1, 2. Mun na an ka ɲi k’a lajɛ cogo min na an be se ka mɔgɔ dusu saalo n’a ka mɔgɔ sara? (Jaa lajɛ, barokun daminɛ na.)

SUSI y’a fɔ ko: “An deen sara a saan kelen ɲɔgɔn ye nin ye. Nka, an bele dusu kasinin lo kosɔbɛ.” Kerecɛn wɛrɛ y’a fɔ ko tuma min na ale muso barila ka sa, ale “dusu kasira fɔɔ a tɛ se ka fɔ.” A fɔ man di, nka o dusukasi ɲɔgɔn be mɔgɔ caaman sɔrɔ. N’a sɔrɔ kafoden caaman tun t’a miiri k’olu ka mɔgɔ sɔbɛ dɔ tun bena sa sanni Arimagedɔn ka se. N’a sɔrɔ i ka mɔgɔ sɔbɛ dɔ sara wala ko i be mɔgɔ dɔ lɔn min ka mɔgɔ dɔ sara. I be se k’i yɛrɛ ɲininga ko: “Mɔgɔ min ka mɔgɔ sara, o tigi be se ka dususalo sɔrɔ cogo di?”

² Mɔgɔ dɔw b’a fɔ ko ni koo o koo y’i sɔrɔ, a mɛɛn o mɛɛn, i ka dusukasi bena ban. Nka, yala o kɔrɔ ko wagati be se k’a to an ka dusukasi be ban wa? Firiyamuso dɔ y’a fɔ ko: “Ne fɛ, a ka fisa an k’a fɔ ko mɔgɔ be min kɛ o wagati la, o lo b’a dɛmɛ ka dususalo sɔrɔ.” N’u be joli furakɛ, a be nɔgɔya dɔɔni dɔɔni. O cogo kelen na, ni tɔɔw b’u janto mɔgɔ dusukasinin na ni kanuya ye, a ka dusukasi be nɔgɔya dɔɔni dɔɔni. Ni dɔ ka mɔgɔ sara, mun lo be se k’o tigi dɛmɛ tigitigi ka dususalo sɔrɔ?

3, 4. N’an ka mɔgɔ sɔbɛ dɔ sara, mun na an be se ka la a la ko Jehova b’an faamu?

³ Siga t’a la, dususalo be bɔ an sankolola Faa Jehova lo fɛ, ale min be makari an na (2 Korɛntikaw 1:3, 4 kalan). N’an be tɔɔrɔla, mɔgɔ si t’an faamu ka se Jehova ma. A y’a sagokɛlaw hakili sigi ko: “Ne le y’aw dusu saalobaga ye.”—Ezayi 51:12; Zab. 119:50, 52, 76.

⁴ Makaritigi Ala Jehova yɛrɛ ka mɔgɔ kanulen dɔw sara. U dɔw ye Ibrayima, Isiyaka, Yakuba, Musa ani Masacɛ Dawuda ye (Nɔnb. 12:6-8; Mat. 22:31, 32; Kɛw. 13:22). Bibulu b’an hakili sigi ko Jehova kɔrɔtɔnin lo k’o mɔgɔ kantigiw kunu ka bɔ saya la (Zɔbu 14:14, 15). U bena ninsɔndiya ni kɛnɛya dafanin sɔrɔ. I hakili to a la fana ko Ala Dencɛ kanulen tɔɔrɔla fɔɔ ka sa. O Dencɛ “koo tun ka di a ye kosɔbɛ.” (Talenw 8:22, 30, Traduction du monde nouveau). O ye Jehova dusu kasi cogo min na, a tɛ se ka fɔ.—Zan 5:20; 10:17.

5, 6. Jehova b’an dusu saalo cogo di?

⁵ An be se ka la a la kosɔbɛ ko Jehova bena an dɛmɛ. O kama, an kana sigasiga k’an dusukunnakow n’an ka dusukasikow fɔ a ye delili la. Tiɲɛn na, k’a lɔn ko Jehova b’an faamu n’an dusukasinin lo, o b’an dusu saalo ani k’an jigi tugu. Nka, a b’o kɛ cogo di do?

