Nyui Kple Vɔ̃: Mɔfiame Siwo Ðea Vi
Kpɔ ale si Biblia ƒe mɔfiamewo kpe ɖe ame miliɔn geɖe ŋu le nu ene siwo gbɔna me.
1. Srɔ̃ɖeɖe
Susu vovovowoe le amewo si ku ɖe srɔ̃ɖeɖe kple nu siwo ana dzidzɔ nanɔ srɔ̃ɖeɖe me la ŋu.
BIBLIA GBLƆ BE: “Srɔ̃ŋutsu ɖe sia ɖe nalɔ̃ srɔ̃a abe ale si wòlɔ̃a eɖokui ene; ke srɔ̃nyɔnu hã nade bubu deto srɔ̃a ŋu.”—Efesotɔwo 5:33.
NU SI WÒFIA: Mawue ɖo srɔ̃ɖeɖe anyi, eya ta eyae nya nu si ana srɔ̃tɔwo nakpɔ dzidzɔ. (Marko 10:6-9) Ne srɔ̃ŋutsu kple srɔ̃nyɔnu tsɔa ɖe le eme na wo nɔewo wu wo ɖokuiwo la, wo ame evea siaa akpɔ dzidzɔ. Srɔ̃ŋutsu si lɔ̃ srɔ̃a la alé be nɛ eye wòawɔ nu ɖe eŋu nyuie. Srɔ̃nyɔnu si dea bubu srɔ̃a ŋu la akpe asi ɖe eŋu eye wòaƒo nu nɛ bubutɔe.
BIBLIA ƑE MƆFIAMEWO ÐEA VI: Quang kple Thi, siwo tso Vietnam, susui be yewomate ŋu akpɔ dzidzɔ le yewoƒe srɔ̃ɖeɖea me gbeɖe o. Zi geɖe la, Quang mewɔa nu ɖe srɔ̃a ŋu nyuie o. Egblɔ be: “Nyemesea veve ɖe Thi nu o, eye medoa ŋukpee zi geɖe.” Thi di be yeagbe srɔ̃a. Egblɔ be: “Mese le ɖokuinye me be nyemagate ŋu aka ɖe srɔ̃nye dzi alo ade bubu eŋu o.”
Mlɔeba, Quang kple Thi srɔ̃ nu si Biblia fia eye wokpɔ ale si woawɔ ɖe aɖaŋuɖoɖo si le Efesotɔwo 5:33 me la dzi le woƒe srɔ̃ɖeɖea me. Quang gblɔ be: “Mawunyakpukpui sia kpe ɖe ŋunye mekpɔ ale si wòle vevie be mawɔ nu ɖe Thi ŋu nyuie, mana wòakpɔe be melɔ̃e, malé be nɛ, makpɔ eƒe nuhiahiãwo gbɔ, eye mana wòakpɔ dzidzɔ. Ne mewɔ nu ɖe eŋu alea, elɔ̃am eye wòdea bubu ŋunye geɖe wu.” Thi hã gblɔ be: “Ne mewɔ ɖe aɖaŋuɖoɖo si le Efesotɔwo 5:33 dzi eye mede bubu srɔ̃nye ŋu geɖe wu la, elɔ̃am ɖe edzi, menɔa dedie eye nye dzi dzea eme.”
Ne èdi be yeanya nu geɖe tso srɔ̃ɖeɖe ŋu la, xlẽ Nyɔ! No. 2 2018, si ƒe tanyae nye “Nu 12 Siwo Nana Ƒomewo Kpɔa Dzidzedze” le jw.org.
2. Ale Si Míawɔ Nu Ðe Amewo Ŋu
Zi geɖe la, amewo mewɔa nu ɖe ame bubuwo ŋu nyuie o le woƒe ŋutigbalẽ ƒe amadede, woƒe dzedzeme, dukɔ si me wotso, subɔsubɔha si me wole alo ale si wobua gbɔdɔdɔe ta.
BIBLIA GBLƆ BE: “Mibu ame ƒomeviwo katã.”—1 Petro 2:17.
