Bito Bibe̱l e makwaleano̱—Nje myango mabu mi mokwe̱le̱no̱ biso̱ e?

OKA

Jalabe̱ la Bibe̱l

Bibe̱l e be̱n myango ma bito jita me ná mokwe̱le̱ biso̱ belēdi ba mweńa. (Roma 15:4; 2 Timoteo 3:16, 17) Din dongo di makwalea son ońola bō̱ babu. Jita labu be nde byembilan ba bwam o bupe̱. Bane̱ be nde byembilan di s’angame̱nno̱ bupe̱.—1 Korinto 10:11; Bonahebe̱r 6:12.

Abigail

Nja nu ta Abigail e? Abigail a ta nde a babe̱ na mot’a m’bwaṅ mō̱ nde nu ta bobe nu ta nu belabe̱ ná Nabal. To̱ na nika, Abigail a ta a bola mambo na dibie̱, a ta pe̱ a be̱ne̱ sibise̱ la ńolo. A ta nde muto nu do̱li jita nde nu be̱n pe̱ bede̱mo bena Yehova a to̱ndino̱.—1 Samuel 25:3.

Nje a bolino̱ e? Abigail a bolane̱ dibie̱ na so̱ṅtane̱ o bwam ba jeka mbeu a ńolo po̱. Mo̱ na mom’ao Nabal ba ta nde ba ja o mundi mwena David nu timbi Kiṅ’a Israel ombus’a ponda a tano̱ a wutame̱ ke̱ a mańa mīla. Niponda ńe̱se̱ David na bato bao ba tombise̱no̱ o mu mundi, ba tati dibemba la Nabal te̱nge̱ne̱ bato ba jiba. Nde ponda david a lomno̱ bato bao o jakwane̱ Nabal son a da, Nabal a bangi nde. Na David a linga jita! A no̱ngo̱ bato bao o wala bwa Nabal na ndabo ao ńe̱se̱.—1 Samuel 25:10-12, 22.

Ba langwedino̱ Abigail nje mom’ao a bolino̱, a pomane̱ nde bola lambo. A boli baboledi bao da ná balane̱ mo̱ David na bato bao, nde mo̱me̱ne̱ pe̱ ala dongame̱ne̱ David o baise̱ mo̱ milakisan. (1 Samuel 25:14-19, 24-31) Enno̱ mambo mena Abigail a wanno̱, sibise̱ lao la ńolo, nde a senga pe̱ malea mao ma dibie̱, David a so̱ṅtane̱ ná Loba nde a bolane̱ nu muto o jeka mbeu a ńolo. (1 Samuel 25:32, 33) Ombusa nika, Nabal a wedi, na Abigail a timba munj’a David.—1 Samuel 25:37-41.

Nje myango ma Abigail mi mokwe̱le̱no̱ biso̱ e? To̱ná Abigail a tano̱ a do̱lo̱ a be̱ pe̱ m’bwaṅ, a si ta a langa mo̱me̱ne̱ bonde̱ne̱. O bwam ba kombe̱ musango, a ta a be̱be̱ o baise̱ milakisan ońola lambo lena a si bolino̱. Abigail a lembe̱ be bete̱medi na pī, dibie̱, ngiń’a mulema, nde na so̱ntane̱ pe̱.

▸ O mapula te̱ bata bia mambo mape̱pe̱ jombwea Abigail, ombwa mulopo m’ekwali “Elle a agi avec prudence.”

Debora

Nja nu ta Debora e? A ta nde muto̱ped’a mudī ńa muto ńena Yehova, Loba la Israel, a bolane̱no̱ o tombe̱le̱ tumba jemea lao. Loba a bolane̱ pe̱ mo̱ o sangilane̱ myambo oteten a Bonaisrael.—Bakaisedi 4:4, 5.

Nje a bolino̱ e? Muto̱ped’a mudī Debora a sue̱le̱ beboledi ba Loba na ngiń’a mulema. Owas’a bediedi ba Loba, a baise̱ Barak ná a die̱le̱ milo̱ṅ ma bila ma Israel te̱nge̱ne̱ basingendi babu Bonakanaan. (Bakaisedi 4:6, 7) Ponda Barak a baise̱no̱ Debora ná ale na mo̱, a si bo bo̱ngo̱, a bupe̱ nde mo̱ na jemea le̱se̱.—Bakaisedi 4:8, 9.

Ombusa Loba bola Bonaisrael bebukedi bende̱ne̱ omo̱ń a basingedi babu, Debora lule̱ dongo diwo̱ la mwenge a lo̱ngino̱ na Barak ońola mambo matombi. O mu mwenge a kwali nje Yael, mut’a ngiń’a mulema nupe̱pe̱, a bolino̱ yongwane̱ o buka bwemba te̱nge̱ne̱ Bonakanaan.—Bakaisedi, bepasi 5.

Nje myango ma Debora mi mokwe̱le̱no̱ biso̱ e? Debora a ta a le̱le̱me̱ o bolea bane̱, a be̱ pe̱ ngiń’a mulema. Debora a ta be̱ ome̱le̱ bato bape̱pe̱ o bola nje e bwam o miso̱ ma Loba. A ta pe̱ a sesa babo̱ na mulema mwe̱se̱ ke̱ ba boli nika.

▸ O mapula te̱ bata bia mambo mape̱pe̱ jombwea Debora, ombwa mulopo m’ekwali “Je me suis levée, telle une mère en Israël.”

Dalila

Nja nu ta Dalila e? Dalila a ta nde muto mō̱ ńena Simson, mukaised’a Israel a tano̱ a to̱ndo̱.—Bakaisedi 16:4, 5.

