Exodus 29;1-46
29 “N̄kpọ emi ke afo edinam ye mmọ man anam mmọ ẹsana ndinam utom nnọ mi nte mme oku: Da abak ayara enan̄ ye okukịm erọn̄ iba+ emi ẹyede idem,+
2 ye uyo eke leaven mîdụhe ye ekara uyo eke leaven mîdụhe emi ẹyetde aran ye mfefere uyo eke leaven mîdụhe emi ẹyetde aran.+ Da eti ndomuyo wheat nam mmọ.
3 Afo enyene ndidọn̄ mmọ ke akpasa nnyụn̄ mmen mmọ ke akpasa oro nnọ,+ ọkọrọ ye ayara enan̄ oro ye okukịm erọn̄ iba oro.
4 “Nyụn̄ da Aaron ye nditọiren esie di ke enyịnusụn̄+ tent usopidem, nyụn̄ da mmọn̄ yet mmọ idem.+
5 Ekem da mme ọfọn̄+ oro di nyụn̄ sịne Aaron ewụra ye anana-ubọk kod ephod ye ephod ye mbana ikpanesịt, nyụn̄ da mbọbọ ephod+ tebe enye ke idem ọsọn̄.
6 Nyụn̄ bọp enye mbọbọ ibuot nyụn̄ dian edisana idiọn̄ọ uyakidem nnọ, ke mbọbọ ibuot+ oro.
7 Ndien da aran oro ẹsidade ẹyet owo+ tọhọ enye ke ibuot nyụn̄ yet enye aran.+
8 “Ekem da nditọiren esie san̄a kpere nyụn̄ sịne mmọ ewụra.+
9 Nyụn̄ bọp mmọ ubọpisịn, Aaron ye nditọiren esie, nyụn̄ yara mmọ uyaraibuot; ndien itie oku edidi eke mmọ, emi edi nsinsi ewụhọ.+ Ntre afo enyene ndida odudu nsịn Aaron ye nditọiren esie ke ubọk nyọhọ.*+
10 “Da ndien ayara enan̄ oro di ke iso tent usopidem, ndien Aaron ye nditọiren esie ẹyedori ubọk mmọ ke ibuot+ ayara enan̄ oro.
11 Ndien afo enyene ndiwot ayara enan̄ oro ke iso Jehovah, ke enyịnusụn̄ tent usopidem.+
12 Da ndusụk iyịp+ ayara enan̄ oro nyụn̄ debi nnuenubọk fo da tọi ke nnụk itieuwa,+ nyụn̄ duọk iyịp emi osụhọde ke ukot itieuwa.+
13 Nyụn̄ da ofụri ikpọn̄+ emi ofụkde nsia+ ye ikpọn̄ emi odude ke esịt,+ ye ekpụt mbiba ye ikpọn̄ emi odude ke mmọ, fọp ke itieuwa+ oro.
14 Edi fọp obụk enan̄ emi ye ikpa esie ye ifuọ esie ke ikan̄ ke edem itienna.+ Enye edi uwa idiọkn̄kpọ.
15 “Ekem da okukịm erọn̄+ kiet ndien Aaron ye nditọiren esie ẹnyene ndidori ubọk mmọ ke ibuot+ okukịm erọn̄ oro.
16 Ndien afo enyene ndiwot okukịm erọn̄ oro onyụn̄ ada iyịp esie esịme akanade itieuwa.+
17 Ndien bak okukịm erọn̄ oro, yet nsia+ esie ye ukot esie nyụn̄ tan̄ mmọ bon ke adiana ke adiana tutu esịm ibuot.
18 Ndien fọp ofụri okukịm erọn̄ oro ke itieuwa. Enye edi edifọp uwa+ Jehovah, emi osiode edinem utebe.+ Enye edi uwa emi ẹfọpde ke ikan̄ ẹnọ Jehovah.
19 “Ekem da okukịm erọn̄ enye eken, ndien Aaron ye nditọiren esie ẹnyene ndidori ubọk mmọ ke ibuot okukịm erọn̄ oro.+
20 Ndien afo enyene ndiwot okukịm erọn̄ oro onyụn̄ ada ubak iyịp esie eyet ke mben utọn̄ nnasia Aaron ye ke mben utọn̄ nnasia nditọiren esie ye ke akpan nnuenubọk nnasia mmọ ye ke akpan nnuenukot nnasia mmọ,+ nyụn̄ sịme iyịp oro kanade itieuwa.
21 Nyụn̄ da ubak iyịp oro odorode ke itieuwa ye ubak aran oro ẹsidade ẹyet owo+ sịme Aaron ke idem ye ke ọfọn̄ esie ye nditọiren esie ye ke ọfọn̄ nditọiren esie, man enye ye ọfọn̄ esie ye nditọiren esie ye ọfọn̄ nditọiren esie ẹkpesana.+
22 “Sio ikpọn̄ okukịm erọn̄ ye ikpọn̄ ikpon̄ isịm+ ye ikpọn̄ emi ofụhọde ke nsia ye ikpọn̄ emi ofụhọde ke esịt ye ekpụt mbiba ye ikpọn̄ emi ofụkde mmọ ye ukot nnasia,+ koro enye edi okukịm erọn̄ edida owo nsịn ke itieutom;+
23 sio n̄ko ekara uyo ye ekara uyo eke ẹyetde aran ye mfefere uyo ke akpasa uyo eke leaven mîdụhe emi odude ke iso Jehovah.+
24 Nyụn̄ yak kpukpru mmọ dọn̄ Aaron ke ubọk ye ke ubọk nditọiren esie,+ nyụn̄ fụn̄ mmọ ka iso fiak edem nte edifụn̄ uwa ke iso Jehovah.+
25 Ekem sion̄o mmọ fep ke ubọk mmọ nyụn̄ dori mmọ ke itieuwa ke enyọn̄ edifọp uwa fọp man osio edinem utebe ke iso Jehovah.+ Enye edi uwa emi ẹfọpde ke ikan̄ ẹnọ Jehovah.+
26 “Nyụn̄ da ikọn̄esịt okukịm erọn̄ edida owo nsịn ke itieutom,+ emi edide eke Aaron, fụn̄ enye ka iso fiak edem nte edifụn̄ uwa ke iso Jehovah, ndien enye ayakabade edi udeme fo.
