Yɛlɛ Noba Naŋ Kanna Te Gama Naŋ Maŋ Soorɔ
Nembuo la a “pɔge” na Aizeeya 60:1 naŋ yel o yɛlɛ na, ka sobuoŋ oŋ “vaa iri” a vɛŋ ka o “kyaanee kyaaŋ”?
Aizeeya 60:1 kannɛɛŋ ka: “Vaa iri, Oo pɔge, vɛŋ ka ho kyaanee kyaaŋ, bonso ho kyaanee na waɛ la. Jehoova gyeremɛ na kyaana eŋnɛ boŋ.” A sɛgre poɔ yɛlɛ zaa wuleeŋ ka a “pɔge” la Zaayɔŋ, bee Gyɛruzɛlɛm, be da la Gyuuda teŋkpɛŋ na. a (Aiz. 60:14; 62:1, 2) Gyɛruzɛlɛm are ko la a Izerayɛl paaloŋ zaa. Te na nyɛɛ soorebie ayi ŋa nɔɛ iribo a kyaare a sɛgre ŋa: A dɛndɛŋ soba, bo saŋa ane sobuoŋ ka Gyɛruzɛlɛm “vaa iri” a vɛŋ ka o kyaanee kyaaŋ? Ayi soba, ka lɛ Aizeeya yelbie na nyɛɛ eebo soseɛlee kaŋa poɔŋ te saŋa ŋa bee?
Bo saŋa ane sobuoŋ ka Gyɛruzɛlɛm “vaa iri” a vɛŋ ka o kyaanee kyaaŋ? Gyɛruzɛlɛm ane a ŋmenpuoredie da leɛ la dabore gaŋ, kyɛ ka a Gyuumine da be Baabilɔŋ gbaŋgbaaloŋ poɔŋ yuomo 70. Kyɛ saŋa na a Miid deme ane a Peerisiya deme naŋ da wa zɔɔtoɔ̃ Baabilɔŋ na, a Izerayɛl biiri naŋ da be Baabilɔŋ paaloŋ na da nyɛ la a vuo ka ba leɛ gaa ba paaloŋ a lɛ te puoro Jehoova. (Eez. 1:1-4) A yi yuoni 537 B.C.E. piilee na, a Izerayɛl biiri naŋ taa yelmennoŋ a yi a bale 12 poɔ na zaa da eɛ lɛ. (Aiz. 60:4) Ba da piileeŋ a ire sarekare korɔ Jehoova, a dire a tige, a da leɛ piili meɛrɛ a ŋmenpuoredie meŋ. (Eez. 3:1-4, 7-11; 6:16-22) Jehoova gyeremɛ na da lɛ piileeŋ a kyaana Gyɛruzɛlɛm eŋɛŋ, lɛ wuleeŋ ka o da piili kyaanɛɛ Naaŋmen noba na eŋɛŋ. Lɛ da vɛŋɛɛŋ baŋ meŋ wa e kyaanee ko a paalonne naŋ da ba puoro Jehoova na.
Kyɛ Aizeeya daŋyelbo na kyɛlee la da nyɛ eebo a lɛ saŋa na. A Izerayɛl biiri yaga zie zaa da ba gɛrɛ nimitɔɔre a erɛ yɛlɛ Jehoova naŋ boɔrɔ. (Niih. 13:27; Maal. 1:6-8; 2:13, 14; Mat. 15:7-9) A puoriŋ, ba gba da zagrɛɛ Yezu Krista naŋ e a Mɛzaaya bare. (Mat. 27:1, 2) Yuoni 70 C.E. poɔŋ, ba da lɛ sãã la Gyɛruzɛlɛm ane a ŋmenpuoredie gbɛre buyi soba.
Jehoova da daŋyel biŋeeŋ ka a yɛlɛ ŋa na eŋ. (Daan. 9:24-27) A pɛlɛɛŋ ka a da ba e o poboɔbo ka Gyɛruzɛlɛm naŋ be a donɛɛ zuŋ na paale a daŋyelbo ŋa zaa naŋ be Aizeeya 60 na.
Ka lɛ Aizeeya yelbie na nyɛɛ eebo soseɛlee kaŋa poɔŋ te saŋa ŋa bee? Ɛɛ, kyɛ o meŋ la kyaarɛɛ pɔge zaala kaŋa yɛlɛ—“a Gyɛruzɛlɛm naŋ be sazuŋ na.” A bitontona Pɔɔl da sɛgɛɛŋ a kyaare a pɔge ŋa ka: “Ona la te ma.” (Gal. 4:26) A Gyɛruzɛlɛm naŋ be sazuŋ na are ko la Naaŋmen laŋnoɔre puoruu naŋ be sazuŋ na, a laŋnoɔre puoruu ŋa la o malekere na zaa naŋ be sazuŋ a dire yelmennoŋ koroo na. O “biiri” la Yezu ane a 144,000 naŋ e Kristabiiri ba naŋ sɔ naaloŋ kãã ka ba do sazu na, ba meŋ taa la a teɛretɔ na Pɔɔl meŋ naŋ da taa na. Bana la a “paali pɛgeyiruu”—“a Naaŋmen noba Izerayɛl.”—1 Pit. 2:9; Gal. 6:16.
Sobuoŋ ka a Gyɛruzɛlɛm naŋ be sazuŋ na “vaa iri” a vɛŋ ka o “kyaanee kyaaŋ”? O eɛ lɛ a tuuro o biiri naŋ be a donɛɛ zuŋ, bana la baŋ sɔ sazu naaloŋ kãã na. De ba yɛlɛ ŋa manne neŋ yɛlɛ naŋ be a daŋyelbo naŋ be Aizeeya zuri 60 na a nyɛ lɛ a naŋ yitaa.