Nje a bolino̱ e? Dalila a no̱ngi mo̱ni mwena badiedi ba bonafilitia ba bolino̱ mo̱ ná andise̱ babo̱ Simson, ńena Loba a tano̱ a bolane̱ o sunga Bonaisrael te̱nge̱ne̱ Bonafilistia. Bonafilistia ba si ta ba we̱le̱ buka Simson ońolana Loba a a bola mo̱ ngińa ninde̱ne̱. (Bakaisedi 13:5) Badiedi babu ba baise̱ so̱ nde Dalila ná ongwane̱ babo̱.

Ba boli Dalila mo̱ni ná a wase bia owe̱ni ngiń’a Simson ninde̱ne̱ e mawano̱. Dalila emedi mu mo̱ni, na mo̱ a wasa natē̱ a so̱ṅtane̱ a bia esok’a Simson. (Bakaisedi 16:15-17) Ombus’a alo nde o langwea Bonafilistia y’esoka, na babo̱ ba damea Simson nde ba we̱le̱ mo̱ o beboa—Bakaisedi 16:18-21.

Nje myango ma Dalila mi mokwe̱le̱no̱ biso̱ e? Dalila e nde eyembilan a bobe di s’angame̱nno̱ jembilane̱. Mukobo mu tute̱le̱ mo̱ o wo̱ndo, a si ta jemea ombasanedi ma muboled’a Yehova, nde a bolane̱ pe̱ mo̱ bobe.

Este̱r

Nja nu ta Este̱r e? Este̱r a ta nde ngo̱n a Bonayuda mō̱ ńena Ahasveros, kiṅ’a Persia e po̱sino̱ o be̱ munj’ao.

Nje a bolino̱ e? Kiṅ’a muto Este̱r a bolane̱ doi lao o jeka ná tumba lao di si bo̱ diboma. A so̱i ná byanedi bō̱ be busisabe̱ ná Bonayuda be̱se̱ ba maje̱ o mindi mena Kiṅ’a Persia e tano̱ ńanea bangame̱n bwabe̱. Mu mwano ma bobe mu ta nde mu wa na moto mō̱ nu ta belabe̱ ná Haman, ńena nu ta nu be̱ne̱ epol’a boso omo̱ń a banedi ba kiṅe̱ be̱se̱. (Este̱r 3:13-15; 4:1, 5) Na jongwane̱ la munasango ao ńa bana na bana nu ta nu belabe̱ ná Mardokai, Este̱r a sambwe̱le̱ mu mwano̱ ombwa mom’ao kiṅe̱ Ahasveros, to̱ná a wusano̱ bo̱lo̱ne̱ longe̱ lao. (Este̱r 4:10-16; 7:1-10) Na kiṅe̱ Ahasveros a bola Este̱r na Mardokai wonja o busise̱ byanedi bepe̱pe̱ be mabole̱ Bonayuda epolo o lingea babo̱me̱ne̱. Na Bonayuda ba buka basingedi babu.—Este̱r 8:5-11; 9:16, 17.

Nje myango ma Este̱r mi mokwe̱le̱no̱ biso̱ e? Kiṅ’a muto Este̱r, a die̱le̱ biso̱ eyembilan moto ńe ngiń’a mulema, nu sibise̱ la ńolo, na nu bi pe̱ myoyo mao. (Myenge 31:24; Filipi 2:3) To̱ná a tano̱ muto nu do̱li na nu be̱n pe̱ epol’edube, a baise̱ bato bape̱pe̱ malea, a kasa pe̱ jongwane̱. A ta nde a kwalisane̱ mum’ao n’edube na muyao, nde na boke̱nju bwe̱se̱. Ponda Bonayuda ba so̱be̱no̱ o bete̱medi ba ndutu, na ngiń’a mulema ńe̱se̱ Este̱r a boli ná a biane̱ ka mō̱ ńabu.

▸ O mapula te̱ bata bia mambo mape̱pe̱ jombwea Este̱r, ombwa mulopo m’ekwali “Elle a risqué sa vie pour le peuple de Dieu” na “Sage, courageuse et prête à se sacrifier.”

Eva

Nja nu ta Eva e? Eva nde e mut’a boso nu wekabe̱, mo̱ pe̱ nde e mut’a boso Bibe̱l e makwaleano̱.

Nje a bolino̱ e? Eva a kwe̱m mbend’a Loba ni ta na bwē. Kapo̱ ka mom’a Adam, Eva a wekabe̱ ke̱nge̱nge̱, a ta pe̱ wonj’a o po̱so̱ mambo, nde a ta pe̱ ńai eno̱ ná embilane̱ bede̱mo ba Loba ka ndolo na dibie̱. (Bebotedi 1:27) Eva a ta a bia ná Loba a kwalane̱ Adam ná ba dedi te̱ epum’a bwele bō̱ te̱nge̱, ba me̱nde̱ wo̱. To̱ na nika Satan a keki o lo̱ndo̱ mo̱ ná a si me̱nde̱ wo̱. O pe̱n n’esungu, Satan a tute̱le̱ mo̱ o jo̱nge̱le̱ ná a me̱nde̱ be̱ne̱ longe̱ la bwam yete̱na a kwe̱m mbend’a Loba. Na mo̱ a da epuma nde a bola pe̱ me̱se̱ ná mom’ao pe̱ a de mo̱.—Bebotedi 3:1-6; 1 Timoteo 2:14..

Nje myango ma Eva mi mokwe̱le̱no̱ biso̱ e? Eyembilan a Eva e malee̱ ná ye bobe o bongwa bepuledi ba bobe. To̱ná mbend’a Loba e tano̱ ná bwē, Eva ese̱le̱ ná ńo̱ng’a lambo a si tano̱ a be̱ne̱ bwam e ńake o mulema mao.—Bebotedi 3:6; 1 Yohane 2:16.

