O tema ni se̱le̱, di kwaledi jombwea eyemban yena Yesu a bolino̱. Y’eyemban e malee̱ ná Janea la Loba di mábokabe̱ o mo̱ń, di be̱n pe̱ nde Yesu Kristo ka Kiṅe̱.

Bibe̱l e kwali ná ponda Yesu a me̱nde̱no̱ no̱ngo̱ kond’a Janea, a me̱nde̱ panga Satan na midī mao ma bobe o mo̱ń. Ngiń’abu e másuwea so̱ nde o wase tatan, ońola nika nde mambo ma batino̱ o be̱ bobe ninka botea o mbu 1914.​— Bebīsedi 12:7, 9.

To̱ná wase ńeno̱ o bete̱medi ba bobe, Yesu, Kiṅ’a Janea la Loba, a boli mambo o wanea bato jongwane̱ o wase ńe̱se̱. Tongwea na nje yena Yesu a bīse̱no̱ jombwea jokwe̱le̱ la bato Bibe̱l o wase ńe̱se̱, jita be o jokwa na we̱le̱ pe̱ bete̱sedi ba Bibe̱l o ebolo o longe̱ labu. (Yesaya 2:2-4) Jita boko ne̱ni be̱ skwe̱ jombwea ebol’a musawedi, ne̱ni po̱ngulane̱ longe̱ labu la ndabo a mbia, na ne̱ni bwane̱ mambo ma wase muńe̱nge̱ esibe̱ timba bakom ba ma mambo. Ba bato be o jokwa mambo me nde ońola bwam babu, nde be pe̱ o timba pat’a bato bena Loba a mapulano̱ owas’a Janea lao.

To̱ná Yesu eno̱ janea o mo̱ń, manea ma bato pe̱ ma dia ma manea wase. Nde Yehova a kwalane̱ Yesu ná: “O me̱nde̱ janea basingedi bo̱ngo̱.” (Myenge 110:2) Son a ponda, Yesu a me̱nde̱ o ńamse̱ basingedi be̱se̱, nde a wanea ba ba masengane̱ Loba lo̱ko̱mea.

O niponda, Janea la Loba di me̱nde̱

• Bo̱le̱ ebasi e kwedi ná bambam. Bibe̱l e makobisane̱ ebasi e kwedi na mut’a mbamba ńena nu me̱nde̱ ńamsabe̱ son a ponda. Bebasi bena bokwe̱le̱ mpoṅ jombwea Loba, na bena be boli ná longe̱ la bato di be̱ ndutu be me̱nde̱ bumba. Bato jita ba me̱nde̱ ńaka ke̱ nika ńe̱se̱ e nibolane̱.​—Bebīsedi 17:15, 16.

• Bo̱le̱ manea ma bato. Janea la Loba di me̱nde̱ ńo̱so̱ na bo̱le̱ ma manea me̱se̱.​—Bebīsedi 19:15, 17, 18.

• Ńamse̱ babobe. Nje pe̱ e me̱nde̱ po̱ye̱ ba bena ba tiki bole̱ nje ye bobe, na bena ba si mapule̱ sengane̱ Loba e? “Nde bayaṅe̱ Loba ba me̱nde̱ bo̱ n’ekombo.”​—Minia 2:22.

• Ńamse̱ Satan na midī ma bobe. Satan na mi midī ma bobe ba si me̱nde̱ pe̱ “wo̱ndo̱ . . . matumba.”​—Bebīsedi 20:3, 10.

Nje nika ńe̱se̱ e mapulano̱ o kwala ońola ba bena ba memeye̱ Janea la Loba e?

Ka Kiṅe̱ o mo̱ń, Yesu a me̱nde̱ bola mambo mena mot’a benama to̱ mō̱ a si we̱lino̱ bola. A me̱nde̱ nde bola nika mwemba na 144 000 la bato ba me̱nde̱ janeye̱ na mo̱, bena ba po̱so̱be̱ o wase. (Bebīsedi 5:9, 10; 14:1, 3) A me̱nde̱ bola ná jemea la Loba di bolane̱ o wase ńe̱se̱. Nje Janea la Loba di me̱nde̱no̱ bola ońola bato be o wase e?

• Di me̱nde̱ bo̱le̱ maboa na kwedi. “To̱ moto a si me̱nde̱ pe̱ kwala na: Na si jai bwam.” “Kwedi e si me̱nde̱ pe̱ be̱.”​—Yesaya 33:24; Bebīsedi 21:4.

• Di me̱nde̱ wana musango ma mbale̱ na mbo̱le̱. “Munam ma bana bo̱ngo̱ mu me̱nde̱ be̱ bonde̱ne̱.” “Moto te̱ a me̱nde̱ ja owas’a mao mudiki ma wań na bao bwele ba jangolo, to̱ moto a si me̱nde̱ sisa babo̱.”​—Yesaya 54:13; Mika 4:4.

• Di me̱nde̱ wana ebolo e mabwesane̱ muńe̱nge̱. “Bapo̱so̱be̱ bam ba me̱nde̱ bolane̱ nje mā mabu ma po̱ngino̱. Ba si me̱nde̱ wo̱ ntū tete.”​—Yesaya 65:22, 23.

• Di me̱nde̱ po̱ngulane̱ wum’a boja ya mbel’a moto. “Eyaṅ n’ekombo a ngońa ba me̱nde̱ bwa muńe̱nge̱, sanja ńanji e me̱nde̱ sombise̱, e ke̱ke̱ miso̱ ka dinganga.”​—Yesaya 35:1.

• Di me̱nde̱ jokwe̱le̱ bato nje bangame̱nno̱ bola ná ba be̱ longe̱ o bwindea. “Nde longe̱ la bwindea le nde ná ba bie wa, Loba la mbale̱ mō̱ me̱ne̱, na nu o lomno̱, Yesu Kristo.”​—Yohane 17:3.

Loba a mapula ná o bwane̱ mi minam muńe̱nge̱. (Yesaya 48:18) Tema ni mabupe̱ e me̱nde̱ tele̱ye̱ nje wangame̱nno̱ bola tatan ná o sangwe man makaki.