1, 2. (a) Nu kae wòfia be ame nanye ɖasefo, eye nu ka mee xexea ƒe nyadzɔdzɔgblɔmɔnuwo do kpo nu le? (b) Nu ka tae Yehowa mehiã xexea ƒe nyadzɔdzɔgblɔmɔnuwo hafi ana amewo nase eŋuti nyateƒea o?

NU KAE wòfia be ame nanye ɖasefo? Nyagɔmeɖegbalẽ aɖe ɖe eme be ɖasefoe nye “ame si kpɔ nudzɔdzɔ aɖe teƒe eye wòkaa nu si dzɔ la ta na amewo.” Le kpɔɖeŋu me, wole nyadzɔdzɔgbalẽ si yɔm wole fifia be The Witness (Ðasefo La) tam le Pietermaritzburg, South Africa, ƒe 160 kple edzivɔe nye esia. Ŋkɔ si wotsɔ na nyadzɔdzɔgbalẽa sɔ ŋutɔ elabena taɖodzinu si le eŋue nye be wòagblɔ nu siwo le dzɔdzɔm le xexea me la pɛpɛpɛ. The Witness nyadzɔdzɔgbalẽa tala ka atam be yeƒe nyadzɔdzɔgbalẽa “ato nyateƒe, nyateƒe bliboa, eye maɖe ɖeke le eme o.”

² Nublanuitɔe la, xexea me nyadzɔdzɔgblɔlawo ŋea aɖaba ƒua nu vevitɔ siwo dzɔna le amegbetɔwo ƒe ŋutinya me dzi zi geɖe, alo womekaa wo ta wòdena pɛpɛpɛ o. Eye kakaɖedzitɔe la, womegblɔa Mawu kple nu siwo wòwɔ la ŋuti nyateƒea o. Evɔ Mawu ŋusẽkatãtɔ la gblɔ to eƒe nyagblɔɖila Xezekiel dzi be: “Dukɔwo nadze sii be, nye Yehowa ye nye kɔkɔetɔ.” (Eze. 39:7) Gake xexea me katã ƒe Dziɖulagã la mehiã xexea ƒe nyadzɔdzɔgblɔmɔnuwo hafi ana amewo nase eŋuti nyateƒea o. Ðasefo siwo ade miliɔn enyi sɔŋ le esi siwo ɖia ɖase tso eŋu na dukɔwo katã me tɔwo. Wogblɔa nu siwo wòwɔ na amegbetɔƒomea va yi kple nu siwo wɔm wòle fifia. Ðasefowo ƒe ha gã sia ƒoa nu tso nu siwo ŋugbe Mawu do be yeawɔ na amegbetɔwo  le etsɔme hã ŋu. Mawu gblɔ le Yesaya 43:10 be: “Miawoe nye nye ɖasefowo kple nye dɔla, si metia.” Ne míena ɖaseɖiɖidɔa nye dɔ vevitɔ na mí le agbe me la, míaɖee afia be míenye Yehowa ƒe Ðasefowo vavã.

3, 4. (a) Ɣekaɣie Biblia Nusrɔ̃viwo tsɔ ŋkɔ yeye? Eye alekee wose le wo ɖokui me le eŋu? (Kpɔ nɔnɔmetata si le nyati sia ƒe gɔmedzedze.) (b) Nyabiase kawo me míadzro?

³ Mɔnukpɔkpɔ gã kae nye esi wònye be Yehowa, “Fia mavɔmavɔtɔ” la, ƒe ŋkɔ le mía ŋu! Eya ŋutɔ gblɔ be: “Esia nye nye ŋkɔ tegbee, eye nye ŋkɔ sia dzidzimewo katã woayɔ”! (1 Tim. 1:17; 2 Mose 3:15, 16; tsɔe sɔ kple Nyagblɔla 2:16.) Le ƒe 1931 me la, Biblia Nusrɔ̃viawo tsɔ ŋkɔ si nye Yehowa Ðasefowo. Emegbe míexɔ akpedalɛta geɖe heta wo ɖe Gbetakpɔxɔ me. Hame siwo le Canada dometɔ ɖeka gblɔ le woƒe lɛtaa me be: “Nya nyui si nye be míenye ‘Yehowa ɖasefowo’ la do dzidzɔ na mí ŋutɔ eye wòʋã mí míeɖoe kplikpaa be míanɔ agbe wòasɔ ɖe ŋkɔ yeyea nu.”

