1, 2. (a) Nu kawoe Mawu ƒe “nunana faa si wu gbɔgblɔ” la lɔ ɖe eme? (b) Biabia kawo mee míadzro le nyati sia me?

LƆLƆ̃ ʋã Yehowa wòna nunana gãtɔ mí esi wòdɔ Yesu, si nye Via malɔ̃nugbɔa, wòva anyigba dzi! (Yohanes 3:16; 1 Yohanes 4:9, 10) Apostolo Paulo ɖɔ esia be enye “nunana faa si wu gbɔgblɔ.” (2 Korintotɔwo 9:15) Nu ka tae Paulo zã nyagbɔgblɔ ma?

² Paulo nyae be Yesu ƒe vɔsa la ɖo kpe edzi be Mawu ƒe ŋugbedodo nyuiawo katã ava eme godoo. (Xlẽ 2 Korintotɔwo 1:20.) Esia fia be Mawu ƒe “nunana faa si wu gbɔgblɔ” lae nye Yesu ƒe vɔsa la kpakple nu siwo katã Yehowa ƒe nyuiwɔwɔ kple eƒe lɔlɔ̃ si nu metsina o ʋãnɛ wòwɔna na mí. Asixɔxɔ si gbegbe le nunana sia ŋu la gɔme sese me goglo ŋutɔ. Dɔ kae wòle be nunana tɔxɛ sia nawɔ ɖe mía dzi? Eye nu kae wòle be wòaʋã mí míawɔ esi míele dzadzram ɖo ɖe Kristo ƒe ku ƒe Ŋkuɖodzi si dze Kuɖa, March 23, 2016 dzi ŋu?

3, 4. (a) Aleke nèsena le ɖokuiwò me ne ame aɖe na nu wò? (b) Tɔtrɔ kawoe nunana vevi aɖe ate ŋu ana nàwɔ le wò agbenɔnɔ me?

³ Evivia mía nu ŋutɔ ne ame aɖe na nu mí. Gake nunana aɖewo le etɔxɛ ale gbegbe be ate ŋu atrɔ míaƒe agbenɔnɔ kura. Tsɔe be èdo hlɔ̃, eye wotso kufia na wò. Gake kasia, ame aɖe si mèdze sii o va do be yeaxɔ tohehea ɖe tewòƒe. Elɔ̃ faa be yeatsɔ yeƒe agbe ana ɖe tawò! Dɔ kae esia awɔ ɖe dziwò?

⁴ Lɔlɔ̃ ƒe nunana tɔxɛ sia aʋã wò nàtrɔ wò agbenɔnɔ. Anɔ eme be aƒoe ɖe nuwò hã be nànyo dɔme, alɔ̃ amewo ahatsɔ agɔ siwo wodze le dziwò la ake wo faa. Àdi godoo be yeada akpe gã aɖe ɖe vɔsa sia ta le yeƒe agbe me katã.

5. Mɔ ka nue fe si Mawu xe ɖe mía ta xɔ asi sãa wu nunana bubu ɖe sia ɖe le?

⁵ Fe si Mawu xe ɖe mía ta la lolo sãsãsã wu nunana si le kpɔɖeŋu sia me. (1 Petro 3:18) Bu eŋu kpɔ: Mí katã míenyi nu vɔ̃ dome tso Adam gbɔ, eye wotso kufia na mí. (Romatɔwo 5:12) Lɔlɔ̃ ʋã Yehowa wòdɔ Yesu ɖe anyigba dzi be “wòaɖɔ ku kpɔ” alo aku ɖe amegbetɔwo katã ta. (Hebritɔwo 2:9) Gake Yesu ƒe vɔsaa wɔ nu si yi ŋgɔ wu ema! Ana woaɖe ku ɖa tegbee. (Yesaya 25:7, 8; 1 Korintotɔwo 15:22, 26) Ame siwo katã xɔa Yesu dzi se la anɔ agbe le ŋutifafa kple dzidzɔ me tegbee, woaɖu fia kple Kristo le dziƒo loo, alo anye Mawu Fiaɖuƒea teviwo le anyigba dzi. (Romatɔwo 6:23; Nyaɖeɖefia 5:9, 10) Yayra bubu kawoe Yehowa ƒe nunana sia ahe vɛ?

