YOMARA na bonańango ao ba bome baba Marcelo na Hiver ba maja nde o son a mundi mō̱ o Guatemala. Yomara a botedi jokwa Bibe̱l na Mboṅ a Yehova, ombusa ponda, bonańango ao pe̱ ba botea o jokwa mwemba na mo̱. Nde ba ta ba be̱ne̱ mitakisan mō̱. Babo̱ balale̱ be ndima, ba si ta pe̱ to̱ ba bia langa braille (matila ma bato ba ndima.) To̱ na nika, mutombise̱ babo̱ jokwa a ta a langa kalat’a jokwa na bepasi ba Bibe̱l ońol’abu.

Mitakisan mipe̱pe̱ ba tano̱ ba be̱ne̱ mi ta nde jombwea jukea labu o ndongame̱n a mwemba. Ba si wusa dangwa 40 ma minuti na babo̱me̱ne̱ o wala o ndabo a Janea ni ta be̱be̱ buka ye̱se̱. Nde bonasango bongwane̱ babo̱ o jukea o ndongame̱n ye̱se̱. Ba botedino̱ pe̱ tombise̱ bebolo ba bautu o ndongame̱n a teten a woki, bonasango bongwane̱ babo̱ o boṅsane̱ na kombe̱ o bo̱ngo̱ bekwali babu.

O Emiase̱le̱ 2019, ndongame̱n a mwemba i botedi tomba o mundi mabu. Ombusa nika, babaedi bō̱ bena ba ta paonia ya pond’a mususu balo o ja o mu mundi. Yi paonia i domse̱ ná i mongwane̱ Yomara na bonańango ao o bia langa na tila braille, to̱ná babo̱me̱ne̱ ba si tano̱ ba bia ne̱ni tila na langa mo̱. Balo o ndabo a ekoted’a kalati o bwam ba jokwa braille na bia pe̱ ne̱ni jokwe̱le̱ bato bape̱pe̱ mo̱.

Ombusa myo̱di to̱ mininga, Yomara na bonańango ao ba ta ba nilanga matila mabu na bo̱bise̱ la ńolo, na nik’e bata jouse̱ mulatako mabu na Yehova. Tatan, Yomara, Marcelo na Hiver be nde paonia ya pond’a mususu. Marcelo e muboledi o mwemba, babo̱ balale̱ pe̱ ba walame̱n jita o ebol’a Sango. Ko̱d’abu o ebol’a Yehova e matute̱le̱ bape̱pe̱ o ebolo.

Ban bonańango balale̱ be muńe̱nge̱ jita ońola ndolo ńena mwemba mu lee̱le̱no̱ babo̱. Yomara mo̱ ná: “Mboṅ a Yehova i lee̱le̱ biso̱ ndolo botea buńa baboso ba te̱ye̱no̱ biso̱ dikalo.” Marcelo a mabata ná: “Di be̱n mako̱m ma bwam o mwemba masu, je pe̱ nde belongi ba mbia ma bonasango mwe o wase ńe̱se̱ mu lati na ndolo.” Yomara na bonańango ao be o jenge̱le̱ buńa miso̱ mabu ma me̱nde̱no̱ telame̱ o paradisi ni me̱nde̱ be̱ o wase.​—Mye. 37:10, 11; Yes. 35:5.