1 Samuel 17;1-58
17 Ekem mbon Philistia+ ẹbon mbonekọn̄ mmọ ọtọkiet ndika ekọn̄. Ke ini mmọ ẹsopde idem ọtọkiet ke Socoh+ emi enyenede Judah, mmọ ẹnam nna ke ufọt Socoh ye Azekah,+ ke Ephes-dammim.+
2 Edi Saul ye nditọ Israel ẹsop idem ọtọkiet ẹnyụn̄ ẹnam nna ke unaisọn̄ itịghede Elah,+ ndien mmọ ẹtịm udịmekọn̄ ndikan̄wana ye mbon Philistia.
3 Ndien mbon Philistia ẹda ke obot ke edem n̄kan̄ emi, Israel ẹnyụn̄ ẹda ke obot ke edem n̄kan̄ oko, itịghede onyụn̄ abahade mmọ.
4 Ndien owo kiet emi edide ata-an̄wanaekọn̄ ke ibuot mbon Philistia ọwọrọ ke itienna mbon Philistia edi, enye ekere Goliath,+ onyụn̄ oto Gath,+ enye okon̄ ke cubit itiokiet ye udomo ubọk* kiet.+
5 Ndien enye ayara ndụn okpoho ke ibuot, onyụn̄ esịne kod ukwak emi enyenede n̄kpri ukwak emi ẹbietde ikpọk, emi kiet odorode ke eken, ndien udobi kod ukwak+ oro edi okpoho shekel tọsịn ition.
6 Enye onyụn̄ esịne n̄kpọ okpoho ofụk asian, enyịm+ okpoho onyụn̄ odu enye ke ufọt afara.
7 Ndien eto eduat esie ebiet eto mme ọdọk-ọfọn̄,+ udobi mbubara eduat esie onyụn̄ edi ukwak shekel ikie itiokiet; ndien andikama akwa otuekọn̄ asan̄a enye ke iso.
8 Ndien enye atuak ada ofiori okot udịmekọn̄ Israel,+ onyụn̄ ọdọhọ mmọ ete: “Ntak emi mbufo ẹwọrọde ẹdi nditịm udịmekọn̄? Nte ami ndịghe owo Philistia, nte mbufo inyụn̄ idịghe mme asan̄autom+ Saul? Mbufo ẹsio owo kiet ke otu mbufo, ẹnyụn̄ ẹnam enye osụhọde etiene mi.
9 Edieke enye edikemede ndin̄wana ye ami nnyụn̄ n̄wot mi, nnyịn iyakabade idi mme asan̄autom mbufo. Edi edieke ami ndikemede ndin̄wana ye enye nnyụn̄ n̄wot enye, mbufo ẹyekabade ẹdi mme asan̄autom nnyịn, ẹnyụn̄ ẹnam n̄kpọ ẹnọ nnyịn.”+
10 Owo Philistia oro onyụn̄ ọdọhọ ete: “Ami mmosụn̄i+ udịmekọn̄ Israel mfịn emi. Mbufo ẹsio owo ẹdi man nnyịn in̄wana!”+
11 Ke ini Saul+ ye ofụri Israel ẹkopde ikọ owo Philistia emi, idem enyek mmọ, ndịk onyụn̄ anam mmọ etieti.+
12 Ndien David ekedi eyen Jesse owo Ephrath+ emi otode Bethlehem obio Judah. Jesse okonyụn̄ enyene nditọiren itiaita.+ Ndien enye ama enen̄ede ọsọn̄ ke eyo Saul.
13 Ndien ikpọ nditọiren Jesse ita ẹtiene Saul ẹka ekọn̄.+ Ndien enyịn̄ nditọiren esie ita emi ẹkekade ekọn̄ ẹkedi Eliab,+ akpan, ye Abinadab,+ udọ, ye Shammah,+ ọyọhọ eyeneren ita.
14 Edi David ekedi ekperedem,+ ndien ikpọ nditọeka esie ita ẹtiene Saul.
15 Ndien David esika ke ini ke ini etiene Saul, ekem afiak edibọk erọn̄+ ete esie ke Bethlehem.
16 Ndien owo Philistia oro esisan̄a ọdọk edi tụhi-tụhi usenubọk ye mbubreyo edida ke itie esie, onyụn̄ anam ntem ke usen aba.
