“Ngo̱ e mápambilane̱. Son a ponda wase e matimba nde epolo longe̱ di titino̱ pe̱ ná di be̱.”—The Guardian.

 Bato ba benama be o lembe̱ ndutu yena i wu nde na babo̱me̱ne̱. Bamabie̱ jita ba makwala ná mambo bato ba benama ba mabolano̱ nde ma mabole̱ ná ngo̱ a wase e benge be̱ wea. Nik’e boli ná ngo̱ e tabilane̱, e wan pe̱ mambo ma bobe jita, k’eyembilan:

•   Mawengisan o ngo̱ ponda ye̱se̱ ka wei ya ngińa, mwanjakolo, midi, bena ba mawane̱ mpupe na midika o beyidi ponda ye̱se̱.

•   Midongo ma ais mi mańamwa.

•   Minja mi mabata be̱ njiba.

 Tabilane̱ la ngo̱ di matapa masu ma wase me̱se̱. Ombusa kwalea ońola bete̱medi ba 193 bekombo, bolangi bō̱ ba ńuspepa New York Times bo ta bo kwala ná: “Ngo̱nd’asu ńe o bele̱ biso̱ ná di sunge mo̱.” Kana tabilane̱ la ngo̱ di bono̱ bato jita di wana pe̱ ndutu inde̱ne̱, Organisation mondiale de la santé e kwali ná mo̱ nde le “lambo le bobe buka me̱se̱ ońola ja la bwam la bato, lena di si ta di máje̱ne̱ne̱.”

 Nde, di be̱n njo̱m a bwam o be̱ne̱ dipita ońola kie̱le̱ ni maye̱. Bibe̱l e ta e mábise̱ mambo me o bolane̱ we̱nge̱, e malangwa pe̱ ońola nje jeno̱ ná di be̱ mbaki ná Loba a me̱nde̱ bola lambo, na nje a me̱nde̱no̱ bola ná di be̱ne̱ kie̱le̱ ńe bonam.

 E. Tabilane̱ la ngo̱ lena di wu nde na bata la be̱ la wea la ngo̱ a wase, le mulatako na mambo Bibe̱l e tano̱ e mábise̱ ońola pond’asu.

 Edinge̱: “O mińa misukan pond’a bobe e me̱nde̱ po̱. Ebanja bato ba me̱nde̱ be̱ bato̱nde̱ babo̱ mo̱me̱ne̱, bato̱nde̱ mo̱ni, . . . ba si dube̱ Loba, . . . ba si to̱ndi do̱lisane̱, . . . bato ba itaba, ba wadiwadi.”—2 Timoteo 3:1-4.

 Bibe̱l e ta e bīse̱ bede̱mo na bedangwedi bena be njo̱m a tabilane̱ la ngo̱ le we̱nge̱. Manea na bato ba ńunga ba mombwea nde mo̱ni beno̱ ná ba kusa, o mulopo ma jombwea bwam ba ńo̱ṅo̱n i mabupe̱. To̱ ponda ba malatano̱ miwe̱n, ba si mawe̱le̱ ko̱ jo̱nge̱le̱ diwo̱ ońola myano beno̱ ná ba bolane̱ ná ngo̱ a wase e si be̱ pe̱ wea.

 Y’edinge̱ e malee̱ ná di s’angame̱n pite̱ ná bato jita ba tukwe bedangwedi babu o bwam ba tata wase. O diwengisan, Bibe̱l e makwala ná bato ba mukubo ba me̱nde̱ “benga bola bobe.”—2 Timoteo 3:13.

 Bibe̱l e malee̱ ná Yehova a Loba, Muweked’asu, a mombwea ngo̱nd’asu jita na baje̱ oten. Jombweye bepasi ba Bibe̱l belalo be malee̱ ná Loba a me̱nde̱ bola lambo.

1.  1. Loba a “si weki [wase] o be̱ na wom, nde [a] longi nde mo̱ o jabe̱.”—Yesaya 45:18.

    Loba a me̱nde̱ londise̱ mwano mao ońola wase. (Yesaya 55:11) A si me̱nde̱ jese̱le̱ ná e ńamsabe̱ to̱ ná e be̱ ńai e titino̱ pe̱ ná e jabe̱.

2.  2. “Bamulema mu sibi ba me̱nde̱ sangwa ekombo [wase], na kusa pe̱ njoaso’a munam. Bate̱m na sim ba me̱nde̱ sangwa ekombo [wase] na ja oten bebe be̱se̱.”—Myenge 37:11, 29.

    Loba a kakane̱ ná bato ba me̱nde̱ ja o wase o bwindea o musango.

3.  3. “Bayaṅe̱ Loba ba me̱nde̱ bo̱ n’ekombo, bapamo pe̱ ba banjisabe̱ ote̱n.”—Minia 2:22.

    Loba a kakane̱ o bo̱le̱ bato ba mabenge̱ bole̱ mambo ma bobe, name̱ne̱ pe̱ na ba ba mańamse̱ wase.

 Ne̱ni Loba a me̱nde̱no̱ londise̱ makakane̱ mao ońola wase e? A me̱nde̱ nde bolane̱ janea di me̱nde̱ die̱le̱ wase ńe̱se̱, lena di mabelabe̱ ná Janea la Loba. (Mateo 6:10) Di janea di me̱nde̱ nde die̱le̱ la mo̱ń. Di si me̱nde̱ be̱ne̱ ńo̱ngi o ka na manea ma bato ba benama jombwea wase na bongwa la mo̱. Mbale̱ ńe nde ná Janea la Loba di me̱nde̱ timbane̱ ma manea.—Daniel 2:44.

 Janea la Loba di me̱nde̱ bola mambo ma bwam ońola bato ba benama na ońola wase. (Myenge 96:10-13) Jombweye nje Yehova Loba a me̱nde̱no̱ bola tongwea na Janea lao.

•   Po̱ngulane̱ wase

   Nje Bibe̱l e makwalano̱: “Eyaṅ n’ekombo a ngońa ba me̱nde̱ bwa muńe̱nge̱, sanja ńanji e me̱nde̱ sombise̱, e ke̱ke̱ miso̱ ka dinganga.”—Yesaya 35:1.

   Nje nik’e mapulano̱ kwala ońola kie̱le̱ ńasu: Yehova a me̱nde̱ jese̱ ngo̱nd’asu bwam, nate̱na bepolo bato ba benama ba ńamse̱no̱.

•   Jeka ná ngo̱ e tabilane̱

   Nje Bibe̱l e makwalano̱: “[Yehova] a lo̱ki mùdi, na mbo̱le̱ e ko̱, bemune̱ be siba.”—Myenge 107:29.

   Nje nik’e mapulano̱ kwala ońola kie̱le̱ ńasu: Yehova a be̱n ngińa omo̱ń a ngo̱. Bato ba si me̱nde̱ pe̱ taka ońola njo̱m a wei to̱ mulo̱lo̱ko̱ ma jita.

•   Lee̱ bato o bongwa wase

   Nje Bibe̱l e makwalano̱: “Na malee̱ wa, na bīse̱ wa ngea wangame̱nno̱ dangwa.”—Myenge 32:8.

   Nje nik’e mapulano̱ kwala ońola kie̱le̱ ńasu: Yehova a bake̱ bato ba benama ebol’a jombwea wase. (Bebotedi 1:28; 2:15) A me̱nde̱ lee̱ biso̱ ne̱ni bongwa nje a wekino̱ na ne̱ni die̱le̱ longe̱ lasu o mbadi ni si mańamse̱ wase.