1. Nu kae ɖee fia be Ŋɔŋlɔawo nɔ vevie na Yesu?

 TSƆE be èle Yesu ƒe nusrɔ̃lawo dome esime wònɔ nu fiam wo. Nu kae nàde dzesii? Anɔ eme be àde dzesii be eyɔa Ŋɔŋlɔawo me nyawo tso susu me enuenu. Le nyateƒe mea, nya gbãtɔ siwo wògblɔ le eƒe nyɔnyrɔxɔxɔ megbe siwo woŋlɔ ɖe Biblia me, kple nya mamlɛtɔ siwo wògblɔ hafi kua katã tso Ŋɔŋlɔawo me. b (5 Mose 8:3; Ps. 31:5; Luka 4:4; 23:46) Le ƒe etɔ̃ kple afã siwo Yesu wɔ subɔsubɔdɔa mea, exlẽa Ŋɔŋlɔawo na amewo enuenu le dutoƒo, eyɔa nya tso wo me, eye wòɖea eme na wo.—Mat. 5:17, 18, 21, 22, 27, 28; Luka 4:16-20.

2. Esi Yesu nɔ tsitsimaa, nu kawoe kpe ɖe eŋu wòva nya Ŋɔŋlɔawo nyuie? (Kpɔ nɔnɔmetata siwo le akpaa dzi.)

² Ƒe geɖe do ŋgɔ na Yesu ƒe subɔsubɔdɔa, eɖoa to sea Mawu ƒe Nyaa ne wole exlẽm, eye eya ŋutɔ hã xlẽnɛ edziedzi. Ðikeke mele eme o be le Yesu ƒe ɖevimea, esenɛ Maria kple Yosef yɔa nya tso Ŋɔŋlɔawo me ne wole dze ɖom le aƒe me. c (5 Mose 6:6, 7) Míate ŋu aka ɖe edzi be Yesu hã kplɔa ƒomea ɖo yia ƒuƒoƒea Sabat ɖe sia ɖe, eye eɖoa  to nyuie ne wole Ŋɔŋlɔawo xlẽm. (Luka 4:16) Esi Yesu nɔ tsitsimaa, eva srɔ̃ ale si eya ŋutɔ axlẽ Ŋɔŋlɔ Kɔkɔeawo. Esia wɔe be menye ɖeko wòva nya Ŋɔŋlɔawo nyuie ko o, ke elɔ̃ wo hã eye wòna wokpɔa ŋusẽ ɖe eƒe nuwɔna dzi. Le kpɔɖeŋu me, èɖo ŋku nu si dzɔ le gbedoxɔa me esime Yesu xɔ ƒe 12 dzia? Nufiala siwo bi ɖe Mose ƒe Sea mea “ƒe mo wɔ yaa le eƒe nugɔmesese kple eƒe ŋuɖoɖowo ŋuti.”—Luka 2:46, 47, 52.

3. Nu kawo mee míadzro le nyati sia me?

³ Ne míawo hã míexlẽa Ŋɔŋlɔawo edziedzia, míava nya wo nyuie eye míade asixɔxɔ wo ŋu. Gake aleke míana Biblia xexlẽ naɖe vi na mí bliboe? Nya si Yesu gblɔ na Farisitɔwo, Zadukitɔwo, kple ame bubu siwo nya Sea la akpe ɖe mía ŋu. Togbɔ be woxlẽa Ŋɔŋlɔawo edziedzi hãa, meɖea vi na wo bliboe o. Yesu gblɔ nu etɔ̃ siwo wòle be woawɔ hafi la na wo. Nu mawo me dzodzro akpe ɖe mía ŋu míagaku kutri vevie be (1) míase nu siwo míexlẽna gɔme nyuie wu, (2) míade dzesi nufiame veviwo le nu si míexlẽ me, eye (3) míana Mawu ƒe Nyaa natrɔ míaƒe nɔnɔme.

