ˈü˗ ˈˈpiʋ̈ kö ˈwɔn ˈö ˗gban ˗Zlan ˗bha ˗Gblüdëdhɛ ˗bha ˈü˗ pö ˗a ˗dhɛ ˗yö ˗dhö ˗ee?​—2 Piɛdhö 3:13 ˗wo pö.