17 Ekem Jesse ọdọhọ David eyen esie ete: “Mbọk, sọsọp da ephah edifọp wheat*+ ye uyo duop emi sọk nditọete fo ke itienna.
18 Ndien nọ etubom tọsịn mbak cheese* duop emi;+ nyụn̄ se nte n̄kpọ etiede ye nditọete fo,+ nyụn̄ bọ idiọn̄ọ nyọn̄ di ndiwụt nte ke mmọ mmọdo.”
19 Edi mmọ ye Saul ye kpukpru mbon Israel eken ẹkedu ke unaisọn̄ itịghede Elah+ ẹn̄wana ekọn̄ ye mbon Philistia.+
20 Ntem David abak edemede ke usenubọk onyụn̄ ayak erọn̄ esịn andikpeme ke ubọk ndien emen mme n̄kpọ oro ada aka, kpa nte Jesse eketemede enye.+ Ke ini enye esịmde ebiet ubon n̄kpoduoho ke itienna,+ mbonekọn̄ ke ẹwọn̄ọ ẹka iso ekọn̄,+ mmọ ẹnyụn̄ ẹfiori n̄kpo ekọn̄.
21 Ndien Israel ye mbon Philistia ke ẹtịm udịmekọn̄ man ẹwọrọ iso ekọn̄.
22 David obiomode mbiomo+ inikiet inikiet ọkpọn̄ ọnọ andikpeme mbiomo,+ efehe aka iso ekọn̄. Ke ini enye akade ekesịm, enye obụp nte n̄kpọ etiede ye nditọete esie.+
23 Nte enye osụk enemede nneme ye mmọ, sese! ata-an̄wanaekọn̄ ke ibuot mbon Philistia otode udịmekọn̄ mbon Philistia do ọdọk edi, enyịn̄ esie edi Goliath+ emi otode Gath,+ enye onyụn̄ editịn̄ se enye eketịn̄de ke akpa,+ ndien David ada okop.
24 Edi ke ini ofụri mbon Israel ẹkụtde owo emi, sese! ndịk anam mmọ etieti,+ ndien mmọ ẹfen̄e.
25 Ndien mbon Israel ẹdọhọ ẹte: “Nte mbufo ẹmekụt owo emi ọdọkde edi mi? Koro enye ọdọk edi ndisụn̄i+ Israel. Ndien owo ekededi eke ediwotde enye, edidem ayada ediwak inyene ofori enye, oyonyụn̄ ọnọ enye eyen esie an̄wan ọdọ,+ ndien ufọk ete esie idikpehe utomo ke Israel.”+
26 Ndien David obụp mbon oro ẹkedade ẹkpere enye ete: “Nso ke ẹdinam ẹnọ owo eke ediwotde owo Philistia+ oko onyụn̄ emen esuene emi ke Israel efep?+ Koro anie ededi edụt+ Philistia emi, eke enye okposụn̄ide+ udịmekọn̄ odu-uwem Abasi?”+
27 Ndien mmọ ẹbọrọ enye kpa nte ẹkebọrọde ke akpa, ẹte: “Ntem ke ẹdinam ẹnọ owo eke ediwotde enye.”
28 Edi Eliab+ akpaneka esie okop enye etịn̄de ikọ ye mbon oro, ndien Eliab ayat esịt etieti ye David+ onyụn̄ ọdọhọ ete: “Ntak emi afo osụhọrede edi mi? Afo onyụn̄ ọkpọn̄ ufene ifan̄ oro ke wilderness ọnọ anie?+ Ami mmetịm mfiọk iseri ye idiọk emi odude fi ke esịt,+ koro afo osụhọrede edi ndise nte ẹn̄wanade ekọn̄.”+
29 Ntem David obụp ete: “Nso ke nnyụn̄ nnam? N̄kọm n̄konyụn̄ mbụp mbụme?”+
30 Ntre enye ọwọn̄ọde ọkpọn̄ enye ebịne owo efen, okobụp kpasụk ukem mbụme oro,+ ndien mmọ ẹbọrọ enye kpa nte ẹkebọrọde ke akpa.+
