Mboṅ a Yehova i be̱n jita la besukulu o jokwa Bibe̱l. Ba bena ba matombise̱ pond’a mususu o dikalo be na ba kusa jongwane̱ la tobotobo tongwea na besukulu, ná ba ‘londise̱ ebol’abu mbom.’​—2 Timoteo 4:5.

Esukul’a Ebol’a Pionie. O su la mbu maboso m’ebol’a pionie, mute̱ dikalo ena ukea o esukul’a pionie. Y’esukulu ye nde ya mińa mutoba. O jita la ngedi e matomba nde o Ndabo a Janea. E be̱n manda ná yongwane̱ pionie ná e bate sisea be̱be̱ na Yehova, e be̱ pe̱ iwiye̱ o mbad’a dikalo ye̱se̱ na bam, na londise̱ pe̱ ebol’ao.

Esukul’a Bate̱ Dikalo la Janea. Y’esukulu ye nde ońola myo̱di miba. E mongwane̱ pionie o be̱ be̱be̱ o wala o to̱ njika epolo ba lomabe̱no̱ ońola dikalo. Ka Mute̱ Dikalo ńa iwiye̱ nu belabe̱ ná Yesu Kristo, pionie pe̱ i makwala ná : “Mba nun, loma mba!” (Yesaya 6:8; Yohane 7:29) Jasumwe̱ o mboa ango̱ wala etum o te̱ dikalo, nika e mabaise̱ ná moto a bie bola mo̱me̱ne̱ ka jabea. Ngō̱, bede̱mo, na da, be ná ba be̱ diwengisan na nje moto a ko̱lo̱ngo̱ne̱no̱ o mbo’ao. Yen ebe angame̱ne̱ na mo̱me̱ne̱ o jokwa eyem’a bwambo ya peńa. Y’esukulu e mongwane̱ bonasango na bonańango be mulamba, ba bai, to̱so̱ ba babe̱, ba be̱n oteten a 23 na 65 ma mbu, o be̱ne̱ bede̱mo be mongwane̱ babo̱ o be̱ ńai Yehova na bebokedi bao ba mabolane̱no̱ babo̱ o mususu mwe̱se̱.

Esukul’a Gilead e bokabe̱ na Watchtower. Na bwambo ba Bonahebe̱r, eyal’a “Gilead” e mapula nde kwala ná “Mwindi ma Mboṅ” (nika ná mboṅ jita). Botea o mbu ma 1943 y’esukulu e botedino̱, 8 000 la bonasango na bonańango, bokwabe̱le̱ oten. O su l’esukulu, ba malomabe̱ o te̱ dikalo “nate̱na o masu ma wase.” (Bebolo 13:47) Oboso ná bawe̱ Gilead ba mapo̱ o ekombo e belabe̱ na Peru, mwemba to̱ mō̱ ma Mboṅ a Yehova mu si ta oten. We̱nge̱ myemba me oten buka na 1 000. Oboso ná bawe̱ Gilead ba mapo̱ o Yapan, Mboṅ a Yehova i si ta i buka dom, nde we̱nge̱ muso̱ngi mabu mu buki 200 000. Y’esukulu ya myo̱di mitanu e mongwane̱ babo̱ o langa na bata pe̱te̱ so̱ṅtane̱ Bibe̱l bwambwam. Nja ńe ná ńukea oten e? Pionie ya tobotobo, bamuloloma ba wu o bekombo bepe̱pe̱, babole̱ ebolo o Bete̱l, baboledi ba bebondo.

• Esukul’a Ebol’a Pionie ye nde ońola nje e?

• Nja ńe ná ńukea o Esukulu ya Bate̱ Dikalo la Janea e?