Obiana a mawo̱, Yesu a bele̱ o mbasan bokwedi bao bane̱i ba belabe̱ ná Petro, Yakobo, Yohane na Andrea a kwalisane̱ babo̱. Ni ponda a tano̱ a kwalisane̱ babo̱ jombwea eyemban ya byukedi bao, a baise̱ babo̱ min myuedi ma mweńa ná: “Nja so̱ ńe mūt’a jemea na jangwa, ńena sango a te̱se̱no̱ omo̱ń a bona bao ba ndabo, o bola babo̱ da o ponda ńangame̱ne̱ e?” (Mateo 24:3, 45; Marko 13:3, 4) Yesu a boli babo̱ mbaki ná, mo̱ ka “Sango” abu, a me̱nde̱ te̱se̱ bato bena ba me̱nde̱ bole̱ da la mudī ponda ye̱se̱. Nja so̱ ńe nu mūtu e?

E nde dibo̱to̱ disadi la bokwedi ba Yesu bo̱kisabe̱ na mudī. Nu “mūtu” pe̱ nde e Dibe̱le̱ di Madie̱le̱ la Mboṅ a Yehova o wase ńe̱se̱. Ba mabola da la mudī o ponda ni te̱nge̱n. Di mengane̱ mo̱ “dime̱ne̱” lasu “la mbasi o ponda ńangame̱ne̱.”​—Lukas 12:42.

Mo̱ nde a mombweye̱ ndabo a Loba. (1 Timoteo 3:15) Yesu a boli nu mūtu m’bē̱ me bodilo o jombwea dongo la bebokedi ba Yehova lena le o wase. A mombwea ebol’a dikalo na belongisan be̱se̱ be mabolane̱ ońola y’ebolo, a mokwe̱le̱ pe̱ biso̱ tongwea na myemba masu. Ná di kuse nje di be̱nno̱ ńo̱ngi o ponda ni te̱nge̱n, “mūt’a jemea na jangwa” a mabola biso̱ da la mudī tongwea na kalati di mabolane̱no̱ o dikalo na nje ye̱se̱ di mabolane̱no̱ o ndongame̱n asu na mako̱to̱ne̱ masu.

Nu mūtu e jemea ońolana a si mawengisane̱ belēdi ba Bibe̱l, e pe̱ iwiye̱ ońola m’bē̱ mao ma te̱ dikalo la myango ma bwam. E pe̱ jangwa ońola mbad’a bwam a mombweano̱ na dibie̱, myam ma kristo me o wase. (Bebolo 10:42) Bońaki na tut’a da la mudī di be̱nno̱ ba malee̱le̱ ná Yehova a manamse̱ ebol’a nu mūtu.​—Yesaya 60:22; 65:13.

• Nja Yesu a po̱sino̱ o bola bokwedi bao da la mudī e?

• Ne̱ni nu mūtu eno̱ jemea na jangwa e?