⁴ Aleke nàɖee afia be nèkpɔa ŋudzedze ɖe mɔnukpɔkpɔ si su asiwò be Mawu ƒe ŋkɔ le ŋuwò la ŋu? Ðe nàte ŋu aɖe nu si tae Yehowa yɔ mí be yeƒe Ðasefowo abe ale si míexlẽe le Yesaya ƒe agbalẽa me ene la mea?

5, 6. (a) Mɔ kawo dzie dzila Israel viwo tona ɖia ɖase tso Yehowa ŋu? (b) Nu ka hãe wode se na dzila Israel viwo be woawɔ, eye nu ka tae wòle be dzilawo nawɔ esia egbea?

⁵ Israel vi siwo nɔ anyi le Yesaya ƒe ŋkekea me dometɔ ɖe sia ɖe nye Yehowa ƒe ‘ɖasefo’ eye dukɔ bliboa nye Mawu ƒe “dɔla.” (Yes. 43:10) Mɔ siwo dzi dzila Israel viwo tona ɖia ɖase tso Mawu ŋu dometɔ ɖekae nye ale si wofiaa nu wo viwo tso nu siwo Mawu wɔ na wo tɔgbuiwo la ŋu. Le kpɔɖeŋu me, Yehowa bia tso dzilawo si be woafia nu wo viwo ku ɖe Ŋutitotoŋkekenyui la ŋu. Egblɔ na wo be: “Ne mia viwo abia mi be: miaƒe subɔsubɔ  sia gɔme ɖe mahã la, ekema migblɔ na wo bena: Esiae nye ŋutitotovɔsa na Yehowa, ame si tsò míaƒe aƒewo ɖi le Egipte-nyigba dzi, eye wòwu Egiptetɔwo; ke ekpɔ míaƒe aƒewo ta.” (2 Mose 12:26, 27) Anɔ eme be dzila mawo na wo viwo nya hã be esi Mose do ɖe Egipte fia Farao ŋkume zi gbãtɔ be yeabiae be wòaɖe mɔ na Israel viwo woayi aɖasubɔ Yehowa le gbedadaƒo la, Farao bia be: “Ame ka nye Yehowa, ne maɖo to eƒe gbe aɖe asi le Israel-viwo ŋuti woayi?” (2 Mose 5:2) Dzilawo ate ŋu agblɔ ale si Yehowa he fuwɔame ewo va Egiptetɔwo dzi eye wòɖe Israel viwo tso Egipte-ʋakɔwo si me le Ƒudzĩa nu hetsɔ ɖo nya si Farao dadala ma bia ŋu la ŋu nya na wo viwo. Yehowa to esia dzi ɖee fia amewo katã be Yee nye Ŋusẽkatãtɔ la. Israel viwo ŋutɔwo kpɔe be Yehowae nye Mawu vavã si wɔa eƒe ŋugbedodowo dzi ɣesiaɣi.

⁶ Ðikeke mele eme o be Israel vi siwo dea asixɔxɔ mɔnukpɔkpɔ si su wo si be Yehowa ƒe ŋkɔa le wo ŋu ŋuti la gblɔa nudzɔdzɔ wɔnuku siawo na amedzrovi siwo va zu woƒe kluviwo la hã, ke menye na wo viwo ɖeɖe ko o. Nenema kee wode se na Israel viwo be woafia wo viwo be woanɔ agbe dzadzɛ wòasɔ ɖe Mawu ƒe nudidi dzɔdzɔewo nu. Yehowa gblɔ be: “Ame kɔkɔewo mianye, elabena nye Yehowa, mia Mawu la, mele kɔkɔe.” (3 Mose 19:2; 5 Mose 6:6, 7) Kpɔɖeŋu nyui kae nye esi esia nye na dzila Kristotɔwo egbea. Ele be woawo hã woafia nu wo viwo be woanɔ agbe dzadzɛ ale be woade bubu Mawu ƒe ŋkɔ kɔkɔe la ŋu!—Mixlẽ Lododowo 1:8; Efesotɔwo 6:4.

7. (a) Ɣesiaɣi si Israel viwo wɔ nuteƒe na Yehowa la, ŋusẽ kae esia kpɔna ɖe dukɔ siwo ƒo xlã wo dzi? (b) Agba kae le ame siwo katã ŋu Mawu ƒe ŋkɔ le la dzi?

