2 Chronicle 19;1-11
19 Ekem Jehoshaphat edidem Judah ọnyọn̄ ufọk esie ke Jerusalem ke emem.+
2 Ndien Jehu+ eyen Hanani+ okụt-n̄kukụt+ ọwọrọ okosobo ye enye onyụn̄ ọdọhọ Edidem Jehoshaphat ete: “Ndi mme idiọkowo ke ẹkpenọ un̄wam,+ ndi mbon emi ẹsuade+ Jehovah ke afo okponyụn̄ ama?+ Ndien ke ntak emi Jehovah amayat esịt+ ye afo.
3 Nte ededi, odu nti n̄kpọ+ emi ẹkụtde fi ke idem, koro afo osion̄ode mme eto utuakibuot efep ke isọn̄+ emi onyụn̄ etịmde esịt fo ndiyom ata Abasi.”+
4 Ndien Jehoshaphat aka iso odụn̄ ke Jerusalem; ndien enye ọtọn̄ọ ntak ọwọrọ asan̄a ke otu mbio obio, ọtọn̄ọde ke Beer-sheba+ tutu esịm obot obot ikpehe Ephraim,+ man enye ada mmọ afiak ọsọk Jehovah Abasi mme ete ete mmọ.+
5 Ndien enye obon mme ebiereikpe ke ofụri isọn̄ ke kpukpru mme obio ibibene Judah, ke obio ke obio.+
6 Ndien enye ọdọhọ mme ebiereikpe ete: “Mbufo ẹtịn̄ enyịn ke se mbufo ẹnamde,+ koro mîdịghe owo ke mbufo ẹkpe ikpe emi ẹnọ edi ẹkpe ẹnọ Jehovah;+ ndien enye omodu ye mbufo ke ikpe emi ẹkpede.+
7 Ndien, ke emi, ẹyak ndịk+ Jehovah odoro mbufo ke idem.+ Ẹtịn̄ enyịn ẹnam n̄kpọ,+ koro baba ukwan̄n̄kpọ+ kiet mîdụhe ye Jehovah Abasi nnyịn, enye inyụn̄ inamke asari+ inyụn̄ ibọhọ ubọkedem.”+
8 Ndien Jehoshaphat obon ndusụk nditọ Levi+ ye mme oku+ ye ndusụk mme etubom ke mme ufọk mme ete+ Israel man mmọ ẹkpe ikpe+ ẹnọ Jehovah ẹnyụn̄ ẹse ẹban̄a ikpe+ mme andidụn̄ ke Jerusalem.
9 N̄ko-n̄ko, enye owụk mmọ ete: “Ntem ke mbufo ẹdida ndịk+ Jehovah ẹnam n̄kpọ ke edinam akpanikọ ye ke ofụri esịt.
10 Amaedi kpukpru ikpe emi nditọete mbufo emi ẹdụn̄de ke mme obio mmọ ẹdimende ẹsọk mbufo, emi ẹban̄ade uduọkiyịp,+ ibet+ ye ewụhọ+ ye item,+ ye mme ubiereikpe,+ mbufo ẹdụri mmọ utọn̄ ẹte mmọ ẹkûnam idiọk ẹdue Jehovah mbak Abasi ediyat esịt+ ye mbufo ye nditọete mbufo. Se mbufo ẹdinamde edi emi man mbufo ẹkûnyene ubiomikpe.
11 Ndien sese Amariah mi nte ọbọn̄ oku mbufo ke kpukpru n̄kpọ Jehovah;+ ye Zebadiah eyen Ishmael etubom ufọk Judah ke kpukpru ikọ edidem; nditọ Levi ẹyenyụn̄ ẹdi ikpọ owo mbufo. Ẹkop odudu+ ẹnyụn̄ ẹnam n̄kpọ, ẹnyụn̄ ẹyak Jehovah+ odu ye mbon emi ẹnamde se ifọnde.”+
