Psalmowo 35:1-28
David ƒe ha.
35 Oo Yehowa, ʋli tanye le nye futɔwo si me;+Wɔ avu kple ame siwo le avu wɔm kplim.+
2 Tsɔ wò akpoxɔnu sue kple akpoxɔnu gã,+Ne nàtso ava xɔ nam.+
3 Tsɔ wò akplɔ kple fía,* ne nàkpe kple yonyemetilawo.+
Gblɔ nam* be: “Nyee nye wò xɔname.”+
4 Ŋukpe kple vlododo neva ame siwo le nye agbe* dim la dzi.+
Ame siwo le vɔ̃ ɖom ɖe ŋunye la nagbugbɔ ɖe megbe, eye woƒe mo natsi dãa.
5 Wonenɔ abe tsro le ya nu ene;Eye Yehowa ƒe dɔla nenya wo ɖe nu.+
6 Woƒe mɔ dzi nedo viviti eye wòanɔ ɖiɖim,Esi Yehowa ƒe dɔla yɔ wo ɖe nu.
7 Elabena yakatsyɔ woɖo ɖɔ ɖi nam le adzame;Eye woɖe ʋe nam,* evɔ nyemewɔ naneke o hafi.
8 Gbegblẽ neƒo ɖe edzi kpoyi;Eye eya ŋutɔ ƒe ɖɔ si wòɖo la neɖee;Nege dze eme ne wòatsrɔ̃.+
9 Ke nye ya matso* aseye ɖe Yehowa ŋu;Makpɔ dzidzɔ ɖe eƒe xɔxɔdɔwo ŋu.
10 Nye ƒuwo katã agblɔ be:
“Oo Yehowa, ame kae le abe wò ene,
Wò ame si ɖea ame beli la tso ame si sesẽ wui la si me,+Eye nèxɔna na wɔnamanɔŋutɔ kple hiãtɔ la tso ame siwo daa adzo wo la si me?”+
11 Ðasefo siwo ɖo susu vɔ̃ la zɔ va ŋgɔgbe,+Nu siwo ŋu nyemenya naneke le o la biamee wole.
12 Wotsɔa vɔ̃ ɖoa nyui teƒe nam,+Ale be wona metsi asi.*
13 Evɔ ne wole dɔ lém la, nye ya metaa akpanya;Metsia nu dɔna hewɔa fu ɖokuinye,*Eye ne nye gbedodoɖa va tsi gbɔnye eŋumaɖomaɖoe* la,
14 Menɔa yiyim nɔa nu xam abe xɔ̃nye alo nɔvinyeŋutsu fam mele ene;Meléa blanui hedea mo to abe ame si le dadaa fam ene.
15 Gake esi mekli nu la, woawo ya wokpɔ dzidzɔ, eye woƒo takpli;Wokpe ta ɖe ŋunye hede xa ɖi be yewoaƒom aƒu anyi;Wogblẽ ŋunye keŋ, eye ɖoɖoe mezina le wo nu o.
16 Mawumavɔ̃lawo ɖua fewu le ŋunye vlodoametɔe,*Wole aɖukli ɖum ɖe ŋunye,+
17 Oo Yehowa, ɣekaɣi nànɔ eteƒe kpɔm ase ɖo?+
Ðem* tso woƒe amedzidzedzewo me,+Ðe nye agbe xɔasi la* tso dzatawo* si me.+
18 Ekema mada akpe na wò le ame geɖewo ƒe ha dome;+Makafu wò le ameha geɖewo dome.
19 Mègana ame siwo lé fum dzodzro la nakpɔ dzidzɔ le tanye o;Eye mègana ame siwo tsrim dzodzro+ la nate ŋku ɖem o.+
20 Elabena menye ŋutifafanyae wogblɔna o,Ke boŋ woɖoa nugbe ɖe ame fafa siwo le anyigbaa dzi la ŋu.+
21 Woke woƒe nu baa le nunye tsom,Le gbɔgblɔm be: “Ehɛ̃! Ehɛ̃! Míekpɔe kple míaƒe ŋkuwo.”
22 Oo Yehowa, èle eteƒe kpɔm. Mègazi kpi o.+
Oo Yehowa, mèganɔ adzɔge tso gbɔnye o.+
23 Oo nye Mawu, Yehowa, nyɔ, ne nàtso aʋli tanye,Eye nàxɔ nya ɖe nunye.
24 Oo Yehowa nye Mawu, drɔ̃ ʋɔnum ɖe wò dzɔdzɔenyenye+ nu;Eye mègana dzi nadzɔ wo le tanye o.
25 Mègana woagblɔ na wo ɖokui be, “Ehɛ̃! esia dim míele”* o.
Mègana woagblɔ be, “Míemii” o.+
26 Na ame siwo katã le dzidzɔ kpɔm be gbegblẽ va dzinye la,Naɖu ŋukpe eye woƒe mo natsi dãa.
Na ŋukpe kple vlododo nanyè tsyɔ ame siwo doa wo ɖokui ɖe dzi ɖe ŋunye la.
27 Ke na ame siwo dzɔa dzi le nye dzɔdzɔenyenye ŋu la nagli kple dzidzɔ;Eye woanɔ gbɔgblɔm ɖaa be:
“Woado Yehowa, ame si dzɔa dzi le eƒe subɔla ƒe ŋutifafa ŋu la, ɖe dzi.”+
28 Ekema nye aɖe aƒo nu* le wò dzɔdzɔenyenye+ ŋu,Eye wòakafu wò ŋkeke blibo la.+
Etenuŋɔŋlɔ
^ Alo, “fía nuevee.”
^ Alo, “Gblɔ na nye luʋɔ.”
^ Alo, “luʋɔ.”
^ Alo, “na nye luʋɔ.”
^ Alo, “nye luʋɔ atso.”
^ Alo, “wona nye luʋɔ tsi asi.”
^ Alo, “tsi nye akɔnu.”
^ Alo, “nye luʋɔ.”
^ Agate ŋu afia, “Mawumavɔ̃lawo ɖua fewu le abolo si woakpɔ ta ko.”
^ Alo, “Ðe nye luʋɔ.”
^ Egɔmeɖeɖe tẽe, “nye nu ɖekɛ la;” eƒe luʋɔ alo agbee wòwɔnɛ.
^ Alo, “dzatatsuiwo.”
^ Alo, “esia dim míaƒe luʋɔ le.”
^ Alo, “made ŋugble.”