⁶ Ala b’an dɛmɛ a ka “Nii Senuman barika la.” (Kɛw. 9:31). A be se ka tɛmɛ a ka hakili senu fɛ k’an dusu saalo kosɔbɛ. Yezu yɛrɛ y’a fɔ ko n’an be hakili senu deli an sankolola Faa fɛ, a bena o di an ma (Luka 11:13). Susi min kofɔra barokun daminɛ na, ale ko: “Tuma caaman na, an y’an kunbiri gwan duguma ka Jehova deli kosɔbɛ walisa a k’an dusu saalo. O wagatiw bɛɛ la, Ala ka hɛɛrɛ y’an dusukun n’an hakili mara.”—Filipikaw 4:6, 7 kalan.

7, 8. Mun na an be se ka la a la ko Yezu bena an dusu saalo?

⁷ Yezu tun be dugukolo kan tuma min na, a y’a yira a ka kumaw n’a ka kɛwalew fɛ ko a be makari i ko a Faa Jehova (Zan 5:19). Jehova ye Yezu ci ka na dugukolo kan walisa ka “mɔgɔ dusukasininw” ani mɔgɔ jigitigɛninw dusu saalo (Ezayi 61:1, 2; Luka 4:17-21). Mɔgɔw tun b’a lɔn ko n’u be tɔɔrɔla, Yezu b’u faamu ani ko a b’a fɛ k’u dɛmɛ sɔbɛ la.—Eburuw 2:17.

⁸ Yezu kanbele tuma na, siga t’a la a teri sɔbɛ dɔw ani a somɔgɔ dɔw sara. A be komi Yezu lamɔfa Yusufu sara tuma min na Yezu tun ye kanbele ye. * N’a sɔrɔ a tun be ni saan 20 ɲɔgɔn ye. Miiri k’a filɛ, a tun ka gwɛlɛ Yezu fɛ cogo min na k’a ka dusukasi muɲu. N’a sɔrɔ a tun man nɔgɔ a fɛ fana k’a bamuso, a dɔgɔcɛw n’a dɔgɔmusow dɛmɛ u k’u ka dusukasi muɲu.

9. Yezu y’a yira cogo di ko Marita ni Mari makari tun b’a la?

⁹ Yezu ka cidenya baara tuma na dugukolo kan, a y’a yira ko a be mɔgɔw faamu ani a be makari u la kosɔbɛ. Ɲɛyirali fɛ, tuma min na a teri sɔbɛ Lazari sara, Marita ni Mari dusu kasinin tun lo kosɔbɛ. Dusukasiba min tun b’u kan, Yezu y’o faamu. U makari y’a minɛ fɔɔ a y’a daminɛ ka kasi. A kasira hali k’a sɔrɔ a tun b’a lɔn ko a tun bena Lazari kunu ka bɔ saya la.—Zan 11:33-36.

10. Mun na an be se ka la a la ko n’an dusukasinin lo, Yezu b’o faamu?

¹⁰ Yezu y’a yira ko a be makari ani ko a be mɔgɔw dusu saalo. O b’an dɛmɛ cogo di bi? Bibulu b’an hakili sigi ko: “Yezu Krista tun be cogo min na kunun, a b’o cogo kelen le la bii, a bena kɛ ten fana tuma bɛɛ.” (Eburuw 13:8). Yezu weelela ko “ɲɛnamaya kuntigi” sabu ale barika la, an be se ka ɲɛnamaya banbali sɔrɔ. Yezu yɛrɛ ye dusukasi sɔrɔ. O kama, mɔgɔ “minw be kɔrɔbɔli la, a be se k’u dɛmɛ.” (Kɛw. 3:15, ABM; Eburuw 2:10, 18). O la, an be se ka la a la ko ni dusukasi b’an kan, o be Yezu tɔɔrɔ. A b’an faamu ani a labilanin lo k’an dusu saalo an “dɛsɛ tuma na.”—Eburuw 4:15, 16 kalan.