⁷ Ɣesiaɣi si Israel viwo wɔ nuteƒe la, enyea ɖaseɖiɖi nyui tso Mawu ƒe ŋkɔa ŋu. Wogblɔ na wo be: “Anyigba dzi dukɔwo katã akpɔe bena, Yehowa ƒe ŋkɔ le ŋuwò, eye woavɔ̃ wò.” (5 Mose 28:10) Gake nublanuitɔe la, le Israel viwo ƒe ŋutinya ƒe akpa gãtɔ me la, womewɔ nuteƒe o. Wotrɔ le Mawu yome hesubɔ legbawo zi gbɔ zi geɖe. Gawu la, wova zu ŋutasẽlawo abe Kanaantɔwo ƒe mawu siwo subɔm wonɔ la ene, eye wotsɔa wo viwo saa vɔe henɔa ame dahewo tem ɖe anyi. Nuxlɔ̃ame vevi kae nye esi esia nye na mí be míaʋli vevie be míanɔ kɔkɔe ɣesiaɣi abe Kɔkɔetɔwo Ƒe Kɔkɔetɔ si ƒe ŋkɔ le mía ŋu la ene!

8. Nu kae Yehowa gblɔ na Yesaya be wòawɔ? Eye aleke Yesaya wɔ nui?

⁸ Yehowa gblɔe ɖi be Israel viwo akpɔ ale si yeaɖe wo tso aboyo me nukutɔe la teƒe. (Yes. 43:19) Gake gbegblẽ si ava Yerusalem kple du siwo ƒo xlãe dzi kokoko la koŋ ŋue Yesaya ƒe agbalẽa ƒe ta ade gbãtɔawo ku ɖo. Yehowa, ame si dzroa dziwo me kpɔna la, gblɔ na Yesaya be wòayi edzi aɖe gbeƒã nuxlɔ̃amenya siawo togbɔ be dukɔa asẽ dzi me hã. Esia wɔ moyaa na Yesaya wòdi be yeanya ɣeyiɣi didi si Mawu ƒe dukɔa agbe dzimetɔtrɔ ase ɖo. Nya kae Mawu gblɔ nɛ? Egblɔ be: “Va se ɖe esime duwo nagbã, eye woazu aƒedo, xɔwo nazu xɔdo, eye anyigba nazu gbegbe.”—Mixlẽ Yesaya 6:8-11.

9. (a) Ɣekaɣie nya si Yesaya gblɔ ɖi tso Yerusalem ŋu la va eme? (b) Nu kae wòle be míakpɔ adze sii egbea?

⁹ Mawu de dɔ sia asi na Yesaya le Fia Uziya ƒe fiaɖuɖu ƒe ƒe mamlɛa me, alo le ƒe 778 D.M.Ŋ. me lɔƒo. Eyi eƒe nyagblɔɖidɔa dzi abe ƒe 46 ene va se ɖe ƒe 732 D.M.Ŋ. megbe, le Fia Xizkiya ƒe dziɖuɣi. Esia nye ƒe 125 hafi wova tsrɔ̃ Yerusalem le ƒe 607 D.M.Ŋ. me. Eya ta Mawu na eƒe amewo nya nu siwo ava dzɔ ɖe woƒe dukɔa dzi ɣeyiɣi didi aɖe do ŋgɔ. Egbea Yehowa na eƒe amewo yi edzi le nu  xlɔ̃m amewo tso nu siwo ava dzɔ ŋu. Gbetakpɔxɔ le nu xlɔ̃m exlẽlawo ƒe 135 ye nye esia be, woakpɔe adze sii be Satana ƒe dziɖuɖu vɔ̃ɖia nu ayi kpuie eye Yesu Kristo ƒe Ƒe Akpe Ðeka Dziɖuɖua axɔ ɖe eteƒe.—Nyaɖ. 20:1-3, 6.

10, 11. Yesaya ƒe nyagblɔɖia me vava ka teƒee Israel vi siwo nɔ Babilon kpɔ?

¹⁰ Yudatɔ siwo ɖo to hena ta Babilontɔwo la dometɔ geɖe tsi agbe esime wotsrɔ̃ Yerusalem eye wokplɔ wo yi aboyo me le Babilon. (Yer. 27:11, 12) Esi Mawu ƒe amewo nɔ afi ma ƒe 70 megbe la, wokpɔ eteƒe nyagblɔɖi aɖe va eme nukutɔe: “Ale Yehowa, miaƒe xɔnametɔ, Israel ƒe kɔkɔetɔ la, gblɔ esi: Le mia tae medɔ ame ɖo ɖe Babel, eye mena wonyã amewo ɖe nu.”—Yes. 43:14.

