ESI wònye be míele xexe si me xaxawo bɔ ɖo me ta la, ele be míaʋli vevie be ŋutifafa nasu mía si. Ke hã, ne ŋutifafa aɖe si nu su mía si gɔ̃ hã la, míedzea agbagba be míakpɔ eta. Nya kae Mawu ƒe Nya la gblɔ si ate ŋu akpe ɖe mía ŋu be míaƒe asi nasu ŋutifafa vavãtɔ si nɔa anyi ɖaa la dzi? Eye aleke míate ŋu akpe ɖe ame bubuwo ŋu be woawo hã woakpɔ ŋutifafa?

Hafi míagblɔ be ŋutifafa ememetɔ su mía si la, ele be míase le mía ɖokui me be míele dedie eye míaƒe susu dze akɔ anyi. Ele hã be xɔlɔ̃wɔwɔ ƒe kadodo nyui nanɔ mía kple amewo dome. Vevietɔ wu la, hafi ŋutifafa si nɔa anyi ɖaa nasu mía si la, ele be míana xɔlɔ̃wɔwɔ ƒe kadodo kplikplikpli nanɔ mía kple Mawu dome. Aleke míate ŋu awɔ esiae?

Ne míewɔna ɖe Yehowa ƒe sewo kple mɔfiame dzɔdzɔeawo dzi la, míeɖenɛ fiana be míeɖoa ŋu ɖe eyama ŋu eye míedi be ŋutifafa nanɔ mía kplii dome. (Yer. 17:7, 8; Yak. 2:22, 23) Esia wɔnɛ be eya hã tena ɖe mía ŋu, eye wòtsɔa ŋutifafa ememetɔ yraa mí. Yesaya 32:17 gblɔ be: “Dzɔdzɔenyenye vavãtɔ me tsonu anye ŋutifafa, eye dzɔdzɔenyenye vavãtɔ ƒe kutsetse anye tomefafa kple dedienɔnɔ tegbee.” Ne míeɖoa to Yehowa tso dzi blibo me la, ŋutifafa vavãtɔ si nye ememetɔ asu mía si.—Yes. 48:18, 19.

Nu bubu si kpena ɖe mía ŋu míekpɔa ŋutifafa si nɔa anyi ɖaa ye nye nunana tɔxɛ aɖe si tso mía Fofo si le dziƒo la gbɔ—eyae nye eƒe gbɔgbɔ kɔkɔea.—Dɔw. 9:31.

Nu etɔ̃lia si apostolo Paulo yɔ be enye “gbɔgbɔ la ƒe kutsetse” ƒe akpa aɖe ye nye ŋutifafa. (Gal. 5:22, 23) Esi wònye be Mawu ƒe gbɔgbɔ lae naa ŋutifafa ta la, ele be míaɖe mɔ be gbɔgbɔ kɔkɔea nafia mɔ mí ale be ŋutifafa vavãtɔ nasu mía si. Na míadzro nu eve aɖewo siwo míate ŋu  awɔ be Mawu ƒe gbɔgbɔa nakpe ɖe mía ŋu ŋutifafa nasu mía si la me.

Gbã, ne míexlẽa Mawu ƒe Nya si tso eƒe gbɔgbɔ me la edziedzi la, gbɔgbɔa kpena ɖe mía ŋu ŋutifafa sua mía si. (Ps. 1:2, 3) Ne míele ŋugble dem le Biblia me gbedeasia ŋu la, Mawu ƒe gbɔgbɔa kpena ɖe mía ŋu míekpɔa Yehowa ƒe susu le nya geɖe ŋu. Le kpɔɖeŋu me, míeva kpɔa ale si wòkpɔtɔ nye ŋutifafame kple nu si tae ŋutifafa le vevie nɛ nenema gbegbe ɖo. Ne míewɔna ɖe nufiame siawo siwo le Mawu ƒe Nyaa me dzi la, ŋutifafa geɖe sua mía si le agbe me.—Lod. 3:1, 2.

Evelia, ele be míado gbe ɖa abia Mawu be wòana eƒe gbɔgbɔ kɔkɔea mí. (Luka 11:13) Yehowa do ŋugbe na mí be ne míebia yeƒe kpekpeɖeŋu la, “Mawu ƒe ŋutifafa, si ƒo gɔmesesewo katã ta la, adzɔ [míaƒe] dziwo kple [míaƒe] tamesusuwo ŋu to Kristo Yesu dzi.” (Flp. 4:6, 7) Ne míedoa gbe ɖa edziedzi biaa Yehowa be wòana eƒe gbɔgbɔ kɔkɔea mí la, mía Mawu la nana ŋutifafa ememetɔ si sua ame siwo le xɔlɔ̃wɔwɔ ƒe kadodo kplikplikpli me kplii la ɖeɖe ko si la yɔa mí fũu.—Rom. 15:13.