4. Nu kae wòle be míadze agbagba awɔ ne míexlẽ Mawu ƒe Nyaa? (Luka 10:25-29)

⁴ Ne míexlẽa Mawu ƒe Nyaa, gake míesea egɔme oa, maɖe vi na mí bliboe o. Le kpɔɖeŋu me, bu “ŋutsu aɖe si nya Sea nyuie,” si bia nya Yesu ŋu kpɔ. (Xlẽ Luka 10:25-29.) Ŋutsua bia Yesu be: “Nu kae wòle be mawɔ be manyi agbe mavɔ la dome?” Yesu he eƒe susu yi Mawu ƒe Nyaa dzi esi wòbiae be: “Nu kae woŋlɔ ɖe Se la me? Aleke nèse egɔmee?” Ŋutsua te ŋu yɔ nya tso Ŋɔŋlɔawo me tsɔ ɖo nya ŋu na Yesu wòsɔ nyuie be, ele be míalɔ̃ Mawu eye míalɔ̃ mía havi. (3 Mose 19:18; 5 Mose 6:5) Gake egabia Yesu be: “Ame ka tututue nye hanyevi?” Nya ma si wòbia ɖee fia be mese nu siwo wòxlẽa gɔme nyuie o. Esia taa menya ale si tututu wòawɔ ŋɔŋlɔ mawo ŋu dɔ o.

5. Ne míedo gbe ɖa eye míegbɔ dzi ɖe Biblia xexlẽ ŋua, vi kae wòaɖe na mí?

⁵ Míagate ŋu ase Mawu ƒe Nyaa gɔme nyuie wu ne míesrɔ̃ ale si míaxlẽ nu nyuie. Aɖaŋuɖoɖo siawo ate ŋu aɖe vi na wò. Do gbe ɖa hafi nàxlẽ Biblia. Esia le vevie elabe Yehowae akpe ɖe mía ŋu míase Ŋɔŋlɔawo gɔme. Eya ta biae be wòana eƒe gbɔgbɔ kɔkɔea nakpe ɖe ŋuwò wò susu nanɔ nu si xlẽ ge nàla ŋu. Eyome gbɔ dzi ɖi nàxlẽ Biblia. Ne ègbɔ dzi ɖe nuxexlẽa ŋua, àse egɔme nyuie wu. Anyo be nàkɔ gbe dzi axlẽe. Azɔ hã àte ŋu aƒo Biblia xexlẽ si wolé ɖe mɔ̃ dzi eye nàkplɔ nuxexlẽa ɖo le wò Biblia me. Esia awɔe be nàkpɔ nudzɔdzɔawo le susu me nyuie, woawɔ dɔ ɖe dziwò, eye nàte ŋu aɖo ŋku wo dzi. (Yos. 1:8) Ne èxlẽ nua vɔa, gado gbe ɖa nàda akpe na Yehowa ɖe eƒe Nyaa ta eye nàbiae wòakpe ɖe ŋuwò nàwɔ ɖe nu si nèxlẽa dzi.

6. Ne èbiaa nyawo ɖokuiwò eye nèwɔa nuŋlɔɖi ne èle Biblia xlẽmaa, aleke esia aɖe vi na wò? (Kpɔ fotoawo.)

⁶ Nu bubu kawoe nàgate ŋu awɔ be nàse Biblia gɔme nyuie wu? Bia nyawo ɖokuiwò. Ne èxlẽ nudzɔdzɔ aɖe vɔa, bia ɖokuiwò be: ‘Ame kawoe le ŋutinyaa me?  Ame kae le nu ƒom? Ame kae wòle nu ƒom na, eye nu ka tae? Afi kae nua dzɔ le, eye ɣekaɣie wòdzɔ?’ Nyabiase siawo tɔgbi akpe ɖe ŋuwò nàde ŋugble le nudzɔdzɔa ŋu eye nàde dzesi nufiame vevi siwo le eme. Nu bubue nye be nàwɔ nuŋlɔɖi kpuikpuikpuiwo. Be nàte ŋu awɔ esiaa, ahiã be nàde ŋugble le nu si nèxlẽ ŋu nyuie, eye esia awɔe be nàgase egɔme nyuie wu eye nàɖo ŋku edzi. Nu kawoe nàte ŋu aŋlɔ ɖi? Ate ŋu anye biabia siwo va susu me na wò esime nènɔ nua xlẽm, nu siwo ŋu nèke ɖo esime nèku nu me, nufiame vevi siwo nède dzesi le nuxexlẽa me kple ale si nàwɔ wo ŋu dɔ, alo ale si nèse le ɖokuiwò me tso nu si nèxlẽ ŋu. Ne èwɔnɛ alea, àva bu Biblia be enye nunana tɔxɛ tso Mawu gbɔ na ye tẽe.

