Exodus 32;1-35
32 Edikem mbon emi ẹkụt ke Moses ebịghi ndisụhọde ke obot ndi.+ Ntre mmọ ẹka ẹkesobo ye Aaron ẹnyụn̄ ẹdọhọ enye ẹte: “Daha ke enyọn̄, nam abasi nọ nnyịn, emi edibemde nnyịn iso,+ koro amaedi Moses emi akadade nnyịn ọwọrọ ke isọn̄ Egypt,+ nnyịn ikam ifiọkke se itịbede inọ enye.”
2 Ntre Aaron ọdọhọ mmọ ete: “Ẹsion̄o n̄kpanuen gold+ ke utọn̄ iban mbufo, ye ke utọn̄ nditọiren mbufo ye ke utọn̄ nditọiban mbufo ẹda ẹsọk mi.”
3 Ndien kpukpru mmọ ẹsion̄o n̄kpanuen gold ke utọn̄ mmọ ẹda ẹsọk Aaron.
4 Ndien enye ọbọ mmọ gold oro, onyụn̄ ada usọi-n̄kpọ odom enye+ onyụn̄ ada gold oro anam editara mbiet eyen enan̄.+ Ndien mmọ ẹtọn̄ọ ndidọhọ ẹte: “O Israel, emi edi Abasi fo, emi akadade fi ọwọrọ ke isọn̄ Egypt.”+
5 Ke ini Aaron okụtde n̄kpọ emi, enye ọbọp itieuwa ke iso eyen enan̄ emi. Ekem Aaron ọtọt ete: “Ẹyenam usọrọ ẹnọ Jehovah n̄kpọn̄.”
6 Ntre ke ndan̄nsiere, mmọ ẹbak ẹdaha ke enyọn̄, ẹwa edifọp uwa ye mme uwa ebuana. Ekem mbon oro ẹsụhọde ẹtetie ẹdia n̄kpọ ẹnyụn̄ ẹn̄wọn̄ n̄kpọ. Ndien mmọ ẹdaha ke enyọn̄ ndibre mbre.+
7 Ndien Jehovah ọdọhọ Moses ete: “Sụhọde ka, koro ikọt fo emi afo akadade ọwọrọ ke isọn̄ Egypt ẹmenam se idade nsobo idi.+
8 Mmọ ẹmewara ẹwaha ẹkpọn̄ usụn̄ oro n̄ketemede mmọ nte ẹsan̄a.+ Mmọ ẹmenam editara mbiet eyen enan̄ ẹnọ idemmọ ẹnyụn̄ ẹnụhọ ẹnọ enye ẹnyụn̄ ẹwa uwa ẹnọ enye ẹnyụn̄ ẹdọhọ ẹte, ‘O Israel, emi edi Abasi fo, emi akadade fi ọwọrọ ke isọn̄ Egypt.’”+
9 Ndien Jehovah ọdọhọ Moses ete: “Mmokụt mbon emi ndien sese, mmọ ẹdi mbon oro ẹsọn̄de obotitọn̄.+
10 Ntre ndien yak nda iyatesịt mi ntiene mmọ nnyụn̄ nsobo mmọ mfep,+ yak nnyụn̄ nnam fi akabade edi akamba idụt.”+
11 Ndien Moses ekpe Jehovah Abasi esie ubọk+ onyụn̄ ọdọhọ ete: “O Jehovah, ntak emi afo akpadade iyatesịt fo+ etiene ikọt fo emi afo akadade akwa odudu ye ọkpọsọn̄ ubọk osion̄o ke isọn̄ Egypt?
12 Ntak emi nditọ Egypt+ ẹkpedọhọde ẹte, ‘Enye okosion̄o mmọ ye idiọk uduak man owot mmọ ke obot emi onyụn̄ osobo mmọ efep ke iso isọn̄’?+ Kabade kpọn̄ ikan̄-ikan̄ iyatesịt fo+ nyụn̄ kpụhọ ekikere*+ ke idiọk emi aduakde ndinam ikọt fo.
13 Ti Abraham ye Isaac ye Israel mme asan̄autom fo, emi afo okotomode idemfo,+ okonyụn̄ ọdọhọde mmọ ete, ‘Nyanam mfri mbufo awak nte ntantaọfiọn̄ ke ikpaenyọn̄,+ nyonyụn̄ nda ofụri isọn̄ emi n̄kemekde, nnọ mfri+ mbufo ẹda ẹnyene ke nsinsi.’”+
14 Ndien Jehovah okpụhọ ekikere* ke idiọk oro enye ọkọdọhọde ete iyanam ikọt imọ.+
15 Ekem Moses asan̄a ye itiatn̄wed Ntiense iba+ ke ubọk oto obot+ oro osụhọde edi, kpa mme itiatn̄wed oro ẹwetde n̄kpọ ke edem mbiba. Ẹwet n̄kpọ ke iso ye ke edem.
16 Ndien itiatn̄wed oro ẹkedi utom ubọk Abasi, ubọkn̄wed okonyụn̄ edi ubọkn̄wed Abasi emi ẹkapde ke itiatn̄wed.+
17 Ndien Joshua ada okop uyom mme owo koro mmọ ẹkefioride n̄kpo, ndien enye ọdọhọ Moses ete: “Kop n̄kpo ekọn̄+ ke itienna.”