Aleke ame aɖewo wɔ Ŋɔŋlɔawo me aɖaŋuɖoɖo sia dzi hewɔ tɔtrɔ siwo hiã le woƒe agbe me ale be ŋutifafa si nɔa anyi ɖaa la va le wo kple Yehowa dome, ŋutifafa ma su woawo ŋutɔwo si eye wòle wo kple wo haviwo dome?

Egbea, ame aɖewo siwo nye ‘dɔmedzoetɔwo’ tsã gake fifia wozu nugɔmeselawo, wonyoa dɔme, wogbɔa dzi ɖi, eye wowɔa nu ɖe amewo ŋu le ŋutifafa me la dometɔ aɖewo le Kristo hamea me. * (Lod. 29:22) De dzesi ale si nya sia nye nyateƒe le Fiaɖuƒegbeƒãɖela eve aɖewo siwo ŋu wokpe ɖo woɖu dziku dzi eye wova le ŋutifafa me kple amewo la gome.

Nɔnɔme gbegblẽ si nɔ David si la kpɔ ŋusẽ ɖe ale si wòƒoa nui dzi. Hafi wòava tsɔ eɖokui aɖe adzɔgbe na Mawu la, elɔ̃a vodadadidi le ame ŋu eye wòƒoa nu na eƒe ƒometɔwo amemabumabutɔe. Le ɣeyiɣi aɖe megbe la, David va kpɔe be ele be yeatrɔ yeƒe nɔnɔme eye yeanye ŋutifafame. Nu kae kpe ɖe eŋu wòva zu ŋutifafame? Egblɔ be, “Meva te Biblia me gɔmeɖosewo dzi wɔwɔ le  nye agbe me, eye esia wɔe be meva wɔa nu ɖe nye ƒometɔwo ŋu bubutɔe.”

Nu siwo me Rachel to le eƒe ɖevime la kpɔ ŋusẽ ɖe eƒe nuwɔna dzi. Egblɔ be, “Fifia gɔ̃ hã, ebia agbagbadzedze geɖe be maɖu dziku dzi, elabena ƒome si me ame sia ame doa dziku kabakaba le mee metsi le.” Nu kae kpe ɖe eŋu wòva zu ŋutifafame? Egblɔ be, “Medoa gbe ɖa na Yehowa edziedzi be wòakpe ɖe ŋunye.”

David kple Rachel ƒe kpɔɖeŋuawo nye ŋutinya siwo ɖee fia be ne míewɔ ɖe Biblia ƒe mɔfiamewo dzi eye míebia Mawu be wòana eƒe gbɔgbɔa mí la, ana ŋutifafa nasu mía si la dometɔ eve pɛ ko. Edze ƒãa be togbɔ be míele xexe si me fuléle xɔ aƒe ɖo me hã la, ŋutifafa ememetɔ si ana ɖekawɔwɔ nanɔ mía kple míaƒe ƒometɔwo kple hati Kristotɔwo dome la ate ŋu asu mía si. Ke hã, Yehowa xlɔ̃a nu mí be ‘míanɔ anyi kple amewo katã le ŋutifafa me.’ (Rom. 12:18) Ðe esia anya wɔa, eye viɖe kawoe dona tso eme ne míedzea agbagba be míawɔ ŋutifafa kple amewo?

To míaƒe gbeadzisubɔsubɔdɔa me la, míekpea amewo be woana ŋutifafagbedeasi si ku ɖe Mawu Fiaɖuƒea ŋu la naɖe vi na wo. (Yes. 9:6, 7; Mat. 24:14) Enye dzidzɔ be ame geɖe xɔ gbedeasia. Esia wɔe be nu siwo le dzɔdzɔm siwo teƒe kpɔm wole la menana dzi ɖena le wo ƒo o, eye dzi megakua wo abe tsã ene hã o. Ke boŋ, etsɔmemɔkpɔkpɔ vavã su wo si eye esia ʋãa wo be woayi edzi ‘adi ŋutifafa, eye woati eyome.’—Ps. 34:14.