NU SI WÒFIA: Biblia mefia mí be míalé fu ame siwo ƒe ŋutigbalẽ to vovo na mía tɔ, ame siwo tso dukɔ bubu me, ame siwo nye ŋutsu ŋutsugbɔdɔlawo alo nyɔnu nyɔnugbɔdɔlawo o. Ke boŋ Biblia de dzi ƒo na mí be míade bubu ame ƒomeviwo katã ŋu, metsɔ le eme be wotso dukɔ bubu me, ga le wo si alo ga mele wo si o. (Dɔwɔwɔwo 10:34) Ne mímelɔ̃ ɖe amewo ƒe dzixɔsewo alo woƒe nuwɔnawo dzi o hã, míate ŋu awɔ nu ɖe wo ŋu nyuie eye míade bubu wo ŋu.—Mateo 7:12.
BIBLIA ƑE MƆFIAMEWO ÐEA VI: Wofia ŋutsu aɖe si ŋkɔe nye Daniel tso ɖevime be wòabu Asiatɔwo be wonye ame siwo ate ŋu agblẽ nu le yewoƒe dukɔa ŋu. Esia ta eva lé fu ame siwo tso Asia eye wòdzua wo le amewo dome. Daniel gblɔ be: “Mesusui be ne mewɔ nu ɖe wo ŋu ale la, efia be melɔ̃ nye dukɔa. Nyemebu eŋu kpɔ be nye nuŋububu kple nuwɔna mawo mesɔ o.”
Mlɔeba Daniel va srɔ̃ Biblia. Daniel gblɔ be: “Eva hiã be matrɔ nye susu kura. Meva kpɔe be ele be Mawu ƒe susu nanɔ asinye, si nye be afi ka kee míeɖatso o, ame ɖekawoe míenye.” Daniel gblɔ ale si wòsena le eɖokui me ne edo go amewo. Egblɔ be: “Zi geɖe la, afi si wotso menɔa vevie nam o. Fifia ya melɔ̃ ameƒomeviwo katã eye xɔlɔ̃ vavãwo le asinye le xexea me godoo.”
Àte ŋu axlẽ nu geɖe tso nya sia ŋu le Nyɔ! No. 3 2020, si ƒe tanyae nye “Ðe Nane Li Si Aɖe Nazãbubu Ða?” le jw.org.
3. Ga
Ame geɖe kua kutri vevie be kesinɔnuwo nasu yewo si ale be yewoakpɔ dzidzɔ eye etsɔme nanyo na yewo.
BIBLIA GBLƆ BE: “Nunya kpɔa ame ta, abe ale si ko ga hã kpɔa ame ta ene, ke nu si nyo le sidzedze ŋue nye be: Nunya kpɔa ame si si wòle la ƒe agbe ta.”—Nyagblɔla 7:12.
NU SI WÒFIA: Míehiã ga, gake menye gae ana míakpɔ dzidzɔ alo ana etsɔme nanyo na mí o. (Lododowo 18:11; 23:4, 5) Nu si ana míakpɔ dzidzɔ vavãtɔ eye etsɔme nanyo na mí ye nye be míawɔ ɖe aɖaŋu siwo Mawu ɖo na mí le Biblia me la dzi.—1 Timoteo 6:17-19.
BIBLIA ƑE MƆFIAMEWO ÐEA VI: Ŋutsu aɖe si ŋkɔe nye Cardo, si tso Indonesia, biã ŋku ɖe kesinɔnuwo didi ŋu. Egblɔ be: “Nu siwo ame geɖe di le agbe me la su asinye. Mezɔ mɔ de teƒeteƒewo, eye meƒle nu xɔasiwo, ʋu nyakpɔwo, kple aƒe dzeaniwo.” Gake Cardo ƒe kesinɔnu mawo menɔ anyi ɖaa o. Egblɔ be: “Ame aɖe trɔm to eme, eye gbe ɖeka kple eƒe zãdodo koa, nye ga katã bu. Dɔ sesẽ siwo katã mewɔ ƒe gbogbo mawo zu dzodzro.” Cardo gblɔ kpee be: “Mezã nye agbe bliboa tsɔ gbla ɖe kesinɔnuwo didi ŋu, gake mlɔeba la, ɖeko wògbã dzi nam eye mese le ɖokuinye me be viɖe aɖeke mele ŋunye o.”
