JOKWA 13
Ne̱ni bebasi be kwedi be mapo̱tise̱no̱ bato na Loba
Yete̱na Loba e ndolo, ońola nje bebasi be makwale̱ ná be mowe̱ mo̱ be mabolano̱ mambo ma bobe jita e? Ońolana be bebasi be kwedi; nje be mabolano̱ na nje be malee̱no̱ e mabola ná bato ba be̱ne̱ jo̱nge̱le̱ la bobe jombwea Loba. Ne̱ni be po̱tise̱no̱ bato na Loba e? Nje Loba a masengano̱ ońol’ao e? Nje pe̱ a me̱nde̱no̱ bolane̱ mo̱ e?
1. Ne̱ni bebasi be kwedi be mapo̱tise̱no̱ bato na Loba tongwea na belēdi babu e?
Bebasi be kwedi be “timbise̱ lobango o mulopo ma mbal’a Loba.” (Roma 1:25) K’eyembilan, jita la bebasi be si lee̱ belongi babu dina la Loba. Nde Bibe̱l e makwala ná jangame̱n bolane̱ dina la Loba. (Roma 10:13, 14) Badiedi ba bebasi bō̱ ba makwala ná lambo la bobe di bolane̱ te̱, ke̱ jemea la Loba di. Nde nika ńe nde mpoṅ. Loba a titi njo̱m a nje ye bobe tomtom. (Langa Yakobo 1:13.) Ye ndutu o je̱ne̱ ná mpoṅ ma bebasi mi boli ná e be̱ bato ndutu o to̱ndo̱ Loba.
2. Ne̱ni bebasi be kwedi be mapo̱tise̱no̱ bato na Loba tongwea na bebolo babu e?
Bebasi be kwedi be si membilane̱ Yehova o nje be mabolane̱no̱ bato. Bibe̱l e makwala jombwea bebasi be kwedi ná “myobe [mabu] mi ńukam nate̱na o mo̱ń.” (Bebīsedi 18:5) O bebwea ba mimbu jita, bebasi be no̱ngi dongo o politik, be sue̱le̱ bila, be wana pe̱ kwed’a muso̱ngi munde̱ne̱ ma bato. Badiedi ba bebasi bō̱ ba mapula be̱ m’bwaṅ; ba mabaise̱ so̱ belongi ba bebasi babu ná be bole babo̱ mo̱ni. Ben bebolo be malee̱ ná ba si bi Loba, ba si be̱n so̱ bwam o kwala ná ba mabolea mo̱.—Langa 1 Yohane 4:8.
3. Nje Loba a masengano̱ ońola bebasi be kwedi e?
Yete̱na mambo bebasi be kwedi be mabolano̱ ma malingise̱ wa, o mo̱nge̱le̱ ná Yehova mo̱ a masenga nde ne̱ni e? A to̱ndi bato nde a lingane̱ badiedi ba bebasi ba mapo̱tise̱ bato na mo̱, ba matakise̱ pe̱ belongi babu. A kakane̱ ná bebasi be kwedi be me̱nde̱ ńamsabe̱ na ná be “si me̱nde̱ pe̱ so̱be̱.” (Bebīsedi 18:21) Son a ponda, Loba a me̱nde̱ ńamse̱ bebasi be kwedi be̱se̱.—Bebīsedi 18:8.
ALA O NJIBA
Bata jokwa jombwea nje Loba a masengano̱ ońola bebasi be kwedi, na nje be bolino̱. Wokwe pe̱ ońola nje nika e s’angame̱nno̱ jeka wa ná wokwe o bia Yehova.
4. Loba a si do̱lisane̱ bebasi be̱se̱
Bato jita ba dube̱ ná bebasi be nde ka mangea me diwengisan ma malane̱ omboa Loba. Nde nika ńe mbale̱ e? Langa Mateo 7:13, 14, nde lo kwaleye pe̱ ońola min myuedi:
-
Nje Bibe̱l e makwalano̱ jombwea ngea ni malane̱ o longe̱ e?
Ombwa SINIMA, nde lo kwaleye pe̱ ońola myuedi mi mabupe̱.
-
Mo̱ Bibe̱l e makwala ná bebasi jita be do̱lisan Loba e?
