Psalmowo 40:1-17
Na henɔ la. David ƒe ha.
40 Mekpɔ mɔ na Yehowa vevie,*Eya ta eƒu to anyi ɖe* ŋunye, eye wòse nye ɣlidodo.+
2 Ehem tso do globo me,Tso ba finyafinya me.
Eye wòtsɔ nye afɔwo ɖo agakpe dzi;Ena nye afɔ li ɖi sesĩe.
3 Ede ha yeye nu nam,+Kafukafuha wònye na mía Mawu.
Ame geɖewo akpɔe, eye vɔvɔ̃ aɖo woEye woaɖo dzi ɖe Yehowa ŋu.
4 Dzidzɔtɔe nye ame si ɖoa dzi ɖe Yehowa ŋu,Eye metrɔna ɖe dadala mabuamewo ŋu loo, alo ɖe ame siwo dze alakpa* yome la ŋu o.
5 Oo Yehowa nye Mawu,Nu siwo nèwɔ na mí la sɔ gbɔ loo!Wò nukudɔwo kple wò susu siwo nèɖe ku ɖe mía ŋu la sɔ gbɔ.+
Ame aɖeke mede nuwò o;+Ne mebe maƒo nu tso wo ŋu alo agblɔ wo ŋu nya la,Womele xexlẽ me o!+
6 Menye vɔsawo kple nunanawoe nèdina* o,+Ke boŋ èʋu to nam be mase nu.+
Mèbia numevɔsa kple nuvɔ̃vɔsa o.+
7 Esia tae megblɔ be: “Kpɔ ɖa, meva ɖo,
Agbalẽ xatsaxatsa la mee woŋlɔ nu ɖo le ŋunye.+
8 Oo nye Mawu, wò lɔlɔ̃nu wɔwɔe nye nye dzidzɔ,*+Eye wò se la le menye.+
9 Meɖe gbeƒã dzɔdzɔenyenye ŋuti nya nyui la le ameha gãwo dome.+
Kpɔ ɖa! Nyememia nu o,+Oo Yehowa, wò ŋutɔ ènyae nyuie.
10 Nyemetsyɔ nu wò dzɔdzɔenyenye dzi le nye dzi me o.
Meɖe gbeƒã wò nuteƒewɔwɔ kple wò xɔname.
Nyemeɣla wò lɔlɔ̃ vavã la kple wò nyateƒe la le ameha gãwo dome o.”+
11 Oo Yehowa, mègate wò nublanuikpɔkpɔ lam o.
Na wò lɔlɔ̃ vavã la kple wò nyateƒe la nakpɔ tanye ɖaa.+
12 Xaxa siwo ɖe to ɖem la mele xexlẽ me o.+
Nye vodada gbogboawo kɔ gbɔ tanye ale gbegbe be nyemegate ŋu le nye mɔ kpɔm o;+Wosɔ gbɔ wu nye taɖa,Eye dzi ɖe le ƒonye.
13 Oo Yehowa, lɔ̃ nàɖem dzro!+
Oo Yehowa, va kaba nàva kpe ɖe ŋunye.+
14 Na ame siwo le didim be yewoaɖe nye agbe* ɖa la,Naɖu ŋukpe eye woƒe mo netsi dãa.
Na ame siwo le vɔ̃e dim nam la,Nagbugbɔ ɖe megbe kple ŋukpe gã.
15 Na ame siwo le gbɔgblɔm be, “Ehɛ̃, Ehɛ̃!” la,Woƒe nu neku le woƒe ŋukpe ta.
16 Ke na ame siwo dia wò la+
Natso aseye ahakpɔ dzidzɔ ɖe ŋuwò.+
Eye ame siwo lɔ̃a wò xɔxɔdɔwo la nanɔ gbɔgblɔm ɖaa be:
“Woado Yehowa ɖe dzi.”+
17 Ke nye la, wɔna vɔ le ŋunye eye hiã tum;Yehowa, ɖo ŋku dzinye.
Wòe nye nye kpeɖeŋutɔ kple nye xɔnametɔ;+Oo nye Mawu, mègatsi megbe o.+
Etenuŋɔŋlɔ
^ Alo, “Mekpɔ Yehowa sinu dzigbɔɖitɔe.”
^ Alo, “Ebɔbɔ lé to ɖe.”
^ Alo, “alakpatɔwo.”
^ Alo, “dzea ŋuwò.”
^ Alo, “medi be mawɔ wò lɔlɔ̃nu.”
^ Alo, “luʋɔ.”
