DUNIƝA nin ɲagaminin lo. O kama, an ka ɲi k’an jija kosɔbɛ ka hɛɛrɛ sɔrɔ. Nka hali n’an ye hɛɛrɛ dɔɔni sɔrɔ, tuma caaman na an ka ɲi ka banba a kana nagasi. Ka kɛɲɛ ni Ala ka Kuma ye, an be se ka hɛɛrɛ sɔbɛ sɔrɔ cogo di? An be se ka tɔɔw dɛmɛ cogo di k’o hɛɛrɛ sɔrɔ?

Walisa ka hɛɛrɛ sɔbɛ sɔrɔ, fɔɔ an hakili ka sigi ani an ka kɛ lafiya la. An ka ɲi fana ka jɛnɲɔgɔnya ɲuman kɛ ni tɔɔw ye. Min yɛrɛ kɔrɔtanin lo kosɔbɛ, o ye ka jɛnɲɔgɔnya teriman kɛ ni Ala ye. An be se k’o kɛ cogo di?

An ka Jehova ka cikan tilenninw ani a ka sariyakolow labato. O la, an b’a yira ko an jigi be Jehova kan ani ko an b’a fɛ ka jɛnɲɔgɔnya hɛɛrɛman kɛ n’a ye (Zer. 17:7, 8; Zaki 2:22, 23). O bena a to, ale fana bena a magwɛrɛ an na ani a bena an dusu lafiya. Ezayi 32:17 b’a fɔ ko: “Tilenninya nafa bena kɛ hɛrɛ ye, tilenniya bena na ni ɲasuman, ni hakilisigi ye tuma bɛɛ.” N’an be mɛnni kɛ Jehova fɛ n’an dusukun bɛɛ ye, an dusukun bena lafiya sɔbɛ la.—Ezayi 48:18, 19.

Hakili senu fana be se k’an dɛmɛ ka hɛɛrɛ sɔbɛ sɔrɔ. O ye Jehova ka nilifɛn nafamanba dɔ ye.—Kɛw. 9:31.

Ciden Pol y’a yira ko hɛɛrɛ ye “nii senuman” deen faan sabanan ye (Gal. 5:22, 23). Hɛɛrɛ sɔbɛ be sɔrɔ hakili senu sababu lo fɛ. O kama, an ka ɲi k’a to a k’an ɲɛminɛ walisa an ka hɛɛrɛ sɔbɛ sɔrɔ. Hakili senu be se k’an dɛmɛ cogo di ka hɛɛrɛ sɔbɛ sɔrɔ? An ka koo fila lajɛ.

 A fɔlɔ, komi Ala ka Kuma sɛbɛra hakili senu sabu fɛ, n’an b’a kalan loon o loon, o b’an dɛmɛ ka hɛɛrɛ sɔbɛ sɔrɔ (Zab. 1:2, 3). An be min kalan, an ka miiri o kan. O la, Ala ka hakili senu bena an dɛmɛ ka Jehova ka miiriya faamu koo caaman kan. Ɲɛyirali fɛ, an b’a faamu mun na Ala ye hɛɛrɛtigi ye ani fɛɛn min kama hɛɛrɛ kɔrɔtanin lo a fɛ. An be kalan minw sɔrɔ Bibulu kɔnɔ, n’an b’u sira tagama, an be hɛɛrɛ sɔrɔ kosɔbɛ an ka ɲɛnamaya kɔnɔ.—Talenw 3:1, 2.

A filanan, an ka ɲi ka hakili senu deli Ala fɛ (Luka 11:13). Jehova y’a daa di ko n’an y’ale ka dɛmɛ ɲini, “hɛrɛ min tɛmɛna mɔgɔw ka faamuyali ma, o le bena [an] tanga hamikojugu ma, Yezu Krista barika la.” (Filip. 4:6, 7). N’an be to ka hakili senu deli Ala fɛ, a bena an dusu lafiya kosɔbɛ. O dusulafiya tɛ sɔrɔ n’an tɛ jɛnɲɔgɔnya ɲuman kɛ ni Ala ye.—Ɔrɔm. 15:13.

