Deuteronomy 8;1-20
8 “Mbufo ẹkpeme ndinam kpukpru mme ewụhọ oro n̄wụkde mbufo mfịn emi,+ man mbufo ẹkpedu uwem+ ẹnyụn̄ ẹwak ẹnyụn̄ ẹdụk ẹkeda isọn̄ oro Jehovah ọkọn̄wọn̄ọde ọnọ mme ete ete mbufo.+
2 Nyụn̄ ti ofụri usụn̄ oro Jehovah Abasi fo akanamde fi asan̄a ke wilderness ke isua aba emi,+ man anam fi osụhọde idem,+ onyụn̄ odomo fi+ ọfiọk se idude fi ke esịt+ m̀mê afo eyenịm mme ewụhọ imọ m̀mê udunịmke.
3 Ntre enye ama anam fi osụhọde idem onyụn̄ anam fi asan̄a biọn̄+ onyụn̄ ada manna,+ emi afo ye mme ete fo mîkọfiọkke ọbọk fi; man anam fi ọfiọk ke idịghe uyo ikpọn̄ ke owo ada odu uwem edi ada kpukpru ikọ eke ẹwọrọde Jehovah ke inua odu.+
4 Ọfọn̄ fo ikatahake, ikpat fo ikonyụn̄ ifụtke ke isua aba emi.+
5 Ndien afo emetịm ọfiọk ke esịt fo ete ke kpa nte owo enen̄erede eyen esie, kpa ntre ke Jehovah Abasi fo ekenen̄ede fi.+
6 “Afo onyụn̄ enyene ndinịm mme ewụhọ Jehovah Abasi fo ke ndisan̄a ke usụn̄ esie+ nnyụn̄ mbak enye.+
7 Koro Jehovah Abasi fo ọmọn̄ ada fi odụk eti isọn̄,+ kpa isọn̄ emi enyenede itịghede mmọn̄, emi mme idịm ye mmọn̄ udem ẹtopde ẹwọrọ ke unaisọn̄ itịghede+ ye ke mme ikpehe oro ẹtiede obot obot,
8 isọn̄ wheat ye barley ye vine ye fig ye pomegranate,+ isọn̄ aran olive ye aranọkwọk,+
9 isọn̄ emi uyo eke afo atade mîdinanake, emi afo mûdunanake n̄kpọ ndomokiet, isọn̄ emi itiat esie ẹdide ukwak, emi afo edinyụn̄ ọdọkde okpoho ke mme obot esie.
10 “Ke ini afo adiade oyụhọ,+ afo n̄ko enyene ndikọm+ Jehovah Abasi fo ke eti isọn̄ emi enye ọnọde fi.+
11 Kpeme mbak udufre+ Jehovah Abasi fo unyụn̄ utre ndinịm mme ibet esie nnyụn̄ nnam mme ubiereikpe esie ye mme ewụhọ esie emi ami ntemede fi mfịn emi;+
12 mbak afo ududia uyụhọ unyụn̄ ubọp nti ufọk unyụn̄ udụn̄ ke mmọ,+
13 enan̄ ye erọn̄ fo ẹnyụn̄ ẹsiaha, silver ye gold ẹnyụn̄ ẹwak ẹnọ fi, ndien kpukpru se inyenede fi ẹnyụn̄ ẹtọt;
14 ndien afo atan̄ idem+ onyụn̄ efre Jehovah Abasi fo, emi okosiode fi ke isọn̄ Egypt, ke ufọk ufụn;+
15 emi okonyụn̄ anamde fi asan̄a ke akwa enyene-ndịk wilderness,+ emi ndiọi urụkikọt+ ye ikpeyen ẹdude, ye edisat isọn̄ emi mmọn̄ mîdụhe; emi okosiode mmọn̄ ke ọkpọsọn̄ itiat+ ọnọ fi;
16 onyụn̄ adade manna+ emi mme ete fo mîkọfiọkke ọbọk fi ke wilderness, man anam fi osụhọde idem+ onyụn̄ odomo fi ese onyụn̄ anam n̄kpọ ọfọn ye afo ke mme utịt usen fo;+
17 ndien afo ọdọhọ ke esịt fo ete, ‘Odudu mi ye ofụri ukeme mi ẹkenam mi nnyene inyene emi.’+
18 Ti Jehovah Abasi fo, koro edi enye ọnọ fi odudu ndikọ inyene;+ man enye anam ediomi emi enye ọkọn̄wọn̄ọde ọnọ mme ete ete fo, nte edide mfịn emi.+
19 “Ndien ama ekem edieke afo edifrede Jehovah Abasi fo, edinyụn̄ etienede mme abasi efen, edinyụn̄ anamde n̄kpọ mmọ onyụn̄ onụhọ ọnọ mmọ, mmedi ntiense mban̄a mbufo mfịn emi nte ke mbufo iditreke nditak.+
20 Mbufo ẹditak ukem nte mme idụt emi Jehovah osobode efep ke iso mbufo, koro mbufo mîdikopke uyo Jehovah Abasi mbufo.+