¹¹ Nyagblɔɖi ma va eme le mɔ ɖedzesi aɖe nu le zã aɖe me le October 539 D.M.Ŋ. ƒe gɔmedzedze. Esi Babilon fia kple eƒe bubumewo nɔ wain nom le kplu kɔkɔe siwo wolɔ tso Yerusalem ƒe gbedoxɔa me me, eye wonɔ woƒe legbawo kafum la, Mediatɔwo kple Persiatɔwo ƒe aʋakɔwo va dze Babilon dzi heɖu edzi. Le ƒe 538 alo ƒe 537 D.M.Ŋ. me la, Kores, ame si ɖu Babilon dzi la, ɖe gbe na Yudatɔwo be woatrɔ ayi wo de agbugbɔ Mawu ƒe gbedoxɔa atu le Yerusalem. Yesaya gblɔ nya siawo katã ɖi, eye wògblɔ ŋugbe si Yehowa do be yealé be na yeƒe ame siwo trɔ dzi me ahakpɔ wo ta ne wotrɔ yina Yerusalem. Mawu gblɔ le wo ŋu be wonye ‘dukɔ, si yewɔ na ye ɖokui, be woaxlẽ nya afia le yeƒe kafukafu ŋu.’ (Yes. 43:21; 44:26-28) Esi aboyome siawo trɔ gbɔ va Yerusalem hetu Yehowa ƒe gbedoxɔa la, wokpɔe be Yehowa, si nye Mawu vavã ɖeka kolia la, ƒe nyagblɔɖiwo vaa eme ɣesiaɣi eye wozu esia ŋuti ɖasefowo.

12, 13. (a) Ame kawo hãe kpe ɖe Israel viwo ŋu le Yehowa ƒe tadedeagu vavãtɔ gbugbɔgaɖoanyi me? (b) Nu kae wodi tso ‘alẽ bubu’ siwo le asi kpem ɖe “Mawu ƒe Israel” ŋu la si, eye nu kae wole mɔ kpɔm na?

¹² Ame akpe geɖe siwo menye Israel viwo o nɔ dukɔ si trɔ gbɔ tso aboyo me la dome, eye emegbe la, dukɔwo me tɔ geɖewo trɔ dzi me zu Yudatɔwo. (Ezra 2:58, 64, 65; Esta 8:17) Egbea Yesu ƒe “alẽ bubuwo” ƒe “ameha gã aɖe” le asi kpem ɖe Kristotɔ amesiamina, siwo ƒo ƒu nye “Mawu ƒe Israel,” la ŋu nuteƒewɔwɔtɔe. (Nyaɖ. 7:9, 10; Yoh. 10:16; Gal. 6:16) Mɔnukpɔkpɔ su ameha gã la me tɔwo hã si be wonye Yehowa ƒe Ðasefowo.

¹³ Le Kristo ƒe Ƒe Akpe Ðeka Dziɖuɖua me la, anye dzidzɔ manyagblɔ na ameha gã la me tɔwo be woaƒo nu tso nu si wòbia be ame nanye Yehowa ƒe Ðasefo le nuɖoanyi sia ƒe ŋkeke mamlɛ siawo me  la ŋu na ame siwo woagbɔ agbee. Gake ne míele agbe nɔm ɖe ŋkɔ si le mía ŋu nu eye míele kɔkɔe ko hafi mɔnukpɔkpɔ sia asu mía si. Togbɔ be míedzea agbagba be míanɔ agbe ɖe Yehowa ƒe nudidi dzɔdzɔewo nu hã la, míewɔa vodadawo gbe sia gbe. Eya ta ehiã be míabia Yehowa ƒe tsɔtsɔke gbe sia gbe. Ne míenɔa agbe dzadzɛ la, míeɖenɛ fiana be míedea asixɔxɔ gã mɔnukpɔkpɔ si su mía si be Mawu ƒe ŋkɔ kɔkɔea le mía ŋu la ŋu.—Mixlẽ 1 Yohanes 1:8, 9.

14. Ŋkɔ Yehowa gɔme ɖe?

¹⁴ Be míase bubu si gbegbe wònye na mí be Mawu ƒe ŋkɔ le mía ŋu gɔme nyuie la, ehiã be míade ŋugble tso nu si ŋkɔa fia ŋuti. Woɖe ŋkɔ “Yehowa” tso Hebrigbe me dɔwɔnya si gɔme woɖena zi geɖe be “evaa eme” la me. Eya ta woɖea ŋkɔ Yehowa gɔme be “Enana Wòvaa Eme.” Gɔmeɖeɖe sia sɔ nyuie na Yehowa si nye xexea me katã kple nuwɔwɔ siwo si nunya le la Wɔla, eye wòɖee fia be Enaa eƒe tameɖoɖowo vaa eme. Yehowa yi edzi na eƒe lɔlɔ̃nu kple tameɖoɖowo le eme vam, eye futɔ aɖeke, Satana kura gɔ̃ hã, mate ŋu agblẽ eƒe tameɖoɖowo me gbeɖe o.

