1. Gwɛlɛya jumanw lo b’an caaman kan? Nka, mun na Jehova dusu ka di a sagokɛla kantigimanw kɔrɔ? (Jaa lajɛ, barokun daminɛ na.)

A MAN nɔgɔ ka ɲɛnamaya kɛ duniɲa nin kɔnɔ. Ɲɛyirali fɛ, an balima caaman be tɔɔrɔla bana juguw kosɔn. Dɔw kɔrɔla ani u ka ɲi k’u janto u somɔgɔ dɔw la minw kɔrɔla kosɔbɛ. Dɔ wɛrɛw fana be bondori kɛra walisa k’u ka denbaya mako gwɛlɛw wasa. O gwɛlɛyaw ɲɔgɔn caaman lo b’an balima dɔw kan. O gwɛlɛyaw b’u ka wagati caaman ta, k’u ka wari tiɲɛ ani k’u sɛgɛn. O n’a ta bɛɛ, i lanin b’a la kosɔbɛ ko Ala ka layiduw bena dafa ani ko i be se ka siniɲasigi ɲuman sɔrɔ. O ka di Jehova ye kosɔbɛ!

2. Ezayi 40:29 b’an jija mun lo la? An be se ka kɛ ni miiriya tilenbali juman lo ye?

² Yala tuma dɔw la i b’a miiri ko gwɛlɛya minw b’i kan, a ka gwɛlɛ kojugu k’u muɲu wa? N’o lo, i kelen tɛ. Galen, Ala sagokɛla kantigi dɔw tun b’a miiri k’u sera u ka fanga daan na (1 Mas. 19:4; Zɔbu 7:7). Nka, u m’u fari faga. U ye fanga deli Jehova fɛ. Jehova m’u jigi tigɛ sabu a be “fanga di sigɛnbagatɔ ma.” (Ezayi 40:29). A fɔ man di nka, Ala sagokɛlaw dɔw b’a miiri ko walisa k’u ka gwɛlɛyaw muɲu  koɲuman, u ka ɲi ka Jehova batoli dabila wagati dɔ la. Olu fɛ, Jehova sago kɛli b’u sɛgɛn ani u tɛ duga si sɔrɔ o la. O kama, u tɛ Bibulu kalan tugun, u tɛ taga lajɛnw na ani u tɛ waajuli kɛ tugun. Sutana do b’o lo fɛ jaati!

3. a) An be se ka mun lo kɛ walisa an fari kana faga? b) An bena mun lo lajɛ barokun nin na?

³ Sutana b’a lɔn ko n’an b’an sendon bɛrɛbɛrɛ Alakow la, o bena an barika bonya. A do t’o fɛ. O kama, n’i fari faganin lo ani i dusu kasinin lo, kana i mabɔ Jehova la. To k’i magwɛrɛ a la. O la, a ‘bena barika don i la, ka fanga di i ma.’ (1 Piyɛri 5:10; Zaki 4:8). Barokun nin na, an bena koo fila lajɛ minw be se k’a to an be sumaya Jehova ka baara la. An bena a filɛ fana n’an be Bibulu ka sariyakolow sira tagama, o be se k’an dɛmɛ cogo min na ka see sɔrɔ o koow kan. Ezayi 40:26-31 b’a yira ko Jehova be se ka fanga di an ma. An k’o vɛrisew lajɛ fɔlɔ.

4. Ezayi 40:26 b’an dɛmɛ ka mun lo faamu?

⁴ Ezayi 40:26 kalan. Lolo minw be sankolo la, mɔgɔ si tɛ se k’u daa lɔn. Lɔnnikɛlaw b’a fɔ ko n’a sɔrɔ lolo miliyari 400 lo b’an ka lolokulu dama kɔnɔ. O n’a t’a bɛɛ, Jehova be tɔgɔ di o lolow kelen kelen bɛɛ ma. O be mun lo yira an na? Ni Jehova b’a janto lolo kelen kelen bɛɛ la, ele min y’a batobaga ye, miiri k’a filɛ a b’a janto i la cogo min na! I t’a bato sabu waajibi lo i k’o kɛ, nka, i b’o kɛ sabu i b’a kanu (Zab. 19:2, 4, 15). An Faa kanulen b’i lɔn ka ɲɛ. Bibulu b’a fɔ ko ‘hali i kunsigi yɛrɛ, Ala b’o bɛɛ daa lɔn.’ (Mat. 10:30). Ka fara o kan, Zaburu sɛbɛbaga b’an hakili sigi ko: “Masaba be janto mɔgɔtilennin la.” (Zab. 37:18). Tiɲɛn na, gwɛlɛya minw b’i kan a b’u lɔn ani a be se ka fanga di i ma walisa i k’o gwɛlɛya kelen kelen bɛɛ muɲu.

