Le ƒe 1942 ƒe gɔmedzedze esime United States de nu Xexemeʋa II lia me vɔ megbe teti la, menɔ ƒe atɔ̃lia me le yunivɛsiti eye wòsusɔ ɣleti ʋɛ aɖewo ko maxɔ yunivɛsitiɖaseɖigbalẽ le xɔtuɖaŋununya me. Mía kple ame eve bubuwo míenɔ xɔ ɖeka me le dziƒoxɔ aɖe dzi. Wo dometɔ ɖeka gblɔ nam be maɖo dze kple ame si “vaa ɖekakpuiawo gbɔ le dziƒoxɔa te.” Aleae wòdzɔe be meva do go John O. (Johnny) Brehmer, si nye Yehowa Ðasefowo dometɔ ɖeka. Ale si wòtea ŋu kpɔa nyabiase ɖe sia ɖe ƒe ŋuɖoɖo le Biblia me la wɔ nuku nam ŋutɔ. Esia wɔe be mena Johnny va nɔ Biblia srɔ̃m kplim edziedzi, eye mía kplii míeyina ɖaɖea gbeƒã ɣesiaɣi si wòanya wɔ nam.

Johnny fofo, Otto, va zu Ðasefo esime wònye gadzraɖoƒe aɖe si nɔ Walnut le Iowa la ƒe amegã. Otto ɖe asi le ɖoƒe ma gbegbe ŋu va tsɔ eɖokui ƒo ɖe gbeƒãɖeɖedɔa me bliboe. Kpɔɖeŋu nyui si eya ŋutɔ kple eƒe ƒomea ɖo la do ŋusẽm mewɔ nyametsotso vevi aɖe emegbe.

Gbe ɖeka, sukua dzi kpɔla gblɔ nam be nyemegale agbagba dzem le nye sukudɔwo me o, eye womate ŋu anɔ te ɖe agbagba siwo medze va yi dzi ana ɖaseɖigbalẽm o. Meɖo ŋku edzi be medo gbe ɖa na Yehowa Mawu vevie heɖe kuku nɛ be wòafia nu si mawɔ lam. Esia megbe kpuie la, woyɔm be mayi aɖakpe kple míaƒe nufialagã si fiaa xɔtuɖaŋununya mí. Egblɔ nam be yexɔ agbalẽ tso dɔwɔƒe aɖe si le xɔtuɖaŋunyala dim la gbɔ eye yeɖo eŋu na wo xoxo be malɔ̃ awɔ dɔ ma. Meda akpe na nufialagã la, gake meɖe nu si tae meɖoe be matsɔ subɔsubɔdɔwɔwɔ na Yehowa awɔ nye agbemedɔe la me nɛ. Le June 17, 1942 me la, mexɔ nyɔnyrɔ, eye esia megbe kpuie ko la, mezu mɔɖela, si nye ale si woyɔa Yehowa Ðasefo siwo ɖea gbeƒã ɣeyiɣiawo katãe.

Emegbe le ƒe 1942 ma ke me la, dziɖuɖua na agbalẽm be mawɔ asrafodɔ, si wɔe be meyi dɔdzikpɔla siwo xɔa ame ɖe asrafodɔ me la gbɔ, eye meɖe nu me na wo be nye dzitsinya maɖe mɔ nam be mawɔ aʋa o. Metsɔ agbalẽ si ɖi ɖase tso nye agbenɔnɔ nyui kple xɔtuɖaŋununya ƒe ŋutete tɔxɛa ŋu, si mexɔ tso nye sukua ƒe nufialagãwo gbɔ la fia wo. Togbɔ be mexɔ ɖaseɖiɖi nyui sia hã la, woka tohefe nam be maxe Amerika dɔlar 10,000 eye woka ƒe atɔ̃ nam be matsɔ anɔ gaxɔ me le United States ƒe gakpɔ si le Leavenworth, le Kansas, la me.

Wode sɔhɛ Ðasefo siwo wu 230 la Leavenworth gakpɔ me, afi si gamenɔlawo dea dukɔa ƒe agble le. Wodea dɔ asi na mí le agble sia dzi le dzɔla geɖewo  ƒe dzikpɔkpɔ te. Wo dometɔ aɖewo nyae be míenye Kristotɔ siwo medea akpa aɖeke dzi le aʋa me o, eye wosea nu gɔme na mí.

Dzɔla ʋɛ aɖewo kpe asi ɖe mía ŋu míete ŋu yi edzi nɔ kpekpem henɔ Biblia srɔ̃m. Wokpe ɖe mía ŋu hã be Biblia srɔ̃gbalẽwo kaa mía si le gakpɔa me. Gaxɔdzikpɔla la gɔ̃ hã wɔ ɖoɖo wotsɔa magazine si nye Consolation (si míeyɔna fifia be Nyɔ!) la vana nɛ ɣleti sia ɣleti!

