Kalanbagaw ka ɲiningaliw
Zeruzalɛmu min kofɔra Ezayi 60:1 kɔnɔ, kɔrɔ juman na a ‘wilila ka lɔ’ ani ka ‘yeelen bɔ’?
A fɔra Ezayi 60:1 kɔnɔ ko: “Zeruzalɛmu, wili ka lɔ i yeelen ka bɔ. Bari e ka yeelen filɛ nin ye. Masaba ka nɔɔrɔ b’i kan.” Zeruzalɛmu dugu wala Siyɔn tun ye Zuda faamadugu lo ye ani o tun ye Israɛl siya bɛɛ tagamasiɲɛ lo ye (Ezayi 60:14; 62:1, 2). O la Ezayi ye min fɔ, o b’a to an b’an yɛrɛ ɲininga koo fila la: A fɔlɔ, tuma juman na ani cogo juman na Zeruzalɛmu ‘wulila ka lɔ’ ani ka yeelen bɔ Alako ta fan fɛ? A filanan, yala Ezayi ka kumaw tun bena dafa bɛrɛbɛrɛ an ka wagati la wa?
Tuma juman na ani cogo juman na Zeruzalɛmu ‘wilila ka lɔ’ ani ka yeelen bɔ Alako ta fan fɛ? Yahutuw ye saan 70 minw kɛ jɔnya la Babilɔni, Zeruzalɛmu n’a batosoba tun ye tɔmɔ ye. Nka o kɔ, Mɛdiw ni Pɛrɛsiw ye Babilɔni dugu minɛ. U ye Israɛldenw bɛɛ hɔɔrɔnya u minw tun be Babilɔni mara la, walisa u ka kɔsegi u faso la ka tiɲɛn batoli sigi sen kan kokura (Ɛsid. 1:1-4). K’a ta saan 537 ka kɔn Krista tile ɲɛ, Israɛl siya 12 bɛɛ la, mɔgɔ kantigiw y’a daminɛ ka kɔsegi Zeruzalɛmu (Ezayi 60:4). U y’a daminɛ ka sarakaw bɔ Jehova ye, ka ɲɛnagwɛw kɛ ani ka Alabatosoba lɔ kokura (Ɛsid. 3:1-4, 7-11; 6:16-22). Jehova ka nɔɔrɔ y’a daminɛ kokura ka yeelen bɔ Zeruzalɛmu kan, o kɔrɔ, a ka mɔgɔ minw kɔsegira u faso la. Olu fana kɛra yeelen ye siya wɛrɛw fɛ, olu minw tun be dibi la Alako ta fan fɛ.
Nka, Ezayi ka kiraya kumaw faan bɛɛ lo ma dafa o wagati la. Israɛldenw fanba ma to ka mɛnni kɛ Jehova fɛ (Neemi 13:27; Mal. 1:6-8; 2:13, 14; Mat. 15:7-9). Kɔfɛ, u yɛrɛ banna Masiya la, o min ye Yezu Krista ye (Mat. 27:1, 2). Saan 70 Krista tile la, Zeruzalɛmu ni Alabatosoba halakira tugun.
Jehova tun kɔnna k’o koo fɔ (Dan. 9:24-27). A gwɛnin lo ko kiraya kuma minw be Ezayi 60nan kɔnɔ, Jehova sago tun tɛ ko u bɛɛ ka dafa Zeruzalɛmu dugu koo la dugukolo kan.
Yala Ezayi ka kiraya kumaw tun bena dafa bɛrɛbɛrɛ an ka wagati la wa? Ɔnhɔn, nka “Zeruzalɛmu min be sankolo la,” o kiraya kumaw be dafara bɛrɛbɛrɛ ka ɲɛsin ale lo ma. Ciden Pol y’a sɛbɛ o Zeruzalɛmu koo la ko “ale lo y’an bamuso ye.” (Gal. 4:26). Ala ka ɔriganisasiyɔn faan min be sankolo la, o lo ye Zeruzalɛmu ye min be sankolo la (sankolola Zeruzalɛmu) ani mɛlɛkɛ kantigiw lo b’a kɔnɔ. O Zeruzalɛmu deen dɔw ye Yezu ani kerecɛn mɔlen 144000 ye. I ko Pol, o kerecɛn mɔlenw fana ka jigiya ye ka taga sankolo la. Olu lo weelela ko “siya senuman” wala “Ala ka Israɛl.”—1 Piyɛri 2:9; Gal. 6:16, Bible senuma.