5. Mun na an be se ka la a la ko see be Jehova ye ka fanga di an ma?

⁵ Ezayi 40:28 kalan. Fanga bɛɛ be bɔ Jehova lo yɔrɔ. Miiri k’a filɛ a ye fanga min don tile dɔrɔn kɔnɔ. David Bodanis be sɛbɛri kɛ lɔnnikow kan. A y’a fɔ ko sekɔndi kelen kelen bɛɛ la, fanga min be bɔ tile la, a be i n’a fɔ bɔnbu belebeleba miliyari caaman lo cira. Ka kɛɲɛ ni lɔnnikɛla wɛrɛ ka jatiminɛ ye, funteni min be bɔ tile la sekɔndi kelen kɔnɔ, duniɲa kuru bɛɛ be se ka baara kɛ n’o ye saan 200 000 kɔnɔ! Yala mɔgɔ dɔ be se k’a fɔ ko Jehova min ye tile dan, ale tɛ se ka fanga di an ma walisa an k’an ka gwɛlɛyaw bɛɛ muɲu wa?

6. Kɔrɔ juman na Yezu ka tɔnna yiri b’an lafiya? O b’an nafa cogo di?

⁶ Ezayi 40:29 kalan. N’an be baara kɛ Jehova ye, o b’an ninsɔndiya kosɔbɛ. Yezu y’a fɔ a ka kalandenw ye ko: “A’ ye ne ka tɔnna jiri da aw kan na.” A y’a fɔ fana ko: “Aw dusuw na lafiya sɔrɔ. Ne ka tɔnna jiri man gɛlɛn, ne ka doni ka fiɲɛ.” (Mat. 11:28-30, ABM). O ye tiɲɛn yɛrɛ lo ye! Tuma dɔw la an sɛgɛnnin lo n’an be tagara lajɛn wala waajuli la. Nka, an be cogo di an kɔsegitɔ? An lafiyanin lo ani an labɛnnin lo k’an ka gwɛlɛyaw muɲu. Tiɲɛn na, Yezu ka tɔnna yiri b’an lafiya kosɔbɛ!

7. Ɲɛyirali dɔ fɔ min be Matiyo 11:28-30 ka tiɲɛntigiya yira.

⁷ An ka balimamuso dɔ ka koo lajɛ. An bena a weele ko Kayla. Bana dɔ tun b’a la min b’a to a ka teli ka sɛgɛn kojugu. Hakili ɲagami bana ani kungolo dimi fana tun b’a la. Tuma dɔw la, a ka gwɛlɛ  a fɛ ka taga lajɛnw na. Nka loon dɔ, a ye jijaliba kɛ ka taga forobakalan dɔ lamɛn. O kɔ, a y’a fɔ ko: “Forobakalan tun be kumana farifaga koo lo la. Kalankɛla ye kalan kɛ cogo dɔ la min y’a yira ko a b’a janto mɔgɔ la. O ye n’ dusukun sɔrɔ fɔɔ n’ ɲɛji bɔnna. O ye n’ hakili jigi ko n’ man ɲi ka fɔn lajɛnw na.” A ninsɔndiyara kosɔbɛ sabu a y’a seko kɛ ka taga lajɛn na!

8, 9. Ciden Pol y’a fɔ ko: “Waati min na ne barika dɛsɛra, o waati yɛrɛ la ne be fanga sɔrɔ.” A tun b’a fɛ ka mun lo fɔ?

⁸ Ezayi 40:30 kalan. N’a sɔrɔ see b’an ye ka koo caaman kɛ. Nka, an tɛ se ka fɛɛn bɛɛ kɛ n’an yɛrɛ fanga dɔrɔn ye. An bɛɛ ka ɲi k’o to an hakili la. See tun be ciden Pol ye ka koo caaman kɛ. Nka, a tun b’a fɛ ka koo minw kɛ, a tun tɛ se k’u bɛɛ kɛ. A y’a dusukunnakow fɔ Jehova ye delili la. Jehova y’a fɔ a ye ko a bena a “ka sebagaya yira [Pol] ka dɛsɛwaati la.” Pol y’o faamu ani a y’a fɔ ko: “Waati min na ne barika dɛsɛra, o waati yɛrɛ la ne be fanga sɔrɔ.” (2 Kor. 12:7-10). A tun b’a fɛ ka mun lo fɔ?