7. Nu kae Yesu gblɔ be míawɔ ne míele Biblia xlẽm, eye nu ka tae? (Mateo 24:15)

⁷ Yesu gblɔ be hafi míate ŋu ase Mawu ƒe Nyaa gɔmea, ele vevie be míawɔ gɔmesese ŋu dɔ. (Xlẽ Mateo 24:15.) Nu kae nye gɔmesese? Efia ale si ame atsɔ nanewo asɔ kple wo nɔewo be wòakpɔ kadodo kple vovototo si le wo dome, alo wòade dzesi nu si be ɖe nya aɖe me. Abe ale si Yesu gblɔe enea, ehiã be míawɔ gɔmesese ŋu dɔ hafi míate ŋu ade dzesii be nudzɔdzɔ aɖe nye Biblia me nyagblɔɖi si va eme. Azɔ hã ehiã be míawɔ gɔmesese ŋu dɔ hafi nu siwo míexlẽna le Biblia me nate ŋu aɖe vi na mí bliboe.

8. Nu kawoe nàte ŋu awɔ be nàgase Ŋɔŋlɔawo gɔme nyuie wu?

⁸ Yehowae naa gɔmesese esubɔlawo. Eya ta do gbe ɖa nɛ be wòakpe ɖe ŋuwò nàtu nɔnɔme vevi sia ɖo, eye nàwɔ nu wòawɔ ɖeka kple wò gbedodoɖaa. (Lod. 2:6) Aleke nàwɔ esiae? De ŋugble le nu si xlẽm nèle ŋu nyuie eye nàkpɔ ale si wòdo ka kple nu siwo nènya xoxo. Àte ŋu  azã míaƒe Biblia-srɔ̃gbalẽwo kple numekugbalẽwo abe Numekuku Ŋuti Mɔfiagbalẽ Na Yehowa Ðasefowo ene atsɔ awɔ esia. Dɔwɔnu siawo akpe ɖe ŋuwò nàse Biblia ƒe akpa si nèxlẽa gɔme eye nàkpɔ ale si nàwɔ eŋu dɔ. (Heb. 5:14) Ne èwɔ esiaa, àgase Ŋɔŋlɔawo gɔme nyuie wu.

9. Nyateƒenya vevi ka dzie Zadukitɔwo ŋe aɖaba ƒu?

⁹ Zadukitɔwo nya Mose ƒe agbalẽ atɔ̃awo me nyawo nyuie, gake woŋe aɖaba ƒu nyateƒenya vevi siwo le agbalẽ mawo me dzi. Le kpɔɖeŋu me, esi wobia nya Yesu tso tsitretsitsia ŋu eye Yesu nɔ nya ŋu ɖom na woa, ebia wo be: “Ðe miexlẽ ŋuve ŋuti nuŋlɔɖi si le Mose ƒe agbalẽa me, ale si Mawu gblɔ nɛ be: ‘Nyee nye Abraham ƒe Mawu kple Isak ƒe Mawu kpakple Yakob ƒe Mawu’ la oa?” (Marko 12:18, 26) Nya si Yesu bia Zadukitɔwo ɖee fiaa be togbɔ be woxlẽ ŋutinya ma zi geɖe hãa, womexɔ Ŋɔŋlɔawo me nufiafia vevi si ku ɖe tsitretsitsia ŋu dzi se o.—Marko 12:27; Luka 20:38. d

10. Nu kae wòle be míawɔ ne míele Biblia xlẽm?

¹⁰ Nu kae míesrɔ̃ tso nudzɔdzɔ ma me? Eyae nye be ne míele Biblia xlẽmaa, míadze agbagba ade dzesi nufiame ɖe sia ɖe le eme. Menye gɔmedzenufiafiawo koe wòle be míade dzesi o, ke ele be míadze agbagba ade dzesi nyateƒenya goglo kple gɔmeɖose siwo bè ɖe nu si xlẽm míelea me hã.