Esi menɔ gaxɔ me ƒe etɔ̃ megbe la, woɖe asi le ŋunye le February 16, 1946 dzi, si nye ɣleti ʋɛ aɖewo le Xexemeʋa II lia ƒe nuwuwu megbe. Enumake megadze mɔɖeɖedɔa wɔwɔ gɔme ake. Wode dɔ asi nam be mayi gbeƒãɖeɖedɔa dzi le Leavenworth, le Kansas. Esia na vɔvɔ̃ ɖom, elabena nuto ma me tɔwo melɔ̃a Yehowa Ðasefowo ƒe nya kura o. Esesẽ be makpɔ dɔ awɔ atsɔ akpɔ ɖokuinye dzi, eye xɔkpɔkpɔ ya gasesẽ wu gɔ̃ hã.

Meɖo ŋku edzi be gbe ɖeka esi menɔ gbeƒã ɖem tso aƒe me yi aƒe me eye mege ɖe dzɔla aɖe ƒe aƒe me la, edo ɣli ɖe tanye be, “Do go le aƒe me nam!” Esi mekpɔ ati si wotsɔ ƒoa baseball le esi la, vɔvɔ̃ ɖom eye medzo enumake. Esi meyi aƒe bubu aɖe me la, nyɔnu aɖe gblɔ nam be, “Tɔ vie megbɔna,” eye wòlé ʋɔa ɖo enu. Metɔ ɖe afi ma va se ɖe esime woʋu fesre aɖe le dziƒoxɔa dzi eye kasia wotrɔ agbaklɔtsi ƒoɖi kɔ ɖe dzinye yoo. Ke hã yayrawo do tso nye subɔsubɔdɔa me. Ɣeyiɣi aɖewo megbe la, mesee be ame siwo mena Biblia srɔ̃gbalẽwo la dometɔ aɖewo va zu Ðasefowo.

Míaƒe habɔbɔa ʋu suku yeye aɖe naa hehe dutanyanyuigblɔlawo le New York dugãa ƒe dziehe gome, le ƒe 1943 me. Wokpe nye hã be mava de sukua ƒe klass ewolia, eye míewu sukua nu le February 8, 1948 dzi. Emegbe wova tsɔ ŋkɔ na sukua be Gbetakpɔxɔ Habɔbɔa Ƒe Gilead Biblia Suku. Le sukunuwuwɔnaa me la, wode dɔ asi nam be mayi aɖaɖe gbeƒã le Gold Coast, si woyɔna be Ghana fifia.

Esi meva ɖo Gold Coast la, nye dɔdeasie nye be maɖe gbeƒã na dziɖuɖumegãwo kple Europatɔwo. Le kwasiɖa ƒe nuwuwuwo la, mewɔa dɔ kple Yehowa Ðasefowo ƒe hamewo eye menaa kpekpeɖeŋu hamea me tɔwo le tso aƒe me yi aƒe me gbeƒãɖeɖedɔa me. Meyina ɖasrãa Ðasefo siwo le nuto saɖeagawo me la kpɔ eye menaa hehe wo le gbeƒãɖeɖedɔa me. Gakpe ɖe eŋu la, mesubɔ abe dzikpɔla mɔzɔla ene le Ivory Coast, si woyɔna be Côte d’Ivoire fifia.

Esime menɔ subɔsubɔm le nuto mawo me la, mesrɔ̃ ale si Afrikatɔwo wɔa nui—memlɔa anyixɔ me, meɖua nu kple asi, eye meyia afɔdzi le ‘gota’ abe ale si Israel viwo wɔe le gbeadzi ene. (5 Mose 23:12-14) Esia wɔe be ŋkɔ nyui va nɔ mía kple nye hati  dutanyanyuigblɔlawo ŋu. Míeva dze Biblia sɔsrɔ̃ gɔme kple dziɖuɖumegã aɖewo srɔ̃wo. Eya ta esi tsitretsiɖeŋulawo tso ɖe mía ŋu eye wona dziɖuɖua te fli ɖe míaƒe dukɔmenɔnɔ ƒe mɔɖegbalẽviwo me la, dziɖuɖumegãwo srɔ̃wo ƒoe ɖe wo srɔ̃wo nu ale be womenya mí le dukɔa me o!

Asrã va lé nye hã metsi aba dzi, abe ale si wòdzɔna ɖe dutanyanyuigblɔla siwo va Afrika la dometɔ geɖe dzi ene. Asrã la nu sẽ eye vuvɔ nɔ wɔyem ale gbegbe be nyemeganya nu si wɔm menɔ o. Ɣeaɖewoɣi la, nye glã nɔa ƒoƒom ale gbegbe be ɖe metsɔa asi lénɛ kpena. Ke hã mekpɔtɔ yi edzi nɔ dzidzɔ kple dzidzeme kpɔm le nye subɔsubɔdɔa me.

