Ponda Samuel a tano̱ a dia muna nusadi, a ta a ja o mbasanedi ma muno̱ko̱ mwa Loba, a bola pe̱ ebolo oten. Muno̱ko̱ mu ta nde epolo owe̱ni bato ba tano̱ bala jowe̱ Yehova. O bi ońola nje Samuel alono̱ ja o wo e? Di se̱le̱ jokwa mambo jombwea ńango ao, Hana.

Hana a jai o diba mimbu jita, nde to̱ na nika a tano̱ a be̱ne̱ ńo̱ngi, a si ta a we̱le̱ ya bana. Ońola nika nde a kane̱no̱ Yehova, a so̱so̱me̱ye̱ mo̱ ná ongwane̱ mo̱. A boli Yehova dikaki ná a yai te̱ mun’a mome, a me̱nde̱ loma mo̱ ná ale ja o mbasanedi ma muno̱ko̱, o bola ebolo oten. Yehova alabe̱ muka mwao, na mo̱ a ya mun’a mome. A bele̱ mo̱ ná Samuel. Ka ne̱ni te̱ a kakanno̱, Hana alane̱ Samuel o muno̱ko̱, ke̱ e mimbu milalo to̱ mine̱i, ná a boleye Loba.

Eli nde a ta prisi ninde̱ne̱, nika ná moto ńa tobotobo nu ta nu kwalisane̱ Yehova o epol’a Bonaisrael, o muno̱ko̱. Bana bao baba pe̱ ba ta ba bola ebolo o mu muno̱ko̱. O si dimbea ná muno̱ko̱ mu ta nde ndabo wuma ba tano̱ bowe̱ Loba; nika e ta so̱ nde wuma yena bato ba tano̱ bangame̱n bola bema ba bwam. Nde bana ba Eli ba ta ba bola mambo ma bobe jita. Samuel a ta e̱ne̱ nje ba tano̱ ba bola. Nde Samuel pe̱ a boli so̱ mambo ma bobe ka bana ba Eli e?— Ke̱m, a bengi nde bola nje e te̱nge̱n, ka ne̱ni sango ao na ńango ao ba lee̱no̱ mo̱ o bola.

O mo̱nge̱le̱ ná Eli a ta angame̱n bolea bana bao babane̱ nje e?— A ta angame̱n ko̱kise̱ babo̱. A si ta angame̱n jese̱le̱ ná ba tike pe̱te̱ bola ebolo o ndabo a Loba. Nde Eli a si boli nika, ońola nika nde Yehova a lingane̱no̱ mo̱ na bana bao ba bome baba. Mo̱ nde Yehova a domse̱no̱ ná a mako̱kise̱ babo̱.

Bulu bō̱, ke̱ Samuel e o iyo̱, a sengi moto mō̱ a bele̱ mo̱ ná: ‘Samuel!’ Na mo̱ a ńa mīla, ala bupe̱ Eli, nde Eli a langwea mo̱ ná: ‘Na si bele̱ wa.’ Nika e bolane̱ ngedi iba ipe̱pe̱. O ngedi ni londe̱ ilalo, Eli a langwedi Samuel ná a sengi pe̱te̱ di doi, angame̱n jalabe̱ ná: ‘Son, a Yehova, to̱po̱, ne o senga.’ Nika nde Samuel a bolino̱. Na Yehova a kwalane̱ Samuel ná: ‘Langwea Eli ná na me̱nde̱ ko̱kise̱ mo̱ na bana bao ońola mambo ma bobe ba mabolano̱.’ O mo̱nge̱le̱ ná e ta  Samuel ndutu ná a bole Eli mu mwe̱ndi e?— E, nika e ta mo̱ ndutu. Nde to̱ nika Samuel a tano̱ a bwa bo̱ngo̱, a boli nje Yehova a kwalino̱ ná a bole. Yehova a to̱pi mbale̱. Bana ba Eli babane̱ ba bwabe̱, Eli pe̱ a wo̱.

Samuel e nde eyembilan a bwam ońol’asu. A boli nje e te̱nge̱n, to̱ nika a tano̱ e̱ne̱ bato bape̱pe̱ be o bola mambo ma bobe. Wa pe̱ so̱ e? O me̱nde̱ be̱ ka Samuel, ná o tike bola nje e te̱nge̱n e? O boli te̱ nika, o me̱nde̱ bwese̱ Yehova, papa na mam’ango̱ muńe̱nge̱.