Hana

Nja nu ta Hana e? Hana a ta nde munj’a Elkana, na ńango a Samuel nu timbi muto̱ped’a mudī nunde̱ne̱ o Israel ńa kwaṅ.—1 Samuel 1:1, 2, 4-7.

Nje a bolino̱ e? Nika a si tano̱ a we̱le̱ ya bana, Hana a wasi nde lo̱ko̱mea ombasanedi ma Loba. Mom’ao Elkana a ta ba bito baba. Penina nune̱ munj’ao a ta a be̱ne̱ bana; nde Hana mo̱ a jai ewombe̱ pond’a bwaba ombus’a diba lao. Penina a ta a ko̱lo̱ngo̱ne̱ yo̱ye̱ Hana, nde Hana a ta nde a kane̱ Loba o bwam ná a kuse lo̱ko̱mea. A kakane̱ Loba ná a boli te̱ mo̱ mun’a mome, a me̱nde̱ bola mo̱ nu muna, na nun a boleye o muno̱ko̱ ma Loba, wuma Bonaisrael ba tano̱ bowe̱.—1 Samuel 1:11.

Loba alabe̱ muka ma Hana, na mo̱ a ya Samuel. Hana a londe̱ kakane̱ lao, aloma Samuel ná ale bolea o muno̱ko̱ ke̱ a dia nde son a muna. (1 Samuel 1:27, 28) Mbu te̱ a ta a bangwea mo̱ son a loki, nde a wanea mo̱ mo̱. Na ponda, Loba a boli ná Hana a ye bana batanu bape̱pe̱—bome balalo na bito baba.—1 Samuel 2:18-21.

Nje myango ma Hana mi mokwe̱le̱no̱ biso̱ e? Mika mena Hana a tano̱ a kane̱ na mulema mwe̱se̱ mongwane̱ mo̱ o we̱lisane̱ bete̱medi ba ndutu. Muka mao ma masoma mu maso̱be̱ 1 Samuel 2:1-10 mu malee̱ dube̱ dinde̱ne̱ a tano̱ a be̱ne̱ye̱ Loba.

▸ O mapula te̱ bata bia mambo mape̱pe̱ jombwea Hana, ombwa mulopo m’ekwali “Elle s’est confiée à Dieu.”
▸ O mapula te̱ bata bia ońola nje Loba ese̱le̱no̱ diba la mbań oteten a tumba lao o mińa ma kwaṅ, ombwa mulopo m’ekwali “Dieu approuve-t-il la polygamie?”

Yael

Nja nu ta Yael e? Yael a ta nde munj’a Hebe̱r, ńena nu si ta mot’a tumba la Israel. Yael a lingedi tumba la Loba na ngiń’a mulema ńe̱se̱.

Nje a bolino̱ e? Yael a lee̱le̱ ngń’a mulema ponda Sisera, mwaned’a milo̱ṅ ma bila ma Bonakanaan, a po̱ino̱ o yal’ao. Sisera a ta nde a wa bo̱lo̱ne̱ bwemba te̱nge̱ne̱ Israel, a ta so̱ a wasa wuma wumse̱ na ya wutame̱. Na Yael a bele̱ mo̱ ná a ye wutame̱ o muno̱ko̱ mao, na wumse̱ pe̱. Ke̱ Sisera e o ko̱ iyo̱, na Yael a bwa mo̱.—Bakaisedi 4:17-21.

Nje Yael a bolino̱ e londe̱ nde eding’a muto̱ped’a mudī Debora e ta e bīse̱ ná: “Yehova a mabake̱ nde Sisera o mā ma muto.” (Bakaisedi 4:9) Ońola nje a bolino̱, Yael a sesabe̱ “buka bito be̱se̱ ba maje̱ o mino̱ko̱.”—Bakaisedi 5:24.

Nje myango ma Yael mi mokwe̱le̱no̱ biso̱ e? Yael a boli lambo nde a lee̱le̱ pe̱ ngiń’a. Myango mao mi malee̱ ná Loba e ná a die̱le̱ mambo ka nje te̱ a mapulano̱ o bwam ná a londise̱ bedinge̱ bao.

Isebe̱l

Nja nu ta Isebe̱l e? Isebe̱l a ta nde munj’a Ahab, Kiṅ’a Israel po̱. A si ta ngo̱n’a Israel, a si ta pe̱ to̱ a bolea Yehova. A ta nde owe̱ Baal, loba la Bonakanaan.

Nje a bolino̱ e? Kiṅ’a muto Isebe̱l a ta be̱ a banda bane̱, a ta pe̱ njo na bobe. A ta a sue̱le̱ jowe̱ la Baal na beboledi ba mbamba ba di jowe̱. A wasi pe̱ o mulemlem a ponda o bo̱le̱ jowe̱ la Yehova, Loba la mbale̱.—1 Kiṅe̱ 18:4, 13; 19:1-3.

Isebe̱l a ta be̱ a wo̱ndo̱ nde a bwa pe̱ bato na londise̱ bepuledi bao. (1 Kiṅe̱ 21:8-16) Ka nje te̱ Loba a tano̱ a bīse̱, a wedi kwed’a bobe, ba si pule̱ pe̱ to̱ mo̱.—1 Kiṅe̱ 21:23; 2 Kiṅe̱ 9:10, 32-37.

Nje myango ma Isebe̱l mi mokwe̱le̱no̱ biso̱ e? Isebe̱l e nde eyembilan a bobe di sangame̱nno̱ bupe̱. A ta a bola mambo ma bobe jita, a be̱ne̱ pe̱ beboledi ba mbamba kańena a timbi nde biane̱ ka muto nu si bi iso̱n, na nu be̱n longe̱ la mbindo o midī me̱se̱.