Le ƒe ene gbãtɔ siwo metsɔ nɔ Afrika me la, mía kple Eva Hallquist, si medo go le United States hafi va la míenɔ agbalẽ ŋlɔm na mía nɔewo. Emegbe mesee be ele Gilead Sukua ƒe klass 21 lia nu wu ge le July 19, 1953 dzi, le dukɔwo dome takpekpe si Yehowa Ðasefowo awɔ le New York, le Yankee Stadium la me. Eya ta mewɔ ɖoɖo kple tɔdziʋumegã aɖe be wòaɖe mɔ nam mawɔ dɔ le ʋua me nɛ ɖe nye ʋudzɔ teƒe ne wòakɔm ayi United States.

Míenɔ ƒu dzi ŋkeke 22; ƒua dzea agbo ɣeaɖewoɣi. Esi míeva ɖi go mlɔeba la, meyi ɖado go Eva le Yehowa Ðasefowo ƒe dɔwɔƒegã si le Brooklyn. Esi mía kplii míenɔ dɔwɔƒegã la ƒe xɔ kɔkɔa tame henɔ New York dugãa me xɔ tsralawo kple eƒe melidzeƒea kpɔm ɖaa la, medo srɔ̃ɖeŋugbe nɛ. Ɣeyiɣi aɖe megbe la, Eva hã va Gold Coast eye mía kplii míewɔ subɔsubɔdɔa le afi ma.

Esi mía kple Eva míesubɔ le Afrika ƒe geɖe megbe la, danye ŋlɔ agbalẽ nam be kansa lé Papa vevie. Mebia mɔ eye mía kple Eva míetrɔ yi United States. Papa ƒe dɔlélea va nyra ɖe edzi, eye wòku le ɣeyiɣi kpui aɖe megbe.

Esi míetrɔ va nɔ Ghana abe ƒe ene ene megbe la, míese be Dada ƒe lãme gblẽ vevie. Mía xɔlɔ̃ aɖewo do susua ɖa be mía kple Eva míatrɔ agbɔ va aƒe ale be míakpɔ edzi. Emae nye nyametsotso sesẽtɔ si dze ŋgɔ mí. Esi mewɔ dutanyanyuigbɔgblɔdɔ ƒe 15 siwo me mía kple Eva míesubɔ le ɖekae ƒe 11 megbe la, míetrɔ yi United States.

Esi ƒeawo va nɔ yiyim la, mía kple Eva míeɖɔa li mía nɔewo kpɔa Dada dzi. Míekpena ɖe eŋu wòdea kpekpeawo ne anya wɔ nɛ. Dada va ku le January 17, 1976 dzi esime wòxɔ ƒe 86. Gake dzigbãnya si gasẽ wu la va tum ƒe asieke megbe. Wokpɔ kansa le Eva ŋu. Míeto mɔ ɖe sia ɖe dzi wɔ avu kple dɔlélea, gake eva ku mlɔeba le June 4, 1985 dzi esime wòxɔ ƒe 70.

Le ƒe 1988 me la, wokpem be mayi aɖakpɔ Ghana alɔdzedɔwɔƒe si wotu yeyee la ŋu kɔkɔ teƒe. Nyemaŋlɔ nudzɔdzɔ ma be gbeɖe o! Esi medo go le Gilead Sukua heva Ghana ƒe 40 aɖewoe nye ema va yi la, Ðasefo alɔfa ʋɛ aɖewo koe nɔ dukɔa me ɣemaɣi. Kaka ƒe 1988 naɖo la, wosɔ gbɔ wu ame 34,000, eye fifia wode ame 114,000 kloe!

Esi metrɔ gbɔ tso Ghana ƒe eve megbe la, meɖe Eva xɔlɔ̃ kplikplikpli si ŋkɔe nye Betty Miller le August 6, 1990 dzi. Mía kplii míeyi edzi le subɔsubɔdɔ wɔm na Yehowa vevie. Míele mɔ kpɔm na ŋkeke si dzi míagakpɔ mía tɔgbuiwo, mía dzilawo, kpakple Eva ake le tsitretsitsia me le Paradiso me le anyigba dzi.—Dɔwɔwɔwo 24:15.

Ne mebu mɔnukpɔkpɔ si su asinye be Yehowa zãm ƒe 70 kple edzivɔwo le eƒe subɔsubɔdɔa me ŋu la, aɖatsi lólona ɖe ŋku dzi nam. Medaa akpe nɛ zi geɖe be efia mɔm be metsɔ subɔsubɔdɔwɔwɔ nɛ wɔ nye agbemedɔe. Togbɔ be mexɔ ƒe 90 kple edzivɔ fifia hã la, Yehowa, si nye aɖaŋuwɔla gãtɔ le xexea me godoo la yi edzi le ŋusẽ kple dzideƒo namem be mayi edzi anɔ esubɔm ɖaa.