Ke hã, menye ame sia amee xɔa míaƒe gbedeasia nyuie zi gbãtɔ o. (Yoh. 3:19) Togbɔ be ele alea hã la, Mawu ƒe gbɔgbɔa kpena ɖe mía ŋu míegblɔa nya nyuia na wo le ŋutifafa kple bubu me. Míetoa esia me wɔna ɖe mɔfiame siwo Yesu na ku ɖe gbeƒãɖeɖedɔa ŋu si dze le Mateo 10:11-13 la dzi. Afi ma gblɔ be: “Ne miege ɖe aƒe aɖe me la, mido gbe na aƒea me tɔwo. Eye ne aƒea dze la, ekema ŋutifafa si miedi nɛ la nava edzi, ke ne medze o la, miaƒe ŋutifafa negbugbɔ va mia dzi.” Ne míewɔ ɖe Yesu ƒe aɖaŋuɖoɖoa dzi la, míate ŋu adzo le aƒea me le ŋutifafa me eye míanɔ mɔ kpɔm be amea naɖo to mí ɣebubuɣi.

Míegadoa ŋutifafa ɖe ŋgɔ ne míewɔ nu ɖe dziɖuɖumegãwo ŋu bubutɔe, ne wotsia tsitre ɖe míaƒe dɔa ŋu gɔ̃ hã. Le kpɔɖeŋu me, Afrika dukɔ aɖe ƒe dziɖuɖu ɖe mɔ amewo ƒe nazãbubu ɖe mía ŋu wɔe be wogbe be yewomaɖe mɔ na mí míatu Fiaɖuƒe Akpatawo le dukɔa me o. Esi habɔbɔa di be yeakpɔ nya sia gbɔ le ŋutifafa me ta la, wodɔ nɔviŋutsu aɖe si wɔ dutanyanyuigbɔgblɔdɔa le Afrika dukɔ ma me kpɔ la ɖe dukɔ ma teƒenɔla si le London, le England la gbɔ. Dɔ si wode nɔviŋutsua si ye nye be wòaƒo nu tso ŋutifafa ƒe dɔ si wɔm Yehowa Ðasefowo le le eƒe dukɔa me la ŋu nɛ. Aleke sasrãkpɔ ma yii?

Nɔviŋutsua gblɔ be: “Esi meɖo amedzroxɔƒea eye mede dzesi nyɔnu si nɔ dɔ wɔm le afi ma ƒe awudodo la, meƒo nya ta be anya tso to aɖe si me tɔwo ƒe gbe mesrɔ̃ la me. Eya ta medo gbe nɛ le wo degbea me. Esia wɔ nuku nɛ, eye wòbiam be, ‘Susu ka tae nèva afi sia?’ Meɖo eŋu nɛ bubutɔe be medi be maƒo nu kple Dukɔa Teƒenɔlaa. Eƒo ka na Dukɔa Teƒenɔlaa, eye wòva gbɔnye le amedzroxɔƒea hedo gbe nam le wo degbea me. Eyome, eɖo to se nye nyawo nyuie esime menɔ nu ƒom tso ŋutifafa ƒe dɔ siwo wɔm Ðasefowo le la ŋu nɛ.”

Ale si nɔviŋutsua ɖe nu me na dukɔteƒenɔlaa le bubu me la wɔe be wòɖe asi le nya vɔ̃ siwo wòse tso mía ŋu la ŋu eye wòse dɔ si wɔm míele la gɔme. Le ɣeyiɣi aɖe megbe la, Afrika dukɔ ma ƒe dziɖuɖua ɖe mɔ ɖe míaƒe xɔtudɔwo ŋu. Nɔviwo kpɔ dzidzɔ ɖe nu nyui sia si do tso sasrãkpɔ ma me ŋu ale gbegbe! Vavãe, nu nyui geɖe dona tso eme ne míede bubu amewo ŋu—ehea ŋutifafa hã vanɛ.

Egbea, Yehowa ƒe amewo le gbɔgbɔmeparadiso si me ŋutifafa xɔ aƒe ɖo la me. Wò hã àte ŋu awɔ akpa aɖe le ŋutifafa ma dodo ɖe ŋgɔ me ne èdze agbagba tu gbɔgbɔa ƒe kutsetsea ƒe akpa sia ɖo le wò agbe me. Vevietɔ wu la, wò nu adze Yehowa ŋu, eye wò asi asu ŋutifafa gbogbo si anɔ anyi ɖaa le Mawu ƒe xexe yeyea me la dzi.—2 Pet. 3:13, 14.