Lea

Nja nu ta Lea e? Lea a ta nde munj’a Yakob ńaboso. Munańango ńa muto nusadi, Rahel, pe̱ nde a ta munj’a Yakob nu londe̱ baba.—Bebotedi 29:20-29..

Nje a bolino̱ e? Lea a yeledi Yakob bana mutoba. (Rut 4:11) Rahel nde Yakob a pulino̱ ba, seto̱ Lea. Nde sango abu nu ta nu beleabe̱ ná Laban, a boli nde ná Lea nde a no̱nge epol’a Rahel. Ponda Yakob a so̱ṅtane̱no̱ ná ba lemse̱ mo̱, na mo̱ a baise̱ Laban beteledi. Laban a timbise̱le̱ nde mo̱ ná o mbia mabu ba si ko̱lo̱ngo̱ne̱ o loma mun’a muto ńa mutu o diba obiana ńa mutudu. Woki po̱ ombusa nika, na Yakob a ba Rahel.—Bebotedi 29:26-28.

Yakob a ta a to̱ndo̱ Rahel buka Lea. (Bebotedi 29:30) Lea a ta so̱ a ko̱no̱ne̱ munańango ońolana Yakob ta a to̱ndo̱ mo̱ jita, babo̱ babane̱ ba ta pe̱ ba te̱nge̱ne̱le̱ pond’a ye̱se̱. Loba e̱n ndutu Lea tano̱ a be̱ne̱, na mo̱ a bola ná a ye bana ba bome mutoba na mun’a muto mō̱.—Bebotedi 29:31.

Nje myango ma Lea mi mokwe̱le̱no̱ biso̱ e? Lea a wasi jongwane̱ la Loba o muka, a s’ese̱le̱ pe̱ to̱ ná bete̱medi ba ndutu a tano̱ a be̱ne̱ o ndabo’ao ńa diba beke mo̱ o je̱ne̱ jongwane̱ la Loba. (Bebotedi 29:32-35; 30:20) Myango ma longe̱ lao mi malee̱ ná diba la mbań di be̱n mitakisan minde̱ne̱, eboledi ewo̱ Loba a se̱le̱no̱ jese̱le̱ ońola ponda po̱. Bete̱sedi ba Loba jombwea diba be nde ná mome mō̱ te̱ a ba nde muto mō̱ na mune.—Mateo 19:4-6.

▸ O mapula te̱ bata bia mambo mape̱pe̱ jombwea Lea, ombwa mulopo m’ekwali “Deux sœurs tourmentées qui ont “bâti la maison d’Israël.”
▸ O mapula te̱ bata bia ońola nje Loba ese̱le̱no̱ diba la mbań oteten a tumba lao o mińa ma kwaṅ, ombwa mulopo m’ekwali “Dieu approuve-t-il la polygamie ?

Marta

Nja nu ta Marta e? Marta a ta nde munańango a Lasaro na Maria, babo̱ balalo ba ta nde ba ja o Betańa, mundi musadi mō̱ mu ta be̱be̱ na Yerusalem.

Nje a bolino̱ e? Marta a ta a nde diko̱m la Yesu la bwam, Yesu “a ta a to̱ndo Marta na munnango na Lasaro pe̱.” (Yohane 11:5) Marta a ta muyao. Buńa bō̱ Yesu a pe̱pe̱le̱no̱ babo̱, Maria a po̱si o sengane̱ Yesu nde Marta mo̱ ta a walame̱ne̱ na bebolo ba ndabo. Marta a to̱kisane̱ so̱ Maria omboa Yesu ná a langweye mo̱ ná ongwane̱ mo̱. Na muyao mwe̱se̱, Yesu ongwane̱ Marta ná a po̱ngulane̱ mbad’ao ńa je̱ne̱ mambo.—Lukas 10:38-42.

Ponda Lasaro a kwedino̱ diboa, Marta na munańango ba lomedi Yesu mwe̱ndi, na dipita ná a me̱nde̱ po̱ jese̱ Lasaro bwam. (Yohane 11:3, 21) Nde Lasaro a wedi. Nje Marta a langwedino̱ Yesu ke̱ be o kwala e lee̱ ná a ta a dube̱ dikaki la bepumbwedi di maso̱be̱ o Betiledi, na ná a ta pe̱ mbaki ná Yesu e ná a pumbwe̱le̱ Lasaro.—Yohane 11:20-27.

Nje myango ma Marta mi mokwe̱le̱no̱ biso̱ e? Marta a ta a bola me̱se̱ o be̱ muyao. A ta a bia kasa mome̱le̱. A ta a kwala nje a mo̱nge̱le̱no̱ esibe̱ bo̱ngo̱, a ta pe̱ a lee̱le̱ dube̱ lao.

▸ O mapula te̱ bata bia mambo mape̱pe̱ jombwea Marta, ombwa mulopo m’ekwali “J’ai cru.”

Maria (ńango a Yesu)

Nja nu ta Maria e? Maria a ta nde eso̱mb’a ngo̱n a Bonayuda mō̱, a si ta a mábia mome ponda a yaino̱ Yesu, a no̱ngi nde deme̱ la mun’a Loba o mbad’a betańsedi.