31 Ekem ẹkop se David eketịn̄de, ẹnyụn̄ ẹmen ikọ emi ẹketịn̄ ẹnọ Saul. Ntem enye ọdọn̄ ẹkeda enye ẹdi.
32 Ndien David ọdọhọ Saul ete: “Yak esịt okûduọ baba owo kiet.+ Asan̄autom fo ayaka akan̄wana ye owo Philistia emi.”+
33 Edi Saul ọdọhọ David ete: “Afo udukemke ubọk en̄wan ye owo Philistia emi,+ koro afo edi eyenọwọn̄,+ enye onyụn̄ edi owoekọn̄ toto ke uyen esie.”
34 Ndien David ọbọrọ Saul ete: “Asan̄autom fo ekekpeme erọn̄ ete esie, ndien, sese, ekpe edi,+ bear onyụn̄ edi n̄ko, mmọ kiet kiet ẹma ẹmụm erọn̄ ẹsio ke otu ufene.
35 Ndien ami mma mbịne nnyụn̄ n̄kọtọ mmọ kiet kiet nduọk+ ke isọn̄ nnyụn̄ nsio mmọ erọn̄ ke inua. Ke ini mmọ ẹkedahade ndin̄wana ye ami, mma mfịk mmọ ke ntan̄ebek mmụm, nnyụn̄ n̄wot mmọ.
36 Ami asan̄autom fo mma n̄wot ekpe oro, nnyụn̄ n̄wot bear oro; ndien owo edụt Philistia+ emi ayakabade etie nte kiet ke otu mmọ, koro enye osụn̄ide+ udịmekọn̄+ odu-uwem Abasi.”+
37 Ndien David adian do ete: “Jehovah emi akanyan̄ade mi osio ke ubọk ekpe ye ke ubọk bear, ayanyan̄a mi osio ke ubọk owo Philistia emi.”+ Ntem Saul ọdọhọ David ete: “Ka, Jehovah akpakam odu ye afo.”+
38 Ekem Saul ada ọfọn̄ esie esịne David, ayara enye ndụn okpoho ke ibuot, onyụn̄ esịne enye kod ukwak.
39 Ekem David ọbọbọ akan̄kan̄ esie ke enyọn̄ ọfọn̄idem esie onyụn̄ odomo ndisan̄a edi ikemeke, sia akanam enye mîsịneke mme n̄kpọ emi. Ekem David ọdọhọ Saul ete: “N̄kemeke ndisịne mme n̄kpọ emi nsan̄a, sia akanam mmensịneke mmọ.” Ntre David osion̄o mme n̄kpọ emi efep ke idem.+
40 Ndien enye emen eto esie akama ke ubọk onyụn̄ asat ndọnọ itiat ition ke itịghede mmọn̄ ọdọn̄ ke ekpat ubọkerọn̄ esie onyụn̄ akama utopitiat+ ke ubọk. Ndien enye asan̄a ekpere owo Philistia oro.
41 Ndien owo Philistia oro enen̄ede asan̄a ekpere David, owo emi akamade akwa otuekọn̄ onyụn̄ asan̄a enye ke iso.
42 Ndien ke adan̄aemi owo Philistia oro okụtde David, enye ese enye ke ndek+ koro enye edide eyenọwọn̄,+ eyịbe+ onyụn̄ eye etieti.+
43 Ndien owo Philistia oro ọdọhọ David ete: “Ndi ami ndi ebua,+ emi esịnde fi ada eto ebịne mi?” Ntem owo Philistia oro otomo mme abasi+ esie ada osụn̄i David.
44 Ndien owo Philistia oro ọdọhọ David ete: “Kam san̄a di ndien nyemen obụkidem fo nnọ mme inuen enyọn̄ ye mme unam ikọt.”+
45 Edi David ọdọhọ owo Philistia oro ete: “Afo ada akan̄kan̄ ye eduat ye enyịm+ etiene mi, edi ami nda enyịn̄ Jehovah mme udịm,+ kpa Abasi udịmekọn̄ Israel, emi afo osụn̄ide,+ ntiene fi.
