Genesis 20;1-18
20 Ndien Abraham ọkpọn̄ do+ aka isọn̄ Negeb okodụn̄ nte esenowo ke Gerar,+ ke ufọt Kadesh+ ye Shur.+
2 Ndien Abraham afiak etịn̄ aban̄a Sarah, n̄wan esie, ete: “Enye edi eyeneka mi an̄wan.”+ Ndien Abimelech edidem Gerar ọdọn̄ ẹkeda Sarah ẹdi.+
3 Ekem Abasi owụt Abimelech idem ke ndap ke okoneyo onyụn̄ ọdọhọ enye ete: “Afo ọmọn̄ akpa ke ntak n̄wan emi afo adade mi,+ koro enye edide n̄wan owo efen.”+
4 Edi Abimelech ikasan̄ake ikpere enye.+ Ntem enye ọdọhọ ete: “Jehovah, nte afo oyosobo idụt eke enende?+
5 Nte enye ikọdọhọke mi ite, ‘Enye edi eyeneka mi an̄wan’? nte n̄wan emi ikonyụn̄ idọhọke mi n̄ko ite, ‘Enye edi eyeneka mi eren’? N̄kanam emi ke esịt akpanikọ n̄konyụn̄ n̄kereke idiọk.”+
6 Ntem ata Abasi ọdọhọ enye ke ndap ete: “Ami n̄ko mmọfiọk nte ke afo akanam emi ke esịt akpanikọ,+ ndien ami n̄ko n̄kọbiọn̄ọ fi mbak ududue mi.+ Ntak edi oro mmen̄kayakke fi otụk enye.+
7 Edi ke emi, da n̄wan owo kayak, sia ebe esie edide prọfet,+ ndien enye ayanam n̄kpeubọk ọnọ fi.+ Ndien afo oyodu uwem. Edi edieke mûdaha enye ukayak, fiọk ete ke afo ayakpa n̄kpa, afo ye kpukpru se idide okwo.”+
8 Ntre Abimelech abak edemede ke usenubọk, okot kpukpru mme asan̄autom esie, onyụn̄ asian mmọ kpukpru n̄kpọ emi. Ndien ndịk anam mmọ etieti.
9 Ekem Abimelech okot Abraham onyụn̄ ọdọhọ enye ete: “Nso ke afo anam ntem ye nnyịn, nso ke nnyụn̄ ndue fi emi anamde afo ada utọ akwa idiọkn̄kpọ emi odori mi ye obio mi?+ N̄kpọ eke owo mîkpanamke afo amanam ye ami.”+
10 Abimelech onyụn̄ ọdọhọ Abraham ete: “Afo ekekere nso emi ekesịnde fi anam n̄kpọ emi?”+
11 Edi Abraham ọdọhọ ete: “Edi koro n̄kọdọhọde ke esịt mi nte, ‘Ke akpanikọ mbak Abasi idụhe ke ebiet emi,+ ndien mmọ iditreke ndiwot mi ke ntak n̄wan mi.’+
12 N̄ko, enye ke akpanikọ edi eyeneka mi an̄wan, emi ete mi obonde, edi idịghe eka mi aman; ntre enye akabade edi n̄wan mi.+
13 Ekem ke ini Abasi anamde mi n̄wọrọ n̄kpọn̄ ufọk ete mi,+ ndọhọ enye nte, ‘Emi edi ima-mfọnido+ eke afo ediwụtde mi: Ke kpukpru ebiet eke idikade, dọhọ ete: “Enye edi eyeneka mi eren.”’”+
14 Ekem Abimelech ada erọn̄ ye enan̄ ye ifịn iren ye ifịn iban ọnọ Abraham onyụn̄ ayak Sarah, n̄wan esie,+ ọnọ enye.
15 Ndien Abimelech ọdọhọ ete: “Sese isọn̄ mi anade fi do ke iso. Dụn̄ ke ebiet eke ọfọnde fi ke enyịn.”+
16 Enye onyụn̄ ọdọhọ Sarah ete: “Sese mmọnọ eyeneka fo+ mbak okụk silver tọsịn kiet. Emi edi idiọn̄ọ ke enyịn*+ kpukpru mbon oro ẹdude ye afo, ye ke iso kpukpru owo, ẹmemen esuene emi ẹkesuenede fi ẹfep.”
17 Ndien Abraham ekpe ata Abasi ubọk;+ ndien Abasi anam idem ọsọn̄ Abimelech ye n̄wan esie ye ifịn iban esie, ndien mmọ ẹtọn̄ọ ndiman nditọ.
18 Koro Jehovah ama enen̄ede esịri kpukpru iban ufọk Abimelech itie eyen ke ntak Sarah, n̄wan Abraham.+
Mme Ikọ Idakisọn̄
^ At. Ed., “ufụk-enyịn.”