Cardo va te Biblia ƒe aɖaŋuɖoɖo ku ɖe ga ŋu la dzi wɔwɔ. Megavuna ɖe kesinɔnuwo didi ŋu o, ke boŋ etiae be yeanɔ agbe tsɛ. Egblɔ be: “Fifia mesena le ɖokuinye me be kesinɔnu vavãwo su asinye, elabe menye Mawu xɔlɔ̃. Metea ŋu dɔa alɔ̃ nyuie le zã me, eye mele dzidzɔ kpɔm ŋutɔŋutɔ.”
Ne èdi be yeanya nu si Biblia gblɔ tso ga ŋu la, xlẽ nyati si ƒe tanyae nye “Ðe Ga Kple Suku Kɔkɔ Dede Ate Ŋu Ana Wò Etsɔme Nanyoa?” si dze le Gbetakpɔxɔ No. 3 2021 me le jw.org.
4. Gbɔdɔdɔ
Nu siwo amewo susu le gbɔdɔdɔ ŋu la le vovovo.
BIBLIA GBLƆ BE: “[Mitsri] gbɔdɔdɔ manɔsenu. Mia dometɔ ɖe sia ɖe nanya ale si wòaɖu eya ŋutɔ ƒe ŋutilã dzi le kɔkɔenyenye kple bubu me, menye le gbɔdɔdɔ ƒe dzodzro ƒe fieŋufieŋu me, abe ale si dukɔ siwo menya Mawu o la wɔna ene o.”—1 Tesalonikatɔwo 4:3-5.
NU SI WÒFIA: Biblia meɖe mɔ ɖe gbɔdɔnuwɔna ɖe sia ɖe ko ŋu o. “Gbɔdɔdɔ manɔsenu” fia ahasiwɔwɔ, gbolowɔwɔ, matrewɔwɔ, ŋutsu kple ŋutsu alo nyɔnu kple nyɔnu ƒe dɔdɔ kpakple lãwo gbɔ dɔdɔ. (1 Korintotɔwo 6:9, 10) Gbɔdɔdɔ nye nunana tso Yehowa gbɔ eye ŋutsu kple nyɔnu siwo ɖe wo nɔewo koe wòɖe mɔ na be woadɔ kple wo nɔewo.—Lododowo 5:18, 19.
BIBLIA ƑE MƆFIAMEWO ÐEA VI: Ðetugbui aɖe si le Australia si ŋkɔe nye Kylie gblɔ be: “Esi menye tre la, mesusui be ne mekpɔ gome le gbɔdɔdɔ me la, mase le ɖokuinye me be wolɔ̃m eye manɔ dedie. Gake medzɔ nenema kura o. Nye dzi gbã eye nyemekpɔe be mele dedie o.”
Emegbe Kylie srɔ̃ Biblia eye wòwɔ ɖe nu si Biblia fia ku ɖe gbɔdɔdɔ ŋu la dzi. Egblɔ be: “Mekpɔe be Mawu ƒe sewo kpɔa mía ta be míagawɔ nu siwo agbã dzi na mí alo ana míase veve o. Fifia esi mele Yehowa ƒe sewo dzi wɔm la, mesena le ɖokuinye me be wolɔ̃m eye mele dedie. Biblia ƒe aɖaŋuɖoɖowo dzi wɔwɔ ɖem tso vevesese geɖe me!”
Àte ŋu axlẽ nu geɖe tso nya sia ŋu le nyati si ƒe tanye nye “Nya Kae Biblia Gblɔ Tso Ŋutsu Kple Nyɔnu Ƒe Anyinɔnɔ Ðekae Srɔ̃maɖemaɖee Ŋu?” me le jw.org.
Mía Wɔla la fiaa nu si nye nyui kple vɔ̃ mí. Togbɔ be menye ɣesiaɣie wònɔa bɔbɔe be míawɔ ɖe eƒe sewo dzi o hã la, eɖea vi na mí ne míedze agbagba wɔ ɖe wo dzi. Míate ŋu aka ɖe edzi be esia ana míakpɔ dzidzɔ ɖaa.