Nje a bolino̱ e? Maria a boli jemea la Loba na sibise̱ la ńolo. A ta a wandabe̱ na Yosef ponda ange̱l e busedino̱ mo̱ nde e bīse̱ mo̱ ná a me̱nde̱ no̱ngo̱ deme̱, na ya Mesia ńena be̱se̱ ba tano̱ benge̱le̱ etum a ponda. (Lukas 1:26-33) A kasi mu m’bē̱ na mulema mwe̱se̱. Ombusa yabe̱ la Yesu, Maria na Yosef ba yai bana ba bome bane̱i na ba bito baba o bosadi bwe̱se̱. Maria a si bengi so̱ be̱ ngo̱ndedi. (Mateo 13:55, 56) To̱ná a kusino̱ edube ende̱ne̱, a si wasi to̱ buńa ná ba bole esese, a si baise̱ pe̱ to̱ ná bombweye mo̱ tobotobo, e be̱ o ponda ebol’a dikalo la Yesu, to̱ ponda ńena a tano̱ elong’a mwemba ma kriste̱n maboso.

Nje myango mao mi mokwe̱le̱no̱ biso̱ e? Maria a ta nde muto nu be̱n dube̱ dinde̱ne̱ na ńemedi na mulema mwe̱se̱ o bambe̱ m’bē̱ munde̱ne̱. A ta bia Betiledi ba bosangi bwam. E kwalabe̱ ná ponda a to̱pino̱ byala ba maso̱be̱ o Lukas 1:46-55, a tubi be̱be̱ ná mwaba ma bepasi ba Betiledi.

▸ O mapula te̱ bata bia mambo mape̱pe̱ jombwea Marta, ombwa mulopo m’ekwali “Une vie exemplaire riche d’enseignements.”

Maria (munańango a Marta na Lasaro)

Nja nu ta Maria e? Kapo̱ ka bonańango ao Lasaro na Marta, Maria pe̱ a ta nde diko̱m la Yesu la bwam.

Nje a bolino̱ e? Maria a lee̱le̱ jita la ngedi ná a be̱nedi Yesu, Mun’a Loba, edube. A ta mbaki ná Yesu a wusa jeka kwed’a munańango ao Lasaro, a ta pe̱ wa ponda Yesu a pumbwe̱le̱no̱ Lasaro. Munańango ao Marta a to̱kisane̱ mo̱ buńa bō̱ ná a jai nde o sengane̱ Yesu o mulopo ná ongwane̱ mo̱ o bola bebolo ba mboa. Nde Yesu a sesi Maria ná a we̱le̱ mambo ma mudī o epol’a boso.—Lukas 10:38-42.

Ngedi nipe̱pe̱, Maria a lee̱le̱ Yesu muyao o mbad’a tobotobo ponda a komno̱ “jo̱ki la mususedi munde̱ne̱” o mulopo na o myende mao ma Yesu. (Mateo 26:6, 7) Bato bō̱ bena be̱n nje Maria a bolino̱ ba sai nde mo̱ ná e nde ńamse̱ di jo̱ki. Nde Yesu a lingedi mo̱, a kwala ná: “Wuma na wuma te̱ min myango ma bwam mi me̱nde̱no̱ langwabe̱ o wase ńe̱se̱, nje nun muto a bolino̱ pe̱ e me̱nde̱ langwabe̱ o jo̱nge̱le̱ mo̱.”—Mateo 24:14; 26:8-13.

Nje myango ma Maria mi mokwe̱le̱no̱ biso̱ e? Maria a ta a be̱ne̱ dube̱ dinde̱ne̱. A ta nde a we̱le̱ jowe̱ la Loba o epol’a boso o longe̱ lao. Na sibise̱ la ńolo le̱se̱, a lee̱le̱ Yesu edube to̱ na nik’e no̱ngo̱ne̱no̱ mo̱ eyeka mo̱ni.

Maria ńa Magdala

Nja nu ta Maria ńa Magdala e? Maria ńa Magdala a ta nde mokwed’a Yesu mō̱ ńa jemea.

Nje a bolino̱ e? Maria ńa Magdala a ta nde mō̱ ńa bito bena ba ta ba die̱le̱ Yesu na bokwedi bao o malo̱ndo̱ mabu. A bolane̱ mabe̱ne̱ mao na mulema mwe̱se̱ o sue̱le̱ babo̱. (Lukas 8:1-3) A bupe̱ Yesu nate̱n’o su l’ebol’ao ya dikalo, a ta wa ponda Yesu a bwabe̱no̱. A kusi edube o be̱ o muso̱ngi ma bato baboso be̱n Yesu ombusa pumbwabe̱le̱ lao.—Yohane 20:11-18.

Nje myango mao mi mokwe̱le̱no̱ biso̱ e? Maria ńa Magdala a sue̱le̱ ebol’a dikalo la Yesu na mulema mwe̱se̱, a tiki pe̱ be̱ mokwed’a Yesu mō̱ ńa jemea nate̱n’o su.

Miriam

Nja nu ta Miriam e? Miriam a ta nde munańango a Mose na Aron. Mo̱ nde e muto̱ped’a mudī ńa muto ńaboso Bibe̱l e makwaleano̱.

Nje a bolino̱ e? Nika a tano̱ muto̱ped’a mudī, a tombe̱le̱ mye̱ndi ma Loba. A ta a be̱ne̱ epol’edube o tumba la Israel, a lo̱ngi pe̱ mwenge ma bebukedi mō̱ na bome ponda Loba a ńamsabe̱ milo̱ṅ ma bila ma Egipto o munja mu mole̱.—Bebusedi 15:1, 20, 21.

Ombusa ponda to̱ ininga, Miriam na Aron ba to̱po̱ne̱ Mose mińuńungu. Yen ebe kumba na eko̱n nde ba tute̱le̱le̱ babo̱ o bola nika. Na Loba “a senga nika,” nde a bola Miriam na Aron mo̱me̱le̱ ma ngińa. (Miso̱ngi 12:1-9) Loba a lomedi pe̱ Miriam diboa la mulo̱ngo̱, yen ebe ońolana mo̱ nde a ta o mulopo ma nje ba bolino̱. Ponda Mose a so̱so̱me̱ye̱no̱ Loba ná a bweye Miram ndedi, Loba a jese̱ mo̱ bwam. Ombus’a mińa samba a jaino̱ etum na bato be̱se̱ o njo̱m a diboa lao, Miriam a kusi wonja o timba oteten a m’boko ma tumba.—Miso̱ngi 12:10-15.

