N̄kamana ke Rochester ke New York. Ikesika Ufọkabasi Catholic. Ini ndide isua itiaita, ete mi ye eka mi ikodụn̄ke kiet aba. N̄kesidụn̄ ye eka mi ke n̄kan̄ emi mme ubuene ẹkedụn̄de, edi ke utịturua ami n̄kodu ye ete mi ke n̄kan̄ emi mme imọ owo ẹkedụn̄de. Ke ini n̄kụtde nte eka mi ọbọde ufen ndibọk nnyịn nditọ itiokiet, ama esidọn̄ mi ndinyene okụk man n̄keme ndin̄wam ubon nnyịn.

 Ete mi okoyom mi ndi imọ owo. Ntre enye ama anam yak n̄ka n̄kese ufọkn̄wed kiet emi ẹnen̄erede ẹdiọn̄ọ ndikpep owo nte ẹkpesede ẹban̄a hotel. Ama enem mi tutu. Ntre mma nsịn enyịn̄ sia n̄kekere ke Abasi ọbọrọ akam mi oro, ke mmọn̄ mforo nnyụn̄ n̄kop inemesịt. Mma nda isua ition n̄kpep nte ẹkpesede ẹban̄a hotel, ibet emi anade mme anam mbubehe ẹtiene, ye nte ikpọ mbubehe ẹkpesede ẹban̄a okụk. Kpa ke ukem ini oro, ke n̄kanam utom ke hotel kiet emi ẹsibrede nsa ke okụk n̄ko ke Las Vegas ke Nevada.

 Ini ndide isua 22, ami n̄kedi ọyọhọ akamba owo ita ke hotel kiet emi ẹsibrede nsa ke okụk. Ẹkeda nte ke ndi imọ owo, ke mmonyụn̄ n̄wọrọ n̄kpọ. N̄kesidia ata nti udia nnyụn̄ n̄n̄wọn̄ wine ye ọkpọsọn̄ mmịn emi ọsọn̄de urua akan. Mbon emi ikesidianade ntre inam mbubehe ẹkesidọhọ mi, “Ti ke okụk edi ata akpan n̄kpọ ke ererimbot emi.” Mmọ ẹkeda nte ke okụk anam owo okop ata inemesịt.

 Utom mi ke Las Vegas ama esịne ami ndikụt nte ke mme imọ owo emi ẹdide do ndibre nsa ke okụk ẹnyene se mmọ ẹyomde. Kpa ye emi mmọ ẹkenyenede okụk ata etieti, eketie nte mmọ ikopke inemesịt. Ama ọtọn̄ọ nditie mi ntre n̄ko. Ekedi nte nnyenede okụk n̄ka, ntre ke esịt enen̄ede etịmede mi, nnyụn̄ n̄kemeke ndide idap yak ọfọn. Mma ntọn̄ọ ndikere ke akpana n̄wot idemmi. Uwem ama odorode mi tutu mbụp Abasi nte, “M̀mọ̀n̄ ke n̄keme ndikụt ata inemesịt?”

 Kpa ke ukem ini oro, nditọeka mi iban iba emi ẹma ẹkekabade ẹdi Mme Ntiense Jehovah ẹma ẹwọrọ ẹdidụn̄ ke Las Vegas. Kpa ye emi mmen̄kesinyịmeke ndibọ mme n̄wed mmọ, mma nnyịme ndisitie ye mmọ nneme Bible, edi n̄kot ke Bible okịm. Ẹkesiwet ikọ Jesus ke ndatndat mmọn̄n̄wed ke Bible mi. Mmọ ẹma ẹdiọn̄ọ ke mmesinịm kpukpru se Jesus eketịn̄de, ntre mmọ ẹkesinen̄ede ẹwak ndineme mban̄a se Jesus eketịn̄de. Mma nsinyụn̄ ntie ke idemmi n̄kot Bible.

 Ediwak n̄kpọ emi n̄kokotde ke Bible ama akpa mi idem. Ke uwụtn̄kpọ, mma n̄kot ke Jesus ọkọdọhọ: “Ke ini ọbọn̄de akam, kûyịre nditịn̄ mfiak ntịn̄ n̄kpọ kiet, kpa nte mbon idụt ẹnamde, koro mmọ ẹkere ke nditịn̄ uwak ikọ edinam ẹkop akam mmimọ.” (Matthew 6:7) Edi oku ufọkabasi nnyịn ama ọnọ mi ndise Jesus onyụn̄ ọdọhọ ke edieke mbọn̄de Akam Ọbọn̄ utịm ikoduop ye akam emi ẹkotde Edisana Mary utịm ikoduop nnọ ndise oro, ke Abasi ọyọnọ mi ibat okụk ekededi emi nyomde. Edi edieke mbọn̄de utọ akam oro, ndi idịghe ndiyịre ntịn̄ mfiak ntịn̄ n̄kpọ kiet edi oro? N̄kpọ en̄wen emi n̄kokotde ekedi ke Jesus ọkọdọhọ: “Ẹkûkot owo ndomokiet ke isọn̄ ‘ete’ mbufo, koro owo kiet edi Ete mbufo, kpa Enye emi odude ke heaven.” (Matthew 23:9) Ntre mma n̄kere nte, ‘Nso inam ndien yak ami ye kpukpru mbon Catholic eken isikot mme oku nnyịn “Ete”?’