11. Vɛrise jumanw lo be ele dusu saalo kosɔbɛ?

¹¹ Dususalo lo an fɛ, k’a lɔn ko Yezu dusu kasira kosɔbɛ Lazari saya kosɔn. Vɛrise wɛrɛw be sɔrɔ Ala ka Kuma kɔnɔ minw b’an dusu saalo fana. O tɛ bari an na, sabu “koo minw bɛɛ tun fɔra Ala ka kuma na kabini fɔlɔfɔlɔ, o fɔra ka hakili d’an ma, janko an jaa ka gwɛlɛya ani ka muɲu, ka jigi sɔrɔ o barika la.” (Ɔrɔm. 15:4). N’i ka mɔgɔ sɔbɛ dɔ sara, i fana be se ka dususalo sɔrɔ vɛrise nunu kɔnɔ:

• “Masaba [ Jehova] be dusukasibagaw gɛrɛfɛ. A be mɔgɔ jigitigɛninw kisi.”—Zab. 34:19, 20.

• “Ne ka haminako tun ka ca kosɔbɛ tuma min na, [ Jehova] ye ne jigi tugu, ne nisɔndiyara.”—Zab. 94:19.

• “An Matigi Yezu Krista yɛrɛ, n’an Faa Ala, min y’an kanu n’a b’an jaa gwɛlɛya [o kɔrɔ, dusu saalo] tuma bɛɛ, ani ka jigiɲuman d’an ma, a ka nɛɛma kosɔn, olu k’aw jaa gwɛlɛya, ani ka barika don aw la.”—2 Tes. 2:16, 17. *

12. An be se ka tɔɔw dusu saalo cogo di?

¹² N’an ka mɔgɔ dɔ sara, kafodenw fana be se k’an dusu saalo kosɔbɛ (1 Tesalonikaw 5:11 kalan). “Dusukasi be mɔgɔ” minw kan, an be se k’olu jija ani k’u dusu saalo cogo di? (Talenw 17:22). I hakili to a la ko “jewaati be yen, kumawaati fana be yen.” (Waaj. 3:7). Firiyamuso dɔ tɔgɔ ko Dalene. Ale y’a fɔ ko: “Minw ka mɔgɔ sara, olu mako b’a la k’u kɔnɔnakow n’u ka miiriyaw fɔ. O la, a kɔrɔtanin lo an k’u lamɛn koɲuman ani an kana kuma tigɛ u daa.” Junia kɔrɔcɛ y’a yɛrɛ faga. Junia y’a fɔ ko: “Minw ka mɔgɔ sara, tiɲɛn lo ko u dusu kasinin lo cogo min na, an tɛ se k’o faamu bɛrɛbɛrɛ. Min kɔrɔtanin lo, o ye ko an b’a fɛ k’u ka dusukunnakow faamu.”

13. An ka ɲi ka mun lo to an hakili la dusukasi koo la?

¹³ I hakili to a la fana ko mɔgɔw ka dusukasi tɛ kelen ye ani u t’o yira cogo kelen na. Tuma dɔw la, an yɛrɛ dɔrɔn lo b’a lɔn dusukasi min b’an kan ani a be se ka gwɛlɛya an ma k’o ɲɛfɔ mɔgɔw ye. Ala ka Kuma b’a fɔ ko: “Ni mɔgɔ dusu cɛnna, a yɛrɛ le b’o lɔn. N’a dusu ka di fana, mɔgɔ wɛrɛ te se k’o diya dɔ sɔrɔ.” (Talenw 14:10). Hali ni mɔgɔ dɔ y’a dusukunnakow fɔ, a man nɔgɔ tɔɔw fɛ tuma bɛɛ k’a faamu a b’a fɛ ka min fɔ tigitigi.