Bibe̱l e malee̱ ná Miriam a kasi beko̱kisedi. Bebwea ba mbu ombusa nika, Loba o̱nge̱le̱ tumba la Israel edube ende̱ne̱ Miriam a kusino̱ na ben byala ná: “Na lom Mose, Aron, na Miriam ná ba te̱me̱ wa oboso”—Mika 6:4.

Nje myango ma Miriam mi mokwe̱le̱no̱ biso̱ e? Myango ma Miriam mi malee̱ ná Loba a masenga nje baboledi bao ba makwalano̱ oteten abu. Mi mokwe̱le̱ pe̱ biso̱ ná di mapula te̱ bwese̱ Loba muńe̱nge̱, di s’angame̱n be̱ bato ba kumba na ba eko̱n, bede̱mo ba bobe beba be ná be tute̱le̱ o ńamse̱ dina la bane̱ bato̱.

Rahel

Nja nu ta Rahel e? Rahel a ta nde mun’a muto ńa Laban, mo̱ pe̱ nde a ta muto ńena Yakob a tano̱ a to̱ndo̱ jita.

Nje a bolino̱ e? Rahel a babe̱ na Yakob a yeyea pe̱ mo̱ bana ba bome baba, bena ba timbi be̱ o musongi ma bome ba longi 12 matumba ma Israel. Rahel a dongame̱n nde moto nu timbi mom’ao ke̱ e o bongwa mido̱ngi ma sango ao. (Bebotedi 29:9, 10) A ta a be̱ne̱ “mbad’a ńolo ńa bwam” diwengisan na Lea munańango ao ńa mutudu.—Bebotedi 29:17.

Yakob a timbi to̱ndo̱ Rahel jita, na mo̱ emea o bolea Laban mbu samba ná Rahel a timbe munj’ao. (Bebotedi 29:18) Nde, Laban a bolane̱ musomba ná Yakob a se̱le̱ nde ba Lea, ombus’a nika nde a kakane̱no̱ ná a me̱nde̱ pe̱ bola mo̱ Rahel.—Bebotedi 29:25-27.

Yakob a ta a to̱ndo̱ Rahel na bana bao ba bome baba buka Lea na bana bao. (Bebotedi 37:3; 44:20, 27-29) Nik’e wan penda oteten a ba bito babane̱.—Bebotedi 29:30; 30:1, 15.

Nje myango ma Rahel mi mokwe̱le̱no̱ biso̱ e? Rahel a we̱lisane̱ bete̱medi ba ndutu o ndabo ao ńa mbia esibe̱ bo̱lo̱ne̱ dipita ná Loba a me̱nde̱ senga mika mao. (Bebotedi 30:22-24) Myango mao mi malee̱ mitakisan bena diba la mbań di mawanano̱ o ndabo a mbia. Eyembilan a Rahel e mabonde̱ dibie̱ la bete̱sedi Loba a bolino̱ o bebotedi be nde ná, mome mō̱ angame̱n nde o ba muto mō̱ buka te̱.—Mateo 19:4-6.

▸ O mapula te̱ bata bia mambo mape̱pe̱ jombwea Rahel, ombwa mulopo m’ekwali “Deux sœurs tourmentées qui ont “bâti la maison d’Israël.”
▸ O mapula te̱ bata bia ońola nje Loba ese̱le̱no̱ diba la mbań oteten a tumba lao o mińa ma kwaṅ, ombwa mulopo m’ekwali “Dieu approuve-t-il la polygamie ?

Rahab

Nja nu ta Rahab e? Rahab a ta nde mut’a mbamba mō̱ nu ta nu ja o Yeriko, mundi mō̱ ma Kanaan, a timbi be̱ muboled’a Yehova Loba.

Nje a bolino̱ e? Rahab a wuti bato ba Israel baba bena ba ta ba lomabe̱ o jombwa mundi o diwuta. A boli nde nika ońolana a ta a senga ne̱ni Yehova, Loba la Israel, a sungino̱ tumba lao o Egipto na ombusa ponda pe̱ o mā ma Bonaamor.

Rahab a wanedi bato bena ba ta ba lomabe̱ jongwane̱, a so̱so̱me̱ye̱ ná ba tate mo̱ na mbia mao ponda ba me̱nde̱no̱ po̱ ńamse̱ Yeriko. Ba bato bemedi o bola nika, buka te̱ yete̱na a si langwedi to̱ moto nje e ta e wana babo̱, yete̱na mo̱ na mbia mao ba jai oteten a bolongi babu ponda Bonaisrael ba me̱nde̱no̱ ko̱ye̱ mundi, na yete̱na a pane̱ musinga ma muso̱no̱ mu mole̱ o winda ná ba we̱le̱ jemba bolongi bao. Rahab a bupe̱ be bediedi be̱se̱, mo̱ na mbia mao ba sungabe̱ ponda Bonaisrael ba bukino̱ Yeriko.

Ombusa ponda, Rahab a babe̱ ná mot’a tumba la Israel, a timba pe̱ mbamb’a kiṅe̱ David na Yesu Kristo.—Yosua 2:1-24; 6:25; Mateo 1:5, 6, 16.

