1-3. a) A be komi Zaburuw 147 sɛbɛra tuma juman? b) Zaburuw 147 b’an dɛmɛ ka mun lo faamu?

NI MƆGƆ dɔ y’a ka baara kɛ ka ɲɛ wala n’a y’a yira ko a be ni jogo ɲumanw ye, an ka kan k’o tigi tando. Jehova Ala fana ka kan ni tandoli ye kosɔbɛ! An ka ɲi ka Jehova tando a ka sebagaya kosɔn, o min be ye a ka danfɛn kabakomanw sababu fɛ. An be se k’a tando fana sabu a be adamadenw minɛ ni kanuya ye. A yɛrɛ y’a Dencɛ di k’a kɛ kunmabɔsara ye an kosɔn.

² Zaburuw 147 sɛbɛbaga tun b’a fɛ ka Jehova tando n’a dusu bɛɛ ye. A ye tɔɔw jija fana u ka fara ale kan k’o kɛ.—Zaburuw 147:1, 7, 12 kalan.

³ An t’a lɔn jɔn lo y’o zaburu sɛbɛ. Nka, a be komi o tigi ye ɲɛnamaya kɛ tuma min na Jehova ye Israɛldenw bɔ jɔnya la Babilonɛ ani k’a to u kɔsegira Zeruzalɛmu (Zab. 147:2). O zaburu sɛbɛbaga ye Jehova tando sabu Israɛldenw tun be se ka Jehova bato u ka jamana kɔnɔ kokura. O cɛɛ y’a yira ko an ka ɲi ka Jehova tando koo wɛrɛw kosɔn fana. O ye koo jumanw lo ye? Mun na an ka ɲi ka “Masaba [ Jehova] tanu”?—Zab. 147:1.

4. Masacɛ Sirusi ye Israɛldenw hɔɔrɔnya ka bɔ jɔnya la tuma min na, o ye mun lo kɛ u la ani mun na?

⁴ Miiri k’a filɛ, Israɛldenw dusu tun tiɲɛnin lo cogo min na tuma min na u tun be jɔnya la Babilonɛ. Minw tun y’u kɛ jɔɔnw ye, olu tun b’u lɔgɔbɔ ko: “Aw ye Siyɔn dɔnkili dɔ la an ye.” O tuma na, Zeruzalɛmu min tun ye Israɛldenw ka ɲagali sababu ye, o dugu tun halakira (Zab. 137:1-3, 6). O kama, dɔnkili la lɔgɔ tun tɛ Yahutuw la. U dusu tun kasinin lo ani u mako tun be dususalo la. Jehova y’u dɛmɛ i ko a tun y’a fɔ cogo min na a ka Kuma kɔnɔ. A y’o kɛ cogo di do? Pɛrɛsiw ka masacɛ Sirusi ye Babilonɛ dugu minɛ ani a y’a fɔ ko: “Masaba . . . le y’a ɲini ne fɛ ko n ka ta’a batoso lɔ Zeruzalɛmu . . . Aw jamanadenw cɛma, mɔgɔ o mɔgɔ kɛr’a ka mɔgɔ ye, aw ka taga Zeruzalɛmu, Zuda mara la. Masaba aw ka Ala ka to n’aw ye.” (2 Til. Kib. 36:23). Siga t’a la, o koo ye Israɛldenw dusu saalo yɛrɛ le!

5. See min be Jehova ye ka mɔgɔ dusu saalo, zaburu 147 sɛbɛbaga ye mun lo fɔ o koo la?

⁵ Jehova ma Israɛldenw jamakulu dɔrɔn lo dusu saalo dɛ, nka a ye Israɛlden kelen kelen bɛɛ dusu saalo fana. O kelen lo bi fana. Zaburuw 147 sɛbɛbaga y’a fɔ ko: “A be dusukasininw jigi tugu k’u mandimiyɔrɔw furakɛ.” (Zab. 147:3). Gwɛlɛya be mɔgɔ minw kan, farikolo wala dusukunnako ta fan fɛ, Jehova b’a janto olu la. Bi, Jehova b’a fɛ sɔbɛ la k’an ka dusukasi nɔgɔya (Zab. 34:19; Ezayi 57:15). A be hakilitigiya ni fanga di an ma walisa an ka se ka gwɛlɛya sifa bɛɛ muɲu.—Zaki 1:5.