Saŋa na a bitontonee zaa naŋ da wa kpi na, a Kristabiiri da kpɛ la ligroŋ poɔ bonso zirii wuluu da leɛ porɛɛŋ yaga zaa, azuŋ a da fɛrɛɛŋ ka a Kristabiiri na ba naŋ sɔ naaloŋ kãã na “vaa iri.” (Mat. 13:37-43) A lɛ saŋa na, ba da eɛ gbaŋgbaare Baabilɔŋ Kpoŋ naŋ e a donɛɛ zaa zirii puoruu na poɔŋ. A noba ba naŋ sɔ naaloŋ kãã na da eɛ gbaŋgbaare a te ta “a teŋɛ baaroo saŋa,” a lɛ saŋa na piileeŋ yuoni 1914. (Mat. 13:39, 40) Yuoni 1919 puoriŋ, ba da faa la ba menne yi zirii puoruu poɔŋ ka ba kyaanee piili kyaana a yi baŋ da moɔ̃ niŋe a moɔlɔ a Naaloŋ duorisoŋ na. b A yuomo yaga ŋa zaa poɔŋ, noba yaga naŋ yi paalonne yaga wa kpɛ la a kyaanee poɔ, ka a Naaŋmen Izerayɛl biiri na mine naŋ kyɛre na meŋ poɔ—bana la a “namine” na Aizeeya 60:3 naŋ yel ba yɛlɛ na.—Yel. 5:9, 10.
Nendaarekaŋa naŋ waana, Kristabiiri ba naŋ sɔ naaloŋ kãã na kyaaŋɛɛ kyaanee naŋ yi Naaŋmen zie yaga zaa a gba gaŋ pampana. Sobuoŋ? Ka ba naŋ wa kpi, ba maŋ te poɔ la a “Gyɛruzɛlɛm Paalaa” na poɔŋ, bee a Krista pɔg-paalaa naŋ e a 144,000 na, ba laŋ eɛ namine ane ŋmenpuore wedeɛreba.—Yel. 14:1; 21:1, 2, 24; 22:3-5.
A Gyɛruzɛlɛm Paalaa na na soŋeŋ yaga zaa ka a daŋyelbo naŋ be Aizeeya 60:1 na nyɛ eebo. (De Aizeeya 60:1, 3, 5, 11, 19, 20 manne ne Yel-iriwulaa 21:2, 9-11, 22-26.) Aŋa lɛ takoreŋ saŋa Izerayɛl biiri naaloŋ diibu naŋ da maŋ be Gyɛruzɛlɛm na, lɛ meŋ la a Gyɛruzɛlɛm Paalaa na, ba na poɔ la Yezu eŋɛŋ a dire naaŋ a donpaalaa poɔŋ. Sobuoŋ ka a Gyɛruzɛlɛm Paalaa na “yi Naaŋmen zie sazuŋ a sigre waana”? O na eɛ yɛlɛ mine naŋ na nyɛ kpeɛ̃o aŋdonɛɛ zaa zuŋ. Nensaaleba naŋ zoro Naaŋmen naŋ yi paalonne zaa na “kyɛnɛ ne la a o veɛloŋ.” Ba koŋ lɛ erɛ yelfaare, ba koŋ lɛ kpiire meŋ. (Yel. 21:3, 4, 24) Yɛlɛ naŋ na yi a poɔŋ wa la ka “yɛlɛ zaa Naaŋmen naŋ da . . . yeli na nyɛɛ eebo,” aŋa lɛ a daŋyele Aizeeya ane o taaba mine naŋ yel na. (Tom. 3:21) A yɛlɛ da piili nyɛrɛɛ eebo saŋa na Krista naŋ da wa leɛ Naa na, a na nyɛɛ eebo baare o Yuoŋ Turi Naaŋ Diibu baaraa saŋa.
a Aizeeya 60:1 poɔŋ, a Donpaalaa Kɔkɔleɛroo Sɛge Forifori Baabole na de la a yelbiri “pɔge” toŋ ne toma kyɛ o ba de “Zaayɔŋ,” bee “Gyɛruzɛlɛm” toŋ ne toma, bonso a Hiburu yelbie naŋ are ko “vaa iri” a vɛŋ ka o “kyaanee kyaaŋ” na, pɔgeba baŋ maŋ de a lɛ yelbie ŋa are ko, ona meŋ la baŋ lɛ boɔle ka “ho” a sɛgre poɔŋ na.
b A yelmeŋɛ puoruu leɛ wa bebeŋ yuoni 1919 poɔŋ aŋa lɛ Iziikiel 37:1-14 ane Yel-iriwulaa 11:7-12 naŋ yel na. Iziikiel da daŋyel biŋeeŋ ka Kristabiiri zaa ba naŋ sɔ naaloŋ kãã na kpɛ la gbaŋgbaaloŋ poɔ a kɔɔre sɛre kyɛ wa nyɛ someŋɛ. A daŋyelbo naŋ be a Yel-iriwulaa gane poɔŋ na kyaarɛɛ siiloŋ poɔ dɔgebo na baŋ da leɛ dɔge te yɔɔmine na baŋ sɔ naaloŋ kãã baŋ da deɛrɛ a puoruu weɛ na. Ba da nyɔge baŋ eŋ nempɔgedieŋ ka lɛ vɛŋ baŋ da ba lɛ tonɔ ba puoruu toma na wagre fẽẽ kaŋa poɔŋ. Yuoni 1919 poɔŋ, ba da iri baŋ ka ba e “a gbaŋgba-bivelaa ane yɛmbaŋna.”—Mat. 24:45; kanne Jehoova Vɛŋɛɛŋ Ka Yelmeŋɛ Puoruu Leɛ Wa Bebe!, gam. 118.