⁹ Pol y’a faamu ko a tɛ se ka koo bɛɛ kɛ a yɛrɛ ma. Mɔgɔ min fanga ka bon ka tɛmɛ ale ta kan, a mako tun be o tigi ka dɛmɛ na. Ala tun be se ka fanga di Pol ma a dɛsɛ tuma na, hakili senu barika la. Nka, o dɔrɔn tɛ. Pol tun tɛ se ka koo minw kɛ n’a yɛrɛ fanga ye, hakili senu barika la, a tun bena se k’o kɛ. Jehova be se ka hakili senu di an fana ma. O la, an bena fanga sɔrɔ kosɔbɛ.

10. Jehova ye Dawuda dɛmɛ cogo di a sera k’a ka gwɛlɛyaw muɲu?

¹⁰ Siɲɛ caaman na, Zaburu sɛbɛbaga Dawuda y’a ye Ala ye fanga di a ma cogo min na hakili senu sababu fɛ. A ye dɔnkili la ko: “Ne be girin kɛlɛbolo kan ele Ala lo sababu la. Ne be se ka dugu laminikogo sago ele lo barika la.” (Zab. 18:30). Gwɛlɛya caaman be yen an tɛ se ka minw ɲɛnabɔ an yɛrɛ ma, u be i n’a fɔ kogo jamanjan an tɛ se ka min sago. O kama, an mako be Jehova ka dɛmɛ na.

11. Hakili senu be se k’an dɛmɛ cogo di an k’an ka gwɛlɛyaw muɲu?

¹¹ Ezayi 40:31 kalan. Bɔɔn (wala sɛgɛn) tɛ to sanfɛ a yɛrɛ fanga dama kosɔn. Fɔɲɔ gwanniman min be yɛlɛ sanfɛ, o lo b’a kɔrɔta sanfɛ. O lo b’a to, a be se ka van ka taga fɔɔ yɔrɔjan ani a tɛ sɛgɛn ten. O la, ni gwɛlɛyaw b’an kan, an ka miiri bɔɔn koo la. Jehova deli a ka fanga d’i ma, “dɛmɛbaga” wala “[hakili] Senuman” sababu fɛ (Zan 14:26). An be se ka Jehova deli tuma o tuma tile kuru bɛɛ kɔnɔ walisa k’a ka hakili senu sɔrɔ. Ni bɛnbaliya b’an ni kafoden dɔ cɛ, n’a sɔrɔ o tuma na yɛrɛ le an mako bena kɛ Ala ka dɛmɛ na. Nka, mun lo be na n’o bɛnbaliyaw ye?

12, 13. a) Mun na bɛnbaliyakow be se ka kɛ kerecɛnw ni ɲɔgɔn cɛ? b) Yusufu ka ɲɛyirali be mun lo yira an na Jehova koo la?

¹² Bɛnbaliyakow be kɛ an ni ɲɔgɔn cɛ sabu an ye mɔgɔ dafabaliw ye. Tuma dɔw la, tɔɔw be se k’an hakɛ ta u ka fɔta wala u ka kɛwalew fɛ. An fana be se k’u hakɛ ta o cogow la. O be se k’an ka limaniya kɔrɔbɔ. Nka, n’an b’an yɛrɛ degi ka baara kɛ n’an balimaw ye hɛɛrɛ la, an b’a yira ko an b’a fɛ ka kantigiya kɛ Jehova ye. Jehova b’an balimaw kanu u ka dafabaliya bɛɛ n’a ta. An fana ka ɲi k’u kanu.

¹³ Jehova t’a sagokɛlaw bali kɔrɔbɔli ma. Yusufu ka ɲɛyirali b’o lo yira. A kanbele tuma na, a fadenw y’a feere jɔnya la keliya kosɔn ani a sanbagaw tagara n’a ye Ezipiti (Zɛnɛzi 37:28). Jehova y’a ye min tun be kɛra cɛɛ kantigi  Yusufu la. Siga t’a la a dusu tiɲɛna k’a ye u tun be min kɛra a tericɛ la. O n’a ta bɛɛ, Jehova m’o koo bali. Kɔfɛ, u ye ngalon tigɛ ka la Yusufu kan ko a tun b’a fɛ ka ben Potifar muso kan ka la n’a ye ani u y’a don kaso la. Jehova m’o koo bali fana. Nka, yala Ala tun ye Yusufu to yen wa? Ayi. Bibulu b’a fɔ ko: “[Jehova] tun be . . . to ka koo bɛɛ ɲa a bolo.”—Zɛnɛzi 39:21-23.

