Ü ˗bhaa ˈka gagade waa ꞊sua ˗an ˗bhokoo dɔ ˗sü ˗yö kë ˗ni ˈgü ˈˈgbɩɩ˗ ˗ee? ꞊Dɛɛ ˗yö ˗kë ꞊dhɛ mɛn ꞊vadhɛ ˗wo ˈdhaŋ˗ ˗bho wo zuʋ̈piʋ̈wɔn ˗nu ˈˈdhiʋ̈ ˈö ˗ʒiö ˗a ˈka gagade waa ˈwɔn ꞊dede ˗nu ˗ta. ˈˈKpɔnŋtaadhɛ ˗todhʋ̈sü ˈgü, mɛn ꞊vadhɛ ˗bhaa ˈgü pë ˈwo˗ ˗dhɛ gagade ˈyaa ˈdhö.

 ˈWɔn yö ˗kɔ suu ˈö bhë, ˗a zü ˈyii bho ꞊dɛɛ. ˗A ˗kwɛ ˗ya ꞊mɔɔn ꞊dɛɛ ˗kwɛ 2000 ˗bha, Wlɔmömɛn ˗nu ˗bha ˈˈsɛgɔdhiʋ̈mɛn ˈö ˈwo˗ ˗dhɛ Pɔnsö Pidhatö bhë, ˗yö dhɛɛˈˈ ˗kpɔ Yesu ˗gɔ ˈö˗ pö: «˗Më ꞊në ˈwo˗ ˗dhɛ tɛanwɔn?» (Zan 18:38) ˈKö ˗kë ꞊dhɛ dhɛɛˈˈ ˈö Pidhatö ˗ya kpɔ Yesu ˗gɔ bhë ˈyii dɔ˗ ˗yɔ ˗gɔ, ˗a ˗bha dhɛɛˈˈ bhë˗ ˗wɔn ˗kun ˈˈgbɩɩ˗. Biblö ˗yö dhɛɛˈˈ bhë ˗a ˗yɔ ˗bɔ. ˗A ˗yɔ ꞊mɔɔn˗ ˗bha ˈö zuʋ̈gblüdhi nu ü ˗dhɛ, ˈö ü ˗takun kö ˈü gagade waa ꞊sua ˗an ˗bhokoopiʋ̈dhɛ dɔ.

Gagade ˗yö ˗dhö ˗ee?

 ꞊Ii, ˗yö ˗dhö. Biblö ꞊yaa˗ pö «˗tɛanwɔn ɛɛnˈˈ gagade» kö ˗yö ˗we pë ˈö ˗gban ˈwɔn ꞊dede waa pë ˈö kpɛnŋdhö ˗an ˗bha, ꞊nën˗ ˈka. Biblö ˗ya ˗zɔn ꞊dhɛ Zoova a ˗Zlan ˈnën ˗tɔ gagade ˗gɔgodhɛ. ˗A ˗wɔn ˈgü ˗ya ˗dhɛ «gagade pö ˗Zlan.» Gagade ˈö go ˗Zlan ˈˈpiʋ̈ ˈnën Biblö ˈgü. ˗A gagade ˈö ˈˈdhʋ̈, Biblö ˗ya ˗zɔn ˗dhɛpuudhɛ ˈka. ˗Yö ꞊mɔɔn˗ ˗bha ˈö ˈˈdhiʋ̈sü kwa ˈka ˈˈkpɔnŋtaadhɛ yaa ˈö ˈwɔn ꞊gban ˗ya kaanˈˈ ˈˈkwëë mü bhë, ˗a ˈgü.—Psaume 43:3; Zan 17:17.

Ü ˗dho gagade dɔ ˗kɔ ˗kë ꞊dhɛ?