Nje myango ma Rahab mi mokwe̱le̱no̱ biso̱ e? Bibe̱l e makwalea nde ońola Rahab ka eyembilan a bwam jangame̱nno̱ bupe̱. (Bonahebe̱r 11:30, 31; Yakobo 2:25) Myango mao mi malee̱ ná Loba e ndedi, a titi ndando, a manamse̱ pe̱ ba ba lakisane̱ mo̱ e be̱ to̱ njika longe̱ ba se̱le̱no̱ be̱ne̱.

▸ O mapula te̱ bata bia mambo mape̱pe̱ jombwea Rahab, ombwa mulopo m’ekwali “Elle a été “déclarée juste par des œuvres.”

Rebeka

Nja nu ta Rebeka e? Rebeka a ta nde munj’a Isak na ńango’a bana babu ba mawasa baba, Yakob na Esau.

Nje a bolino̱ e? Rebeka a boli jemea la Loba to̱ o bete̱medi ba ndutu. Buńa bō̱ ke̱ e o toa madiba o tongo, moto mō̱ a baise̱ mo̱ ná a bole mo̱ madiba ma ńo̱. Rebeka a pomane̱ nde bola mo̱ madiba nde a toa pe̱ madiba ońola kame̱l ao. (Bebotedi 24:15-20) Nu moto a ta nde muboled’a Abraham, a ta a dangwa etum a lo̱ndo̱ la bwaba o kusea Isak, mun’a Abraham muto. (Bebotedi 24:2-4) A ta a kane̱ ná a kuse bonam ba Loba. Ponda e̱nno̱ ná Rebeka a to̱ndi ebolo e pe̱ muyao, a so̱ṅtane̱ ná Loba alabe̱ muka mao, na ná mo̱ pe̱ nde po̱so̱be̱ ońola Isak.—Bebotedi 24:10-14, 21, 27.

Rebeka a sengino̱ nje e wan nu muboledi, emedi o wala na mo̱ o bwam ná a timbe munj’a Isak. (Bebotedi 24:57-59) Rebeka a yai mawasa ma bome. Loba a bīse̱ mo̱ ná mutudu Esau, a me̱nde̱ bolea mūtu Yakob. (Bebotedi 25:23) Ponda Isak a pulino̱ o bola Esau minam ma mun’a boso, Rebeka a boli nde me̱se̱ na me̱se̱ ná Yakob nde a kuse mi minam, ka nje te̱ mwano ma Loba a tano̱ a bia mu tano̱.—Bebotedi 27:1-17.

Nje myango ma Rebeka mi mokwe̱le̱no̱ biso̱ e? Rebeka a ta ede̱mo, ngiń’ebolo na muyao, be bede̱mo bongwane̱ mo̱ o be̱ ńango a bwam ońola bana bao, mut’a bwam, na muboled’a Loba la mbale̱.

▸ O mapula te̱ bata bia mambo mape̱pe̱ jombwea Rebeka, ombwa mulopo m’ekwali “Je suis prête à partir.”

Rut

Nja nu ta Rut e? Rut ta nde ngo̱n a Moab ńese̱le̱ maloba mao na mundi a yabe̱no̱ ná a timbe̱ muboled’a Yehobva o ekombo a Israel.

Nje a bolino̱ e? Rut a lee̱le̱ Naemi ńango ńa diba ndolo ninde̱ne̱. Naemi mwemba na mom’ao na bana babu ba bome baba, ba ta bala ja o mundi ma Moab ebanja jai ninde̱ne̱ e ta o ekombo a Israel. Bana bao ba bome ba bai bito o Moab, mō̱ a ta a belabe̱ ná Rut, nune̱ pe̱ Orpa. Ombus’a ponda to̱ ininga, mom’a Naemi na bana babu ba bome baba ba wedi, ba bito balalo ba dī so̱ nde mikusa.

Na Naemi a no̱ngo̱ bedomsedi ba timba o Israel, owe̱ni mwanjakolo mu tano̱ mu wa bo̱. Rut na Orpa pe̱ ba botedi o bupe̱ mo̱. Nde Naemi a baise̱ babo̱ ná ba timbe na mbia mabu. Na Orpa a bola nika. (Rut 1:1-6, 15) Rut mo̱, a tingame̱ nde na ńango ao ńa diba na jemea le̱se̱. A ta a to̱ndo̱ mo̱, a ta pe̱ a pula jowe̱ Yehova, Loba la Naemi.—Rut 1:16, 17; 2:11.

Kana Rut a tano̱ mukoa mwe jemea na ngiń’ebolo, a pomane̱ be̱ne̱ dina la bwam o Betlehem, mundi ma Naemi. Bede̱mo ba Rut be tapi Mot’a m’bwaṅ mō̱ nu ta nu belabe̱ ná Boas, na mo̱ a bola Rut da ońola mo̱ na Naemi. (Rut 2:5-7, 20) Ombus’a pond’a Rut a babe̱ na Boas nde a timba pe̱ mbamb’a Kiṅe̱ David ńa Yesu Kristo.—Mateo 1:5, 6, 16.

Nje myango ma Rut mi mokwe̱le̱no̱ biso̱ e? Kana a tano̱ a to̱ndo̱ Naemi na Yehova, Rut emedi o jese̱le̱ mbia na mundi mao. A ta a bol’ebolo na ngińa, a be̱ pe̱ jemea to̱ owas’a bete̱medi ba ndutu.

▸ O mapula te̱ bata bia mambo mape̱pe̱ jombwea Rut, ombwa mulopo m’ekwali “Là où tu iras j’irai” na “Une excellente femme.”

Sara

Nja nu ta Sara e? Sara a ta nde munj’a Abraham na ńango’a Isak.