46 Jehovah ọmọn̄ ada fi esịn mi ke ubọk mfịn emi,+ ndien ami nyowot fi nnyụn̄ mbịghi fi ibuot; nyonyụn̄ nda okpo mbonekọn̄ Philistia mfịn emi nnọ mme inuen enyọn̄ ye mme unam ikọt;+ ndien ofụri isọn̄ ẹyefiọk ke Israel ẹnyene Abasi.+
47 Ndien ofụri esop emi ẹyefiọk ke Jehovah idaha akan̄kan̄ m̀mê eduat inọ edinyan̄a,+ koro ekọn̄ emi enyenede Jehovah,+ ndien enye ayada mbufo esịn nnyịn ke ubọk.”+
48 Ekem owo Philistia oro adaha asan̄a ekpere ndikosobo ye David, ndien David ọsọsọp efehe aka iso ekọn̄ ndikosobo ye owo Philistia oro.+
49 Ekem David esịn ubọk ke ekpat osio itiat kiet otop, ndien itiat oro ọkọtọ+ owo Philistia oro, onyụn̄ ebe odụk enye ọkpọiso, ndien enye ọduọ ekịbi iso ke isọn̄.+
50 Ntre ke David akada utopitiat ye itiat, ọsọn̄ ubọk akan owo Philistia oro onyụn̄ ọtọ enye owot; David inyụn̄ ikamake akan̄kan̄.+
51 Ndien David efehe akada ekpere owo Philistia oro. Ekem odụri enye akan̄kan̄+ osio ke efọk, ada esịbe enye ibuot.+ Ndien ke ini mbon Philistia ẹkụtde ke owo uko mmimọ akpa, mmọ ẹfen̄e.+
52 Ndien mbon Israel ye mbon Judah ẹdaha ẹda ẹsio n̄kpo ẹnyụn̄ ẹbịne+ mbon Philistia ẹdụk itịghede+ tutu ẹkesịm inuaotop Ekron,+ ndien mbon Philistia emi ẹkenọde unan idiọk idiọk ẹduọn̄ọ ke usụn̄ ọtọn̄ọde ke Shaaraim,+ tutu esịm Gath ye Ekron.
53 Ekem nditọ Israel ẹto ndibịne mbon Philistia ẹnyọn̄ ẹdi, ẹnyụn̄ ẹkebụme+ n̄kpọ ke itienna mmọ.
54 Ndien David emen ibuot+ owo Philistia oro ọnyọn̄ edi Jerusalem, onyụn̄ atan̄ mme n̄kpọekọn̄ owo Philistia oro okobon ke tent esie.+
55 Ndien ke ndondo oro Saul okụtde nte David ọwọrọde aka ndisobo ye owo Philistia oro, enye obụp Abner+ etubom udịmekọn̄ esie ete: “Abner, enye edi eyen+ anie?”+ Ntem Abner ọbọrọ ete: “Ma uwem ukpọn̄ fo, O edidem, ami mfiọkke!”
56 Ntre edidem ọdọhọ ete: “Dụn̄ọde fiọk m̀mê akparawa emi edi eyen anie.”
57 Ntem, ke ndondo oro David otode ndiwot owo Philistia oro edi, Abner emen enye edi iso Saul, enye onyụn̄ akama ibuot+ owo Philistia oro ke ubọk.
58 Ndien Saul obụp enye ete: “Akparawa, afo edi eyen anie?” ndien David ọbọrọ ete: “Ndi eyen Jesse,+ asan̄autom fo, owo Bethlehem.”+
Mme Ikọ Idakisọn̄
^ “Udomo ubọk” edi uniọn̄ emi ọtọn̄ọde ke ibuot akpan nnuenubọk esịm ibuot akpatre nnuenubọk ke ini ẹtian̄arede ofụri nnuenubọk.
^ Mîdịghe, emi ekeme ndidi “barley.”
^ At. Ed., “mmọn̄eba,” nte an̄wan̄ade edi n̄kpọ emi ẹdade mmọn̄eba ẹnam.