6. (a) Yehowa ƒe yayra kawoe nèle mɔ kpɔm na vevie? (b) Nu etɔ̃ kawoe Mawu ƒe nunanaa aʋã mí be míawɔ?

⁶ Yayra bubu siwo Mawu ƒe nunana sia ahe vɛ ye nye be, anyigba la katã azu paradiso, woada dɔ na dɔnɔwo, eye woafɔ kukuawo gɔ̃ hã ɖe tsitre. (Yesaya 33:24; 35:5, 6; Yohanes 5:28, 29) Míelɔ̃a Yehowa kple Via malɔ̃nugbɔa ɖe “nunana faa si wu gbɔgblɔ” sia ta. Nu kae nunana sia aʋã mí be míawɔ? Aʋã mí (1) be míadze Kristo Yesu ƒe afɔɖoƒewo yome pɛpɛpɛ, (2) be míalɔ̃ mía nɔviwo, eye (3) be míatsɔ anɔ amewo kem faa tso dzi me.

7, 8. Dɔ kae wòle be Kristo ƒe lɔlɔ̃ nawɔ ɖe mía dzi, eye nu kae wòle be esia naƒoe ɖe mía nu míawɔ?

⁷ Gbã la, ele be Yesu ƒe lɔlɔ̃ naʋã mí be míanɔ agbe si ade bubu eŋu. Apostolo Paulo gblɔ be, ‘Kristo ƒe lɔlɔ̃ la ƒoa nya ɖe mía nu.’ (Xlẽ 2 Korintotɔwo 5:14, 15.) ‘Ame lɔ̃amee wolɔ̃na,’ eya ta Paulo nyae be ne míelɔ̃ ɖe edzi be lɔlɔ̃ gã aɖe le Yesu si na mí la, aʋã míawo hã, alo aƒoe ɖe mía nu, be míalɔ̃e ahade bubu eŋu. Nyateƒee, ne míese nu si tututu Yehowa wɔ na mí gɔme la, eƒe lɔlɔ̃ aʋã mí be míanɔ agbe si aɖee afia be míedea bubu Yesu ŋu. Aleke míawɔ esiae?

⁸ Lɔlɔ̃ na Yehowa aʋã mí be míasrɔ̃ Yesu ahadze eƒe afɔɖoƒewo yome pɛpɛpɛ. (1 Petro 2:21; 1 Yohanes 2:6) Míeɖenɛ fiana be míelɔ̃ Mawu kple Kristo ne míeɖoa to wo. Yesu gblɔ be: “Ame si léa nye sewo me ɖe asi, eye wòwɔa wo dzi la, eyae lɔ̃am. Azɔ ame si lɔ̃am la, Fofonye alɔ̃e, eye malɔ̃e, eye maɖe ɖokuinye afiae.”—Yohanes 14:21; 1 Yohanes 5:3.

9. Aleke xexea ƒoa nya ɖe mía nui?

⁹ Le Ŋkuɖodziɖuɣi sia la, anyo be  míade ŋugble le ale si míele míaƒe agbea zãmee ŋu. Eya ta bia ɖokuiwò be: ‘Nu kawo mee mele Yesu srɔ̃m le xoxo? Akpa kawoe wòhiã be mawɔ asitɔtrɔ le?’ Ele vevie be míabia nya siawo mía ɖokuiwo, elabe xexea ƒoa nya ɖe mía nu be míato yewoƒe ʋe me. (Romatɔwo 12:2) Ne míekpɔ nyuie o la, míava nɔ nufialawo, ame ŋkutawo kple kamedefefewɔla xɔŋkɔ siwo le xexea me la srɔ̃m. (Kolosetɔwo 2:8; 1 Yohanes 2:15-17) Aleke míawɔ aɖu nyaƒoɖeamenu sia dzi?

10. Nya kawoe wòle be míanɔ mía ɖokui biam le Ŋkuɖodziɖuɣi sia, eye nu kae ŋuɖoɖo siwo míakpɔ la aʋã mí be míawɔ? (Kpɔ nɔnɔmetata si le nyati sia ƒe gɔmedzedze.)