6. Zaburu sɛbɛbaga ye min sɛbɛ Zaburuw 147:4 kɔnɔ, o b’an nafa cogo di? (Jaa lajɛ, barokun daminɛ na.)

⁶ O kɔ, zaburu sɛbɛbaga kumana sankolofɛnw koo la. A ko Jehova ye “lolow daa sigi [o kɔrɔ, a b’o daa lɔn]. A ye tɔgɔ di u kelen kelen bɛɛ ma.” (Zab. 147:4). Mun na a kumana sankolofɛnw koo la? Miiri nin na: Zaburu sɛbɛbaga tun be se ka lolow filɛ n’a ɲɛɛw ye, nka a tun tɛ se k’u daa lɔn. Kabi o tuma na, an be se ka lolo minw ye, caamanba farala u hakɛ kan. Dɔw b’a fɔ ko lolo miliyari caaman lo be an ka lolokuluw kɔnɔ. A be komi lolokulu miliyari waa caaman fana lo be yen sankolo la. An tɛ se ka lolow daa lɔn. Nka, an Danbaga kɔni be se ani a ye tɔgɔ di u kelen kelen bɛɛ ma. O kɔrɔ ko Jehova be lolo kelen kelen bɛɛ lɔn ka ɲɛ (1 Kor. 15:41). Nka, a be adamadenw fana lɔn wa? Ala b’a lɔn lolo kelen kelen bɛɛ be cogo min na. O cogo kelen na, a b’an kelen kelen bɛɛ lɔn fana. A b’a lɔn an be yɔrɔ min na, an dusukunnakow ye min ye ani an mako be min na tigitigi!

7, 8. a) Ni Jehova b’a sagokɛlaw dɛmɛna u ka gwɛlɛyaw wagati la, a be mun lo to a hakili la? b) Jehova be makari ka mɔgɔ dafabaliw dɛmɛ cogo min na, o lakali.

⁷ Jehova b’a mako don i la. Nka o dɔrɔn tɛ, see b’a ye ani a ka makari kosɔn a b’i dɛmɛ gwɛlɛyaw wagati la (Zaburuw 147:5 kalan). N’a sɔrɔ i b’a miiri ko i ka gwɛlɛyaw ka ca kojugu ani i tɛ se k’u muɲu. I tɛ se ka min kɛ, Ala b’o lɔn sabu a hakili b’a la ko i “ye buguri ye.” (Zab. 103:14). Komi an ye mɔgɔ dafabaliw ye, an be to ka fili dɔw kɛ tuma caaman na. An dusu be tiɲɛ tuma dɔw la sabu an filila ka kuma dɔ fɔ. A be se ka kɛ fana ko nege jugu dɔ y’an minɛ, wala ɲangoya b’an na. Tiɲɛn lo k’o koo ɲɔgɔnw tɛ Jehova sɔrɔ, nka o koow be min kɛ an na, a b’o faamu bɛrɛbɛrɛ.—Ezayi 40:28.

⁸ N’a sɔrɔ gwɛlɛya dɔ y’i sɔrɔ ka ye ani Jehova y’a bolo barikaman kɛ k’i dɛmɛ k’o gwɛlɛya ɲɛnabɔ (Ezayi 41:10, 13). An ka miiri balimamuso Kyoko koo la. Ale ye piyɔniye ye ani a fari tun fagara kosɔbɛ tuma min na u y’a bila ka taga waajuli kɛ yɔrɔ wɛrɛ la. Nka, Kyoko y’a lɔn cogo di ko Jehova b’ale faamu? Kyoko ka kafo kura kɔnɔ, mɔgɔ caaman tun b’a ka miiriyaw faamu. Ale fɛ, a be komi Jehova tun b’a fɔra a ye ko: “I koo ka di ne ye. I ka piyɔniye baara dɔrɔn kama tɛ. Nka, i koo ka di ne ye sabu i ye ne denmuso ye ani i y’i yɛrɛkun di ne ma. Ne b’a fɛ i ka ɲagali sabu i ye ne Seere dɔ ye!” Sebagayabɛɛtigi Ala y’a yira ele la cogo di ko “daan t’a ka lɔnniya” wala a ka faamuyali la?