Dɔw y’o ladiliw sira tagama ani u y’u ka ɲɛnamaya kɛcogo yɛlɛma. O y’a to u ye hɛɛrɛ sɔbɛ sɔrɔ. Ka fara o kan, u be hɛɛrɛ la ni Jehova ani u mɔgɔɲɔgɔnw ye. U sera k’o kɛ cogo di?

Sanni mɔgɔ dɔw ka kɛ Jehova Seerew ye, u tun ye ‘dusubatigiw’ ye. Nka sisan, u b’u janto tɔɔw la, ka ɲumanya kɛ u ye ani u b’a ɲini ka to hɛɛrɛ la ni tɔɔw ye * (Talenw 29:22). An k’a filɛ balima fila sera k’o kɛ cogo min na.

David tun be dimi joona ani o tun be nɔɔ to a kumacogo kan. Sanni a ka kɛ Jehova Seere ye, a tun be mɔgɔw kɔrɔfɔ ani a tun be kuma juguw fɔ a somɔgɔw ma. Kɔfɛ, David y’a faamu ko a ka ɲi k’a sɔɔn yɛlɛma ani k’a ɲini ka kɛ hɛɛrɛ la ni tɔɔw ye. A ye hɛɛrɛ sɔrɔ cogo di? A ko: “N’ y’a daminɛ ka Bibulu ka sariyakolow sira tagama. O y’a to ne ni n’ somɔgɔw tun be ɲɔgɔn bonya kosɔbɛ.”

Rachel lamɔcogo ye nɔɔ to a kan. A ko: “Hali sisan n’ be bondori kɛra walisa n’ kana to ka dimi joona sabu n’ lamɔna denbaya min kɔnɔ, o mɔgɔw ye dusubatigiw ye.” Mun lo y’a dɛmɛ ka kɛ hɛɛrɛ la ni tɔɔw ye? A ko:  “Ne be Jehova deli tuma o tuma walisa a ka n’ dɛmɛ.”

David ni Rachel ka koo b’a yira ko n’an be Bibulu ka sariyaw sira tagama ani n’an be Ala deli a ka hakili senu di an ma, an bena hɛɛrɛ sɔbɛ sɔrɔ. Tiɲɛn na, hali n’an be duniɲa juguman kɔnɔ, an dusukun bena lafiya. O b’a to bɛɛn be kɛ an n’an somɔgɔw n’an kerecɛnɲɔgɔnw cɛ. Jehova b’an jija ko an ka “to hɛrɛ la ni mɔgɔ bɛɛ ye.” (Ɔrɔm. 12:18). O be se ka kɛ tiɲɛn na wa? N’an b’an jija ka to hɛɛrɛ la ni tɔɔw ye, nafa jumanw lo b’o la?

An ka waajuli baara sen fɛ, an be hɛɛrɛ kofɔ mɔgɔw ye Ala ka Masaya koo la. O la, an be sababu di u ma k’o hɛɛrɛ nafa sɔrɔ (Ezayi 9:5, 6; Mat. 24:14). An ninsɔn ka di k’a ye ko mɔgɔ caaman sɔnna o kibaro diiman na. O kɛra sababu ye u jigi tigɛnin tɛ ani duniɲa ka koow cogoya t’u kɔnɔ gwan tugun. Nka sisan, u be ni jigiya sɔbɛ ye siniɲasigi koo la. O b’u lasun “ka hɛrɛ ɲini ka tugu a nɔfɛ.”—Zab. 34:15, ABM.