5. Bebasi be kwedi be si membilane̱ ndol’a Loba
Bebasi be po̱tise̱ bato na Loba o mbadi jita. Mbadi po̱ ńe bobe tobotobo ńe nde ná be no̱ngi dongo o bila. Ná we̱ne̱ eyembilan ewo̱, ombwa SINIMA. Ombusa nika kwalea ońola myuedi mi mabupe̱.
-
Nje bebasi jita be bolino̱ o pond’a bila ba wase ńe̱se̱ be londe̱ beba e?
-
Nje wa o mo̱nge̱le̱no̱ jombwea nje be bolino̱ e?
Langa Yohane 13:34, 35 na 17:16. Ombusa nika kwalea ońola min myuedi:
-
O mo̱nge̱le̱ ná Yehova a masenga nde ne̱ni ke̱ bebasi be mano̱ngo̱ dongo o bila e?
-
Bebasi be kwedi be njo̱m a jita la mambo ma bobe. O njika mambo we̱nno̱ ná bebasi be s’embilane̱ ndol’a Loba e?
Bebasi be kwedi be s’embilane̱ ndol’a Loba
6. Loba a mapula jongwane̱ bato o busa o bebasi be kwedi
Langa Bebīsedi 18:4, a nde lo kwaleye pe̱ ońola min myuedi:
-
Ne̱ni o masengano̱ o bia ná Loba a mapula sunga bato bena bebasi be kwedi be wo̱ndino̱ e?
7. Benga jokwa bia Loba la mbale̱
Mo̱ bebolo ba bobe ba bebasi be kwedi bangame̱n tukwa mbadi o me̱ne̱no̱ Loba e? Keka te̱ dutea ná muna mō̱ a yaṅ malea ma dibie̱ ma sango. Na mo̱ asumwe̱ o mboa, a bola mambo ma bobe jita. Nu sango a si do̱lisan bedangwedi ba mun’ao. Ońola nje e si te̱nge̱nno̱ ná ba nume nu sango njo̱m ońola bedangwedi ba pamo ba mun’ao e?
-
Mo̱ e te̱nge̱n o numa Yehova njo̱m na jembe̱ pe̱ o jokwa bia mo̱ ońola bebolo ba bebasi be kwedi e?
BATO BA MAKWALA NÁ: “Na si to̱ndi kwalea ońola Loba ebanja bebasi be njo̱m a mambo ma bobe jita.”
-
Nika nde wa pe̱ o mo̱nge̱le̱no̱ e?
-
Ońola nje bebolo ba bebasi be kwedi be s’angame̱nno̱ tukwa mbadi di me̱ne̱no̱ Yehova e?
EBONGOLO
Bebasi be kwedi be po̱tise̱ bato na Loba tongwea na belēdi babu ba mpoṅ na bebolo babu ba bobe. Loba a me̱nde̱ ńamse̱ bebasi be kwedi.
Ndimbisedi
-
Nje o mo̱nge̱le̱no̱ jombwea belēdi ba bebasi be kwedi na bebolo babu e?
-
Nje Loba a masengano̱ ońola bebasi be kwedi e?
-
Nje Loba a me̱nde̱no̱ bolane̱ bebasi be kwedi e?
BATA WASA
Okwa njo̱m iba ońola nje Loba a si do̱lisanno̱ jita la bebasi.
“Mo̱ bebasi be̱se̱ be nde ńai po̱ e? Mo̱ be̱se̱ be malane̱ omboa Loba e?” (Tema o mulomba)
Ońola nje Yehova a mapulano̱ ná jowe̱ mo̱ mwemba na bape̱pe̱ e?
“Mo̱ e mapula ye̱ke̱i te̱ ná moto a be̱ o ebasi e?” (Tema o mulomba)
Mambo mō̱ ma ta ma takise̱ pata po̱ o ebas’ao. Nde nik’e s’eki mo̱ ná okwe mbale̱ jombwea Loba.
“Nje e boli ná pata po̱ ńasumwe̱ o ebas’ao” (Umwe̱!, Ngo̱nde̱ 2015)
O bebwea ba mimbu, bebasi be lee̱ mpoṅ mi mabole̱ ná bato bo̱nge̱le̱ ná Loba a si mombwea biso̱ na ná e njo. Okwa mbale̱ jombwea mpoṅ milalo.
“Mpoṅ mi mabole̱ ná e be̱ ndutu o to̱ndo̱ Loba” (Njongo a Betatedi, Tinini 1, 2013)