9, 10. Jehova b’an dɛmɛ mun koo lo la fɔlɔ? Ɲɛyirali dɔ fɔ.

⁹ Tuma dɔw la, an mako be dumuni, fani ani siyɔrɔ la. N’a sɔrɔ an be hami sabu dumuni bɛrɛ t’an fɛ. Nka, Jehova lo b ‘a kɛ sanji be ben ani sumanw be falen. Jehova yɛrɛ be dumuni di kaankaandenw ma u kasi wagati la (Zaburuw 147:8, 9 kalan). Ni Jehova be to ka dumuni di kaankaanw ma, an be se ka la a la ko an mako be fɛɛn minw na, a bena o di an ma fana.—Zab. 37:25.

¹⁰ Min kɔrɔtanin lo, o ye ko Jehova b’an mako wasa Alako ta fan fɛ. A be “hɛrɛ” di an ma ‘min be tɛmɛ mɔgɔw ka faamuyali kan.’ (Filip. 4:6, 7). An ka balimacɛ Mutsuo n’a muso ka ɲɛyirali lajɛ. Saan 2011, dugukoloyɛrɛyɛrɛ kɛra kɔgɔji kɔnɔ ani ka tiɲɛniba kɛ Zapɔn jamana na. Jehova ye Mutsuo n’a muso dɛmɛ o wagati la. U yɛlɛla u ka boon sanfɛ sabu jii tun be ɲini ka taga n’u ye. Nka, u bɔnɛna u bololafɛn fanba la. U sira dibi ni nɛnɛ na boon dennin dɔ kɔnɔ u ka sangaso yɔrɔ filanan na. Sɔgɔma, u ye dɛmɛ ɲini Alako ta fan fɛ. U ye nin gafe dɔrɔn lo sɔrɔ: Annuaire des Témoins de Jéhovah 2006 (Saan 2006, Sanyɛlɛma gafe). O gafe lajɛtɔ, Mutsuo ɲɛɛ lara cɛtigɛ nin kan: “Le tsunami le plus meurtrier jamais recensé.” Dugukolo yɛrɛyɛrɛ min kɛra Sumatra saan 2004, o lo tun lakalila yen. O dugukolo yɛrɛyɛrɛ tun ye tiɲɛni min kɛ, o ɲɔgɔn tun ma deli ka kɛ. Koo minw ye balimaw sɔrɔ o yɔrɔ la, tuma min na, Mutsuo n’a muso y’o kalan, u ɲɛji jigira. U mako tun be jijali la ani o gafe sababu fɛ, u y’a faamu ko Jehova tun b’u jijara Alako ta fan fɛ wagati bɛnnin na. Jehova y’u mako wasa ni kanuya ye bololafɛnw fana ta fan fɛ. U balima minw be Zapɔn jamana faan wɛrɛw la, olu ye dumuni ni faniw di u ma. Nka, min yɛrɛ y’u jija kosɔbɛ, o ye ko Jehova ka ɔriganisasiyɔn ka lasigiden dɔ nana bɔ u ye. Mutsuo ko: “Ne fɛ, Jehova tun be n’an kelen kelen bɛɛ ye ani a tun b’a jantora an na. O y’an dusu saalo yɛrɛ le!” Ala b’an dɛmɛ Alako ta fan fɛ fɔlɔ. O kɔ, a be sɔrɔ k’an mako wasa bololafɛnw ta fan fɛ.

