Ephesus 3;1-21
3 Ke ntak emi, ami Paul, owo-n̄kpọkọbi+ Christ Jesus ke ibuot mbufo, mbon idụt+—
2 edieke mbufo ẹkopde ẹban̄a itie akama-ukpọhọde+ emi Abasi akadade mfọnido esie oro owo mîdotke ọnọ mi ke ufọn mbufo,
3 ẹte ke ẹma ẹyarade edisana ndịben̄kpọ ẹnọ mi,+ kpa nte ami n̄kebemde iso n̄wet ibio ibio.
4 Emi anam, ke ini mbufo ẹkotde emi, mbufo ẹmekeme ndidiọn̄ọ adan̄a nte mfiọkde+ edisana ndịben̄kpọ+ Christ.
5 Owo ikanamke nditọ owo ke mme emana oko ẹfiọk ndịben̄kpọ+ emi nte emi ẹyararede+ enye idahaemi ẹnọ ndisana apostle ye mme prọfet+ esie ke spirit,
6 nte ke mbon idụt ẹyedi nsan̄a mme ada udeme nnyene ye ndido idem+ kiet ye mme anditiene nnyịn mbuana ye Christ Jesus ke un̄wọn̄ọ+ emi oto ke eti mbụk.
7 Mma n̄kabade ndi asan̄autom+ kaban̄a emi nte enọ mfọnido Abasi oro owo mîdotke edide, oro ẹkenọde mi nte asan̄ade ekekem ye usụn̄ oro odudu esie anamde utom.+
8 Ami, emi nsụhọrede n̄kan owo emi ekpride akan+ ke otu ndisana owo, ke ẹkewụt mfọnido oro owo mîdotke,+ man n̄kpatan̄a eti mbụk emi aban̄ade inyene+ Christ oro ayan̄ade owo ifiọk, nnọ mme idụt+
9 n̄kponyụn̄ nnam mme owo ẹkụt nte ẹsede ẹban̄a+ edisana ndịben̄kpọ+ emi toto ke ata eset ekedịbede ke Abasi, emi okobotde kpukpru n̄kpọ.+
10 Emi ekedi man ẹkpeda esop+ ẹnam mme andikara ye mme odudu+ ke mme itie heaven ẹfiọk akwa ọniọn̄ Abasi+ oro ẹkụtde ke nsio nsio usụn̄,
11 nte ekemde ye nsinsi uduak emi enye akaduakde ke Christ,+ kpa Jesus Ọbọn̄ nnyịn,
12 emi otode ke enye nnyịn inyene ifụre emi nditịn̄ ikọ inyụn̄ inyene usụn̄ ndisan̄a n̄kpere+ ye uko oto ke mbuọtidem oro nnyịn inyenede ke enye.
13 Ntem mmeben̄e mbufo nte ẹkûyak idem emem mbufo ke ntak ukụt+ eke esịmde mi ke ibuot mbufo, koro emi edi ubọn̄ ọnọ mbufo.
14 Ke ntak emi mmọtọn̄ọ edọn̄+ nnọ Ete,+
15 emi osiode kpukpru ubon+ ke heaven ye ke isọn̄ enyịn̄,+
16 man enye ekpenyịme, nte ekemde ye uwak+ ubọn̄ esie, ete ẹnam owo emi mbufo ẹdide ke esịtidem+ okop idem ke odudu oro otode ke spirit+ esie,
17 onyụn̄ anam Christ odụn̄ ke esịt mbufo ebe ke mbuọtidem mbufo ke ima;+ man mbufo ẹkpedọn̄ n̄kam+ ẹnyụn̄ ẹsọn̄ọ ẹwụhọ ke itiat idakisọn̄,+
18 man mbufo ẹkpekeme nditiene kpukpru ndisana owo mfiọk+ ọyọhọ ọyọhọ se idide ubom ye uniọn̄ ye ukon̄ ye utụn̄ọ,+
19 nnyụn̄ mfiọk ima Christ+ emi akande ifiọk, man mbufo ẹkpeyọhọ ẹsịm ọyọhọ udomo+ oro Abasi ọnọde.
20 Edi amaedi enye emi ekemede ndinam n̄kpọ etịm awak akan kpukpru se nnyịn iben̄ede m̀mê ikerede,+ nte odudu esie eke anamde utom+ ke idem nnyịn edide,
21 yak ubọn̄ enyene enye ebe ke esop onyụn̄ ebe ke Christ Jesus ke kpukpru emana ke nsinsi nsinsi.+ Amen.
