WALA te̱ o eyondi esadi e be̱n dina ná Sangir Besar o Indonesia ye we̱nge̱ mimbu to̱ mininga, yen ebe o wusa je̱ne̱ bonańango asu balalo bena ba maje̱ oten, o sawa. Ba biane̱ o y’eyondi jita ońol’ebol’abu ya jongwane̱ bato o so̱ṅtane̱ Bibe̱l. Nde ba be̱n pe̱ ebolo epe̱pe̱.

Ba madangwa be̱be̱ na munja, ba po̱ndo̱ madale mande̱ne̱, na babo̱ bondane̱ mo̱ o sawa. Madale mō̱ oteten a ma mena ba mapo̱ndo̱no̱ me bonde̱ne̱ ka bo̱l. Ombusa nika, ba maja o be̱nji, na babo̱ ba bwa ma madale na hama natē̱ ma sala ka mye̱ń ma wuba. Ba bo̱le̱ te̱, ba mawe̱le̱ ma madale ba bono̱ o milonga, na babo̱ bondane̱ mo̱ o wuma ba majano̱. O sukan, ba malonde̱ ma madale o mikuta minde̱ne̱, na kamio̱n i po̱ no̱ngo̱ mo̱ ońol’ebol’a longa la mangea.

Mō̱ ńa ba bonańango a mabelabe̱ ná Hulda. A ta a be̱ne̱ ponda o bola y’ebolo buka bane̱. A ta be̱ a bolane̱ mo̱ni a makusano̱ buńa te̱ o jombwea mbia mao. Nde tatan, e ta pe̱ e pula mo̱ mo̱ni ońola lambo dipe̱pe̱. A ta a pula tafe̱l ná a we̱le̱ bolane̱ JW Library^®. Hulda a ta a bia ná sinima na mane̱ mambo mena ma maso̱be̱ o JW Library ba me̱nde̱ jongwane̱ mo̱ o kenjise̱ ebol’ao ya dikalo na jokwa lao la Bibe̱l.

O pambo a ponda ńa mo̱di mō̱ n’epasi, Hulda a tombise̱ hawa iba idiba te̱ o bwa madale jita, ná a we̱le̱ londise̱ kamio̱n nisadi po̱. O sukan, a timbi kusa mo̱ni mwena mu ta mu pula mo̱ o janda tafe̱l.

Hulda mo̱ ná: “To̱ná ebol’a bwa la madale e tano̱ e wo̱lise̱ mba jita, na pomane̱ dimbea ni sese ńe̱se̱ ponda na kusino̱ tafe̱l am ńena ńongwane̱ mba o kenjise̱ ebol’am ya dikalo na o boṅsane̱ ndongame̱n na bo̱bise̱ la ńolo.” A kwali pe̱ ná ni tafe̱l ńongwane̱ mo̱ o bebotedi ba diboa la Corona, kana di tano̱ nde di bolane̱ inte̱rne̱t o tombise̱ ndongame̱n na o te̱ dikalo. Je muńe̱nge̱ ná Hulda a we̱li londise̱ ńo̱ng’ao.