18 Edi enye ọdọhọ ete:
“Idịghe uyom ikwọ akwa edinam,+
Inyụn̄ idịghe uyom ikwọ edikan;
Edi uyom ikwọ efen ke n̄kop.”
19 Edikem ke ndondo oro enye asan̄ade ekpere itienna onyụn̄ okụtde eyen enan̄+ oro ye nte mmọ ẹnekde unek, Moses ayat esịt etieti, onyụn̄ otop mme itiatn̄wed oro enye akakamade ke ubọk ọduọk, onyụn̄ obom mmọ ke ukot obot oro.+
20 Ndien enye emen eyen enan̄ oro mmọ ẹkenamde ọfọp ke ikan̄ onyụn̄ ọkọk enye tutu enye akabade ntọn̄,+ ndien enye asuan ntọn̄ oro ke enyọn̄ mmọn̄+ onyụn̄ anam nditọ Israel ẹn̄wọn̄ mmọn̄ oro.+
21 Ekem Moses ọdọhọ Aaron ete: “Nso ke mbio emi ẹkenam fi emi esịnde fi ada akwa idiọkn̄kpọ emi etiene mmọ?”
22 Ndien Aaron ọbọrọ enye ete: “Mbọk yak ọbọn̄ mi okûyat esịt. Afo ọmọfiọk nte mbon emi ẹsịnde esịt ke idiọk.+
23 Mmọ ẹkedọhọ mi ẹte, ‘Nam abasi nọ nnyịn, emi edibemde nnyịn iso,+ koro amaedi Moses emi akadade nnyịn ọwọrọ ke isọn̄ Egypt, nnyịn ikam ifiọkke se itịbede inọ enye.’
24 Ntem ndọhọ mmọ nte, ‘Mmanie ẹnyene gold? Yak mmọ ẹsion̄o ẹda ẹsọk mi.’ Ndien ntomo gold oro ndọn̄ ke ikan̄, eyen enan̄ emi onyụn̄ ọwọrọ edi.”
25 Ndien Moses okụt ete mbon oro ẹma ẹnam n̄kpọ ẹbe ubọk, koro Aaron akayakde mmọ ẹnam n̄kpọ ẹbe ubọk+ man mme asua mmọ ẹsuene mmọ.+
26 Ekem Moses ada ke inuaotop itienna ọdọhọ ete: “Mmanie ẹda ye Jehovah? Yak mmọ ẹtiene mi!”+ Ndien kpukpru nditọ Levi ẹsop idem ẹtiene enye.
27 Ndien enye ọdọhọ mmọ ete: “Ntem ke Jehovah Abasi Israel ọdọhọ ete, ‘Ẹbọbọ akan̄kan̄ mbufo ke isịn. Ẹsan̄a ẹbe ke kpukpru inuaotop itienna ẹnyụn̄ ẹwot nditọete mbufo ye mbọhọidụn̄ mbufo ye n̄kpet n̄kpet ufan mbufo.’”+
28 Ndien nditọ Levi+ ẹnam kpa nte Moses ọkọdọhọde, ẹnyụn̄ ẹwot n̄kpọ nte owo tọsịn ita ke usen oro.
29 Ndien Moses ọdọhọ ete: “Ẹda odudu ẹyọhọ ubọk* mbufo ẹnọ Jehovah+ mfịn emi, koro mbufo ẹmen̄wana ye nditọ mbufo ye nditọete mbufo,+ man enye ọkpọdiọn̄ mbufo mfịn emi.”+
30 Edikem ke ndan̄nsiere Moses ọdọhọ mbon oro ete: “Mbufo ẹmenam akwa idiọkn̄kpọ,+ ndien ami mmọn̄ ndọk ntiene Jehovah. Ndusụk nyekeme ndisio isop idiọkn̄kpọ mbufo.”+
31 Ntre Moses afiak etiene Jehovah onyụn̄ ọkọdọhọ ete: “Mbọk, mbon emi ẹmenam akwa idiọkn̄kpọ ke emi mmọ ẹkenamde abasi gold ẹnọ idemmọ!+
32 Edi mbọk, edieke edimade ndidahado ke idiọkn̄kpọ mmọ,+—edi edieke mûmaha, sọhi mi fep+ ke n̄wed+ fo emi afo ekewetde.”
33 Edi Jehovah ọdọhọ Moses ete: “Owo ekededi eke anamde idiọkn̄kpọ edue mi, nyọsọhi enye mfep ke n̄wed mi.+
34 Da, ndien, mbon emi usụn̄ ka ke ọtọ eke n̄kọdọhọde fi. Sese! Angel mi eyebem fi iso,+ ndien ama ekem ke usen eke ndinọde mmọ ufen, nyọnọ mmọ ufen idiọkn̄kpọ mmọ.”+
35 Ndien Jehovah ọnọ mbon emi ufen koro mmọ ẹkenamde eyen enan̄, kpa eyen enan̄ emi Aaron akanamde.+