¹⁰ ‘Ame ŋutɔe dua eƒe tsi zɔzrɔ̃e,’ eya ta le Ŋkuɖodziɖuɣia la, di ɣeyiɣi nàlé ŋku ɖe wò awuwo, film siwo nèkpɔna, ha siwo nèsena kpakple nu siwo le wò kɔmpiuta, asitelefon, alo tablɛt dzi la ŋu nyuie. Azɔ bia ɖokuiwò be: ‘Ne Yesu le afi sia eye wòkpɔ awu si medo la, ɖe wòakpe ŋu nama?’ (Xlẽ 1 Timoteo 2:9, 10.) ‘Ðe nye awuwo nana amewo kpɔnɛ be Kristo yomedzelae menyea? Ðe Yesu anɔ film siawo kpɔm kplima? Ðe wòalɔ̃ aɖo to ha siwo mesena? Ne Yesu ɣe nye asitelefon alo tablɛt la, ɖe nu siwo wòakpɔ le edzi ate ɖe dzinyea? Ðe wòasesẽ nam be maɖe nu si tae videofefe aɖe ƒoƒo dzɔa dzi nam la me na Yesua?’ Ele be lɔlɔ̃ si le mía si na Yehowa naʋã mí be míatsɔ nu sia nu si mesɔ na Kristotɔ o la aƒu gbe, aleke kee wòxɔ asii o. (Dɔwɔwɔwo 19:19, 20) Esi míeɖe adzɔgbe na Yehowa la, míedo ŋugbe nɛ hã be míanɔ agbe si ade bubu Kristo ŋu. Wogblɔna be, ‘Ðu kple dzo mewɔa xɔlɔ̃ o,’ eya ta mele be nu siwo ana Yesu sɔsrɔ̃ nasesẽ na mí la ƒe ɖeke kura nanɔ mía si o.—Mateo 5:29, 30; Filipitɔwo 4:8.

11. (a) Aleke lɔlɔ̃ na Yehowa kple Yesu ʋãa mí le gbeƒãɖeɖedɔa wɔwɔ me? (b) Aleke lɔlɔ̃ aʋã mí be míakpe ɖe nɔviwo ŋu le hamea me?

¹¹ Lɔlɔ̃ si le mía si na Yesu aʋã mí be míaɖe gbeƒã ahafia nu amewo veviedodotɔe. (Mateo 28:19, 20; Luka 4:43) Le Ŋkuɖodziɖuɣi sia la, ɖe nàte ŋu awɔ ɖoɖo be nàwɔ kpekpeɖeŋu mɔɖeɖedɔa ahazã gaƒoƒo 30 alo 50 le gbeƒãɖeɖedɔa mea? Nɔviŋutsu aɖe si xɔ ƒe 84, si nye aho, la bui be yemate ŋu awɔ mɔɖeɖedɔa o le tsitsi kple lãmegbegblẽ ta. Gake mɔɖela siwo le eƒe nutoa me gblɔ be yewoakpe ɖe eŋu. Eya ta wowɔ ɖoɖo ʋu va kɔnɛ le aƒe me, eye wotia anyigbamama si me nɔvi tsitsia ate ŋu awɔ dɔ le. Esia na be nɔviŋutsua ɖo gaƒoƒo 30 ƒe nudidia gbɔ. Ðe nàte ŋu akpe ɖe hamea me tɔ aɖe ŋu be wòawɔ kpekpeɖeŋu mɔɖeɖedɔa le March alo April mea? Menye ame sia amee ate ŋu awɔ mɔɖeɖedɔa o, ke hã míate ŋu azã míaƒe ɣeyiɣi kple ŋusẽ atsɔ adzi míaƒe subɔsubɔdɔ wɔwɔ na Yehowa ɖe edzi. Ekema míaɖee afia be, abe Paulo ene la, Yesu ƒe lɔlɔ̃ la ƒoa nya ɖe mía nu. Nu bubu ka hãe Mawu ƒe lɔlɔ̃ aʋã mí míawɔ?

12. Nu kae Mawu ƒe lɔlɔ̃ aʋã mí be míawɔ?

¹² Evelia, ele be Mawu ƒe lɔlɔ̃ naʋã mí be míalɔ̃ mía nɔviwo. Apostolo Yohanes ŋlɔ bena: “Lɔlɔ̃tɔwo, ne aleae Mawu lɔ̃ míi la, ekema ele na míawo hã be míalɔ̃ mía nɔewo.” (1 Yohanes 4:7-11) Ne míelɔ̃ ɖe edzi be Mawu lɔ̃ mí la, ke ehiã be  míalɔ̃ mía nɔviwo. (1 Yohanes 3:16) Mɔ kawo nue míate ŋu aɖe lɔlɔ̃ afia wo le?