Nje a bolino̱ e? Sara ese̱le̱ longe̱ la bwam o mundi munde̱ne̱ ma Ur ońolana a ta a dube̱ makaki mena Loba a tano̱ a bola mom’ao Abraham. Loba a ta a langwea Abraham ná asumwe̱ Ur nde ale o mundi ma Kanaan. Loba a ta kakane̱ mo̱ ná a me̱nde̱ bola ná a timbe tumba dinde̱ne̱. (Bebotedi 12:1-5) Yen ebe niponda ke̱ Sara a be̱n lambo ka 60 mbu. Botea o niponda, Sara na mom’ao ba timbi nde baje̱ o mino̱ko̱.

To̱ná di longe̱ di tano̱ longe̱ la ndutu ońola Sara, a sue̱le̱ Abraham ńena nu ta nu bupe̱ bediedi ba Loba. (Bebotedi 12:10, 15) Sara a jai ewombe̱ mimbu jita, nik’e takise̱ pe̱ mo̱ bwambi. Nde Loba a ta a kakane̱ Abraham ná a me̱nde̱ namse̱ mbot’ao. (Bebotedi 12:7; 13:15; 15:18; 16:1, 2, 15) Ombus’a ponda, Loba a bamse̱ Sara ná a me̱nde̱ yeya Abraham muna. Nik’e bolane̱ pe̱, Sara a timbi ya muna nde ke̱ a ta matomba ponda yadi. Ke̱ e lambo ka 90 mbu, mom’ao pe̱ 100 mbu. (Bebotedi 17:17; 21:2-5) Boli nde mun’abu dina ná Isak.

Nje myango ma Sara mi mokwe̱le̱no̱ biso̱ e? Eyembilan a Sara e mokwe̱le̱ biso̱ ná jangame̱n be̱ mbaki ponda ye̱se̱ ná Loba a me̱nde̱ londise̱ makaki mao, to̱ ye̱ne̱ne̱ nde biana ma titi ná ma londa. (Bonahebe̱r 11:11) Eyembilan ao ya mut’a bwam pe̱ o mbasanedi ma mom’ao e malee̱ mweńa ma edube o ndabo a diba. —1 Petro 3:5, 6.

▸ O mapula te̱ bata bia mambo mape̱pe̱ jombwea Sara, ombwa mulopo m‘ekwali “Tu es une femme belle d’apparence” na “Dieu l’a appelée “Princesse.”

Ngo̱n a Sulam

Nja nu ta Ngo̱n a Sulam e? Ngo̱n a Sulam a ta nde mudo̱led’a mun’a muto mō̱ kalat’a Bibe̱l ni belabe̱ ná Mwenge Ma Bonamyenge e makwaleano̱. Bibe̱l e si mabola dina lao.

Nje a bolino̱ e? Ngo̱n a Sulam a ta a to̱ndo̱ mutate̱ mido̱ngi mō̱, a bengi pe̱ be̱ mo̱ jemea. (Mwenge Ma Bonamyenge 2:16) A ta a do̱lo̱ jita, kańena nik’e duti kiṅe̱ Salomo nu ta nde m’bwaṅ ma moto, na mo̱ a bola me̱se̱ ná ngo̱n a Sulam pe̱ e to̱nde mo̱. (Mwenge Ma Bonamyenge 7:6) To̱ná bato bape̱pe̱ ba tute̱le̱no̱ mo̱ o jemea Salomo, ngo̱n a Sulam a bangi. A ta a to̱ndo̱ mutate̱ mido̱ngi a ta pe̱ a pula be̱ mo̱ jemea.—Mwenge Ma Bonamyenge 3:5; 7:10; 8:6.

Nje myango ma ngo̱n a Sulam mi mokwe̱le̱no̱ biso̱ e? To̱ná a tano̱ a do̱lo̱ jita, a to̱ndo̱be̱ pe̱, ngo̱n a Sulam a bengi o be̱ne̱ sibise̱ la ńolo. A s’ese̱le̱ ná mo̱nge̱le̱ ma bane̱ to̱ dipita la be̱ m’bwaṅ na be̱ne̱ edube ba bole ná a si to̱ndo̱ pe̱ mutate̱ mido̱ngi. A bengi be̱ne̱ jalea la ńolo, a be̱nga pe̱ be̱ ko̱nji.

Munj’a Lot

Nja nu ta munj’a Lot e? Bibe̱l e si mabola dina lao. Nde e makwala ná a ta a be̱ne̱ bana ba bito baba, ná a ta pe̱ nde a ja o Sodom mwemba na mbia mao.—Bebotedi 19:1, 15.

Nje a bolino̱ e? Munj’a Lot a si sengane̱ byanedi ba Loba. Loba a ta a no̱ngo̱ bedomsedi ba bumbise̱ mundi ma Sodom na baje̱ oten ońola musonje mu ta oten. Kana Loba a tano̱ a to̱ndo̱ Lot, nu ta nde moto nu te̱m na sim, a lom ange̱l ao iba ná i busise̱ mo̱ o mu mundi, nde yalane̱ pe̱ mo̱ o epol’a mbaki.—Bebotedi 18:20; 19:1, 12, 13.

Yi ange̱l i langwedi Lot na mbia mao ná ba ńe mila, nde ná ba sombwa pe̱ to̱ ombusa, e ya be̱ ba wo̱. (Bebotedi 19:17) Nde munj’a Lot “a ta ombwa ombusa, na mo̱ a timba diwondi la wanga.”—Bebotedi 19:26.

Nje myango ma munj’a Lot mi mokwe̱le̱no̱ biso̱ e? Myango mao mi malee̱ ná ye bobe o to̱ndo̱ bema o dikala nik’e me̱nde̱no̱ tute̱le̱ biso̱ o kwe̱me̱ byanedi ba Loba. Yesu a boli din jome̱le̱ ná: “O̱nge̱le̱ munj’a Lot!”—Lukas 17:32.