27 Nam ikọn̄esịt+ edifụn̄ uwa ye ukot edisana udeme emi ẹkefụn̄de, ẹkenyụn̄ ẹsiode ke okukịm erọn̄ edida owo nsịn ke itieutom,+ asana, emi ẹkesiode ke eke Aaron ye eke nditọiren esie.
28 Ndien enye eyedi eke Aaron ye eke nditọiren esie, nte ewụhọ emi nditọ Israel ẹdinịmde ke nsinsi, koro enye edide edisana udeme;+ ndien enye ayakabade edi edisana udeme emi nditọ Israel ẹdinọde. Mme n̄kpọ emi ẹdade ẹto mme uwa ebuana+ mi ẹdidi edisana udeme ọnọ Jehovah.
29 “Ndien ndisana ọfọn̄+ Aaron ẹyedi eke nditọiren+ esie eke ẹditienede enye edem man mmọ ẹsịne ke ini ẹyetde mmọ aran+ ye ke ini ẹsịnde mmọ odudu ke ubọk ẹyọhọ.+
30 Oku ke otu nditọiren esie emi edidade itie esie, edinyụn̄ odụkde tent usopidem man anam utom ke edisana ebiet, eyesịne mme ọfọn̄ emi ke usen itiaba.+
31 “Ndien afo ayada okukịm erọn̄ edida owo nsịn ke itieutom onyụn̄ etem obụk esie ke edisana ebiet.+
32 Ndien Aaron ye nditọiren esie ẹnyene ndita+ obụk unam erọn̄ oro ye uyo emi odude ke akpasa ke enyịnusụn̄ tent usopidem.
33 Ndien mmọ ẹnyene ndita mme n̄kpọ emi ẹkedade ẹsio isop man ẹsịn mmọ odudu ke ubọk ẹyọhọ ẹnyụn̄ ẹnam mmọ ẹsana.+ Edi owo efen ekededi iditaha mmọ, koro mmọ ẹdide ndisana n̄kpọ.+
34 Ndien edieke obụk unam uwa edida owo nsịn ke itieutom ye uyo ẹsụhọde tutu eyo esiere, do afo enyene ndifọp se isụhọde ke ikan̄.+ Owo inyeneke ndita enye, koro enye edide edisana n̄kpọ.
35 “Ntem ke afo edinam ye Aaron ye nditọiren esie nte ekemde ye ofụri se n̄ketemede fi.+ Afo edida usen itiaba esịn mmọ odudu ke ubọk ọyọhọ.+
36 Ndien afo ayawa ayara enan̄ ke uwa idiọkn̄kpọ kpukpru usen ndisio isop,+ afo oyonyụn̄ anam itieuwa asana ọbọhọ idiọkn̄kpọ ebe ke ndisio isop nnọ enye, nnyụn̄ nyet enye aran+ man enye asana.
37 Afo edida usen itiaba osio isop itieuwa, onyụn̄ anam enye asana+ man enye akabade edi ata edisana itieuwa.+ Owo ekededi eke otụkde itieuwa enyene ndidi edisana.+
38 “Emi edi se afo ediwade ke itieuwa: okukịm erọn̄ isua kiet, iba ke usen kiet ofụri ini.+
39 Afo ediwa okukịm erọn̄ kiet ke usenubọk,+ onyụn̄ awa okukịm erọn̄ enye eken ke mbubreyo.*+
40 Domo eti ndomuyo ke ephah kiet,+ da mbahade kiet ke itie duop nyụn̄ domo aran emi ẹnyịmide-nyịmi, ke hin kiet, da mbahade kiet ke itie inan̄ buak ọtọkiet, nyụn̄ domo wine ke hin kiet da mbahade kiet ke itie inan̄ nam edin̄wọn̄ uwa,+ ndien emi edisan̄a ye akpa abak okukịm erọn̄ oro.
41 Nyụn̄ wa ọyọhọ okukịm erọn̄ iba ke mbubreyo. Wa enye ye uwa n̄kpasịp+ nte eke usenubọk ye edin̄wọn̄ uwa esie, afo ediwa enye man osio edinem utebe, nte uwa oro ẹfọpde ke ikan̄ ẹnọ Jehovah.
42 Emi edidi edifọp uwa ofụri ini+ ke ofụri emana mbufo ke enyịnusụn̄ tent usopidem ke iso Jehovah, ke ebiet emi ndiwụtde mbufo idem man ntịn̄ ikọ nnọ mbufo.+
43 “Ndien nyowụt nditọ Israel idem do, ubọn̄ mi+ oyonyụn̄ anam ebiet oro asana.
44 Ndien nyanam tent usopidem ye itieuwa ẹsana; nyonyụn̄ nnam Aaron ye nditọiren esie ẹsana+ man mmọ ẹnam utom nte mme oku ẹnọ mi.
45 Ndien nyodụn̄ ke otu nditọ Israel, nyonyụn̄ ndi Abasi mmọ.+
46 Ndien mmọ ẹyefiọk ẹte ke ami ndi Jehovah Abasi mmọ, emi n̄kosiode mmọ ke isọn̄ Egypt man ndụn̄ ke otu mmọ.+ Ami ndi Jehovah Abasi mmọ.+
