Mma kiet emi ekerede Irma odụn̄ ke Germany, enye onyụn̄ edi n̄kpọ nte isua 90. Enye ama enyene aksiden ikaba, ẹma ẹnyụn̄ ẹsiak enye idem ediwak ini, enye inyụn̄ ikemeke aba ndisan̄a n̄kwọrọ ikọ ke ufọk ke ufọk nte ekesinamde. Irma editie ke ufọk idahaemi ada leta ọkwọrọ ikọ ọnọ iman esie ye mbon emi enye ọdiọn̄ọde. Mme owo ẹsima leta esie tutu ẹsikot enye ke fon ẹbụp m̀mê nso usen ke enye edifiak iwet mmimọ leta. Mme owo ẹsinyụn̄ ẹwet leta n̄ko ẹkọm enye, ẹdọhọ enye afiak ewet mmimọ leta en̄wen. Irma ọdọhọ ete, “Kpukpru emi esinam esịt enem mi onyụn̄ anam n̄ka iso n̄kwọrọ ikọ.”

 Irma esiwet leta ọnọ ediwak mbon oro ẹma ẹkesọn̄. Enye ọdọhọ ete: “Akamba mma kiet ama okot mi ọdọhọ ke leta mi esidọn̄ imọ esịt tọn̄ọ ebe imọ akakpa. Leta oro esisịne ke Bible esie, enye esinyụn̄ ama ndisio n̄kot ke mbubreyo. Mma kiet n̄ko emi mîbịghike ebe esie akakpa ọdọhọ ke se nsiwetde ke leta mi esin̄wam imọ akan se eteubom ufọkabasi mmimọ esikwọrọde, Enye ọdọhọ ke ikpama ndikụt mi iso ye iso sia imenyene ediwak mbụme ndibụp.”

 Enyene mma kiet emi mîkedịghe Ntiense Jehovah, emi Irma ọkọdiọn̄ọde. Mma oro ama ọwọrọ okodụn̄ ke ata anyan ebiet onyụn̄ ọdọhọ yak Irma esiwet imọ leta. Irma ọdọhọ ete:“Mma oro ikọduọkke leta mi ndomokiet. Ke mma oro ama akakpa, eyen esie an̄wan ama okot mi ke fon ọdọhọ ke imokot kpukpru leta oro n̄kewetde nnọ eka imọ, onyụn̄ ọdọhọ mbọk yak nsitiene n̄wet leta ikọ Abasi nnọ imọ n̄ko.”

 Ukwọrọikọ esinen̄ede enem Irma. Enye ọdọhọ ete: “Mmesiben̄e Jehovah nte aka iso ọnọ mi ukeme ndinam n̄kpọ esie. Kpa ye mmen̄kemeke aba ndisan̄a n̄kwọrọ ikọ ke ufọk ke ufọk, mmanam se n̄kemede.”