14. Ni dɔ ka mɔgɔ sara, an be se ka mun lo fɔ wala ka mun lo kɛ walisa k’a dusu saalo?

¹⁴ Tiɲɛn na, saya dusukasi be mɔgɔ min kan, tuma dɔw la an t’a lɔn an bena min fɔ o tigi ye. Nka, Bibulu b’a fɔ ko “lɔnnikɛla ka kuma be mɔgɔ dusu suma.” (Talenw 12:18). Mɔgɔ caaman sera ka dusukasibagatɔw dusu saalo sɛbɛ nin sababu fɛ: Quand la mort frappe un être aimé.... * Tuma caaman na, an be se ka dusukasibagatɔw dɛmɛ bɛrɛbɛrɛ cogo min na, o ye ka ladili nin sira tagama: “Minw be kasi, aw ye kasi ni olu ye.” (Ɔrɔm. 12:15). Gaby cɛɛ sara ani a ko tuma dɔw la ale b’a dusukunnakow yira kasi dɔrɔn lo fɛ. A ko: “O kama, ni n’ teriw be kasi ni n’ ye, o be n’ dusu saalo. O wagatiw la, n’ b’a ye ko n’ tɛ n’ kelen na.”

15. Hali n’a ka gwɛlɛ an ma ka kuma ni dusukasibagatɔ ye, an be se k’a dusu saalo cogo di? (Koorilen nin lajɛ: “ Dususalo kumaw.”)

¹⁵ A be se ka gwɛlɛya i ma ka kuma ni dusukasibagatɔ ye. N’o lo, n’a sɔrɔ a ka fisa i ka dususalo kumaw sɛbɛ lɛtɛrɛ, e-mail wala sms kɔnɔ k’u ci a tigi ma. I be se ka vɛrise dɔ sɛbɛ min be mɔgɔ dusu saalo. I be se ka banbagatɔ ka jogo ɲuman dɔ sɛbɛ wala k’a tigi ka koo dɔ lakali min diyara i ye. Junia y’a fɔ ko: “Ni mɔgɔ ye jijalikuma dennin dɔ sɛbɛ k’o ci n’ ma wala ni n’ kerecɛn ɲɔgɔn dɔ ye n’ weele ka na dumuni kɛ n’a ye, o be ne dɛmɛ kosɔbɛ. O b’a to ne b’a lɔn ko mɔgɔw be n’ kanu ani u b’u janto n’ na.”

16. An be se ka mɔgɔ dusu saalo koɲuman cogo wɛrɛ juman na?

¹⁶ An balima min ka mɔgɔ dɔ sara, an ka la a la ko an be delili minw kɛ a ye wala n’a ye, o deliliw be se k’a dɛmɛ. A be se ka gwɛlɛya an ma k’an dusukunnakow fɔ delili la o wagati gwɛlɛ na. Hali n’an be kasi ka sigisigi, n’an be delili kɛ a ye ni kɔnɔgwɛ ye, o be se k’a dusu saalo kosɔbɛ. Dalene y’a fɔ ko: “Tuma dɔw la, ni balimamusow nana bɔ n’ ye ka n’ jaa gwɛlɛya, n’ b’a ɲini u fɛ u ka delili kɛ n’ ye. A daminɛ ka gwɛlɛ u ma. Nka delili kɛtɔ, u kaan be gwɛya ka taga ani u be kuma n’u dusukun bɛɛ ye. U ka limaniya barikaman, u ka kanuya ani u b’u janto ne la cogo min na, o be ne ka limaniya sabati.”

17-19. Mun na an ka ɲi ka to ka dusukasibagatɔw dusu saalo?

