Ayi. Jehova Seerew tɛ boloci koo kɛlɛ. An fɛ, bɛɛ lo b’a latigɛ a yɛrɛ ye n’a bena boloci kɛ wala n’a tɛn’a kɛ. Jehova Seere caaman y’a latigɛ ka boloci kɛ.

 An be furakɛcogo ɲanamanw lo ɲini. Lɔnnikɛlaw be jijali minw kɛ walisa banajuguw kana jɛnsɛn, an b’u waleɲuman lɔn o kosɔn. Dɔgɔtɔrɔw fana be baaraba min kɛ mɔgɔw ka kɛnɛyako kosɔn, sanko wagati gwɛlɛn nin na, an b’u waleɲuman lɔn o kosɔn.

 Faaman minw be kɛnɛyakow kun na, an b’u dɛmɛ u ka baara la. Misali la, kabi Covid-19 bana daminɛna, an ye barokunw ani videwo dɔw bɔ kaan caaman na an ka site web kan walisa ka mɔgɔw jija u ka faamanw ka cikanw labato o bana koo la, i n’a fɔ cikan minw ɲɛsinna jama lajɛnko ma, tɛgɛko, cache-nez donko, ani ka to dan na wagati dɔ la walisa ka tɔɔw latanga o bana ma, ani cikan wɛrɛw.—Ɔrɔmukaw 13:1, 2.

 Kabi saan caaman, an ka gafew be mɔgɔw hakili jigi koo nunu na:

•   Ka taga kɛnɛyako ta fan fɛ, bɛɛ lo b’a latigɛ a yɛrɛ ye a bena desizɔn min ta.—Galatikaw 6:5.

   “[Gafe nin] tɛ cikan wala ladili dɔw di mɔgɔw ma k’a yira u ka ɲi ka fura minw ta wala u ka ɲi k’u yɛrɛ fura kɛ cogo min na. A be koow ɲɛfɔ mɔgɔw ye dɔrɔn ani a b’a to bɛɛ k’a latigɛ a bena min kɛ.”—Réveillez-vous !, saan 1987, feburukalo tile 8nan ta.

   “E n’i ka denbayamɔgɔw ka ɲi ka boloci kɛ wa? E lo ka kan k’o koo latigɛ i yɛrɛ ma.”—Réveillez-vous !, saan 1993, utikalo tile 8nan ta.

•   An b’a ɲini k’an yɛrɛ fura kɛ sabu an be niin jati fɛɛn nafamanba ye.—Kɛwaliw 17:28.

   “Jehova Seerew be dɔgɔtɔrɔw sɛgɛrɛ walisa u k’u dɛmɛ k’u ka kɛnɛyakow ɲɛnabɔ. Ɲɛnamaya ka di u ye, ani u b’u seko bɛɛ kɛ ka kɛɲɛ ni Bibulu ka sariyaw ye walisa ka se ka sijan sɔrɔ.”—Kɔrɔsili Sangaso, saan 1975, ɔkutɔburukalo tile fɔlɔ ta.

   “Jehova Seerew be sɔn dɔgɔtɔrɔw k’u furakɛ. U b’a fɛ ka kɛ kɛnɛya la ani ka sijan sɔrɔ. Jehova Seere dɔw yɛrɛ ye dɔgɔtɔrɔw ye, i n’a fɔ dɔgɔtɔrɔcɛ Luka, o min tun ye saan kɛmɛkulu fɔlɔ kerecɛn dɔ ye. . . . Minw be mɔgɔw fura kɛ, Jehova Seerew b’a lɔn k’u be baaraba lo kɛ ani ko u b’u yɛrɛ di ka mɔgɔw dɛmɛ. Jehova Seerew b’o mɔgɔw waleɲuman lɔn sabu u b’u dɛmɛ k’u ka banaw nɔgɔya.”—Kɔrɔsili Sangaso, saan 2011, feburukalo tile fɔlɔ ta.