13. Kpɔɖeŋu kae Yesu ɖo ɖi le amewo lɔlɔ̃ me?

¹³ Yesu ɖo amelɔlɔ̃ ƒe kpɔɖeŋu ɖi na mí. Esime wònɔ anyigba dzi la, ekpe ɖe amewo ŋu, vevietɔ ɖokuibɔbɔlawo. Eda dɔ na dɔnɔwo, bunɔwo, ŋkunɔwo, tokunɔwo kple mumuwo. (Mateo 11:4, 5) Yesu mewɔ nu abe hakplɔlaawo ene o, ke boŋ efia nu ame siwo di be yewoasrɔ̃ nu tso Mawu ŋu la dzidzɔtɔe. (Yohanes 7:49) Elɔ̃ ɖokuibɔbɔla mawo eye wòku kutri kpe ɖe wo ŋuti.—Mateo 20:28.

14. Nu kawoe nàte ŋu awɔ atsɔ aɖe lɔlɔ̃ afia nɔviwòwo?

¹⁴ Ŋkuɖodziɖuɣia nye ɣeyiɣi nyui aɖe si míate ŋu abu ale si míakpe ɖe mía nɔviwo ŋu le hamea me ŋu, vevietɔ nɔvi tsitsiwo. Àte ŋu aɖi tsa ayi wo gbɔ, elabe ‘nɔvi kpɔkpɔe nye nɔviwɔwɔ.’ Àte ŋu aɖa nu na wo, awɔ aƒemedɔwo na wo, akɔ wo kple ʋu ayi kpekpeawo, alo awɔ dɔ kpli wo le gbeadzi. (Xlẽ Luka 14:12-14.) Na Mawu ƒe lɔlɔ̃ naƒoe ɖe nuwò nàɖe lɔlɔ̃ afia nɔviwòwo!

15. Nu ka dzie wòle be mí katã míalɔ̃ ɖo?

¹⁵ Etɔ̃lia, Yehowa ƒe lɔlɔ̃ aʋã mí míatsɔ mía nɔviwo ƒe vodadawo ake wo. Mí katã míenyi nu vɔ̃ kple ku dome tso Adam gbɔ, eya ta mía dometɔ aɖeke mate ŋu agblɔ be, “Nyemehiã tafea o.” Mawu subɔla wɔnuteƒe adodoea gɔ̃ hã hiã tafe ƒe nunana la. Wotsɔ fe gã aɖe ke mí katã! Nu ka tae wòle vevie be míade dzesi esia? Míakpɔ ŋuɖoɖoa le Yesu ƒe kpɔɖeŋu ɖeka me.

16, 17. (a) Nu kae míate ŋu asrɔ̃ tso kpɔɖeŋu si Yesu wɔ ku ɖe fia la kple kluviawo ŋu me? (b) Esi nède ŋugble tso Yesu ƒe kpɔɖeŋua ŋu vɔ la, nu kae nèɖo be yeawɔ?

¹⁶ Yesu wɔ kpɔɖeŋu aɖe si ku ɖe fia aɖe ŋu; fia la tsɔ denario 60,000,000 ƒe fe ke kluvi aɖe. Gake emegbe kluvi sia ya gbe be yematsɔ fe sue si ye hati kluvi nyi le ye ŋu, si nye denario 100 la akee o. Ðe wòle be fia la ƒe nublanuikpɔkpɔ naʋã kluvia hã be wòakpɔ nublanui na ehavia hafi. ‘Banamee wobana na,’ eya ta fia la do dɔmedzoe helĩhelĩ ɖe kluvia ŋu le esi eya metsɔ fe sue ma ke o ta. Egblɔ be: “Kluvi vɔ̃ɖi, esi nèɖe kuku nam la, metsɔ fe mawo katã ke wò. Ðe mele be wò hã nàkpɔ nublanui na hawòti kluvi abe ale si mekpɔ nublanui na wòe ene oa?” (Mateo 18:23-35, etenuŋɔŋlɔ) Abe fia ma ene la, Yehowa tsɔ fe gã aɖe ŋutɔ ke mí. Nu kae wòle be Yehowa ƒe lɔlɔ̃ kple nublanuikpɔkpɔ naʋã míawo hã míawɔ?