 ˗Zlan ˈyaa˗ ˈˈpiʋ̈ kö ˈkwa ˈˈwɩ gagade ˈö Biblö ˈgü ˗a ˗bha kwa ˈtii ˗bha. ˗Ya ˗dhɛ kwa ˗gɔ ˗ʒian kö ˈkwa kwa ˗zota ˗a ˈgü ˗së ˈka kö ˈkwa ꞊tun ˈdhaŋ bho ˗a ˈˈdhiʋ̈, kë ˈˈdhʋ̈ kö ˈkwa ˈdho ˈdhaŋ bho kwa zuʋ̈piʋ̈wɔn ˗nu ˈˈdhiʋ̈ dosɛnŋ. (Wlɔmö 12:1) ˗Zlan ˗ya ˈˈpiʋ̈ kö ˈkwa˗ dɔ, kö˗ ˗dhɔ ˗yö kwa kë kwa «ˈnii˗» ꞊gban ˈka. ˗Yö kwa ꞊faan ˗mën kö pë ˈö ˈkwa˗ ꞊draan Biblö ˈgü ˈkwa˗ ˗ga kö ꞊ya kë ꞊dhɛ gagade ˗mü, ˈkwa˗ ˈwɔn dɔ.—Matiö 22:37, 38; Këwɔn ˗nu 17:11.

ˈDe nu ꞊sua ˈka?

 Biblö ˗ya ˗pö ꞊dhɛ ˗Zlan ˈyɔɔ˗ ˈö ˗kë Sɔtraan Dügɔmɛn ˈka bhë, ˈnën nu ꞊sua ˈka. ˗A ˗wɔn ˈgü Biblö ˗ya ˗dhɛ «꞊sua dë.» (Zan 8:44, NWT) ˗Yö ꞊sua ˗ya ˗Zlan ˗bha mɛnbhɩɩdhe ˗blɛɛsü ˗nu ˗dhɛ. (ˈWunzüdɔdhɛ 3:1-6, 13, 17-19; 5:5) ˈÖ sü ˈˈtʋ̈ŋ bhë ˗a ˗bha ˈö yö˗ ˈka ꞊dɛɛ ˗bha, Sɔtraan ˗yö ꞊suawɔn ˗nu ˗pɛn ˗kplawo, ˈö ˈˈdhɛ kpa gagade ˈö ˗gban ˗Zlan ˗bha, ˗a ˗ta.—˗Dhɛkpaɔ dhiaˈˈ ˈsëëdhɛ 12:9.

ˈMën ˗kë ˈö ꞊sua ˈdhö ˗pɛn ˗sü ˈka ꞊dɛɛ?

 Kwa ˗bha ˈˈtʋ̈ŋ ˈö Biblö ˗ya ˗dhɛ «ˈˈkpʋnŋtaadhɛ yën ˈˈtʋ̈ŋ» bhë, Sɔtraan ˗yö ˈˈkpënŋ˗ kë ˗ni ˈgü mɛn ꞊vadhɛ ˗gɔ ˗a ˈgü. Mɛn ꞊vadhɛ ˗wo ꞊sua ˗kë ꞊dɛɛ kö ˗wo ˈˈkpënŋ˗ ˗kë mɛn ˈˈwɛɛ ˗nu ˗gɔ, ˈgo mü ˈzü kö ˗wo ˗an ˗ta ˗bhö. (2 Timote 3:1, 13) ꞊Sua ˗yö ˗zlanwo ꞊vadhɛ ˈgü ˈpö ꞊dɛɛ. ˗Dhɛ ˗kɔ ˈö Biblö ˗ya to˗ ˈka ˈˈdhiʋ̈ ˈö˗ pö˗ ˈka bhë ˗a ˈdhö, mɛn ˗nu «˗dho mɛ ˈdhɛ ˈwo dho˗ ˗nu draan˗ ˗a ˗nu dhɔɔbhaawɔn ˗nu ꞊në˗ ˗bha bha ꞊në˗ mɔɔ˗,» ˈyö «ˈyii ˈdho kë˗ ˗nu ˈˈpiʋ̈ ꞊dhɛ ˈwo wo ˈˈtʋ ˈto tɛanwɔn» ˗bha.—2 Timote 4:3, 4.

ˈMën ˗kë ˈö gagade ˗wɔn ˈdhö ˈˈgbɩɩ˗?