11. Mɔgɔ minw b’a fɛ Jehova k’u dɛmɛ, olu ka kan ka mun lo kɛ?

¹¹ Jehova labɛnnin lo tuma bɛɛ ka “dɛsɛbagatɔ dɛmɛ.” (Zab. 147:6a). Nka, an ka ɲi ka mun lo kɛ walisa k’o dɛmɛ sɔrɔ? An ka ɲi ka jɛnɲɔgɔnya ɲuman kɛ ni Ala ye. O jɛnɲɔgɔnya tɛ ɲɛ majigilenya kɔ (Sof. 2:3). Ni tilenbaliyako dɔ be kɛra mɔgɔ majigininw na, u be koow to Ala bolo walisa a k’o ɲɛnabɔ ani k’u ka tɔɔrɔ nɔgɔya. O ɲɔgɔnna mɔgɔw koo ka di Jehova ye.

12, 13. a) Walisa Ala k’an dɛmɛ, an ka ɲi k’an mabɔ mun lo la? b) Mɔgɔ sifa jumanw lo koo ka di Jehova ye?

¹² Faan wɛrɛ fɛ, Ala “be mɔgɔjugu majigi fɔɔ duguma.” (Zab. 147:6b). An kɔni t’a fɛ o koo ɲɔgɔn k’an sɔrɔ! N’an b’a fɛ Jehova k’an kanu ani a kana dimi an kɔrɔ, a be koo minw kɔniya an k’olu kɔniya (Zab. 97:10). Ɲɛyirali fɛ, an ka ɲi ka kakalayakow kɔniya. O kɔrɔ ko fɛɛn o fɛɛn be se k’an lasun ka kakalayako kɛ, i n’a fɔ porno, an ka ɲi k’an yɛrɛ mabɔ u la (Zab. 119:37; Mat. 5:28). O be se ka gwɛlɛya an ma. Nka, an ka ɲi k’an jija kosɔbɛ walisa ka Jehova ka duga sɔrɔ.

¹³ Walisa ka se ka koo juguw kɔniya, an ka ɲi k’an jigi la Jehova lo kan. An kana an jigi la an yɛrɛ kan. N’an b’a ɲini k’an yɛrɛ kisi “soo ka barikatigiya,” o kɔrɔ adamadenw ka fɛɛrɛw sababu fɛ, yala o bena diya Jehova ye wa? Ayi! An kana an jigi la fana “adamaden barika,” o kɔrɔ an yɛrɛ wala mɔgɔ wɛrɛ kan walisa ka kisili sɔrɔ (Zab. 147:10). An ka ɲi ka to k’an magwɛrɛ Jehova lo la ani k’a deli a k’an dɛmɛ. Ale tɛ sɛgɛn i ko adamadenw. Hali n’an tora k’a deli tuma o tuma ko a k’an dɛmɛ, a tɛna sɛgɛn an kɔrɔ. “Mɔgɔ minw be siran Masaba ɲa, minw jigi b’a ka ɲumanya kan, a be janto olu la.” (Zab. 147:11). Komi Jehova ye kantigi ye ani a b’an kanu, a bena to n’an ye ani k’an dɛmɛ walisa an ka see sɔrɔ an ka nege juguw kan.

14. Mun lo ye zaburu sɛbɛbaga jigi sigi?

¹⁴ Jehova y’an jigi si ko ni gwɛlɛyaw b’an kan, a bena to k’an dɛmɛ. Tuma min na Israɛldenw kɔsegira Zeruzalɛmu, zaburu sɛbɛbaga ye dɔnkili la Jehova koo la ko: “A be barika don dugu dondaw sɔgɔnanw na kosɔbɛ. A be barika don dugudenw na dugu kɔnɔ. A be hɛɛrɛ kɛ jamana kɔnɔ.” (Zab. 147:13, 14). Zaburu sɛbɛbaga tun b’a lɔn ko Jehova bena dugu dondaw barika bonya walisa k’a batobagaw tanga. O koo y’a jigi sigi kosɔbɛ!