 Ini n̄kokotde n̄wed James ke n̄kọtọn̄ọ ndinen̄ede ntie n̄kere utọ uwem emi ndude. James 4:4 ọdọhọ: “Nte mbufo ifiọkke ite edidi ufan ye ererimbot edi edidi asua ye Abasi? Ke ntre, owo ekededi eke oyomde ndidi ufan ye ererimbot anam idem asua ye Abasi.” Enye emi okodụkde mi ọkpọ akan ekedi ufan̄ikọ 17 emi ọdọhọde: “Edieke owo ọfiọkde ndinam se inende edi mînamke, oro edi idiọkn̄kpọ ọnọ enye.” Ke ntre mma n̄kot nditọeka mi iban iba oro ndọhọ ke mmọn̄ n̄kpọn̄ utom mi sia mma ndikụt ke ndusụk se ẹsinamde ke utom oro ifọnke, utọ nte ndibre nsa ke okụk, ye idiọkitọn̄.

 N̄koyom ndinen̄ede ndiọn̄ọ Abasi, nnyụn̄ nnen̄ede n̄kpere ete ye eka mi ye nditọeka mi idem. Ntre mma mbiere ke ndisịnke ibuot nsịn itọn̄ n̄n̄wana okụk aba. Edi ikememke inọ mi-o. Ke uwụtn̄kpọ, ẹma ẹdọhọ ke ẹmọn̄ ẹmenede mi itie, ẹnyụn̄ ẹkpe mi okụk emi awakde utịm ikaba m̀mê utịm ikata akan se ẹkesikpede mi. Edi ke mma n̄kọbọn̄ akam mban̄a n̄kpọ oro, mma mbiere ke ndụhe utọ uwem oro aba. Mma n̄kpọn̄ utom oro, n̄kọdiọn̄ itie emi eka mi ekesinịmde moto, n̄wọrọ n̄kodu do nnam ekpri mbubehe.

 Kpa ye emi Bible akan̄wamde mi ndiọn̄ọ se inen̄erede idi akpan n̄kpọ, n̄kosụk mmaha ndika mbono esop Mme Ntiense Jehovah. Nditọeka mi iban iba oro ẹma ẹbụp mi m̀mê nso ke Mme Ntiense Jehovah ẹdue mi. Mma ndọhọ mmọ: “Jehovah Abasi mbufo asasuan ubon. N̄kukụre ini emi nnyenede ndidu ye ubon nnyịn edi ini Christmas ye ini usọrọ usen emana, edi mbufo isinamke kpukpru oro.” Eyeneka mi an̄wan kiet ama ọtọn̄ọ nditua onyụn̄ obụp mi ete: “Afo esidu ke m̀mọ̀n̄ kpukpru mme ini eken ke isua? Ọdọn̄ nnyịn ndidu ye afo ini ekededi. Edi mme ini usọrọ oro kpọt ke afo enyene ndidu ye nnyịn, ndien onyụn̄ anam oro ke ntak emi ekerede ke mûnamke ẹdidọhọ ke edi idiọkowo.” Ikọ esie oro ama odụk mi ke ọkpọ, ntre mma ntọn̄ọ nditiene enye ntua.

 Ama edin̄wan̄a mi ndien ke Mme Ntiense Jehovah ẹma ubon mmọ etieti. Ntre mma mbiere ndika mbono esop mmọ usen kiet ke Ufọkmbono Obio Ubọn̄. Do ke n̄kokụt Kevin. Enye ama ọtọn̄ọ ndikpep mi Bible. Kevin ama ọdiọn̄ọ ndikpep owo Bible etieti.

 Kevin ye n̄wan esie ikoyomke ikpọ n̄kpọ. Mmọ ẹkenam oro man ẹnyene ini ẹnen̄ede ẹn̄wam mme owo ẹdiọn̄ọ Bible. Okụk emi mmọ ẹken̄wanade ama ekem mmọ ndikpe usụn̄ n̄ka Africa ye Central America n̄kan̄wam yak ẹbọp ọfis Mme Ntiense Jehovah do. Uwem ama enem mmọ etieti, mmọ ẹma ẹnyụn̄ ẹnen̄ede ẹma idemmọ. Mma ndọhọ ke esịt mi nte, ‘Utọ uwem emi ke nyom.’

 Kevin ama ebre vidio kiet emi owụtde nte uwem esinemde mme isụn̄utom ọnọ mi. Mma mbiere ke se nyomde ndinam edi oro. Ke 1995, mma nna baptism n̄kabade ndi Ntiense Jehovah ke mma n̄kesịn idem n̄kpep Bible ke ufan̄ ọfiọn̄ itiokiet. Utu ke ndiben̄e Abasi anam mi mforo, mma ntọn̄ọ ndibọn̄ akam ndọhọ: “Kûnọ mi ubuene kûnyụn̄ unọ mi inyene.”—Mme N̄ke 30:8.

 Ndi ata imọ owo idahaemi, edi idịghe ke ntak okụk, edi ke ntak emi nnen̄erede n̄kpere Abasi nnyụn̄ n̄kopde inem uwem. Mma n̄kụt Nuria edima an̄wan mi ke Honduras. Nnyịn mbiba ima idi isụn̄utom ke Panama, idahaemi ididi isụn̄utom ke Mexico. Mmokụt ke se Mme N̄ke 10:22 etịn̄de edi ata akpanikọ. Itie oro ọdọhọ: “Edidiọn̄ Jehovah ofori owo, enye inyụn̄ idianke ubiak ke esịt”!