 Gagade ˗ya ˗kë ˈö mɛn ˗nu ˗wo ˈdhaŋ bho wo ˈko ˗nu ˈˈdhiʋ̈. ˗Dhɛ ˈö ˈdhaŋ˗ ˗bho ˈko ˈˈdhiʋ̈ ˗sü ˈyaa˗ ˗bha, ˈˈtɔŋdëdhɛ ɛɛnˈˈ ˗kë ˈˈkwëë ˗sü ˈyaa ꞊mɔɔn˗ ˗bha kö ˗yö ꞊gwëë mü. Biblö ˗ya ˗pö ꞊dhɛ ˗Zlan ˗ya ˈˈpiʋ̈ kö ö ˗dhɔkë ˗kɔ ˗yö ˗gban gagade ˗ta. ˗Ya ˗pö: «Mɛ ˗nu ˈwo˗ ˈpiö kö [˗wo ˗Zlan] gba bhë, ˗an ꞊duaˈ ˗mü kö ˗wa gba ˗zuu ˈslööslö waa˗ ˈwun giagia ˗an ˈgü.» (Zan 4:24, NTBL) ˈBha˗ pö ˗kɔ ˈö gagade ˈö Biblö ˈgü ˈö ꞊mɔɔn˗ ˗bha ˈö ü ˗takun ˗a ˈka kö ˈü ꞊suawo ˗nu ˈwo ˗zlanwo ˗nu ˈgü ˗an dɔ kö ˈü bo ˈdhaŋ bho ˗sü ˈka ˗an ˈˈdhiʋ̈, ˗bhö ˈwɔn ˗gɔ ˗nu ˈwo yö ˈko ˈˈpiʋ̈ ˈö ˗an ˗gɔ ˗yö ˗kë « Des mensonges qui empêchent d’aimer Dieu » ˈka bhë, ˗an ˗wo pö.

ˈMën ˗kë ˈö ˗Zlan ˈdhö˗ ˈˈpiʋ̈ kö ˈa gagade dɔ?

 ˗Zlan ˗ya ˈˈpiʋ̈ kö ˈü dha. ˗A ˗wɔn ˈgü ü ˗bhawɔn ˗yö gagade ˈö ˗gban ˗a ˗bha ˗a draansü ˗bha. (1 Timote 2:4) ˈBha ˗Zlan ˗bha ˈtɔŋ˗ ˗nu ˈwo ˗gban ˈwɔn ˗së waa ˈwɔn yaa ˗an ˗bha ˗an draanˈˈ, ˈgo mü ˈzü ˈbha ˗an ˈkun, ü ˗dho kë ˗a ˈˈtɔŋdë ˈka. (Psaume 15:1, 2) ˗Zlan ˗yö Yesu ˗bɔ ˈˈsɛ ˗ta kö ˗yö mɛn ˗nu ˗takun gagade dɔ ˗sü ˗bha. ˗Zlan ˗ya ˈˈpiʋ̈ kö ˈkwa kwa ˈˈtʋ ˈto Yesu ˗bha mɛn ꞊klaŋkë ˗wo ˗nu ˗bha.—Matiö 17:5; Zan 18:37.

˗Zlan ˗dho ꞊sua bho ˈˈshia˗ yi ˈbha ˈka ˗ee?

 ꞊Ii! Mɛn ˗nu ˗wa ꞊sua kë mɛn ˈˈwɛɛ ˗nu ˗gɔ kö ˗wo ˗an ˗ta ˗bhö, ˗a ˗san ˗yö ˗Zlan ˗kë. ˗Ya ˈˈplünŋ ˗bho ꞊dhɛ ˗yö ˗dho mɛn ˗nu ˈö ˈwaa˗ ˈˈpiʋ̈ ˈwo wo ꞊kwaa ꞊sua ˗zü ˗an bho ˈˈshia. (Psaume 5:6) ˗Zlan ꞊yaa˗ kë ˈˈdhʋ̈, ˗wo ˈö yö ˗dho ˗yökodhiʋ̈: «Mɛn ˗nu ˈö ˈwo gagade pö ˗wo ˗dho ˗tosɛta kë yi ꞊gban ˈka.»—Proverbes 12:19.