11. Abe ale si 2 Timoteo 3:16, 17 ɖee fia enea, aleke nàwɔ ake ɖe nufiame veviwo ŋu le Biblia me?

¹¹ Aleke nàwɔ ake ɖe nufiame veviwo ŋu ne èle Biblia xlẽm? Bu nya si le 2 Timoteo 3:16, 17 ŋu kpɔ. (Xlẽe.) Kpukpui mawo gblɔ be ‘Ŋɔŋlɔ bliboa nyo’ na (1) nufiafia, (2) nyagbegbe, (3) ɖɔɖɔɖo, kple (4) amehehe. Biblia ƒe akpa siwo mèxlẽna edziedzi o gɔ̃ hã ate ŋu aɖe vi na wò le mɔ ene mawo nu. Nufiafia: Ne èxlẽ Biblia ƒe akpa aɖea, de ŋugble le nu si fiam wòle wò tso Yehowa, eƒe tameɖoɖo kple Biblia me gɔmeɖosewo ŋua ŋu. Nyagbegbe: De dzesi ale si nu si nèxlẽ akpe ɖe ŋuwò nànya nɔnɔme alo dzodzro siwo wòle be nàƒo asa na kple ale si nàyi edzi awɔ nuteƒe na Yehowa. Ðɔɖɔɖo: De ŋugble le ale si nàte ŋu azã nu si nèxlẽ atsɔ aɖɔ nuŋububu gbegblẽ aɖe ɖo alo aɖo nya ŋu na ame aɖe le gbeadzi ŋu. Amehehe: De dzesi nufiame vevi siwo le nu si nèxlẽ me siwo ate ŋu ana hehe wò be nàbu nuwo ŋu abe ale si Yehowa bunɛ ene. Ne èdi nu vevi ene siawo le kpukpui siwo nèxlẽ mea, àke ɖe nufiame vevi geɖe ŋu eye esia ana wò Biblia xexlẽ nagaɖe vi na wò geɖe wu.

12. Nya kae Yesu bia Farisitɔwo, eye nu ka tae?

¹² Gbe ɖeka Farisitɔwo tsɔ nya ɖe Yesu ŋu be eƒe nusrɔ̃lawo da le Sabat sea dzi. Yesu bia wo be ‘Ðe miexlẽe oa?’ eye wòƒo nu tso Ŋɔŋlɔawo me kpɔɖeŋu eve ŋu. (Mat. 12:1-7) e Eyome eyɔ nya tso Hosea ƒe agbalẽa me tsɔ ɖee fia be Farisitɔwo mese Sabat sea gɔme o eye womekpɔa nublanui o. Nu ka tae Mawu ƒe Nyaa metrɔ woƒe nɔnɔme o? Nu si tae nye be womebɔbɔ wo ɖokui be Mawu ƒe Nyaa nakpɔ ŋusẽ ɖe wo dzi o, ke boŋ woxlẽnɛ be yewoakpɔ vodada le ame bubuwo ŋu. Esia wɔe be womese Mawu ƒe Nyaa gɔme nyuie o.—Mat. 23:23; Yoh. 5:39, 40.

13. Nɔnɔme kae wòhiã be wòanɔ mía si ne míele Biblia xlẽm, eye nu ka tae?

¹³ Míesrɔ̃e tso Yesu ƒe nyawo me be ne míele Biblia xlẽmaa, mele be míawɔ nu abe Farisitɔwo ene o, ke boŋ míabɔbɔ mía ɖokui eye míalɔ̃ faa Mawu ƒe Nyaa namla mí. Ele be míaxɔ Mawu ƒe Nyaa “kple dzi faa.” (Yak. 1:21) Ne míebɔbɔa mía ɖokui xlẽa Biblia be míasrɔ̃ nu tso eme, ke menye be míatsɔe adi vodada le amewo ŋu oa, Mawu ƒe Nyaa aƒo ke ɖe to le mía me eye wòakpe ɖe mía ŋu míatu nɔnɔme nyuiwo abe nublanuikpɔkpɔ, veveseseɖeamenu kple lɔlɔ̃ ene ɖo.