14. N’an tɛ dimi mara an kɔnɔ, nafa juman lo b’o la?

¹⁴ An ka Dawuda ka koo lajɛ fana. Koo jugu caaman kɛra Dawuda la minw man teli ka kɛ mɔgɔw la. O n’a t’a bɛɛ, a ma dimiya mara a kɔnɔ. A tun ye Ala teri ye ani a y’a sɛbɛ ko: “I ka dimi dabila, e dusu kana bɔ. I kana dimi, o bena kɛ kojugu ye.” (Zab. 37:8). Komi an b’a fɛ ka Jehova ladegi, a kɔrɔtanin lo kosɔbɛ an kana dimi mara an kɔnɔ. Jehova “t’an minɛ ka kɛɲɛ n’an ka kojugu ye.” (Zab. 103:10). N’an tɛ dimi mara, nafa wɛrɛ b’o la. Ɲɛyirali fɛ, dimi be se ka tansiyɔn ani nɛnɛkiri bana bila an na. A be se ka na ni biɲɛ ani pankereya (samanɛnɛ) bana ye. N’an ye dumuni kɛ a tɛ jigi an kɔnɔ. N’an diminin lo, o be se k’a to an tɛ miiri koɲuman. Dimi be se k’a to fana an be koo dɔ fɔ wala an be koo dɔ kɛ min be digi tɔɔw la. O kama, an hakili be se ka ɲagami wagatijan kɔnɔ. A ka fisa an k’an hakili sigi. Bibulu b’a fɔ ko: “Hakilisigi be mɔgɔ kɛnɛya.” (Talenw 14:30). O la, an ka ɲi ka mun lo kɛ, ni tɔɔw donna an gasi la? An be se ka mun lo kɛ walisa hɛɛrɛ ka to an n’an balimaw cɛ? An ka Bibulu ka ladiliw sira tagama.

15, 16. I be se ka mun lo kɛ ni mɔgɔ dɔ donna i gasi la?

¹⁵ Efɛzikaw 4:26 kalan. Mɔgɔ min tɛ Jehova sagokɛla ye, n’ale ye koo jugu dɔ kɛ an na, o tɛ bari an na. Nka, n’an kerecɛnɲɔgɔn dɔ wala an somɔgɔ dɔ ye koo dɔ kɛ an na wala a ye fɛɛn dɔ fɔ min ma diya an ye, o be se k’an kɔnɔ gwan kosɔbɛ. N’an tɛ sera ka ɲinɛ o kɔ do? Yala an bena dimiya mara saan caaman kɔnɔ wa? Wala an bena Bibulu ka ladili ɲumanw sira tagama ani k’o koo ɲɛnabɔ joona joona wa? N’an be mɛɛn ka sɔrɔ k’o koo ɲɛnabɔ, a bena gwɛlɛya an ma ka hɛɛrɛ kɛ n’an balima ye.

¹⁶ N’a sɔrɔ i balima dɔ donna i gasi la ani i be to ka miiri o koo la tuma o tuma. I bena mun lo kɛ walisa ka hɛɛrɛ kɛ n’i balima ye? Kɔn ka Jehova deli. A deli a k’i dɛmɛ ka kumaɲɔgɔnya ɲuman kɛ n’i balima ye. A to i hakili la ko i balima ye Jehova teri dɔ lo ye fana (Zab. 25:14).  Ala b’a kanu. Jehova b’a teriw minɛ ni ɲumanya ye ani b’a fɛ an fana k’u minɛ o cogo la (Talenw 15:23; Mat. 7:12; Kɔlɔs. 4:6). O kɔ, miiri koɲuman k’a filɛ i bena min fɔ i balima ye. Kana a miiri ko a tugura le ka don i gasi la. N’a sɔrɔ a filila le wala i ma koow faamu ka ɲɛ. Sɔn a ma ko n’a sɔrɔ ele fana nɔɔ b’o koo la. I be se k’a daminɛ k’a fɔ ko: “N’a sɔrɔ n’ be dimi joona, nka i ye kuma min fɔ n’ ye o loon na, o ye . . . ” N’o kumaɲɔgɔnya sen fɛ i ma se ka hɛɛrɛ kɛ n’i balima ye, kana i fari faga. Jehova deli i balima ye. Jehova deli a k’a duga ani a k’i dɛmɛ walisa i ka sinsin i balima ka jogo ɲumanw kan. I balima fana ye Ala teri ye. A mana kɛ min o min ye, la a la ko i ye jijali minw kɛ walisa ka hɛɛrɛ kɛ n’a ye, o ka di Jehova ye kosɔbɛ.