Bɛɛ lo tɛ sɔn ka kibaro diiman lamɛn ɲɔgɔnyeko fɔlɔ la (Zan 3:19). O n’a ta bɛɛ, Ala ka hakili senu b’an dɛmɛ ka kibaro diiman fɔ u ye hɛɛrɛ la ani ka bonya la u kan. O cogo la, Yezu ye cikan minw di Matiyo 10:11-13 kɔnɔ ka ɲɛsin waajuli ma, an b’a yira ko an b’o sira tagama. Yezu y’a fɔ yen ko: “N’aw bena don luu min kɔnɔ, aw k’a fɔ ko Ala ka hɛrɛ kɛ o luu kɔnɔ mɔgɔw ye. N’u sɔnna ko aw ka jigi u fɛ, aw ye duga min kɛ u ye, u bena o hɛrɛ sɔrɔ. Nga n’u banna ko aw te jigi u fɛ, aw tun ye duba min kɛ u ye, u tena o hɛrɛ sɔrɔ.” N’an be tugu Yezu ka ladiliw kɔ, hali n’a tigi m’an lamɛn, o t’an ka hɛɛrɛ nagasi ani an jigi b’a la ko a tigi bena mɛnni kɛ an fɛ siɲɛ wɛrɛ.

N’an be kuma faamanw fɛ ni bonya ye, hali minw b’an kɛlɛ an ka waajuli baara kosɔn, o be kɛ sababu ye hɛɛrɛ be to an n’u cɛ. Ɲɛyirali fɛ, Afiriki jamana dɔ la, mɔgɔw tun be ni miiriya tilenbaliw ye an koo la. O kama, gofɛrɛnɛman ma sɔn an ka Masaya Boonw lɔ. Walisa k’o koo ɲɛnabɔ hɛɛrɛ la, Betɛli y’a ɲini balimacɛ dɔ fɛ ko a ka taga bɔ o jamana ka lasigiden ye Londre, Angletɛri jamana na. O balimacɛ tun ye misɔndenya baara kɛ o jamana na. A tun ka ɲi k’a ɲɛfɔ o jamana ka lasigiden ye ko Jehova Seerew be baara min kɛra u ka jamana kɔnɔ, o nafa tɛ dɔ wɛrɛ ye hɛɛrɛ kɔ. Mun lo sɔrɔla o la do?

O balimacɛ ko: “Tuma min na n’ sera, muso dɔ lo tun be mɔgɔ kunbɛnyɔrɔ la. N’ y’a ye a ka fanidoncogo fɛ ko n’ tun ye siyakan min degi Afiriki, ale y’o siyamɔgɔ dɔ lo ye. N’ y’a fo a ka kaan na. O barila a la kosɔbɛ ani a ye n’ ɲininga ko: ‘A ka di wa?’ N’ y’a fɔ a ye ni bonya ye ko n’ b’a fɛ k’u ka jamana ka lasigiden ye. A y’a weele telefɔni na ani o cɛɛ bɔra ka na. O cɛɛ ye n’ fo a ka siyakan na. O kɔ, n’ y’a ɲɛfɔ a ye ko Jehova Seerew be baara min kɛra u ka jamana kɔnɔ, o kuun tɛ dɔ wɛrɛ ye hɛɛrɛ kɔ. A ye n’ lamɛn koɲuman.”

O balimacɛ ye koow ɲɛfɔ ni bonya ye. O y’a to, o cɛɛ tun tɛ ni miiriya tilenbali ye tugun Jehova Seerew koo la. Dɔɔni o kɔ, o jamana ye sira di Jehova Seerew ma u ka Masaya Boonw lɔ. Balimaw ninsɔndiyara kosɔbɛ sabu hɛɛrɛ sɔrɔla olu ni faamanw cɛ. Tiɲɛn na, n’an be tɔɔw minɛ ni bonya ye, nafa caaman minw b’o la u dɔ ye hɛɛrɛ ye.

Hɛɛrɛ ye hakili senu deen faan dɔ lo ye. Bi, Jehova Seerew be hɛɛrɛ la u ni ɲɔgɔn cɛ. N’i b’i jija ka kɛ n’o jogo ye, i bena dɔ fara o hɛɛrɛ kan. Min yɛrɛ kɔrɔtanin lo kosɔbɛ, i bena i koo diya Jehova ye ani ka hɛɛrɛba ni hɛɛrɛ banbali sɔrɔ duniɲa kura kɔnɔ.—2 Piyɛri 3:13, 14.