14. Aleke míawɔ anya ne Biblia le míaƒe nɔnɔme trɔm? (Kpɔ fotoawo.)

¹⁴ Ne Mawu ƒe Nyaa le ŋusẽ kpɔm ɖe mía dzia, adze le ale si míewɔa nu ɖe amewo ŋu me. Esi Farisitɔwo mena Mawu ƒe Nyaa ɖo woƒe dzi gbɔ o taa, “wobu fɔ ame siwo meɖi fɔ hafi o.” (Mat.  12:7) Ke míawo ɖe? Ðe nu si míesusuna tso amewo ŋu kple ale si míewɔa nu ɖe wo ŋu ɖenɛ fiana be Mawu ƒe Nyaa le míaƒe nɔnɔme trɔmaa? Anyo be míabia nya siwo gbɔna mía ɖokui: ‘Ðe medea dzesi nɔnɔme nyuiwo le ame bubuwo me eye megblɔnɛ na woa, alo woƒe vodadawo ŋu koe nye susu nɔna? Ðe mekpɔa nublanui na amewo eye melɔ̃na faa tsɔna kea woa, alo ɖe medoa dziku kabakaba eye meléa dziku ɖe dɔmea?’ Ale si míaɖo biabia siawo ŋui aɖee afia nenye be míeɖea mɔ be nu si míexlẽ nakpɔ ŋusẽ ɖe míaƒe nuŋububu, seselelãme, kple nuwɔna dzi.—1 Tim. 4:12, 15; Heb. 4:12.

15. Aleke Yesu se le eɖokui me tso Ŋɔŋlɔawo ŋu?

¹⁵ Nya siwo le Psalmo 40:8 nye nyagblɔɖi si ɖe ale si gbegbe Yesu lɔ̃ Ŋɔŋlɔawo fia. Afi ma gblɔ be: “Oo nye Mawu, wò lɔlɔ̃nu wɔwɔe nye nye dzidzɔ, eye wò se la le menye.” Esia taa Yesu kpɔ dzidzɔ eye wòyi edzi wɔ nuteƒe na Yehowa. Míawo hã míate ŋu akpɔ dzidzɔ eye míasubɔ Yehowa nyuie ne míena Mawu ƒe Nyaa de dzi gbɔ na mí.—Ps. 1:1-3.

16. Nu kawoe nàwɔ be Mawu ƒe Nyaa naɖe vi na wò geɖe wu? (Kpɔ aɖaka si nye “ Ale Si Nàwɔ Ase Nu Si Xlẽm Nèle Gɔme Nyuie.”)

¹⁶ Mina Yesu ƒe nyawo kple eƒe kpɔɖeŋu naʋã mí be míana ale si míexlẽa Biblia naganyo ɖe edzi. Be míase Biblia gɔme nyuie wua, ele be míado gbe ɖa hafi axlẽe, míagbɔ dzi ɖe exexlẽ ŋu, míabia nyawo mía ɖokui, eye míawɔ nuŋlɔɖi kpuikpuikpuiwo. Azɔ hã míate ŋu awɔ gɔmesese ŋu dɔ ne míede ŋugble le nu si míexlẽ ŋu eye míeku nu me le míaƒe agbalẽwo me. Míate ŋu asrɔ̃ ale si míazã Ŋɔŋlɔawo nyuie wu ne míedze agbagba be míade dzesi nufiame vevi siwo bè ɖe nuŋlɔɖiawo me. Eye míate ŋu ana Mawu ƒe Nyaa natrɔ míaƒe nɔnɔme ne míebɔbɔa mía ɖokui be wòamla mí. Ne míeku kutri le nu siawo mea, míaƒe Biblia xexlẽ aɖe vi na mí geɖe wu eye mía kple Yehowa dome anɔ kplikplikpli.—Ps. 119:17, 18; Yak. 4:8.