¹⁷ Esi míele dzadzram ɖo ɖe Ŋkuɖodzia ŋu la, míate ŋu abia mía ɖokui be: ‘Ðe nɔvi aɖe dze agɔ le dzinyea? Ðe  wòle sesẽm nam be matsɔe akeea?’ Ne ŋuɖoɖoae nye ɛ̃ la, ekema ɣeyiɣi nyuitɔe nye esia be nàsrɔ̃ Yehowa, ame si ‘lɔ̃a tsɔtsɔke.’ (Nehemiya 9:17; Psalmo 86:5) Ne míekpɔa ŋudzedze ɖe Yehowa ƒe nublanuikpɔkpɔ gã la ŋu la, ele be míawo hã míakpɔ nublanui na amewo ahatsɔ ake wo tso dzi me faa. Ne mímelɔ̃a mía nɔviwo hetsɔa woƒe vodadawo kea wo o la, ke mele be míakpɔ mɔ be Yehowa nalɔ̃ mí ahatsɔ míaƒe vodadawo ake mí o. (Mateo 6:14, 15) Gake tsɔtsɔke mefia be nu si wowɔ ɖe mía ŋu meve mí o, ke boŋ ɖe wònana míekpɔa dzidzɔ.

18. Aleke Mawu ƒe lɔlɔ̃ kpe ɖe nɔvinyɔnu aɖe ŋu wòdo dzi tsɔ nɔvi tsitsi aɖe ƒe blibomademade?

¹⁸ Ate ŋu asesẽ na mí be míado dzi atsɔ mía nɔviwo ƒe blibomademade. (Xlẽ Efesotɔwo 4:32; Kolosetɔwo 3:13, 14.) Nɔvinyɔnu Lily to nɔnɔme sia me. [1] (Kpɔ dzesidenya la.) Ekpe ɖe ahosi aɖe si ŋkɔe nye Carol ŋu. Ekɔa Carol ɖe ʋu me yia afi sia afi si wòdi be yeayi, eyina ɖaɖia asi nɛ, eye wòwɔa nu bubu geɖewo nɛ. Ke hã ɖeko Lily tu wɔ ya lɔ, elabe nu medzea Carol ŋu gbeɖe o, eye ɣeaɖewoɣi eƒe nuwɔna na wòsesẽna be wòakpe ɖe eŋu. Gake Lily ƒe ŋku nɔa Carol ƒe nɔnɔme nyuiwo boŋ ŋu eye wòyi edzi kpe ɖe eŋu ƒe geɖe va se ɖe esime Carol dze dɔ vevie heku mlɔeba. Togbɔ be Carol dzi kpɔkpɔ sesẽ na Lily hã, egblɔ be: “Mele mɔ kpɔm vevie be woafɔ Carol ɖe tsitre nam. Medi be makpɔ nɔnɔme si anɔ esi ne eva de blibo.” Eme kɔ ƒãa be Mawu ƒe lɔlɔ̃ aʋã mí be míado dzi anɔ anyi kple mía nɔviwo ahanɔ mɔ kpɔm na ɣeyiɣi si me amegbetɔwo ƒe blibomademade nu ayi tegbee.

19. Nu kae wòle be Mawu ƒe “nunana faa si wu gbɔgblɔ” nàʋã wò be nàwɔ?

¹⁹ Nyateƒee, Yehowa na “nunana faa si wu gbɔgblɔ” la mí. Mina míada akpe ɖe eta ɖaa! Ŋkuɖodziɖuɣia nye ɣeyiɣi nyuitɔ si me míade ŋugble le nu siwo katã Yehowa kple Yesu wɔ na mí ŋu. Mina lɔlɔ̃ sia naʋã mí be míadze Yesu ƒe afɔɖoƒewo yome pɛpɛpɛ, alɔ̃ mía nɔviwo ahatsɔ woƒe vodadawo anɔ wo kem tso míaƒe dzi ƒe gogloeƒe ke.