17. N’an ye jurumu kɛ, Jehova b’an dɛmɛ cogo di walisa an ka jɛnɲɔgɔnya ɲuman kɛ n’ale ye? Mun na an ka ɲi ka sɔn o dɛmɛ ma?

¹⁷ Dɔw b’a miiri ko u tɛ se ka Jehova bato sabu u ye jurumuba kɛ. N’an b’an yɛrɛ jalaki kojugu, o be se k’a to an ka hɛɛrɛ, an ka ninsɔndiya ani an ka fanga be nagasi. Masacɛ Dawuda tun b’a yɛrɛ jalaki kojugu. A y’a fɔ ko: “Ne tun jera ne ta jurumun kan minkɛ, ne farikolo tun bɛ halakira le, ne tun be to ka ŋuna tere bɛɛ; sabu su ni tere, i tun bɛ i boro digira ne kan le.” Dawuda y’a jaa gwɛlɛya ka koow kɛ i n’a fɔ Jehova b’a fɛ a sagokɛlaw k’a kɛ cogo min na. A y’a sɛbɛ ko: “O kosɔn ne lɔra ne ta jurumun na, k’a fɔ i ye. . . . O ra, ele ka ne ta jurumun kunko bɔ ne kunna.” (Zab. 32:3-5, Biblu Ala ta Kuma). N’i ye jurumuba kɛ, Jehova labɛnnin lo ka yafa i ma. A b’a fɛ k’i dɛmɛ walisa i ka jɛnɲɔgɔnya ɲuman kɛ n’ale ye. Nka, a be dɛmɛ min lase i ma diinan mɔgɔkɔrɔw sababu fɛ, i ka ɲi ka sɔn o ma (Talenw 24:16; Zaki 5:13-15). Kana koow bila ka suma sabu i ka ɲɛnamaya banbali be bɔ o lo la! Nka, ni Jehova yafara i ma kabi wagatijan ani i dusukun bele b’i kɛlɛla do?

18. Minw b’u yɛrɛ jalaki kojugu u ka jurumu tɛmɛninw kosɔn, Pol ka ɲɛyirali be se k’u dɛmɛ cogo di?

¹⁸ Tuma dɔw la, ciden Pol fari tun be faga a ka jurumu tɛmɛninw kosɔn. A y’a fɔ ko: “Bari ne ye cidenw bɛɛ la fitinin ye, ne man kan ka wele ko ciden yɛrɛ, bari minw lara Ala la ne ye olu tɔɔrɔ.” O n’a t’a bɛɛ, a y’a fɔ fana ko: “Nga ne be yɔrɔ min na sisan, o ye Ala ka nɛɛma nɔɔ ye.” (1 Kor. 15:9, 10). Jehova tun b’a lɔn ko Pol ye mɔgɔ dafabali ye. Nka, a sɔnna Pol ma ani a tun b’a fɛ Pol k’o faamu. N’i nimisara sɔbɛ la i ka jurumu tɛmɛninw na ani k’u fɔ Jehova ani diinan mɔgɔkɔrɔw ye, i be se ka la a la ko Jehova bena yafa i ma sɔbɛ la. Tiɲɛn na, Jehova yafara i ma ani sɔn o ma.—Ezayi 55:6, 7.

19. Saan 2018 ka kalankun ye juman ye? Mun na o kalankun bɛnnin lo?

¹⁹ Duniɲa nin laban be surunyana minkɛ, an be se ka la a la ko an bena gwɛlɛya caaman sɔrɔ. Nka, an k’a to an hakili la ko Jehova lo be “fanga di sigɛnbagatɔ ma, a be barika don barikatan la.” I mako be min na walisa k’a bato ni kantigiya ye, a bena o d’i ma (Ezayi 40:29; Zab. 55:23; 68:20). Saan 2018 kuru bɛɛ la, an hakili bena jigi o tiɲɛnko nafaman na tuma o tuma n’an tagara lajɛn dɔ la Masaya Boon na. O tiɲɛnko nafaman ye saan 2018 ka kalankun lo ye. A kuun ko: Minw jigi be Jehova kan, olu be fanga kura sɔrɔ.—Ezayi 40:31.