15-17. a) Tuma dɔw la, an be se ka mun lo miiri an ka gwɛlɛyaw koo la? Nka, Jehova b’an ɲɛminɛ cogo di Bibulu sababu fɛ? b) Ɲɛyirali dɔ fɔ min b’a yira ko Ala ka “kuma be taga teliya la.”

¹⁵ N’a sɔrɔ gwɛlɛya dɔw b’i kan ani i hakili ɲagaminin lo o kosɔn. Jehova be se ka hakilitigiya d’i ma walisa i ka se k’o koo muɲu. Zaburu sɛbɛbaga y’a fɔ Ala koo la ko: “A y’a ka kuma fɔ dugukolo kan. A ka kuma be taga teliya la.” A y’a fɔ fana ko Jehova be ‘sanji siminin (nɛzi) yɛrɛkɛ, k’a kɛ galasi be kɛ yɔrɔ bɛɛ ani a b’a kɛ sanbɛrɛ be ben.’ Zaburu sɛbɛbaga ye ɲiningali kɛ ko: “Jɔn be se ka lɔ o nɛnɛ ɲa?” O kɔ, a ko Jehova be “kuma dɔrɔn, u be yelen.” (Zab. 147:15-18). Ala be fɛɛn bɛɛ lɔn ani a be se koo bɛɛ la. Ale lo b’a kɛ sanbɛrɛ ni nɛzi be ben. O kama, an be se ka la a la ko see b’a ye k’an dɛmɛ ka gwɛlɛya sifa bɛɛ ɲɛnabɔ.

¹⁶ Bi, Jehova b’an ɲɛminɛ Bibulu lo sababu fɛ. “A ka kuma be taga teliya la.” O kɔrɔ ko a b’an ɲɛminɛ cogo ɲuman na ani wagati bɛnnin na. Miiri k’a filɛ, koo nunu b’an nafa cogo min na: ka Bibulu ani “Jɔnkɛ dannamɔgɔ hakiliman” ka gafew kalan, ka JW Telewisɔn filɛ, ka jw.org lajɛ, ka baro kɛ ni diinan mɔgɔkɔrɔw ye ani ka jɛn n’an kerecɛn ɲɔgɔnw ye (Mat. 24:45, ABM). Yala o t’a yira i la ko Jehova kɔrɔtɔnin lo k’i dɛmɛ wa?

¹⁷ Barika min be Ala ka Kuma na, balimamuso Simone b’o lɔn. A fari tun faganin lo fɔɔ a tun b’a jati ko nafa foyi t’ale la. A tun b’a jati ko ale kɔni koo man di Ala ye. Nka, tuma min na a fari fagara, a y’a jija ka Jehova deli a k’ale dɛmɛ. A fana y’a jija ka to ka kelenna kalan kɛ. A ko: “N’ ka gwɛlɛyaw bɛɛ la, n’ y’a ye ko Jehova tun be n’ barika bonya ani ka n’ ɲɛminɛ.” O y’a dɛmɛ a tora ka kɛ ni miiriya ɲuman ye a yɛrɛ koo la.

18. Mun na i b’a miiri ko Ala ye nɛɛma kɛ i ye? Mun kosɔn i b’a fɛ k’a fɔ ni kaanba ye ko “Masaba ka tanu”?

¹⁸ Nɛɛma min tun be Ala sagokɛlaw ye galen, zaburu sɛbɛbaga tun b’o kala ma. Ala “ka kuma” ani a ka “kolatigɛninw n’a ka fɔtaw” tun dira olu dɔrɔn lo ma (Zaburuw 147:19, 20 kalan). Ala y’an fana duga. Dugukolo kan bi, an dɔrɔn lo be weele a tɔgɔ la. An be Jehova lɔn ani an b’a ka Kuma sira tagama. O kɛra sababu ye an be jɛnɲɔgɔnya teriman kɛ n’a ye. I ko Zaburuw 147 sɛbɛbaga, yala dalilu caaman t’i fɛ k’a fɔ ni kaanba ye ko “Masaba ka tanu” wa? Yala, i be mɔgɔ wɛrɛw jija u ka Jehova tanu wa?