Sankolola Zeruzalɛmu ‘wilila’ ani ka ‘yeelen bɔ’ cogo di? A deen kerecɛn mɔlen minw de dugukolo kan, a tɛmɛna olu lo fɛ k’o kɛ. A y’o kɛ i ko a fɔra cogo min na Ezayi 60nan ka kiraya kumaw kɔnɔ.
Saan kɛmɛkulu 2nan na, cidenw sanin kɔ, kerecɛn tɔgɔtigiw ka kalanw jɛnsɛnna yɔrɔ bɛɛ ka kerecɛn mɔlenw bila dibi la Alako ta fan fɛ. O kama, u tun ka ɲi ka “wili” (Mat. 13:37-43). O wagati la, u tun be jɔnya la Babilonɛba kɔnɔ, o kɔrɔ duniɲa kuru bɛɛ ka ngalon diinanw jɛnkulu. U tora o jɔnya la fɔɔ ka taga se “diɲɛ laban tuma” ma, o min daminɛna saan 1914 (Mat. 13:39, 40). Dɔɔni o kɔ saan 1919, u hɔɔrɔnyara ka bɔ Babilonɛba la. U sinna k’a daminɛ ka yeelen bɔ Alako ta fan fɛ, u kɛtɔ ka kibaro diiman fɔ bɛrɛbɛrɛ Ala ka Masaya koo la. a Saanw tɛmɛtɔ, mɔgɔw bɔra siyaw bɛɛ la ka na o yeelen na. U dɔw kɛra Ala ka Israɛl mɔgɔ tɔɔw ye dugukolo kan. A fɔra Ezayi 60:3 kɔnɔ ko u ye “masaw” ye.—Yir. 5:9, 10.
Sini ma, kerecɛn mɔlenw bena yeelen bɔ kosɔbɛ ka tɛmɛ sisan kan. Cogo di do? N’u sara, u be taga kɛ “Zeruzalɛmukura” mɔgɔw ye sankolo la, o kɔrɔ Krista ka muso. U bɛɛ lajɛnnin ye mɔgɔ 144000 ye minw bena kɛ masaw ni sarakalasebagaw ye ni Krista ye.—Yir. 14:1; 21:1, 2, 24; 22:3-5.
Zeruzalɛmukura lo bena Ezayi 60:1 ka kiraya kuma dafa bɛrɛbɛrɛ (Ezayi 60:1, 3, 5, 11, 19, 20 kɔnɔnakumaw suma ni Yirali 21:2, 9-11, 22-26 taw ye). Galen, Zeruzalɛmu lo tun ye Israɛldenw ka faamadugu ye. O cogo kelen na, Zeruzalɛmukura ani Krista lo bena mara kɛ duniɲa kura ka gofɛrɛnɛman kɔnɔ. Zeruzalɛmukura be ‘jigi ka bɔ Ala fɛ’ cogo di? A be ‘jigi ka bɔ Ala fɛ,’ a kɛtɔ ka koo dɔw kɛ ka ɲɛsin dugukolo ma. Ala ɲɛsiranbagaw bena bɔ siyaw bɛɛ la ka “taama a yeelen” na. U yɛrɛ bena hɔɔrɔnya ka bɔ jurumu ni saya la (Yir. 21:3, 4, 24). O bena kɛ sababu ye “yɛlɛmani ka don diɲɛ koow bɛɛ la,” i ko kira Ezayi ani kira tɔɔw tun y’a fɔ cogo min na (Kɛw. 3:21). O yɛlɛmaniba daminɛna tuma min na Krista sigira masaya la ani a bena ban a ka saan waa kelen mara laban na.
a Tiɲɛn batoli sigira sen kan cogo min na saan 1919, o tun lakalila fana Ezekiyɛli 37:1-14 ani Yirali 11:7-12nan kɔnɔ. Ezekiyɛli tun kɔnna k’a fɔ ko wagatijan kɛnin kɔ jɔnya la, kerecɛn mɔlenw bɛɛ lo tun bena hɔɔrɔnya Alako ta fan fɛ. Nka, Yirali ka kitabu tun b’a fɔ ko kerecɛn mɔlenw jɛnkulu dennin min b’an ka waajuli baara ɲɛminɛna, olu tun bena segi ka wolo Alako ta fan fɛ sabu wagati kunkurunin dɔ la, u ma se ka Jehova sago kɛ bɛrɛbɛrɛ. Mun na do? Sabu u tun bagara u ma k’u minɛ ka don kaso la. Saan 1919, Yezu ye u kɛ “jɔncɛ kantigiman hakiliman ye.”—Mat. 24:45, NW; gafe Le culte pur de Jéhovah enfin rétabli ! ɲɛɛ 118 lajɛ.