¹⁷ A ka gwɛlɛ k’a lɔn mɔgɔ kelen kelen bɛɛ ka dusukasi bena mɛɛn fɔɔ ka se wagati min ma. Mɔgɔ min ka mɔgɔ sɔbɛ sara, a daminɛ na, a teriw n’a lɔnbagaw be na walisa k’a dusu saalo. Kalo damanin o kɔ, u bɛɛ b’u ka loon o loon baaraw daminɛ. Nka, dusukasibagatɔ mako bele be dususalo la. O kama, an ka to k’an yɛrɛ labila walisa k’a dɛmɛ. Bibulu b’a fɔ ko: “Teri sɛbɛ bɛ mɔgɔ kanu tuma bɛɛ, a bɛ kɛ i balimakɛ ye tɔɔrɔ waati la.” (Talenw 17:17, ABM ). Kerecɛnw be se k’u kerecɛnɲɔgɔn dusukasininw dusu saalo kosɔbɛ u ka dusukasi wagati bɛɛ la.—1 Tesalonikaw 3:7 kalan.

¹⁸ Kana ɲinɛ ko dusukasibagatɔ ka dusukasi be se ka daminɛ tuma bɛɛ. Koo nunu be se k’a tigi hakili jigi banbagatɔ koo la: u ka furu sanyɛlɛma loon, miziki, fotow, kasa dɔ, mankan dɔ, saan wagati dɔ wala u tun be koo minw kɛ ɲɔgɔn fɛ. Mɔgɔ min furuɲɔgɔnma sara, n’a sɔrɔ a tun be deli ka koo dɔw kɛ n’a furuɲɔgɔnma ye i n’a fɔ ka taga lajɛnbaw wala Yezu ka saya Hakilijigi lajɛnw na. O tigi siɲɛ fɔlɔ k’o koow kɛ a kelen, o be se k’a ka dusukasi lawuli. Balimacɛ dɔ y’a fɔ ko: “N’ muso sanin kɔ, n’ tun b’a lɔn ko an ka furu sanyɛlɛma loon min bena na o kɔ, o tun bena gwɛlɛya n’ ma. Tiɲɛn na, a tun man nɔgɔ hali dɔɔni. Nka, balima dɔw ni n’ teri sɔbɛw ye ɲɛnagwɛ dennin dɔ labɛn walisa n’ kana to n’ kelen.”

¹⁹ A to i hakili la ko dusukasibagatɔw mako tɛ dɛmɛ na wagati kɛrɛnkɛrɛnninw dɔrɔn na. Junia y’a fɔ ko: “Ka koo kɛrɛnkɛrɛnnin dɔ sanyɛlɛma loon niin bɔ a la, mɔgɔ be dɛmɛ min sɔrɔ loon gwansanw na, o b’a tigi nafa kosɔbɛ. O dɛmɛ ɲɔgɔn be mɔgɔ nafa ani k’a dusu saalo kosɔbɛ.” Tiɲɛn lo, an tɛ se ka dusukasibagatɔ ka dusukasi wala a furuɲɔgɔn ɲɛnafin bɛɛ ban. Nka, an be se k’a jija ani k’a dusu saalo n’an be koo dɔw kɛ a ye (1 Zan 3:18). Gaby y’a fɔ ko: “N’ be Jehova waleɲuman lɔn kosɔbɛ diinan mɔgɔkɔrɔw ka dɛmɛ kosɔn. U ye n’ dɛmɛ gwɛlɛyaw wagati la. Tiɲɛn na, u ye n’ dɛmɛ k’a faamu ko Jehova be n’ kanu ani ko a b’a janto n’ na.”

20. Jehova y’a daa di koo minw na, mun na u b’an dusu saalo kosɔbɛ?

²⁰ Dususalo lo k’a lɔn ko Jehova min ye Dususalotigi Ala ye, ale bena dusukasikow bɛɛ ban yanni dɔɔni. Bibulu b’a fɔ ko: “Suuw bena [ Krista] kaan mɛn. U bena kunun”! (Zan 5:28, 29). O wagati la, an dusu bena saalo fɔɔ abada! Ala y’a daa di ko “a bena saya fanga ban pewu! Matigi, Masaba bena bɛɛ ɲaji cɛ.” (Ezayi 25:8). O tuma na, mɔgɔ minw bɛɛ bena kɛ dugukolo kan, sanni u ka kasi, “mɔgɔ minw be nisɔndiya la,” u bena “nisɔndiya ni olu ye.”—Ɔrɔm. 12:15.