15. Gɔmesese si le Yehowa ƒe ŋkɔa ŋu ƒe akpa bubu kae wòɖe fia Mose? (Kpɔ aɖaka si nye “ Ŋkɔ Si Ŋu Gɔmesese Geɖe Le.”)

¹⁵ Esi Yehowa Mawu nɔ Mose dɔm be wòayi aɖakplɔ yeƒe dukɔa tso Egipte la, eɖe gɔmesese si le eƒe ŋkɔa ŋu ƒe akpa bubu fia esi wògblɔ na Mose be: “‘Mava Nye Nu Si Metia Be Manye’ [alo, “Manye Ame Si Medi Be Manye”]. Eye wògblɔ kpee be: ‘Ale nàgblɔ na Israel viwoe nye esi: “Mava Nye ye dɔm ɖe mia gbɔ.”’” (2 Mose 3:14, NW; etenuŋɔŋlɔ.) Eya ta le nɔnɔme ɖe sia ɖe me la, Yehowa ava nye nu sia nu si hiã be eƒe tameɖoɖowo nava eme. Le Israel vi siwo nɔ kluvinyenye me gome la, Yehowa va nye wo Ðela, wo Takpɔla, woƒe Mɔfiala, kple Nunala si naa nu sia nu si wohiã le gbɔgbɔ me kple ŋutilã me siaa la wo.

16, 17. (a) Aleke míate ŋu aɖee afia be míedaa akpe ɖe mɔnukpɔkpɔ si su mía si be Mawu ƒe ŋkɔa le mía ŋu la ta? (b) Nu ka mee míadzro le nyati si kplɔe ɖo me?

¹⁶ Egbea Yehowa kpɔtɔ wɔa nu wòsɔna ɖe gɔmesese si le eƒe ŋkɔa ŋu nu, eye wòyi edzi le nu siwo míehiã le gbɔgbɔ me kple ŋutilã me siaa nam mí. Ke hã gɔmesese si le Mawu ƒe ŋkɔa ŋu gafia nu bubu aɖe hã mí tso eyama ŋu. Eyae nye ka? Yehowa ate ŋu ana eƒe nuwɔwɔwo nawɔ nu sia nu si hiã be eƒe tameɖoɖo nava eme. Le kpɔɖeŋu me, ezãa eƒe Ðasefowo wowɔa eƒe dɔ. Ele be ŋugbledede tso esia ŋu naʋã mí be míayi edzi anɔ agbe wòasɔ ɖe eƒe ŋkɔa nu. Nɔviŋutsu Kåre si xɔ ƒe 84, si nye Ðasefo dovevienu aɖe le Norway ƒe 70 sɔŋ la gblɔ be: “Mesena le ɖokuinye me be bubu gã aɖee wònye nam be mele Yehowa, Fia mavɔmavɔtɔ la, subɔm eye mele ame siwo ŋu eƒe ŋkɔ kɔkɔea le la dome. Mɔnukpɔkpɔ gã aɖee wònyena nam ɣesiaɣi be maɖe Biblia me nyateƒea me na amewo ahakpɔ dzidzɔ si gbegbe dzena le mo na wo ne wova se nyawo gɔme. Le kpɔɖeŋu me, nye dzi dzea eme ŋutɔ ne mefia amewo ale si Kristo ƒe tafevɔsaa ɖea vi na míi kple ale si wòate ŋu ana agbe mavɔ nɔnɔ le xexe yeye si me dzɔdzɔenyenye kple ŋutifafa anɔ me la nasu wo si.”

¹⁷ Enye nyateƒe be le nuto aɖewo me la, ele sesẽm be míakpɔ ame siwo di be yewoasrɔ̃ nu tso Mawu ŋu. Ke hã, abe Kåre ene la, ɖe mèkpɔa dzidzɔ ne amewo ɖo to wò eye nèfia nu wo tso Yehowa ƒe ŋkɔa ŋu oa? Gake aleke míate ŋu anye Yehowa Ðasefowo aganye Yesu ƒe ɖasefowo? Míadzro biabia sia me le nyati si kplɔe ɖo me.